2012-11-30Хамт олноороо жингээ хасах аяны ялагч, хамгийн их жин хассан /6 сарын хугацаанд 51 кг/ шилдэг
иргэнээр шалгарсан Ц.Мөнхзултай өөрийгөө ялсан амжилтын талаар ярилцлаа. -Та яагаад жингээ хасахаар шийдсэн бэ. Таныг ямар зүйл тэгтлээ их зоригтой шийдвэр гаргахад хүргэсэн вэ?
Би ер нь бүдүүндээ нэг их гутарч сэтгэлээр унаж байгаагүй. Бага байхын л хүмүүсийн хэлдгээр унаган махтай, махлаг хүүхэд байсан. Бүр дөжирчихсөн. Тэгээд байж байтал 2012 оны эхээр Удирдлагын академийг төгссөн юм. Төгсөлтийн зураг авахуулсныхаа дараа өөрөөсөө маш их айж, цочирдсон.
Бүр ухаан алдаж унах шахсан гээч. Тэр зурагнаас л өөрийгөө арай л хэтэрснээ мэдээд эмэгтэй хүн ийм бүдүүн байж болохгүй гэдгийг ухаарсан юм. Өмнө нь өдөр бүр толиндоо харахдаа ч тийм их жингийн илүүдэлтэй болсноо анзаардаггүй байсан.
Тэр үеээс хойш турж эхэлье гэж шийдсэн. Би тэмцээнд орьё гэж ороогүй танил маань надад санал болгосон юм.
- Яаж илүүдэл жингээ хассан бэ. Жингээ хасах сонирхолтой хүн бүрийн хувьд энэ их чухал асуулт?
Яаж гэдэг чинь сонирхолтой асуулт байна. Би ямар нэгэн хүнсний нэмэлт бүтээгдэхүүн хэрэглээгүйгээр турсан. Би өмнө нь өөрийгөө унаган махтай гэж боддог байсан. Тэгсэн чинь одоо бодохнээ “унаган” буруу хооллох зуршилтай байсан гэдгээ ойлгосон.
Мэдээлэл технологи хөгжчихсөн өнөө үед хаанаас л бол хаанаас мэдээлэл авах боломжтой. Жингээ хэрхэн хасах тухай өөрийнхөө хэмжээнд судалж байгаад өөрт тохирох хоолны жор, хөдөлгөөнөө олж авсан. Ямар ч хүнээс зөвлөгөө энэ тэр аваагүй. Ямар бүтээгдэхүүн хэрэглэвэл таргалуулдаг юм, уураг тосыг нь яаж тааруулах вэ гээд их эрэл хайгуул хийсэн дээ.
- Таны хооллолтын дэглэмийг сонирхмоор байна. Зөв эрүүл аргаар жин хасахад хооллолт их нөлөөлсөн нь лавтай. Өглөө юунаас эхэлдэг вэ?
Эрүүл зөв аргаар жин хасах аргыг 100 хувь гэж үзвэл миний хувьд хооллолт 70 хувь, дасгал хөдөлгөөн 30 хувийг эзэлнэ.
Ерөнхийдөө ногоон цай, цэвэр ус, тослоггүй сүү гээд шингэн юмаар эхэлдэг. Жимс, жимсгэнэ, хүнсний ногоо түлхүү хэрэглэдэг. Гэхдээ хүнсний ногоо гэхээр анхдагч байдал, хоёрдогч байдал гэж хуваадаг үзэх хэрэгтэй. Би бол анхдагч байдлаар нь хэрэглэдэг. Ямар нэгэн даршилсан, нөөшилсөн, амталсан, хөөлгөсөн байдлаар химийн урвалаар хувиргачихсан хэлбэрээр нь хэрэглэдэггүй гэсэн үг. Байгалиас нь ургуулаад, хураасан байдлаар нь хүнсэндээ хэрэглэдэг. Хооллолт бол маш энгийн. Таргалуулдаг төрөл бүрийн цагаан гурилан бүтээгдэхүүн кекс, бялуу, газтай ундаа, дандаа амтлагч орсон, эсвэл хайраад хуурчихсан, түлсэн шарсан малын гаралтай өөх тостой хоол, чипс, чихэр, шоколад идэхээ больсон.
