хоногт ажиллаж, авлигын эсрэг тусгайлсан арга хэмжээ зохион байгуулсан билээ. Орон нутгийн удирдлагуудын санал хүсэлтийн дагуу ажиллахдаа тус газрынхан авлигын эсрэг хууль тогтоомжийн хэрэгжилтийг хянах, төрийн үйлчилгээний ил тод байдлыг хангах, хандив, бэлэг, давхар ажил эрхлэлтэй холбоотой асуудлыг хянан шалгах, сум хөгжүүлэх, жижиг дунд бизнесийг дэмжих сангийн зарцуулалтыг хянан шалгах, нэг цэгийн үйлчилгээг боловсронгуй болгох, иргэдийн төрийн үйл ажиллагаанд оролцох идэвхийг өрнүүлэх, иргэдээс гомдол, мэдээлэл хүлээн авах зэрэг арга хэмжээг авч хэрэгжүүлсэн.

Түүнчлэн шинээр хэрэгжиж эхэлсэн Төсвийн тухай хуулийн дагуу улсын төсөв дэх иргэний эрх мэдэл, үүрэг оролцоо эрс нэмэгдэж байгаатай холбогдуулан Өмнөговь аймгийн иргэний нийгмийн байгууллагын төлөөллийг орон нутгийн өөрөө удирдах ёсны болон нутгийн захиргааны байгууллагуудтай нүүр тулсан уулзалтыг зохион байгуулж, төсвийн төлөвлөлт, захиран зарцуулалт, тайлагналтын талаар иргэдэд тодорхой мэдлэг, мэдээлэл олгосон нь тус ажлын хэсгийн гол онцлог ажлын нэг байсан билээ.

Авлигатай тэмцэх газрынханы өгсөн үүрэг чиглэлийн дагуу цаашид хуулийн хэрэгжилтийг хангаж ажиллах чиглэлээр авч хэрэгжүүлэх арга хэмжээний талаар аймгийн Засаг даргын албан даалгавар гарсан байна. Энэхүү албан даалгаврыг бүрэн эхээр нь хүргэж байна.

Хуулийн хэрэгжилтийг хангах зарим

арга хэмжээний тухай

Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хууль, Мэдээллийн ил тод байдал ба мэдээлэл авах эрхийн тухай хууль, Авлигын эсрэг хууль, Өмнөговь аймгийг 2013-2016 онд хөгжүүлэх аймгийн Засаг даргын мөрийн хөтөлбөрийн 107 дугаар заалтыг хэрэгжүүлэх зорилгоор Засаг захиргаа, нутаг дэвсгэрийн нэгж, түүний удирдлагын тухай хуулийн 29.1.6-ын “а”, “л” дэх заалтуудыг үндэслэн ДААЛГАХ нь:

Нэг. Мэдээллийн ил тод, нээлттэй байдлыг хангах, ашиг сонирхлын зөрчлөөс урьдчилан сэргийлэх чиглэлээр дараах арга хэмжээг хэрэгжүүлэхийг төрийн байгууллагын удирдах албан тушаалтнуудад даалгасугай.

1.Иргэнийг хүлээн авч уулзах байр, цагийн хуваарийг тогтоож нийтэд мэдээлэх

2.Мэдээлэл авахтай холбогдсон үйлчилгээний хөлсийг уг мэдээллийг өгөхтэй холбогдон гарах хувилах, шуудангаар хүргүүлэх зэрэг шууд зардлаар тооцон тогтоох

3.Төрийн байгууллагын байранд байрлаж байгаа түүний үйлчилгээг эрхэлдгээс бусад аж ахуйн нэгж, байгууллагыг гаргах

4.Ашиг сонирхлын зөрчлөөс урьдчилан сэргийлэх ёс зүйн дүрмийг тогтоон мөрдүүлэх

5.Нийтийн албанд нэр дэвшсэн этгээдийн хувийн ашиг сонирхлын урьдчилсан мэдүүлгийг Авлигатай тэмцэх газарт хүргүүлж, дүгнэлтийг үндэслэн томилж байх

6.Мэдлэг, чадвар бүхий иргэдээр төрийн албыг гүйцэтгүүлж, хяналт, хариуцлагын зарчмыг чанд баримтлах

7.Нийтийн эрх ашигт хамааралтай асуудлыг иргэдийн оролцоог ханган шийдвэрлэж, төрийн үйлчилгээг иргэдээр үнэлүүлж байх

8.Төрийн болон нутгийн захиргааны байгууллага, нутгийн өөрөө удирдах байгууллага нийтийн хэрэгцээнд зориулан иргэн, хуулийн этгээдээс бэлэг, бусад санхүүгийн туслалцаа хүсэхгүй, авахгүй байх.

Хоёр. Иргэдийн мэдээлэл авах эрхийг хангах, ашиг сонирхлын зөрчлөөс ангид байх чиглэлээр дараах арга хэмжээг хэрэгжүүлж ажиллахыг нийт төрийн албан хаагчдад даалгасугай.

