“Ногоон автобус”-ны хэргийн сүүдэр ба ҮХЦ-ийн томилгооны давхцал

“Ногоон автобус”-ны гэх хэрэгт холбогдон цагдан хоригдож байсан “Тэнүүн Огоо” ХХК-ийн захирал А.Ганхуягийг суллаж, Монгол Улсаас гарахыг хязгаарласан хилийн хориг тавьсан гэх мэдээлэл олон нийтийн анхаарлыг татаж байна.

Энэ хэрэг нь нийслэлийн төсвийн хөрөнгөөр худалдан авсан автобусны чанар, худалдан авах ажиллагааны хууль зөрчсөн байж болзошгүй асуудалтай холбоотойгоор сүүлийн жилүүдэд хамгийн их шүүмжлэл дагуулсан дуулиануудын нэг болсон. Тухайн үед хэргийг шалгах ажиллагааны хүрээнд өндөр албан тушаалтнуудын нэрс ч холбогдож байсан юм.

Харин анхаарал татаж буй нэг зүйл нь энэхүү мэдээлэл нь тухайн үед Түгжрэлийг бууруулах Үндэсний хорооны дарга, Засгийн газрын гишүүнээр ажиллаж байсан Ж.Сүхбаатарыг Үндсэн хуулийн цэцийн даргаар томилох тохироо бүрдсэн гэх улс төрийн мэдээлэлтэй цаг хугацааны хувьд давхцаж байгаа явдал юм.

Өмнө нь “Ногоон автобус”-ны хэрэгтэй холбоотойгоор Ж.Сүхбаатарын нэр олонтаа дурдагдаж, прокуророос яллах дүгнэлт үйлдэн шүүхэд шилжүүлэх шатанд хүрсэн гэх мэдээлэл ч гарч байсан. Гэвч өнөөдрийн байдлаар уг хэрэгт улс төрийн болон албан тушаалын хариуцлага хэрхэн тооцогдох нь тодорхой бус хэвээр байна.

Тиймээс олон нийтийн зүгээс “Ногоон автобус”-ны хэрэг үнэхээр эцэслэн шийдэгдэх үү, эсвэл хариуцлага зөвхөн хувийн хэвшлийн төлөөлөл дээр төвлөрч, шийдвэр гаргах түвшний улс төрийн албан тушаалтнууд хариуцлагаас үлдэх үү гэсэн асуултыг дахин тавьж эхэллээ.

Хуулийн байгууллагуудын шийдвэр, улс төрийн томилгоонуудын ийм давхцал нь эрх мэдэл, хариуцлагын асуудалд эргэлзээ төрүүлэхгүй байх ёстой. Харин ч эсрэгээрээ олон нийтийн өмнө ил тод, ойлгомжтой тайлбарлагдаж, хууль хүн бүрт адил үйлчилдэг болохыг нотлох шаардлага улам бүр нэмэгдэж байна.