УДэлхийн рок поп урлагийн түүхэнд "попын хатан хаан" хэмээн хүндлэгдсэн нэрт дуучин Уитни Хьюстоныг таалал төгсөхөд түүний шүтэн бишрэгчид нүдэндээ нулимстай, сэтгэлдээ дуутай нь хоцорсон. Хэдий тэрбээр тэнгэрийн оронд одсон ч бүтээл нь шүтэн бишрэгчдийнх нь сэтгэл зүрхэнд мөнхөд эгшиглэсээр байна. Ингээд түүний 2012 оны нэгдүгээр сарын 8-нд буюу таалал төгсөхөөсөө сарын өмнө "Мюзик" сэтгүүлд өгсөн ярилцлагыг уншигч Та бүхэнд бүрэн эхээр нь хүргэе.

-Таныг их ганцаардмал хүн гэж ярьдаг. Ганцаардлын гайхамшиг нь юу вэ?

-Энэ асуултад би олон удаа хариулж байсан. Хүн болгон л намайг ганцаардмал, найз нөхөдгүй гэж ярьдаг. Би ганцаардмал гэдэг ханаар бусдаас өөрийгөө тусгаарласан вант улсын эзэн. Хэн ч миний энэ ханыг нурааж чадахгүй. Учир нь олон найз нөхөдтэй хүний дэргэд би ямар ч асуудалгүй амьдарч чадаж байгаад оршино. Энэ нь ганцаардлын гайхамшиг.

-Тэгвэл ганцаардлын аймшиг нь юу вэ?

-Шууд хэлэхэд ганцаардалд аймшиг гэж байдаггүй. Гэхдээ миний хамгийн их хүндэлж явдаг хүн таалал төгсөхөд л би ганцаардлын аймшгийг мэдэрсэн.

-Та домогт дуучин Майкл Жексоныг яриад байна уу?

-Мэдээж. Тэр зөвхөн домогт дуучин байгаагүй. Дэлхийн хөгжмийн ертөнцийн хаан нь байсан юм. Биднийг зарим нэгэн хэвлэлд хайр сэтгэл, янаг амрагийн холбоотой гэж бичдэг байлаа. Үүнд Майкл их баярладаг байсан юм шүү. "Ийм сайхан бүсгүй, аугаа дуучинтай нэр холбогдоно гэдэг нэр төрийн хэрэг" гэж хүртэл хошигнодог байлаа. Өнөөдөр тэр бүгдийг эргээд санахад сэтгэл уймарч, уйлмаар санагдаж байна /нулимс цийлэгнэв/. Энэ бол ганцаардлын жинхэнэ аймшиг.

-Таны босгосон ганцаардлын ханыг яаж нураах вэ?

-Энэ хана намайг үхсэн цагт л нурах байх. Ер нь хүн амьдралдаа их олон найзтай байгаад хэрэггүй. Учир нь хэзээ нэгэн цагт хэсэг нь чамаас урваж таарна. Түүний оронд цөөн тооны чанартай найзтай байсан дээр. Ядаж нэг нь урвалаа гэхэд нөгөө хэд нь чамайг хамгаална шүү дээ. Би ийм зарчмаар л амьдардаг. Цаашдаа ч энэ зарчмаараа амьдрах болно.

-"Тайзан дээр гарах үедээ л ганцаардлаа мартдаг" гэж ярьсан байсан?

-Үзэгч бүхэн "Уитни" гэж хашгираад, миний дууг түрэн дуулж байхад би яаж ганцаардах юм бэ. Тийм болохоор л би "Тайзан дээр гарах үедээ л ганцаардлаа мартдаг" гэж хэлсэн. Мөн гадуур явахад хүн болгон толгой дохиж мэндлээд, зарим нь ирж гарын үсэг зуруулах, хамт зургаа авахуулахад "Би хэн юм бэ" гэж өөрөөсөө асуух үе гардаг. Даанч хариултыг нь олж чаддаггүй юм.

-Дэлхийн хөгжмийн урлагт хөл тавьсан цагаас чинь л Таныг Майкл Жексоны "халаас"- ны дуучин гэж ярьж ирсэн. Та үүнд өнөөдрийг хүртэл дорвитой хариулт өгөөгүй?

