Эрэгтэй нь баруун гартаа бөгжөө зүүдэг юм байна лээ шүү дээ. Тэрийг нь мэдэхгүй агаа бөгжөө авахдаа зүүн гартаа зүүж үзээд авчихсан чинь "За хосууд бөгжөө солилцоорой" гэсэн чинь бөгж хуруунд нь ороогүй хаха. Одоо бичлэгийг нь үзэхээр хурууныхаа тал хүртэл хийчихсэн бөгжтэй гараа ардаа нууж байгаа нь гардын ёоооё! үхтлээ шоолж билээ. Бас аниагийн хуримаар би даашинзны хормойг нь бариад алхаж байгаад бүдэрч унаад. Босоод ирсэн чинь хөл аймшигтай шалбарчихсан цус гарч байсан. Аз болж эгчийн даашинз урагдаагүй. Хурим дээрх манай гэр бүлийн зурган дээр зөвхөн миний өвдөг дээр томоос том улаан шархны зураг гарсан даа. Эдгээх гэж их зовсон. Хамгийн инээдтэй нь тэгж цус гартал унасан байхад эгч маргааш нь зургаа хараад чи өвдгөө яасан юм гэж байгаам даа. Оюун ухаан нь ертөнцөөс тасарчихсан ккк. Хурим хийхээр хүмүүс тэгтлээ догдолдог юм байна лээ, юугаа ч санахгүй. Хэзээ морин хуур тоглоо вэ гээд асууж байх жишээтэй лол.

2012 онд тохиолдсон ид шидийн гэмээр явдал
Би нэг залуутай үерхэж байгаад жирэмсэн болсон чинь тэр намайг хаяад явчихсан. Тэгээд ямар ч холбоогүй байж байгаад гэнэт нэг өдөр хүрч ирээд “Би хүүхэд та хоёртойгоо хамт амьдармаар байна” гэж хэлээд уучлал гуйсан. Яг тэгээд ярилцаад зогсож байсан чинь би гэнэт өвдөөд зургаан цагийн дараа хүүтэй болж билээ. Миний хүү аавыгаа ирэхийг л хүлээж байсан юм шиг байна лээ. Одоо бид гурав аз жаргалтай сайхан амьдарч байгаа.

2012 оны хамгийн хайр татам чанар
Түүний минь хамгийн хайр татам чанар ... гэнэ ээ ... Өглөө сэрэхэд түрүүлээд босчихсон кофе уунгаа нэт ухаад, хүүг минь дэргэдээ авчихсан намайг ганц цаг ч болов унтаж амраг ... гэсэн байртай инээчихсэн, сахал нь ургачихсан жаахан хэнэггүй царайгаар хараад сууж байдаг хань минь. Дэлгүүр явахад нь дуртай шоколаднаасаа ганцыг захихад заавал хоёр юм уу гурваар үржүүлж авчирдаг хайр минь. Өндөр өсгийтэй гутал өмсөөд аальгүй царайтай юм алхахад дуртай байдаг залуу минь. Ээжтэй минь хэнээс ч илүү хүндэтгэлтэй харьцдаг хоёр хүүхдийн минь халамжит эцэг... Түүний минь хамгийн хайр татам чанар хамгийн энгийн зан нь байдаг юм байна.

2012 оны эрэгтэй хүнээс авч байсан хамгийн мэдрэмжтэй бэлэг
Бид 2 оюутан байлаа. Оюутан болохоор мөнгө төгрөг ч муутай. Мартын 8-наар тэр маань надад бууз хийж өгөх болов оо. Будаатай хуурганаас өөр хоол хийж үзээгүй хүн шүү дээ. Буузаа чимхээд л тавилаа. Би өөр өрөөнд байсан болохоор байсхийгээд л гүйж ирээд “Одоо чимхэж байна. Одоо тавьж байна. Одоо 20 минут, одоо 10 минут одоо 5 минут, одоо гаргалаа” гээд л нээх хөөрхөн гүйж ирж бүх процессоо мэдээллээд л... Тэгж тэгж нээх урвуу царайлсан хошуугаа унжуулаад ороод ирлээ. Яасан гэсэн чинь “давс хийхээ мартчихаж” гэсэн...Тэр минь дадлага хийгээд тухайн газраас нь цалин гэж 200 орчим мянган төгрөг өгөв өө. Бусад хүмүүсийг сонсох нь ээ анхны цалингаараа ээж аав даа юм авч өгдөг болохоор түүнийгээ ч бас тэгэх байх гэж бодож байлаа. Тэгсэн цалин буусан оройноо нүүр дүүрэн аз жаргал тодруулсан нисээд л ороод ирсэн. Тэгээд надад нэг хуучин гар утас, өөртөө нэг хуучин ориг пүүз авсан байж билээ. Би тэр үед утасгүй, хүний утсыг гуйж барьдаг байсан. Харин тэр минь хямдхан чийг татдаг пүүз өмсдөг байсан. Тэр үед мөнгөгүй мөртлөө ямар их аз жаргалтай байгаа вэ.

