Ерөнхий сайд Н.Учрал 2027 оны төсвийн есөн шийдвэрээ танилцууллаа

Засгийн газрын ээлжит бус хуралдаанаар 2027 оны улсын төсвийн төслийг УИХ-д өргөн мэдүүлэхээр шийдвэрлэж, Ерөнхий сайд Н.Учрал төсвийн тодотгол болон ирэх оны төсвийн есөн гол шийдвэрийг танилцууллаа.

1. Оюутолгойн ногдол ашиг: Монгол Улс Оюутолгойн ногдол ашгаа авч, ДЦС-4, боловсруулах үйлдвэр, боловсролын салбарт зарцуулахаар төлөвлөжээ. Ногдол ашгийг юунд зарцуулахыг иргэдийн саналаар шийднэ.

2. 1072 хувьцаа: “Эрдэнэс Тавантолгой”-н хувьцааг иргэн өвлүүлэх, бэлэглэх, арилжих эрхтэй болно.

3. Татвар: 792 мянган төгрөг хүртэлх цалинд татвар ногдуулахгүй болгож, иргэдийн гарт 840 тэрбум төгрөг үлдээнэ.

4. Цалин, тэтгэвэр: Тэтгэвэр 380.3 мянган төгрөгөөр нэмэгдэж, дундаж тэтгэвэр 1.335 сая төгрөгт хүрнэ. Ахмад болон оюутан ажиллах үедээ тодорхой нөхцөлөөр шимтгэл төлөхгүй.

5. Орон сууц: 16 мянган орон сууцыг 6 хувийн зээл болон түрээслээд өмчлөх нөхцөлөөр олгоно. Төрийн 4000 орон сууцны урьдчилгааг 30-аас 15 хувь болгоно.

6. Эрчим хүч: “ДЦС-3”-ын дэргэд 300 МВт-ын “ДЦС-6” барьж, “ДЦС-3”-ыг шинэчилнэ. Мөн 10 аймгийн дулааны станцыг ашиглалтад оруулна.

7. Боловсрол: 100 мянган компьютер нийлүүлж, 100 “ногоон сургууль” байгуулна. Бүс бүрд Кембрижийн хөтөлбөртэй хоёр сургууль, нэг төрөлжсөн ахлах сургууль байгуулна.

8. Эрүүл мэнд: Үргэлжилж буй 39, шинээр 34 эмнэлгийн төслийг хэрэгжүүлж, ахмадуудад даралт, зүрх судас, чихрийн шижингийн зарим эмийг үнэ төлбөргүй олгоно.

9. Ногоон хөгжил: 500 цахилгаан автомашин цэнэглэх “Ногоон өртөө” байгуулж, сэргээгдэх эрчим хүчний тоног төхөөрөмж болон цахилгаан автомашиныг гааль, онцгой албан татвараас чөлөөлөхөөр төлөвлөжээ.