С.Батдөл нүүрс тээврийн ААН-ын дарааллыг зохицуулсан хахуулийн мөнгөөрөө худалдаж авсан үл хөдлөхүүд

2023 онд олныг цочирдуулж, гэрээс нь их хэмжээний бэлэн мөнгө илэрсэн “Улаанбаатар төмөр зам”-ын албан тушаалтан асан С.Батдөлийн хэрэг тухайн үедээ шүүхээр шийдэгдсэн ч түүний хахуулийн мөнгөөр бүрдүүлсэн үл хөдлөх хөрөнгийн сүлжээ өнөөдөр ч анхаарал татсан хэвээр байна.

Мөрдөн шалгалтаар тэрбээр нүүрс тээврийн дараалалд нөлөөлөх замаар авсан хахуулийн орлогоо бэлнээр хадгалахаас гадна үл хөдлөх хөрөнгө болгон “хөрвүүлсэн” нь тогтоогдсон. Тухайлбал, Чингэлтэй дүүрэгт байрлах, тус бүр 293 ам метр талбай бүхий хоёр давхар обьектыг нийт нэг тэрбум төгрөгөөр худалдан авч, уг байранд нь караоке ажиллуулж байжээ.

Мөн Хан-Уул дүүргийн “Ривер гарден” хотхонд 116 ам метр талбайтай үйлчилгээний зориулалттай обьектыг 750 сая төгрөгөөр худалдан авч, гоо сайхны салон ажиллуулж байсан нь ил болсон.

Үүнээс гадна Баянгол дүүргийн 25 болон 7 дугаар хороонд орон сууцнууд, мөн Хүүшийн аманд байрлах тансаг хаус зэрэг хэд хэдэн үл хөдлөх хөрөнгийг өөрийн болон хамаарал бүхий этгээдийн нэр дээр авсан байв.

Ялангуяа Хүүшийн ам дахь хаусаас 5.4 тэрбум төгрөгийн бэлэн мөнгө хураагдсан нь тухайн үед олон нийтийн анхаарлыг хамгийн их татсан баримт болсон. Энэ нь хууль бус орлого хэрхэн үл хөдлөх болон бэлэн хөрөнгийн хэлбэрт шилжиж байсныг тод харуулсан тохиолдол байв.

Ийнхүү С.Батдөлийн хэрэг нь зөвхөн авлигын дуулиан төдийгүй, хахуулийн мөнгө богино хугацаанд үл хөдлөх хөрөнгө болон хувирч, далд эдийн засгийн нэг хэлбэр болж байгааг илчилсэн жишээ хэвээр үлдсэн юм.