Д.Болд: Монгол поп бол уламжлал дээр тогтсон шинэ цагийн хөгжмийн урсгал

2013-02-05

Төрийн соёрхолт дуучин

Д.Болдын “Монгол поп-2” цомгийг танилцуулах өдөрлөг тун сонирхолтой боллоо. Дуучид цомог, шинэ уран бүтээлээ олон нийтэд танилцуулахдаа ширээний араас яриад өнгөрдөг бол Д.Болд энэ ёсыг эвдэж дуучин, уран бүтээлч хүнийхээ хувьд ёслол төгөлдөр танилцуулав. Тэрбээр “Монгол поп- 2”-ыг бүтээхэд хамтран ажилласан уран бүтээлчдээ танилцуулсны дараа Roketbay-тэй хамтран дуулсан “Үүлэн домог” дуугаа дуулж сонирхуулсан. Учир нь сүүлийн үед түүний “Үүлэн домог” бүтээлийг хулгайнх хэмээн цоллосон билээ. Тиймээс ч Төрийн соёрхолт цуу ярианд няцаалт өгөх зорилгоор тус уран бүтээлээ хөгжмийн дуугаралтаас нь эхлээд тайлбарлаж хурсан олны нүдийг хужирласан юм.
“Монгол поп-2” цомогт алдартай яруу найрагчдын шүлэг аялгуутай болж шинээр төрснөөрөө онцлог аж. Р.Чойномын “Сүмтэй будрын чулуу” номд багтсан “Намрын тухай бодол”, Б.Лхагвасүрэнгийн “Чамдаа би хайргүй байхын аргагүй” шүлгэнд Д.Болд ая хийжээ. Тэрбээр тус шүлгүүдийг зохиогчийн зөвшөөрөлтэй авснаа энэ үеэр онцолж байсан юм. Цомог танилцуулах үеэр түүнтэй уран бүтээлийнх нь талаар ярилцав.

-“Үүлэн домог” дууг хулгайнх гэсэн яриа гадуур тархсанд Та их эмзэглэсэн юм уу даа?

-Үгүй. Би ерөөсөө ийм тийм юм бодоогүй. Хамгийн гол нь өнөөдөр “Үүлэн домог” дууны хөгжим ингэж бүтсэн юм шүү гэдгийг хөгжимчидтэйгөө хамт дуулж сонирхууллаа.

-“Монгол поп-2” цомог их хөдөлмөр шингэсэн бүтээл болжээ. Хөгжмийн энэ урсгалыг монголчууддаа таниулах гэж байгаа нь Таны гавьяа юм?

-Монгол поп зөвхөн Болдынх биш гэдгийг ойлгох хэрэгтэй. Энэ бол монголчуудын хөгжмийн урсгал. Тиймээс одооноос Монголынхоо рок попын уран бүтээлчидтэй хамтран ажиллаж байна. Би зууны манлай дуучин Б.Сарантуяагийн цомгийн продюсероор ажиллах гэж байгаа. Тэр цомогт монгол поп урсгалын дуу багтана. Мөн “Гурван охин” хамтлагийн шинэ цомогт энэ төрлийн дуунууд орсон. “Камертон-2” шоунаас төрсөн хамтлагийн шинэ цомогт ч монгол поп урсгалын уран бүтээлүүд орно. Ерөнхийдөө манай урлагийнхан монгол поп урсгалаар уран бүтээл хийх сонирхолтой байгаа. Тиймээс үүнийг цаашид улам хөгжүүлэх, дэлхийд сурталчлах талаар ажиллана.

-Монгол поп урсгалыг тодорхойлбол?

-Монгол поп бол уламжлал дээр тогтсон шинэ цагийн рок, поп хөгжмийн урсгал. Бид солонгосчууд Kpop хөгжмөө сурталчилж байгаа шиг монгол попоо хөгжүүлнэ гэж бодож байна. Монгол поп бол зөвхөн дуу биш, монгол бахархлын нэгдэл. Мөн монгол түмнийг бусад үндэстнээс ялгаж байгаа соёл, зан заншил, эд өлгийн цогц юм. Уламжлалгүй шинэчлэл, шинэчлэлгүй уламжлал гэж байхгүй. Үүний нэг адилаар авьяаслаг, билэг төгөлдөр өвөг дээдсийнхээ бурхан ухааныг магтан дуулж, уран бүтээлээрээ сурталчлах болно.

