Газрын тосны салбарын үйлдвэрлэлийн явц нь цаг хугацаа, хүн хүч, хөрөнгө оруулалтыг ихээр шаарддаг төдийгүй эрсдэл өндөр байдаг онцлогтой. Тодруулбал:

Цооног өрөмдөх, судалгаа шинжилгээний ажлууд хийхэд цаг хугацаа, хөрөнгө ихээхэн шаарддаг,
Ашигт давхаргын даралт унахаас сэргийлэх, цооногийн ундаргыг тогтворжуулах, ашигт давхаргын талаар мэдээлэл олж авах үүднээс туршилтын олборлолт явуулдаг,
Нэгэнт олборлолтонд шилжүүлсэн цооногуудын үйл ажиллагааг зогсоох нь цооногт тос царцаж парафинжих, цооногийн мөргөцөг бохирдох, ундарга буурах, тос агуулагч давхаргын гидродинамикийн холбоо алдагдах зэрэг технологийн хүндрэлүүдийг үүсгэх ба олборлолтыг сэргээхэд өндөр өртөгтэй засвар үйлчилгээг хийх шаардлагатай болдог,
Олборлолтыг огцом нэмэгдүүлэх боломжгүй бөгөөд олборлолтын ил байгууламж байгуулж шинээр ашиглалтын цооногуудыг өрөмдөх, олборлолтын тоног төхөөрөмж суурилуулах, цооногийн ундаргыг нэмэгдүүлэх технологийн үйл ажиллагаа, үйлчилгээнүүдийг хийх замаар газрын тосны олборлолтыг аамжаар нэмэгдүүлдэг.

Туршилтын олборлолт нь газрын тосны хайгуулын үе шатанд хийгдэх ёстой үндсэн ажлуудын нэг бөгөөд ашигт давхаргын гидродинамикийн холбоо, шинж чанар, давхарга дахь шингэний физик шинж чанар, хураагуурын бүтэц, тос үүсгэгч, агуулагч чулуулгийн нүх сүвшилт, нэвчүүлэмж, хурдас хуримтлалын орчин, давхаргын даралт, цооногийн ундарга зэрэг ашигт давхаргын талаарх мэдээлэл олж авах, цооногт гидродинамик судалгаа хийх, давхаргын даралтыг тогтовортой байлгах, үр ашигтай нээлт мөн эсэхийг тогтоох, улмаар ордын газрын тосны нөөцийг тодорхойлох, орд ашиглалтын хөтөлбөр боловсруулах, ордын насжилтыг тогтоох зорилготойгоор хийгддэг.

Тамсагийн сав газрын газрын тосны олборлолт 1998 оноос туршилтын журмаар эхэлсэн бөгөөд 2016 он гэхэд үйлдвэрлэлийн хүчин чадалдаа бүрэн хүрэх юм. Газрын тосны олборлолт жил бүр өсөн нэмэгдэж буйтай холбогдон технологийн хүндрэлүүд үүсэхээс урьдчилан сэргийлж, олборлож буй тосыг газрын тос боловсруулах үйлдвэр ашиглалтанд орох хүртэл хугацаанд экспортлох шаардлагатай болсон.

Тосон-Уул XIX, Тамсаг-XXI болон 1997 оны БХГ-т талбайн газрын тос нь дэлхийн газрын тосны аж үйлдвэрт мөрддөг түүхий тосны шинж чанарын хувьд дунд зэргийн, хүхэр багатай тосонд хамаардаг бөгөөд Тамсагийн сав газраас олборлож буй газрын тосыг Сингапурын бирж дээр борлогддог “Дачин 33” маркын, Дорноговийн сав газраас олборлож буй түүхий тосыг Лондонгийн бирж дээр борлогддог “Брент” маркын тосны тухайн үеийн борлуулах үнээр тус тус борлуулж байна.

2013 оны 3 дугаар сарын 12-ны өдрийн байдлаар Дачин 33 маркын газрын тос нэг баррель тутамд 106,32 ам.доллар, Брент маркын газрын тос нэг баррель тутамд 109,65 ам.доллар байна.