1.Төрийн үйл ажиллагааны ил тод байдал болон иргэн, хуулийн этгээдийн мэдээлэл авах эрхийг хангаж, хуулийн дагуу нууцад хамааруулснаас бусад тухайн байгууллагын үйл ажиллагаатай холбоотой мэдээллээр хангах үйл ажиллагааг шуурхай хэрэгжүүлэх

2.Хууль бусаар мэдээллийг нуун дарагдуулах, мэдээ, баримт бичгийг хуурамчаар үйлдэх, засварлах, устгах болон иргэний мэдээлэл авах эрхийг зөрчихгүй байх

3.Зөвхөн хууль тогтоомжид заасан төлбөр, хураамжийг үйлчлүүлэгчээс авч, түүний хэмжээ болон үйл ажиллагаа, хүний нөөц, төсөв, санхүү, төрийн болон орон нутгийн өмчийн хөрөнгөөр бараа, ажил, үйлчилгээ худалдан авах ажиллагааны ил тод байдлыг ханган холбогдох мэдээллийг цахим хуудас болон мэдээллийн самбартаа ойлгомжтой байдлаар байрлуулах

4.Төрийн албан хаагч нь албан үүргээ хуульд захирагдан, тэгш, шударга, хариуцлагатай, албаны ёс зүйг сахин гүйцэтгэж, нийтийн ашиг сонирхлыг дээдлэн ажиллах

5. Авлигын эсрэг хууль тогтоомжийг иргэдэд сурталчлан, олон нийтэд авлигын нийгмийн хор аюулыг ухуулан таниулах, тэдэнд авлигыг үл тэвчих ёс суртахуун төлөвшүүлэх, уг ажиллагаанд тэднийг татан оролцуулах арга хэмжээг хэрэгжүүлэх

6.Сургалтын байгууллагууд эрх зүйн болон ёс зүйн хичээлийн хүрээнд суралцагчдад авлигын нийгмийн хор аюул, түүнээс урьдчилан сэргийлэх талаар зохих мэдлэг эзэмшүүлж, түүнийг үл тэвчих ёс суртахуун төлөвшүүлэх

7.Албан тушаалтан захиргааны акт гаргах, хяналт, шалгалт хийх, хариуцлага хүлээлгэх, гэрээ байгуулах, эдгээрийг хэлэлцэх, бэлтгэх, оролцох болон ашиг сонирхлын зөрчилд орж болох бусад нөхцөл байдлыг мэдэгдэж хэвших

8.Албан тушаалтан бүрэн эрхээ хэрэгжүүлэхэд нөлөөлсөн аливаа дарамт, шахалт, зохимжгүй нөлөөллийн талаар өөрийн удирдах албан тушаалтан, эрх бүхий байгууллагад мэдэгдэж байх

9.Төрийн албан тушаалтны ил тод, шударга байдлын нотолгоо болох хөрөнгө орлогын мэдүүлгээ хуульд заасан хугацаанд нь үнэн зөвөөр гаргаж хэвших

10.Өөрийн салбар байгууллагын ёс зүйн дүрмийг чанд мөрдөж, төрийн үйлчилгээг шат дамжлага, хүнд суртал, чирэгдэлгүйгээр иргэдэд хүргэж ажиллах.

Гурав. Авлигатай тэмцэх, мэдээллийн ил тод байдлыг хангах, ашиг сонирхлын зөрчлөөс урьдчилан сэргийлэх талаар төр, засгаас явуулж байгаа бодлого, үйл ажиллагаа дараах чиглэлээр дэмжиж ажиллахыг иргэн, хуулийн этгээдэд зөвлөсүгэй.

1.Хүний эрх, эрх чөлөө, үндэсний аюулгүй байдал, байгууллагын хууль ёсны ашиг сонирхлыг хамгаалах зорилгоор хууль тогтоомжид нийтэд мэдээлэхийг хориглосноос бусад бүх мэдээллийг авах, мэдээлэл авахдаа зохих үйлчилгээний хөлс төлөх

2. Мэдээлэл авах эрхээ хэрэгжүүлэхдээ холбогдох дүрэм журмыг биелүүлэн, Монгол Улсын Үндсэн хууль, бусад хууль, бусдын эрх, хууль ёсны ашиг сонирхлыг хүндэтгэх

3.Албан бус боловсролын байгууллага болон сургуулиас гадуурх сургалт эрхэлдэг аж ахуйн нэгж, байгууллага, иргэн өөрийн үйл ажиллагааны чиглэлийн дагуу авлигын нийгмийн хор аюулыг тайлбарлан таниулах, түүнээс урьдчилан сэргийлэх талаар зохих мэдлэг эзэмшүүлэх

4. Хэвлэл мэдээллийн байгууллага авлигын аливаа хэлбэрийг үл тэвчих, хувийн ашиг сонирхлоос ангид байх нийгмийн сэтгэл зүйн орчинг төлөвшүүлэхэд нийтлэл, нэвтрүүлгийнхээ бодлогыг чиглүүлэх, энэ талаар байнга мэдээлэл, сурталчилгаа явуулах

5.Төрийн байгууллага нээлттэй, иргэдийн ашиг сонирхолд нийцсэн үйл ажиллагаа явуулж байгаа эсэхэд хяналт тавьж, хамтран ажиллах, мэдээллийг харилцан солилцох, олон нийтэд мэдээллийг тогтмол хүргэж байх

6.Албан тушаалтныг бүрэн эрхээ хэрэгжүүлэхэд нөлөөлсөн аливаа дарамт, шахалт, зохимжгүй нөлөөлөл үзүүлэхгүй байх.

Дөрөв. Дээрх чиглэлээр хэрэгжүүлж байгаа үйл ажиллагааны мэдээллийг долоо хоног бүрийн Баасан гаригт, албан даалгаврын хэрэгжилтийг сар бүрийн 30-ны дотор Төрийн захиргаа, удирдлагын хэлтэст ирүүлж байхыг сумдын Засаг дарга, төрийн болон төсөвт байгууллагын дарга, эрхлэгч нарт даалгасугай.

ЗАСАГ ДАРГА Б.БАДРАА