Урьд нь бол найгүй их иддэг байсан. Ууртай юм уу, стресстэй үедээ Германы цэнхэр савтай чипсийг том хоёр уутаар дүүрэнг идэж, сэтгэлээ тайвшруулдаг байсан даа. Зөв хооллолтын талаар ярихад миний олж мэдсэнээр монголчууд аль эрт дээр үеэс л онч мэргэн үгэндээ хэлсэн байдаг. Өглөөний хоолыг өөртөө, өдрийн хоолыг найздаа, оройн хоолыг өстөн дайсандаа өг гэсэн нь үнэхээр үнэн үг. Яг үүний дагуу би орой 6 цагаас хойш хоол иддэггүй, харин хөнгөн маягийн зууш эсвэл тараг, жимс иддэг болсон. Өдрийн цагаар бол би гадуур хооллодоггүй. Гэрээсээ өөртөө тохирсон хоол бэлтгээд ирдэг.
-Та гэхдээ махан хоол иддэг биз дээ. Манайхан мах идэхгүй бол толгой эргээд, ядарч сульддаг гэж ярьдаг?
Байнга бол биш. 7 хоногтоо 2-3 удаа өдөртөө иддэг.
Амин дэмээр баялаг ногоо жимс жимсгэнэ, малын өөх тос ороогүй, махыг давс амтлагч хэрэглэдэггүй идчихдэг. Чихэр давс ерөөсөө хэрэглэдэггүй.
-Дасгал хөдөлгөөнтэй байна гэхээр фитнесст байнга явах хэрэгтэй. Тэгэж байж л хөдөлгөөн хийсэн болно гэж ихэнх хүмүүс ойлгодог. Та ямар дасгал хөдөлгөөн хийсэн бэ?
Хүмүүс турах гээд фитнесст явах ч юм уу хөдөлгөөнөө огцом нэмэгдүүлдэг. Би ч гэсэн өнгөрсөн жилийн таван сард фитнесст нэг сар явж үзсэн. Тодорхой жин хасагддаг ч гэсэн байнгын явах шаардлагатай, системтэй байдаг болохоор над шиг ажлын цаг зав муу хүнд бүтэхгүй юм байна гэдгийг ойлгосон. Тиймээс би өөрийнхөө нөөц бололцоон дээр тулгуурлаад яавал турах боломжтой вэ гээд эрэл хайгуул хийсэн.
Миний хувьд ажлын цаг нар боломжгүй байсан учраас зүгээр л өдөр тутам хийдэг, амьдралын энгийн хөдөлгөөнүүдээ нэмэгдүүлж, идэвхитэй амьдарч эхэлсэн. Байгаа орчин дах хөдөлгөөнөө нэмэгдүүлэхэд л болно. Бид нар шиг суугаа ажилтай хүмүүс ямар нэгэн бичиг, баримт албан газар луу хүргүүлэхдээ, хүнээр хүргүүлэх биш, өөрөө аваачиж өгөх гэдэг ч юм уу, хүн дуудахдаа утсаар дуудалгүй, өөрөө гүйж очиж дуудах, лифтээр гарахын оронд шатаар өгсч, уруудах гэх мэтчилэн хөдөлгөөн хийж болно.
Ажилдаа өглөө оройдоо хөлөндөө эвтэйхэн гутал өмсөөд, дулаан хувцаслаад эрчимтэй алхаад явахад болно. Амьдралын энгийн юмнаас л хүн хөдөлгөөнөө нэмэгдүүлж жингээ хасах боломжтой. Илүүдэл жинтэй хүмүүс өөхөндөө баригдаад их залхуу болсон байдаг. Би ч гэсэн тийм л байсан. Тэр байдлаа л эрчимтэй хөдөлгөөнөөр өөрчилсөн. Хүн өөрөө зорилгоо яс махандаа шингэтэл ойлговол зорилгодоо хүрэхийн тулд их тэмүүлж, хичээдэг юм билээ. Тэгээд л турна даа.