Монгол Улсын хэмжээнд 1998-2012 оны хооронд нийт 13,32 сая баррель буюу 1,80 сая тонн тос олборлож, экспортлон газрын тосны орлогоос Монгол Улсын төсөвт 332,3 тэрбум төгрөгийг төвлөрүүлээд байна.

БХГ-ний дагуу гэрээлэгч нь олборлон экспортолж буй түүхий тосны 40 хувиар өртгөө нөхөх ба үлдсэн тосны БХГ-д заасан хувь бүхий тодорхой хэсэг нь Монгол Улсын Засгийн газарт ногддог.

2012 оны 12 дугаар сарын 31-ний өдрийн байдлаар Петрочайна Дачин Тамсаг ХХК нийт 1,66 тэрбум ам.долларын хөрөнгө оруулалт хийснээс нийт хөрөнгө оруулалтын 17,7 хувь буюу 294,8 сая ам.долларын өртгөө нөхөөд байна.

Харин Доншен газрын тос Монгол ХХК нийт 216 сая ам.долларын хөрөнгө оруулалт хийснээс нийт хөрөнгө оруулалтын 39,1 хувь буюу 84,6 сая ам.долларын өртгөө нөхөөд байна.

Тосон-Уул XIX, Тамсаг-XXI болон 1997 оны БХГ-т талбайн газрын тосны нөөцийн тооцооны тайланг (хуучин нэрээр) Эрдэс баялаг, эрчим хүчний яамны дэргэдэх Эрдэс баялгийн мэргэжлийн зөвлөлөөр тус тус хэлэлцүүлж Эрдэс баялаг, эрчим хүчний сайдын “Нөөц бүртгэх тухай” тушаалаар дээрх гурван талбайн нийт 332,64 сая тонн баталгаат нөөц, үүнээс 43,258 сая тонн ашиглалтын баталгаат нөөцийг Монгол Улсын Ашигт малтмалын нөөцийн нэгдсэн санд бүртгэсэн.

Монгол Улсын “Газрын тосны тухай хуулийг хэрэгжүүлэх журам”-ын 12.1 дэх заалт, БХГ-ний 5.4 дэх заалт, ЭБМЗ-ийн дүгнэлт, ЭБЭХ-ний сайдын тушаалыг тус тус үндэслэн Газрын тосны газрын даргын 2010.02.22-ны өдрийн 18 дугаар болон 2011.06.29-ний өдрийн 111 дүгээр тушаалаар Тосон-Уул XIX талбайн уурхайн эдэлбэрт, 2011.08.08-ны өдрийн 128 дугаар тушаалаар 1997 оны БХГ-т талбайн уурхайн эдэлбэрт, 2012.12.10-ны өдрийн 207 дугаар тушаалаар Тамсаг-XXI талбайн уурхайн эдэлбэрт тус тус газрын тосны ашиглалт эхлүүлэх зөвшөөрөл олгосон.

Газрын тосны газрын даргын тушаалын дагуу Тосон-Уулын газрын тосны ордын ашиглалт 2010.02.22-ны өдрөөс, Зүүнбаян Цагаан-Элсний газрын ордын ашиглалт 2010.06.15-ны өдрөөс, Тамсагийн газрын тосны ордын ашиглалт 2012.12.06-ны өдрөөс тус тус эхэлсэн.

Газрын тосны тухай хуулийн 7.1-д “Газрын тостой холбогдсон үйл ажиллагаа явуулахад зориулан эдэлбэр газрын зөвшөөрлийг орон нутгийн эрх барих байгууллага, уурхайн эдэлбэрийн зөвшөөрлийг Засгийн газар тус тус олгоно” гэж заасны дагуу газрын тостой холбогдсон үйл ажиллагаа явуулахад зориулан уурхайн эдэлбэр (ашиглалтын талбай)-ийн зөвшөөрөл олгох асуудлыг Монгол Улсын Засгийн газрын хуралдаанаар хэлэлцүүлж, Засгийн газрын 2012 оны 12 дугаар сарын 1-ний өдрийн 154 дүгээр тогтоолоор Тосон-Уул XIX, Тамсаг-XXI болон 1997 оны БХГ-т талбайд уурхайн эдэлбэрийн зөвшөөрөл олгосон. Ингэснээр Монгол Улс газрын тос олборлогч орон болсон.