Сарааг ямар сайхан хоолойтой болохыг нь, дуулахгүй байж дундаас нь таслах дуртай Болдын муухайг нь, дууны оочер дээр хэрхэн “алалцаж” сурахыг, дуртай дуунаасаа хэрхэн таашаал авахыг мэдэж авдаг. Тэгэхээр сайн караокечин гэдэг зөвхөн дуу сайн дуулдаг бус цагаа зөв тохируулдаг, бусдыг дуулуулдаг, өөрийн сонгосон дуугаа алдалгүй дуулах чадварыг хослуулдаг хүн байх нь. Гоолингоочууд маань өөрийнхөө хэр сайн караокечин болохоо хуваалцаж байна.

“Амьдралаа ярия аа”
Найз залуугаасаа 12 сард салсан юм л даа. Ажлынхантайгаа шинэ жилээ тэмдэглээд, орой нь бүгдээрээ караокед дуулж байсан чинь би гэж согтуу амьтан “Эрчүүдийг үзэн ядах сэтгэлийг надад өгөөч” гэдэг дууг зориуд сонгож, дуулсан байгаа юм. Тэгснээ дуугаа дуулж дуусгачихаад “Чи муу новш. Яг баяр болох гэж байхад намайг хаяад байхдаа яахав дээ” гээд микрофоноор үглээд л байсан гэсэн. Ичиж үхмээр. Одоо хаа нэг энэ дуу таарахаар “Ээнээ, шинэ жилээ нахих уу? Амьдралаа ярия аа” гээд ажлынхан инээлдээд байдаг юм. /Э, 27 настай/

Долоо хэмжиж нэг огтол. Караокед ч ялгаагүй!
Ямар ч хүмүүстэй караоке орсон, хамгийн түрүүнд би дуртай дуунуудаа тэмдэглээд авчихдаг. Тэгэхгүй бол нэг дуу дуулчихаад л дахиж нөгөө номоо хайна. Номоо хайж эргүүлж эргүүлж байгаад дуу хийгээд тэрийгээ хүлээнэ. Тэр хүртлээ хүмүүсийн дуулж байгааг сонсоно гэхээр ядаргаатай санагдаад байдаг юм. Тэгснээс эхний 10 минутыг дуу хайхдаа зориулаад сэтгэл амар дуулвал хамаагүй гоё. Найзууд маань намайг “Долоо хэмжиж нэг огтолдог мундаг караокечин” гэдэг шүү. /У,23 настай/

“Би юу дуулаад байгаа билээ?”
Би ч муугүй караокечин л даа. Гэхдээ ямар хүмүүстэй хамт дуулж байгаагаас л шалтгаална. Манай ажлын эгч байдаг юм. Бүх дууг яг нэг л аянд оруулаад, адилхан янзаар дуулдаг. “Будантай юу буурал хорвоо доо” гэдгийг ч, “Аялан дуулах чиний минь хоолойтой”, “Би эр хүнд хайртай” –г ч гэсэн яах аргагүй л ав адилхан дуулаад байдаг. Цуг дуулахаар бүр “Би юу дуулаад байгаа билээ?” гэж гайхтал дуулна гээч! /Г,29 настай/

Хагас цагийг нь би ганцаараа..
Караокед нэг цаг авлаа гэж бодоход гучин минутыг нь бараг би ганцаараа л дуулчихдаг байлаа. Угаасаа л манай найзууд нэг их дуулдаггүй, “Чи дуулчих” л гээд байдаг. Яг л тэрэн шигээ нэг өдөр шинэ ангийнхантайгаа караокедоод, сурсан зангаараа би эхнээс нь дуулж байсан юм. Тэгсэн чинь манай ангийн аягүй нүүрэмгий нэг охин яг намайг дуулахаар л микрофон булааж авж дуулчихаад, дуусангуут нь надад өгөөд байхаар нь уур хүрээд. Орой миний дуулсан бүх дууг дундаас нь бүгдийг нь булааж авж дуулдаг юм даа. Түүнээс хойш найзуудтайгаа караоке орохоор тэднийгээ ч гэсэн дуулуулж, дагаж сонсдог болсон. Дуулах дургүйдээ биш, намайг бодоод л урьд нь тэгж их дуулуулдаг байсан юм билээ. /Ч,21 настай/

