- УИХ-ын сонгуулийн өмнөөс эхэлсэн гэж болно. Сонгуульд нэр дэвшүүлэх үйл явц, нэр дэвшсэн хүмүүсээс авахуулаад сонгогчдод, Монголчуудад зориулж бус, намд байгаа нуугдмал бүлэглэлүүдийн тохиролцоо, нам хоорондын наймааны үр дүнгээс шууд шалтгаалсан нэр дэвшилт болсныг УИХ-ын сонгуулийн үр дүн баталсан. Энэ үеэс эхлээд намын шинэчлэл яригдаж, бүр үндсээр нь, цогц бодлогын түвшинд өөрчлөх, шинэчлэх шаардлагатай гэдгийг бид онцолсон. Намыг шинэчлэх хөтөлбөр, бодлогын бичиг баримт хүртэл боловсруулж санал болгосон.

Үнэндээ энэ шинэчлэл, намын бодлогын асуудал зөвхөн сүүлийн 8 - 9 сарын хугацаанд болж буй үйл явц биш юм. Энэ бол МАН-ын төр барьсан олон жилийн хугацаанд хийсэн буруу зүйл, бодлогын алдаа, булхай, луйвар, асуудалтай гэж яригдаж буй бүх зүйлүүд уршиг тарьж, хар мөрөө үлдээсний илэрхийлэл. Тэгээд хийсэн зүйлээ далдлах гэж, ар араасаа дагасан олон буруу зүйлийг хийсэн дээ. Хуурсаар хуурсаар худалч, хумсалсаар хумсалсаар хулгайч гэдэг биз. Одоо үндсээр нь өөрчлөх цаг иржээ. Эхлээд хийсэн буруу бүх зүйлээ ил үнэн шударгаар зарлах хэрэгтэй, дараа нь гэм хийсэн этгээдүүд нь намын эгэл жирийн гишүүдээсээ, ард түмнээс уучлал гуйгаад, хариуцлагаа хүлээх шаардлагатай. Үүнийг манай намын залуу лидерүүд болох УИХ-ын гишүүн С.Бямбацогт, Ж.Энхбаяр нар ч хэлж байсан. Тэгэж байж л эхлэл нь зөв тавигдана.

- МАН-ыг шинэчлэх эв нэгдлийн хороо байгуулагдсан гэж сонссон. Энэ талаар.

- МАН-ын шинэчлэлийн асуудал зөвхөн нэг намынх бус Монголын бүх намуудад хамаатай асуудал гэж ойлгож болно. Өөрөөр хэлбэл 92 жилийн түүхтэй энэ намын төлөвшил, шинэчлэл нь бусад намд хамааралтай явагддаг үйл явц. МАН-ын Удирдах зөвлөлийн болон Бага хурлын гишүүд, жирийн гишүүд дэмжигчид зорилго нэгтэйгээр нэгдэж “МАН-ыг шинэчлэх эв нэгдлийн хороо”-г үүсгэн байгуулснаа зарласан.

МАН-ыг бид шүүмжлээд байгаа нь зүгээр, сайхан, болоод байгаа зүйлийг хараар будаад байгаа юм биш. Үнэндээ болохгүй, бүтэхгүй байгаа олон зүйл байгааг манай намын удирдлагууд мэдсэн ч мэдээгүй дүр эсгэж байгаа нь намаа улам бүр хүнд байдалд оруулж байгаагаа ухаарах цаг болсон. Олон хэллээ, шаардлаа, хөөцөлдлөө. Одоо муур хулгана болж тоглодог үе дууссан.
Намын УЗ-д эрүүл бодол, сэтгэлгээтэй асуудалд шударгаар ханддаг хүмүүс байгаа шүү. Бид хамтарч бодсон зүйл, зорьсон зорилтоо “МАН-ыг шинэчлэх эв нэгдлийн хороо”-гоор дамжуулан хийх болно.

- Та нарыг сонгууль дөхөхөөр л гараад ирдэг гэх юм. Их хурлаа хийлгэнэ гэж нэг хэсэг явлаа. Энэ ажил ямар үр дүнд хүрэв.