-Зарим хүн яаж ийж байгаад гүрийж байгаад 10 кг хасчихдаг. Их жинтэй хүмүүсийн хувьд цаашид үргэлжлүүлэн хасахад хэцүү байдаг гэдэг. Танд тийм үе байсан уу, тэрийг яаж даван туулсан туршлагаасаа хуваалцаач?
Эхлээд ямар нэгэн үр дүн гарахад муу, сайн тал гэж бий. Хүн амьдрах явцдаа амтлах мэдрэхүйгээрээ таашаал авч хоол иддэг. Тэгэхээр амтлах мэдрэхүйгээ тодорхой хэмжээгээр хасч байж үр дүн гарах нь ойлгомжтой. Нэг орой унтаад, өнөөдөр сайхан болчих юм шиг хүмүүс санадаг. Тодорхой хэмжээний тэвчээр гаргаж байж амжилтанд хүрнэ. Хэрвээ тэгэхгүй бол өө Мөнхзул чинь чипсээ идээд л яваад байвал хэцүү.
Манай хүүхнүүд гурилан бүтээгдэхүүнд их дуртай. Би ч гэсэн их дуртай байв. Бялуу, пицца, маш их амттанууд бий. Нэг талаар амтлах мэдрэхүйнд их сайн таашаал өгч байгаа нь кайфтай. Гэтэл ходоодонд оронгуут дайсан болж хувирдаг. Зарим хүмүүс надад одоо чамд амьдралаас авах ямар нэгэн амт алга гэж хэлдэг. Би хариуд нь чиний хэлж байгаа чинь үнэн байж болно гэхдээ би гайхалтай үр дүн үзчихсэн, тэрэндээ маш их сэтгэл хангалуун байгаа болохоор золиос гаргасандаа харамсахгүй байна гэсэн. Байгаа байдалдаа сэтгэл хангалуун байх нь ямар ч амттанаас татгалзах хүчийг надад өгсөн.
-Амттан идэх хүслээ дарах нь их асуудалтай нь мэдээж. Өөрийгөө ингэж болохгүй гээд хянаад байхаар сэтгэлийн дарамтанд орох явдал ч бий. Шантрах үе байсан байх?
Дэглэх эхлээд эхний долоо хоног барьж байхад бас л их хэцүү байсан шүү. За ер нь эвгүй болж эхэллээ шүү, Мөнхзулаа гээд өөртөө шивнэж байлаа. Гэрт идэх дуртай юм байгаад байдаг, миний хажууд хүмүүс дуртай, гоё хоолыг идээд байдаг. Саад бэрхшээл бол байлгүй яахав.
Тэгээд л хүн намайг харахгүй юм чинь яадаг юм бэ гээд амруугаа хоол хийх гээд оролдсон тохиолдол бий. Яг тэр үед магад би ингээд идчихвэл хүн намайг харахгүй ч , би өөрөө өөрийгөө л ичгүүртэйгээр хуурсан болно гэдгээ ойлгосон. Мөнхзул өөрийгөө хуурна ш дээ гэсэн сэтгэл намайг их уяж, барьж байсанд их баярладаг. Өөрийгөө хуурсан болно гэхээс л миний дотор шатдаг байлаа. Иймэрхүү маягаар л өөрийгөө ялж, дотоод хүнтэйгээ ярилцсаны дүнд би өнөөдөр ийм амжилтанд хүрсэн гэж боддог.
Өөртэйгөө ярилцах нь хамгийн чухал. Шагнал аваад ирэхэд манай дарга надад өөрийгөө ялсанд баяр хүргэе гэж хэлсэн. Энэ үг надад их урам өгсөн шүү.