-Хэзээнээс “Itunes”-ээр цомгоо борлуулах гэж байна вэ?

-Гурав хоногийн өмнөөс цомгоо борлуулж эхэлсэн. Ухаалаг утсанд зориулан аппликэйшн бүтээсэн нь Монголын рок попын түүхэнд анхных гэж хэлж болно. Мөн удахгүй amazon. com сайтаар “Монгол поп-2” цомог дэлхий даяар борлуулагдах гэж байгааг дуулгахад таатай байна.

-Дараагийн цомгийнхоо ажилд орсон уу. Шинэ цомог хэдийд сонсогчдын гар дээр очих бол?

-R&B цомгийн бэлтгэл ажил ид дундаа үргэлжилж байна. Мөн удахгүй поп цомог мэндэлнэ. 2013 он миний хувьд уран бүтээлийн жил болж байна.

-Цомог хэвлэгдэхэд Та “Уламжлалгүй шинэчлэл гэж байхгүй” гэж хэлсэн. Энэ үг чинь их таалагдсан шүү?

-Баярлалаа. Аливаа юм бүхэн түүх, эхлэлтэй байдаг. Ийм сайхан эхлэлтэй Монголын ард түмэнд төгсгөл гэж байхгүй. Тиймээс бид үргэлж дээшээ тэмүүлэх хэрэгтэй. Аргалж, хуурч хийсэн зүйл амжилтыг хойш нь татдаг. Тиймээс чанартай зүйл хийх хэрэгтэй гэж би боддог юм.

-Монгол поп урсгалыг сурталчлахдаа түүх, ёс заншилтай нь хамтатган таниулах байх?

-Зөвхөн хөгжим гэлтгүй Монголын үнэт зүйл болсон түүхэн эдлэл, уран дархдын бүтээл гээд брэнд болох зүйлсийг хамтатган сурталчилъя гэж бодож байна. Залуус маань эртний зүйл гэхээр үзэсгэлэн, музейд байдаг гэдэг ойлголтыг хална. Түүх, зан заншил бидний нэг бахархал. Энэ сайхан зүйлээ үр хойчдоо уламжлуулан үлдээхийн тулд бид ахуйдаа хэрэглэх хэрэгтэй. Ингэж хүн бүрт хүртэж байж дэлхийд танигдахад амархан болно.

-Тоглолт хийх бодол бий юу?

-Маш гоё тоглолт хийнэ. Энэ жил “Камертон” хамтлагийн бас миний бие даасан тоглолт болно. Түүнээс гадна “Камертон-2” төслөөс гарсан шинэ хамтлаг маань тоглолтоо хийнэ. Шоуны ялагчид долдугаар сард Сингапурт суралцахаар явах байх. Тэндээ цомгоо хийгээд ирэх есдүгээр сард худалдаанд гарна. Түүний дараа арваннэгдүгээр сард тоглолт хийнэ гэж төлөвлөж байгаа. Харин “Камертон” хамтлагийн тоглолт ирэх зургадугаар сарын 24-нд болно. Би одоогоор хэзээ тоглолт хийхээ төлөвлөөгүй байна.

-“Камертон 2” шоунаас төрсөн хамтлаг монгол поп урсгалаар дагнан уран бүтээлээ хийх үү?

-Монгол поп урсгалын уран бүтээлээс дуулна. Мөн өөр урсгалын уран бүтээлээс ч дуулж сонирхуулна. Ерөнхийдөө тэднийг R&B, поп чиглэлээр нь явуулна гэж бодож байна.

-Таны тоглолтоороо өмсдөг үндэсний хувцаснууд хүмүүсийн нүдийг яахын аргагүй булаадаг. Хувцсаа хаана оёулдаг вэ?

-Хувцасныхаа загварыг өөрөө гаргадаг. Харин оёулахдаа Монголын шилдэг оёдолчидтой хамтардаг. Гутлаа ч гэсэн сор болсон урчуудаар хийлгэдэг шүү.

Эх сурвалж:unen.mn