Орон сууцны үнэ “тэнгэрт хадлаа”

2012-11-26

О.Магнай дарга аа, таны сонорт хүргэх нэг зүйл байна. Улаанбаатар хотод оршин суух иргэдийн ихэнх нь гэр хороололд амьдардгийг та хэнээр ч хэлүүлэлтгүй мэдэж байгаа.

Эдгээр иргэд хаа нэг газар халуун ус, палантай суултуур дээр суухыг мөрөөдөхдөө 5,10 төгрөгөө өөрөөсөө харамлан цуглуулж, байр авахыг хичээдэг ч хэдэн арван жил цуглуулсан мөнгө нь орон сууц авахад хүрэлцэхгүй болжээ.

О.Магнай дарга аа, өнгөрсөн баасан гарагт миний утсанд нэг мессеж ирлээ. Уншвал, Замын цагдаагийн зүүн талд байрлалтай “Kingdom” хотхонд захиалга авч байна. Та 97-213 метр.квадрат, 3-7 өрөө байрнуудаас сонголт хийх боломжтой. Нэг метр.квадратын үнэ 2.200.000 төгрөг” гэсэн байх юм. За энэ ч яахав. Дээд зэрэглэлийн хотхон байж болох. Гэтэл чийг үнэртсэн умгар нэг өрөө байр 60-73 сая төгрөгийн үнэтэй болчихжээ. Энэ үнэ зөвхөн хуучин орон сууцных шүү. Метр.квадрат жижигтэй нэг өрөө байр ийм үнэтэй байхад хоёр, гурван өрөө байрны үнийг сонирхоод ч хэрэггүй юм билээ.

Ашиглалтад орсон, орох гэж байгаа, шинэ орон сууцны нэг метр.квадратын үнэ нэг сая 500 мянган төгрөгөөс эхлээд гурван сая 500 мянган төгрөг хүртэл байхаас гадна ам.доллараар хэмжигдэнэ. Орон сууцны үнэ ханш өнгөрсөн долоо хоногийн байдлаар нэг иймэрхүү байлаа. Харин өнгөрсөн саруудад ямархуу үнэ ханштай байсныг сонирхохоор есдүгээр сард хэвлэгдсэн “Зар мэдээ” сонины нэгэн дугаар дээр гарсан “ Баянзүрх дүүргийн 15 дугаар хороололд гурван өрөө байр зарна” гэсний дагуу залгахад “89 сая төгрөгөөр зарчихсан” гэв.

Мөн IV хороололд хоёр өрөө байрыг 80 саяар, “Алтан гадас” хотхоны нэг метр.квадратын үнэ нэг сая төгрөг, аравдугаар хороололд хоёр өрөө байрыг 70 саяар тус тус зарсан байв. Түүнчлэн Сонгинохайрхан дүүрэгт байрлах “Орчлон” хорооллын нэг метр.квадрат нь 990 мянган төгрөгийн үнэ ханштай байжээ. Харин өчигдрийн байдлаар орон сууцны үнэ ханш ямар байгааг сонирхохоор “Гурван өрөө байр зарна” гэх зарын дагуу залгахад III хорооллын 54 сургуулийн урд байрлах 80 метр.квадрат орон сууцыг 160 сая төгрөгөөс жаахан ярина” гэв.

Мөн “Тэнгис кино театрын ард хоёр өрөөг байрыг хямд зарна” гэсний дагуу залгахад “88 сая төгрөг”, нэгдүгээр хороололд өргөтгөх боломжтой нэг давхрын нэг өрөө байрыг 82 саяар тус тус зарна” гэх юм. Үүнээс харахад өнгөрсөн саруудад зарагдаж байсан хоёр өрөө байрны үнэ өнөөдрийн байдлаар нэг өрөө байр авахад ч хүрэхгүй болсон байгаа юм. Иймэрхүү үнэ ханштай байхад хэн хүний нас нь хүрэхгүй биз.

Өнгөрсөн жилүүдэд Засгийн газраас бүх нийтээр нь орон сууцжуулахаар “100 мянган айлын орон сууц хөтөлбөр”-ийг санаачилсан. Тус хөтөлбөрийн хүрээнд бага, дунд орлоготой иргэдэд зориулан жилийн зургаан хувийн хүүтэй зээлийг олгож эхэлсэн. Энэ нь гэр хороололд амьдардаг иргэдэд орон сууцтай болох мөрөөдөл биелэх нь гэдэг итгэл төрүүлж байтал Төрийн банкинд зээл хүссэн иргэд “Хохирсон” гэх мэдээлэл хийх юм. Бодвол тэдний орон сууцтай болох мөрөөдөл нь бас л хэвээр үлдэж байх шиг. Ерөнхийдөө энэ жил барилгын салбар зогсонги байдал орсон. Энэ нь мэдээж зөвшөөрөлгүй барилга ихээр сүндэрлэсэнтэй холбоотой. Үүнээс болоод орон сууцны үнэ “тэнгэрт хадсан” байж магад.

Хувь хүн болон барилгын компаниуд “Барилга.мн” гэх сайтад орон сууцаа борлуулахаар байршуулдаг. Ерөнхийдөө энэ сайт орон сууцны үнэ ханшны хэлбэлзлийг ядах юмгүй гаргаад ирчихдэг хамт олон. Иймээс тус сайтын мэргэжилтнээс орон сууцны үнэ ханш ямар байгаа талаар тодруулахад “Манай сайтад тавигдсан орон сууцны үнэ өнгөрсөн аравдугаар сарын 25-ны үеэр шинэчлэгдсэн. Одоо арванхоёрдугаар сарын эхэнд солино. Ойрын өдрүүдэд орон сууцны үнэ ханш тогтвортой байгаа” гэв.

Нэлээд хэд хоногийн өмнө, нэг таксинд суусан юм. Автозам нэлээд ачаалалтай байсан учир FM сонсож байтал “Та бүхэндээ зар танилцуулъя. Баянгол дүүрэгт гурван өрөө байр яаралтай хямд зарна. Үнэ 135 сая төгрөгөөс сайн ярина. Суудлын машин оролцуулж болно” гэсэн зар явтал жолооч ах “Хм... Энэ орон сууцны үнэ арай дэндлээ” гэв. Би ч хариуд нь “Харин тийм ээ” гэхэд жолооч “Ах нь Гурвалжин дээр цемент зардаг юм. Байр авах санаатай хэд арван төгрөг цуглууд авах гэхээр дөрөв, таван сая төгрөг дутчих юм. Тэгэхээр нь ганц, хоёр сар гүрийж нэмээд авах гэхээр бас л нэмэгдчихсэн байх. Үнэхээр хаврын тэнгэр шиг юм аа” гэж зовлонгоо ярьсан юм.

О.Магнай дарга аа, та ажлаа авснаасаа хойш иргэд, хэрэглэгчдийн төлөө багагүй зүйлийг хийсэн. Энэ нь ч иргэдэд таалагдаж байгаа. “О.Магнай дарга маш их зүйл хийж байна. Урагшаа” гэх хүмүүс цахим ертөнцөөр цөөнгүй байгаа. Иймээс та дараагийн удаа орон сууцны үнийн хөөрөгдөлттэй тэмцэхгүй бол болохоо байх нь. Нийслэлийн Засаг дарга гэр хорооллыг Өмнөд Солонгосын “Гангнам” дүүрэг шиг болгоно гэж амласан ч гэр хороололд амьдрах иргэдийн орон сууцтай болох мөрөөдөл үүгээр үл хязгаарлагдах ёстой шүү дээ.

Орон сууцны үнэ ханшийг танилцуулъя

Ж.Баттуул