- Хүн ходоодоороо тархиа удирдах уу, тархиараа ходоодоо удирдах уу. Энэ л зааг дээр хүний хооллолт явагддаг юм шиг ээ?
Энэ тухай би аягүй их боддог. Би өөрийнхөө ходоодондоо захирагдаад, хоол идэх дур хүсэл /аппетит/-даа хөтлөгдөөд ямар ч хамаагүй амттай л байвал идчихдэг байсан үе надад бий. Гэхдээ одоо тархиараа удирддаг болсон болохоор энэ хоол хүнс миний биенд ямар ашигтай юм бэ гэж тунгааж үзээд, ашигтайг нь аваад ашиггүйг нь хаяж байх хэрэгтэйг ойлгосон. Одоо дэглэм бариад 9 сарыг ардаа хийсэн байна.
-Өмнө нь ямар хооллолтой байсан бэ. Тэр үеийн хооллолтоо бодохоор ямар санагдаж байна вэ?
Аймшигтай. Ходоодондоо захирагдаад яваад байсан, хөөрхий. Замбараагүй, хайнга ханддаг байж дээ. Харин одоо яах ёстойгоо мэдсэн учраас энэ сайхан үр дүнгээ алдах эрх надад байхгүй. Улам их хичээнэ. Гэхдээ хичээнэ гээд яс арьс болтлоо турна гэсэн үг биш. Өдөрт авах ёстой килокалороо аваад л явна.
-Таныг өөрчлөгдсөний дараа хүмүүсийн хандлага хэр өөрчлөгдсөн вэ. Зарим хүн маш их хүндэлж, зарим нь өмнөх байдлыг муугаар ярьж байна уу?
Хүмүүсийн хандлага их өөрчлөгдсөн. Ялангуяа би чинь залуу эмэгтэй, гэрлэж амжаагүй яваа шүү дээ. Урьд нь би өөрийгөө бүдүүн юм чинь дээ гээд хүмүүстэй нэг их харьцдаггүй байсан. Одоо эрэгтэй хүмүүсийн талаас хэлэхэд хандлага бол шал өөр болж байгаа нь мэдрэгдсэн. /Инээв/. Урьд нь хамт ажиллаж байсан хүмүүс миний тарган байсан зургыг хараад Мөнхзулаа чамайг ийм аймаар болсныг анзаараагүй юм байна. Чи нээрээ их жинтэй байжээ гээд хэлдэг.
Хүүхнүүд их гярхай болохоороо надаас “яаж би турах вэ” гээд зөвлөгөө авдаг болсон. Зарим нэгэн нь өөртэй чинь уулзаж төлбөртэй зөвлөгөө авмаар байна, клуб нээе, энд тэнд лекц уншаач гээд их олон байдлаар хандах болсон нь сайхан санагдаж байна. Ерөнхийдөө хандлага их өөр болсон. Хүмүүс урьд нь энэ их бүдүүн гэсэн маягаар харьцдаг байсан. Гэхдээ тэдний буруу биш нийгэм угаасаа л тийм шүү дээ. Гаднах байдал их чухал юм байна гэдгийг ойлгосон. Би ер нь тайван, хэнэггүй, эршүүд маягийн эмэгтэй л дээ.
Хүмүүсийн хандлага гэснээс гэрийнхэн маань их өөрчлөгдсөн. Манай аав ээж настай хүмүүс болохоор малын гаралтай өөх тос их хэрэглэнэ. Миний үр дүнг хараад өөх тосоо багасгаад, оливийн тос хэрэглэдэг юм билүү гээд зөв хооллолтын ач тусыг ойлгодог болсон. Орой 6 цагаас хойш аль болох хоол идэхгүй байсан нь зүгээр юм гээд аав ээж хоёр маань хоол идчихээд гарч гадуур салхинд алхдаг болсон. Амьдралын жижигхэн зүйл дээр хүртэл хүмүүст нөлөөлж чадсан байдал маань надад эргээд урам зориг өгч байгаа.