“Энэ миний хамгийн сайн дуулдаг дуу шд, еээ!”
Найз залуутайгаа Валентины баярыг тэдний найзуудтай хамт тэмдэглэхээр болов оо. Манай хүн намайг гэрээс ирж аваад л, бэлэг сэлтээ өгөөд үнэхээр гоё байлаа. Тэгээд найзуудых нь байгаа газар очсон чинь нэг караокед, дандаа хосууд байна аа. Би өөрийнхөө найзууд дунд хамгийн гайгүй дуулдагт ордог болохоор санаа зовохгүй, өөртөө бардам сууж байлаа. Тэгээд л лаг нөгөө номыг нь аваад тоог нь хэлээд “Энэ дууг захиалчих” гэж найз залуудаа чанга хэлээд суусан чинь “Өө, миний дуртай дуу байна шд, хоёулаа цуг дуулъя” гэж байна аа, нэг охин нь. Дотроо инээд хүрээд л “Энэ миний хамгийн сайн дуулдаг дуу шүү дээ, еээ” гэж бодоод л эхэлсэн чинь тэр охин надаас хамаагүй гоё хоолойтой, яг мэргэжлийн дуучин шиг байхгүй юу. Дараа нь сонссон чинь харин СУИС-д сурдаг байсан юм билээ. Тэр үед бантаад л, хоолой хүрэхгүй хэсэг дээр нь бүр солгойрч гарч ирээд, үнэн онигоотой. Хөөрхий, манай хүн л миний улаан фен. Алгаа ташчихсан, халууцаж ядаж байгаа намайг улам чанга тэврээд дагаж дуулж байсныг нь санадаг. /Ү,24 настай/

Зууны караоке хит- Ухаарч амжаагүй бүхний чинь төлөө..
Мартын найманд найзуудтайгаа баярлалдаад сууж байсан чинь надад сайн гээд байдаг нэг залуу утасдлаа. “Чамайг баярлуулмаар байна, гараад ир, үүдэнд чинь очъё” гэхээр нь “Зааза” гэж ярьчихаад гараад очлоо. Тэгсэн нөгөөдөх чинь “Ийм олуулаа байгаа юм чинь караоке орох уу?” гээд бөөнөөрөө хажууханд нь байдаг караокед оров оо. Тэр өдөр тийшээ ороогүй л бол би баярын гоё настритайгаа үлдэж болох байлаа. Оронгуутаа нөгөөдөх чинь микрофон барьж аваад намайг анх харсан, хэдийнээс хойш сайн байгаа, цаашид ч хайрласаар байх болно молно гэснээ “Чамд нэг дууг зориулая” гээд “Ухаарч амжаагүй бүхний чинь төлөө” гээд дуулж гардаг юм даа. Миний ой гутсан гэж яана. Зүгээр л хэлнэ биз дээ. Заавал баярлуулая гэснээ найзуудын маань өмнө, тэгээд тийм өдрөөр, тэгж хэлээд. Түүнийг дуулж дууссаных нь дараа хэн ч дахиж дуулаагүй. Бүгдээрээ л оройтчихлоо, явах уу гээд арайхийж гарж билээ. /С,25 настай/

“Ямар гоё дуучин шиг дуулдаг юм бэ?”
Намайг магтахаар би улам хошгороод, хоолойгоо сөөтөл дуулдаг хүн шдээ. Нэг удаа ангийнхаа охидуудтай караокед ороод Кивигийн “Love love love”-ийг дахилтаас нь дуулсан чинь манайхан “Хөөх, Жаагий чи ямар гоё дуучин шиг дуулдаг юм бэ?” гэхээр нь урам ороод бүр чанга дуулсан гэж байгаа. Тэр орой хэдэн ч дуу дуулсан юм бүү мэд. Ямар ч гэсэн орой нь гарахад нөгөөдүүлдээ “Баяртай” ч гэж хэлж чадахааргүй хоолой сөөчихсөн байсан. /Ж, 27 настай/

Эелдэг, даруу бүсгүйн имидж будаа!
Найзуудтайгаа караокед орсон чинь тэнд нь манай нөгөө ангийн нэг өндөр, хөөрхөн залуу зөөгч хийж байна аа. Би далимуулаад танилцах шалтаг гаргах санаатай найзууддаа “Аль болох олон оруулж ирээд байгаарай” гээд л захилаа. Ундаа, самар барьж орж ирэх тоолонд нь би микрофон барьчихсан “Би эр хүнд хайртай”, Никитоны “Хөөрхөн хүүхэн”, “Би түүнийг анх харснаас хойш” гээд л өөрийгөө рекламдах дуунууд ээлжилж дуулаад л байлаа. Тэгээд сүүлдээ бүр халаад, юун залуу найрах. Найзуудтайгаа “Дуу дуугаа бид бүхэн авалцжийнэ. Дур хүсэл бүр аймар оволзжийно” гээд яг орилж байсан чинь нөгөөдөх чинь ороод ирдийн. Оройноос хойш хичээж цуглуулсан нөгөө эелдэг даруу, сайхан бүсгүйн имидж шууд будаа. Харин ашгүй маргааш орой нь “Би ч гэсэн “Намайг дагаад цэнгэ”-ийг чам шиг чанга орилж дуулах дуртай” гэдэг мессеж утсанд ирж намайг баярлуулсан даа. /Д, 23 настай/

Чи ч гэсэн бидэнтэй өөрийнхөө хэр сайн караокечин гэдгээ хуваалцаарай.

ГООЛИНГОО