2012 оны хамгийн сайн зуршил
Өглөө сэрэнгүүтээ орчин тойрноо тэмтэрч, дараа нь нүдээ нээгээд бүх зүйлийг ажиглан хардаг. Дараа нь босож цонх руу дөхөж очин, наранд залбирдаг. “Энэ дэлхийн хамаг сайн сайхны төлөө Ум ма ни бад ни хум” гэж хэлдэг дээ. Түүний дараа ойр байгаа ямарваа нэгэн зүйлээ үнсдэг. Тарьж буй цэцгээ ургаж байгааг нь хараад гэх мэтчилэн. Харин дараа нь 2-3 аяга цайг лемон болон зөгийн балтай уугаад ажилдаа гардаг.

2012 оны хамгийн цөөн үгээр бичсэн гэр бүлийн онцлог
Манай эхнэр, хүү, охин гурав намайг ноолох дуртай. Энэ манай гэр бүлийн онцлог.

2012 оны хамгийн сайн найзын чанар
Миний сайн найз юм бүхэнд бялхсан хайраар ханддаг. Хэнийг ч ялгалгүй харьцаж, найз нөхдийнхөө хэн нэгнийг эмнэлэгт эргэх, ар гэрт нь гарсан асуудалд туслах, гадаад явахад нь мөнгө цуглуулах гээд хамгийн чухал үйл явдлуудыг зохион байгуулан, бусдыгаа нэгтэж, жинхэнэ сэтгэл гаргаж чаддаг. Өөрөө ч их энгийн хэрнээ ихэмсэг зантай, өхөөрдөм бүсгүй. Түүнд эрчүүд дурлаж, ажил нь үргэлж амжилттай явдаг. Түүний өөрөөрөө байгаа, энгийн хэрнээ эрхэмсэг, сэтгэл татам байдал нь хүн бүрийг татаж, ямар ч ажил хийсэн маш хурдан дээшилж чаддаг. Дарга нар нь түүний энэ үнэт чанарыг шууд анзаарч, ажил дээрээ ч онцгой нэгэн байж чаддаг. Маш хурдан тушаал дэвшиж, юм бүхэн нь бүтэмжтэй байдаг. Би ийм найзтайгаараа бахархдаг.

2012 оны шилдэг 9-р сарын 1-ний дурсамж
9-р ангид орх жил хамгийн хөгтэй байсан. Манай ангид нээх хөөрхөн банди ирж билээ. Тэгээд л эхлээд хөвгүүд танилцаад, дараань нөгөөдөх чинь охидуудтай ирж танилцаа. Яг над др ирээд “Намайг Билгүүнээ гэдэг” гээд нээх хөөрхөн инээгээд “Чамайгг хэн гэдэг вэ” гэхээр нь сандарсандаа “Билгүүн” гээд хэлчихэж билээ. Манай ангийхан нир хийтэл инээгээд л ёооо! Бас яг 9-1нд англи хэлний хичээл ороод багш “Бяслагийг юу гэдэг билээ” гээд асуухаар нь дотроо “чийс” гэж хэлнэ дээ гэж бодоод л лаг хамгийн түрүүнд гараа өргөснөө хэлэхдээ “ЧЯСЛАГ” гээд хэлчихэж билээ. Үнэхээр хөгтэй!

2012 оны хамгийн олон хүний цээжинд байдаг дөрвөн мөрт
Миний хэнз хурга
Магнай халзан зурвастай
Мярс мярс майлсаар
Намайг чиглэсээр ирдэг

2012 оны ээжийн шилдэг зөвлөгөө
Би дөрвөн жилийн өмнө жирэмсэн байхдаа нөхрөө машины ослоор алдаж, ганц бие жирэмсэн эмэгтэй үлдэх үед бүх зүйл утгагүй санагдаж, үнэхээр хэцүү байсан. Тэр үед ээж "Хэн ч чамд юу ч гэж хэлж болно. “Чи чадна, чи ухаантай” гэж хэлж магадгүй. Гэхдээ бүх зүйлийг ЦАГ ХУГАЦАА харуулдаг. Чамд цаг хугацаа хангалттай байгаа. ЦАГ ХУГАЦАА бүх зүйлийг эмчилж, өөрчилж чаддаг. Чиний одоо хэн байх нь чухал биш, ирээдүйд хэн болох нь чухал" гэж хэлж байсан. Тэр үед яаж тэр хүнийг байгаагүй гэж мартах юм? Цаг хугацаа өнгөрсөн ч би нөхрөө мартаж чадахгүй гэж дотроо бодож байсан. Гэвч ээжийн зөв байсан. Мэдээж ганц үрийнхээ эцгийг огт байгаагүй мартана гэж юу байхав. Гэхдээ ЦАГ ХУГАЦАА тэр үеийн сэтгэл хөдлөл, шаналал, хөөрлийг хэвийн болгох ганц зүйл гэдэг үнэн. Баярлалаа ээж. Одоо хүртэл би ямар нэг асуудал гарахад цаг хугацаа надад байгаад нь л маш их баярладаг. Одоо байгаа бүхэндээ баярладаг, бас ирээдүйд ирэх болгоныг хүлээдэг, өнгөрсөн болгоноос суралцдаг. Би ээжийн ачаар ийм их, ийм чухал зүйлийг ойлгосон. Бүх ээжүүд мандтугай!