-Та зөв хооллолт, дасгал хөдөлгөөний ачаар өөрийгөө өөрчилж чадсан. Эрүүл сайхан болохоосоо гадна өөрийгөө шинээр нээж, амьдралыг илүү гэрэлтэй өнцгөө харах болсон байх.Одоо таны зорилго юу вэ?
Тийм ээ. Тэгэлгүй яахав. Өөрийгөө шинээр нээж олж авсан.
Манай ажлын нэг эмэгтэй надад хэлэхдээ: “Мөнхзулаа би чамайг урд нь аягүй тийм залхуу, хайнга, хээгүй, эршүүд, юманд амархан шантрамтгай гэж боддог байсан. Одоо чамайг өөрийгөө ялаад явж байгаа чинь өөрийгөө хүмүүст бас нэг өөр талаас нь харах шинэ боломжийг өгсөн хэрэг болж байна гэж хэлсэн нь надад их урам зориг өгсөн.
Миний зорилго мэдээж өөрчлөгдсөн. Томорсон. Өөрийгөө ялсан чанар дээрээ түлхүү тулгуурлаад илүүдэл жинтэй хүмүүсийг жин хасахад нь тусалдаг клуб маягийн юм нээе гэж бодож байна. Нийгэм рүүгээ хандсан үйл ажиллагаа зохиодог ч юм билүү гээд хийх зүйл их байна.
Миний энэ жин хасах хүсэл маань биелж, үр дүн нь олон нийтэд ил болж байгаад баяртай байна. Би эхлээд их санаа зовж байсан. Хүний өмнөөс турсан ч биш дээ гээд.
-Мэдээж хүмүүс тэгэж зөв хоолловол турна гэдэг зөвлөгөөнүүдээс илүүтэй бодит үр дүн, хүнээс их үлгэр дууриалал авдаг. Энэ нь бараг төрөлхийн аранших байх. Жин хаясны дараа таны эрүүл мэндийн байдалд ямар дэвшилт, өөрчлөлт гарсан бэ?
Би урд нь ЭХО-д үзүүлэхээр цус өтгөрсөн, элэг өөхлөлттэй гэдэг үгийг сонсдог байлаа. Харин турсны дараа өөхлөлт алга болж, зүрх дэлсэхээ больсон. Ноднин нэг хөлөө гэмтээчихээд рентгений нэг аппарат дээр гарч хэвтэх гэсэн чинь жингийн даацын хязгаар болчихсон байна гээд аппарат дээр гарч чадаагүй. Тэгэхэд би сэтгэлээр унаж байсан. Хөлний үеэ оюутан байхдаа ажил хийж байгаад гэмтээчихсэн юм. Хөл бол асар их өвдөнө. Хэвлийн өөхлөлт их байсан. Өдөр тутмын үйл ажиллагаанд аймаар их дарамт үзүүлдэг байж дээ. Одоо бол ямар нэгэн дарамт байхгүй. Яагаад гэвэл би хэвийн жинтэй. Хөл маань өвдөхөө больсон. Тэр их хүнд жингээр дарж өвдгөхгүй болсон учраас тэр байх. Би одоо өмнөхөөсөө илүү өөртөө итгэлтэй, хүн болгон намайг хараад байгаа юм шиг, өөрөө өөрийгөө ялсан шүү гэж бодохоор их цоглог байгаа.
-Их жин хаясны дараа хүмүүсийн арьс нь суларч, ядрангуй царайтай болдог. Таны хувьд тийм зүйл ажиглагдахгүй байна?
Миний арьс унжаагүй. Яагаад унжаагүй вэ гэхээр би өөрөө залуу, арьс залуу учраас тэр. Би чинь байгалийн бүтээгдэхүүн учраас өөрөө аяндаа дасгал хөдөлгөөнөөр чангалагдсан. Ямар нэг нууц байхгүй. Тэгэхээр залуу байгаа дээрээ илүүдэл жингээсээ салж, амьдралын зөв хэвшлийг өөртөө бий болгох хэрэгтэй.