- Намын XXVII Их хурлыг яаралтай хийх шаардлагатай. УИХ-ын сонгуулиас хойш Намын бага хурал ганцхан удаа хуралдлаа, одоо бүр Бага хурлаа ч хийхээс зайлсхийж, зугатах болсон. Сүүлд хуралдсан Бага хурлаар Их хурлаа хуралдуулахыг шаардсан. Шаардлагыг хүлээж аваагүй. Гол нь Их хурлаар хэн нэгнийг солих, холих биш, алдсандаа дүгнэлт хийх, алдаагаа засах, буруутай бол буруугаа хүлээх, цаашдын бодлого, ажлаа зөв төлөвлөж, мөрдөх нь чухал. Манай удирдлагууд үүнээс айж, зугатаж байна.

Айсны үр дүнд орон нутгаа алдлаа. Одоо тэгээд дахиад яах юм бол.

Бас Ерөнхийлөгчөө алдах вий. Муу нуухаар сайн илчил гэдэг биз дээ. Нуугаад, зугатаагаад байвал, дотроо илжрээд, ялзрал нь гүнзгийрээд л байна. Үүнийгээ тэд мэдэж байгаа ч, мэдэхийг хүсэхгүй байгаа нь харамсалтай.

- Та бүхний шинэчлэл цаашид яаж үргэлжлэх гэж байна.

- Шинэчлэлийг өнөөдөр хэлээд, маргааш болчихдог зүйл биш. Бид 2012 оны 7-р сард хуралдсан Бага хурлаас хойш олон ч аймаг, сум, нийслэлийн бараг бүх дүүрэгт хамаарах намын гишүүдтэй уулзаж үзсэн. Асар их бухимдал, уур уцаар, гомдол байна. Ганцхан бид хэд л яваад байна гэж бодсон үгүй юм байна лээ шүү. Дээрээс нь төрийн албан хаагчид, жижиг бизнес эрхлэгчид нэмэгдэж эхэллээ, сүүлдээ хуруу хумсаа хугалах шахам байж олсон машин унаагаа унаж чадахгүй болсон жолооч нар, иргэд бухимдаж эхэллээ. Тэд МАН-д найдлага тависаар байна.

Гэтэл тэд найдлагыг хүлээн авахыг хүссэнгүй, ядаж намын гишүүдийнхээ итгэл, сэтгэлийг сэргээх зүйл бага хийлээ. Бидний ажил харин ч ахицтай явж байгаа. Хот, хөдөөгүй жирийн гишүүд, дэмжигчид дэмжиж байгаагаа илэрхийлж байна. Мөн намын Удирдах зөвлөлийн гишүүд хүртэл биднийг дэмжиж, болохгүй байгаа зүйлийн талаарх шүүмжлэлийг ил хэлж, зарчимтай байхыг ярьдаг болсон. Энэ бол дэвшил, цаашид ч газар авах болно гэдэгт бүү эргэлзээрэй.

- Аймаг, орон нутагт МАН-ын үйл ажиллагаа ямар байдалтай байна вэ? Нийслэлд болж буй Та бүхний шинэчлэлийн талаарх мэдээлэл хэр байна.

- Шулуухан хэлэхэд Улаанбаатар хотод өрнөж буй шинэчлэлийг бага мэдэрч байна. Гэхдээ шинэчлэл, эрүүл орчин, тунгалаг намтай болох талаар гишүүн бүр ярьдаг, шаарддаг болсныг мэдэрсэн. Орон нутаг бүр өөр өөрийн онцлогтой хэдий ч намын анхан шатны байгууллагуудын үйл ажиллагаа гундуу байна, гишүүдийн амьдрал ахуй хэт дордсон байдалтай, ямар нэгэн шийдвэр харсан, хариултаа хүлээсэн асуулт ихтэй, бухимдалтай болчихсон байна. Санхүүжилтийн ил тод байдал байхгүйгээс, намын үүрийн дарга нарын урамшуулал ойлгомжгүй зэргээс шалтгаалаад төрөл бүрийн хардлагын орчин бий болсон нь харамсалтай. Мөн намын дунд, анхан шат гэлтгүйгээр бүх газарт нь залуучуудын, ахмадуудын, эмэгтэйчүүдийн гэсэн далд фракци бүлэглэлүүд амь бөхтэй оршиж байна.

Ялагдал хүлээсэн аймгуудад Ардчилсан намын гишүүдэд манай намынхан дээрэлхүүлэх аястай, тэднийг хамгаалах зүрхтэй намын дарга ч гэж алга. Ерөнхийдөө гишүүдийн маань намд итгэх итгэл буурч, оч нь унтарсан шинжтэй харагдсан. Хамгийн их санаа зовоосон зүйл бол гишүүд маань ийм хүнд байхад, гишүүн биш ч гэсэн дэмжигчид маань юу бодож, яаж яваа бол гэдэг л байна. Үүнийг зоригтой, шийдвэртэй улс төрийн алхам хийж, тэдэнд урам зориг өгөхгүй бол балрах шинжтэй байна.