2012 онд бүсгүйчүүдийн маань санал нэгтэйгээр дэмжсэн сэтгэгдэл. /Эрчүүдийн өчил: “Илчилж амжаагүй хайр минь” асуулга/ Нэг юм хэлэхэд эрчүүд хайраа зоригтой илэрхийлж байгаасай. Бас гудамжинд явж байхдаа таалагдсан охинтойгоо ичиж зоволгүй танилцаж байгаасай гэж хэлмээр байна. Би лав эрэгтэй байсан бол хэзээ ч сэтгэл догдлуулсан тийм учралыг алдахгүй байх байсан. Надтай танилцмаар байгаа нь илт байгаа хэрнээ зориг гаргалгүй байсаар тэгээд салаа замын эрхээр салж байгаа юм даа. – Гоолингоочууд маань дэмжих нь аргагүй л юм тийм үү?

2012 оны хамгийн аз туршсан, зоригтой үйлдэл
Ээжээсээ давхраа хийлгүүлье гэж зөндөө гуйдаг байлаа. Ээж маань их л дургүй, зөвшөөрдөггүй байсансан. Үеийн охидууд давхраа хийлгүүлээд нүд нь сэргээд их л хөөрхөн болчихсон явдагсан. Тэгээд төлөвлөгөө гаргаж эхлэлээ. 18 нас хүрэх төрсөн өдрөө тэмдэглэчихээд маргааш нь гэрийнхэн хоёр хоног амралтанд явна гэхээр нь шалтаг гаргаж үлдээд яг төрсөн өдрийнхөө маргааш нь хамаатныхаа охины очсон эмч дээр очоод давхраа хийлгүүлчихсэн. Бүтэн сайн өдөр аавыгаа орж ирэхэд нь “Аав энийг хараа” гээд хавдаад хөхөрчихсөн нүдээ үзүүлсэн чинь аймар тайван “Юу юм, давхраа юм уу” гээд асууж билээ. Тэгээд ээжийг машинаа тавьчихаад орж ирэхэд нь аав ээжийг дуудаад “Охин чинь давхраа хийлгүүлчихсэн байна” гэсэн чинь ээж хэсэг шоконд ороод өрөө лүүгээ явчихсан. 10 минутын дараа загнах гээд л ирсэн чинь аав “Заза, насанд хүрсэн хүн өөрийгөө мэдэж байгаа биз” гээд амыг нь таглачихсан даа. Тэрнээс хойш ээж маань надтай долоо хоног үг дуугараагүй. Одоо зориг гаргаж хийлгүүлсэндээ маш их баярладаг. Амьдралдаа гаргасан зөв шийдвэрүүдийн нэг гэж боддог. Эмэгтэй хүн өөртөө итгэлтэй байхдаа маш хүчтэй байдаг. Жижигхээн давхраа минь намайг цоглог сэргэлэн нүдтэй болгосон, өөртөө итгэх итгэлийг минь хөөрхөн өнгөлж өгсөн :)

2012 оын хамгийн хачирхалтай “Зүүдэнд орсон явдал”. / Эсвэл хамгийн хөгжилтэй гэж нэрлэх хэрэгтэй байх./
Би хэд хоногийн өмнөөс нэг залуутай харилцаж байгаа юм. Их ухаалаг, цэгцтэй яриатай гайхалтай залуу. Яг л миний хүлээж хайж байсан хүн мөн юм шиг санагдаад байгаа. Тэгсэн өчигдөр орой унтахдаа тэр “Шөнө зүүдэнд чинь цагаан морьтой ханхүү очвол тэр чинь би шүү! Энэ шөнө чи яг тэгж зүүдлэнэ” гэдэг юм байна. Би ч догдлоод, тэгж зүүдлээсэй гэж залбирсаар унтлаа. Шөнө байн байн сэрээд яагаад зүүдлэхгүй байна гэж санаа зовоод байсан чинь үүрээр цагаан модон морь унаад давхиж тоглож байгаа хүүхэд зүүдэлдэг байгаа. Өглөө босоод ганцаараа ямар их инээв ээ. Ямар ч байсан цагаан морьтой ханхүүгээ зүүдэлсэн ккк

Гоолингоо