Хүн ер нь өөрийн таргалсан шалтгаанаа мэдэж байвал их зүгээр. Үнэхээр өвчнөөс болоод ингэж таргалсан уу эсвэл амьдралын буруу хэвшил, хооллолтоос болж байна уу гэдгээ олж мэд. Хэрвээ өвчнөөс бол эмчид очиж зөвлөгөө авах хэрэгтэй. Миний хувьд эв эрүүл таргалалттай байсан. Яагаад гэвэл амьдралын буруу хэвшил, буруу хооллолт юм чинь тодорхой шүү дээ. Эмчид үзүүлэх шаардлагагүй.
-Илүүдэл жингээ хасахыг хүсч байгаа хүмүүст та ямар зөвлөгөө өгөх вэ?
Хамгийн түрүүнд хэлэхэд турья гэсэн чин эрмэлзлэлээ өөртөө суулгах хэрэгтэй. Үнэн сэтгэлээсээ. Учир нь хүүхнүүд за ёстой өнөөдрөөс дэглэм барина аа гэчихээд маргааш нь больдог ч юм билүү гээд их туйлбаргүй байдаг. Ингэвэл хэзээ ч амжилтанд хүрэхгүй. Нэг эхэлсэн юм аа заавал дуусгах хэрэгтэй. Үр дүнгийг нь үз.
Турахдаа маш зөв аргаар турах хэрэгтэй. Янз бүрийн эм, кофе уухыг би сайн муу гэж хэлмээргүй байна. Тодорхой хэмжээгээр үр дүнд хүрдэг л байх.
Гэхдээ эмээр турна гэдэг асар буруу. Хүмүүс надаас herbalife ямар вэ гэж асуудаг. Уугаад хэрэглээд турсан хүмүүсийг би мэднэ. Монголд орж ирээд эрүүл хооллолтын клуб нээгээд үйл ажиллагаа явуулж, хүмүүсийн нэг бизнес болчихсон. Тэрэн дээр хэлэх юм алга. Алийг нь хэрэглэж жингээ хасч, турах чинь таны сонголт. Сонголт таны гарт. Гэхдээ л нэг юманд дасал болж, хамааралтайгаар турна гэдэг яаж ч бодсон сайн зүйл биш.
-Манай монголчууд өлсч байгаа цангаж байгаагаа ялгахаа больсон. Яаж ялгах вэ?
Яаж ялгах вэ гэхээр үнэхээр өлсөөд байвал хоол идэхээс 30 минутын өмнө ус уугаад үз. 30 минутын дараа үнэхээр цангаж байсан бол цангаа чинь дарагдаад өлсөөгүй гэж мэдэгддэг. Харин 30 минутын дараа ус уучихаад үнэхээр өлсөөд байвал юмаа идэх хэрэгтэй л гэсэн үг. Хуурамч болон жинхэнэ өлсөх мэдрэмжийг ялгах ёстой. Тэгэж чадвал зөв цагтаа хооллож сурна.
-Та ямар хувцас өмсөх дуртай вэ. Их жин хаясны дараа хувцсаа солих шаардлагатай болсон байх?
Тийм ээ тэгсэн. Бүх хувцас томдож байгаа юм чинь. Гэхдээ өөртөө сэтгэл ханамжтайгаар дэлгүүр хэсэх ямар байдгийг би мэдэрсэн. Ер нь өмнө нь би өмд өмсөх дуртай байсан чинь одоо юбка, палаж туфль өмсөх дуртай болсон.
Ярилцсанд баярлалаа.
Та энэ бүсгүйн турсанд гайхаж байгаа бол ийм жишээ маш олон байдаг. Харцгаая.
WWW.MISS.MN
.jpeg "Томруулж харах")
.png "Томруулж харах")