- МАН XXVII Их хурлаа хийлээ, тэгээд ямар үр дүн хүлээж байна. Хийдэг бүх зүйл, бахь байдгаараа байж л байх юм биш биз.

- Бүгдээрээ хэлэлцвэл буруугүй, бүлээн усаар угаавал буртаггүй гэдэг. Үр дүн гарах нь тодорхой. Намын гишүүдийнхээ дуу хоолойг ил тодоор сонсож, нийтэд илэрхийлэх боломж нээгдэнэ. Намын эв нэгдэл баталгаатай хангагдана. Учир нь одоо хаа сайгүй, хүн бүр шүүмжилж, шинэчлэл ярьж байна. Намын жирийн гишүүдийн бодол санаа үймж гүйцлээ. Ийм үед бид энэ чигээр нь зүтгүүлээд, муу, болохгүй байгаа бүх зүйлийг шинэчлэл ярьж байгаа хэсэг хүмүүст тохох гэж оролдож байгаа нь МАН-ын удирдлагуудын арчаагүй үйлдэл гэдгийг сануулчихъя. Одоо бид ямар ч гоё сайхан үлгэр зохиож, ард түмэндээ хайртай хүмүүс болох гэж оролдоод нэмэр болохгүй. Ард түмэн чинь тэнэг биш шүү.

Бараг л сонгуулийн өмнө ард түмнээ хуурах ээлжит мэх гэдгийг захын хүүхэд хүртэл хэлж мэднэ шүү. Их хурлаа нээлттэй, хэвлэл, мэдээллээр шууд явуулах хэрэгтэй. Тэгэхгүй бол бас л далдуур нуух юм ихтэй нам гэдэг яриа гарах нь тодорхой. Их хуралд дээд тал нь 1000 гаруй төлөөлөгч оролцоно. Тэгвэл намын 220.000 гишүүн оролцдоггүй юмаа гэхэд, харах, сонсох, дүгнэлт хийх эрхтэй, Монголчууд бүгдээрээ дүгнэх эрхтэй. Энэ нам ямар нам вэ? гэдгийг цөөн тооны эрх мэдэл бүхий хүмүүсээр төсөөлөх бус, харин Монголын төлөө гэсэн сэтгэлтэй олон мянган гишүүд байдгыг харуулах цаг нь болсон.

- Танай намаас нэр дэвшигч Ерөнхийлөгчийн сонгуульд амжилтгүй оролцвол, унагасан шалтгааныг нь та бүхэнд тохох гэж оролдох байх.

- Харин ч Ерөнхийлөгчийн сонгуульд МАН-ын нэр дэвшигч ялах гол хүчин зүйлүүдийн нэг нь бидний шинэчлэл, явуулж буй үйл ажиллагаа гэдгийг ухаармаар юм даа. Ард түмнээс нуугдаад, ариун амьтан шиг царайлаад, нэгэнт бий болсон, байгаа бугашсан, учир битүүлэг, нуугдмал бүлэглэл мэт энэ байдлаараа сонгуульд орвол харин ч буруутан нь МАН-ын одоогийн удирдлага байх болно гэдгийг хариуцлагатайгаар мэдэгдэж байна.

Бид намын нийтлэг эрх ашгийн төлөө буцалт, цуцалтгүй зүтгэхэд бэлэн. Бид Ерөнхийлөгчийн сонгуульд нэр дэвшигчтэйгээ хамт, ялалтанд хүрэхийн төлөө дарга царайлж, гэдсээ илээд хэвтдэг хэсэг нь биш, харин ч чөмгөө дундартал, гутлаа цоортол гүйж зүтгэх хүч нь очиж очиж бидний хэсэг залуучууд байх болно.

Б.ГАНХУЯГ: ЯЛАГДАЛ ХҮЛЭЭСЭН АЙМГУУДАД МАНАЙ НАМЫНХАН ДЭЭРЭЛХҮҮЛЖ БАЙНА, ТЭДНИЙГ ХАМГААЛАХ ЗҮРХТЭЙ ДАРГА Ч ГЭЖ АЛГА
Tweet
Bolod.mn