-Би тэгж ярьж байгаа хүмүүсийг үнэндээ гайхдаг. Би өөрт байгаа авьяасаа хэн нэгний халааснаас олж авсан юм байх даа. Та сэтгүүлчийн авьяасаа эрхлэгчийнхээ халааснаас олж авсан уу, үгүй биз дээ. Яг үүнтэй адил миний дуулах авьяас, ур чадвар хэн нэгний халаасанд байна гэдэг утгагүй. Би Майклтай дотно сайхан найзын харилцаатай байсан. Яг үнэнийг хэлэхэд би түүний үнэнч шүтэн бишрэгч нь юм шүү дээ. Миний ээж "Чи өөрөө л өөрийнхөө үнэнийг мэдэж байвал хүмүүс чиний талаар худал юм ярьсан ч бүү тэмц" гэж хэлсэн. Тиймээс би өнөөдрийг хүртэл энэ ярианд дорвитой хариулт өгөөгүй.

-Уитни Хьюстон гэдэг хүн эрчүүдийн тухай ямар бодолтой явдаг бол?

-Бидний амьдарч буй эрин зуунд эрчүүд нь илүү давамгайлж байна. Улстөр, спорт, урлаг соёл гээд бүгдэд нь манлайлж байна. Би энэ эрчүүдийн ертөнцөд эмэгтэй хүн болж төрсөндөө баярладаг, бахархдаг. Эрэгтэй хүнийг яг ийм байгаасай, тийм байгаасай гэж ярих дургүй. Ямар надад таалагдах гэж бурхнаас заяасан араншингаа өөрчлөлтэй нь биш.

-Охин чинь хэзээ нэгэн цагт хүний бэр болоод яваад өгнө. Тэгэхэд Танд юу бодогдох вэ?

-Энэ тухай би бодож байгаагүй. Гэхдээ охиныхоо төлөө амиа өгөхөөс ч буцахгүй гэдгээ л мэдэж байна. Миний охин бол ээжийнхээ амьдралын үргэлжлэл нь юм. Тиймээс би өөрийнхөө үргэлжлэлийг сайн хүн болгохын төлөө хичээж байна. Үүнийг зарим хүн буруугаар ойлгож намайг дэндүү хатуу ээж гэж боддог бололтой юм билээ.

-"Би одоо шувуу болсон" гэж Нью-Йорк хотод аялан тоглож явахдаа хэлсэн. Энэ үг зарим хүнд таагүй сэтгэгдэл төрүүлсэн?

-Энэ үгийг би зүгээр ч нэг хэлээгүй. Өөрийн тань хэлдгээр зарим нэгэн хүнд талаагдаагүй нь үнэн. Ямар сайндаа л "Уитни өөрийгөө дэндүү эрт булшилчихлаа" гэж бичиж байх вэ дээ. Муу ёрлож байгаа юм биш. Би энэ хорвоогоос явлаа гэж бодоход шувуу болохыг л хүсдэг. Тэгээд л тэр тоглолт дээр сэтгэл хөдөлсөн дөө "Би одоо шувуу болсон" гээд хэлчихсэн юм.

-Тэгвэл үхлийн дараа амьдрал байдаг гэдэгтэй Та санал нийлдэг гэж ойлгож болох уу?

-Бололгүй яахав. Нөгөө ертөнцөд очсон миний бүх анд хаа нэгтээ дуугаа аялаад явж л байгаа. Би үүнд ерөөсөө ч эргэлзэж байгаагүй. Хэрвээ миний цаг боллоо гэж үзвэл хүссэн ч эс хүссэн ч бурхан намайг аваад л явна. Харин бурхан дуудтал үлдэж байгаа хүмүүст аз жаргал бэлэглэх юм л бүтээе гэж боддог.

-Холливудын алдартнуудаас Кевин Костнер Танд "хир" халдаадаггүй юм билээ. Ер нь Та хоёр сайн найзууд биз?

-"Бие хамгаалагч" киноноос хойш үнэхээр сайн найзууд болцгоосон. Сайн найз гэх нь бас зохимжгүй юм. Ерөөсөө тэр хүн бурхнаас надад заяасан миний амьдралын зөвлөгч. Нэг л удаа би алдаж гишгэвэл түшиж авахад бэлэн байдаг хамтрагч минь юм. Үргэлж намайг дэмжиж урмын үг хайрлаж байдаг Кевиндээ баярлалаа. Тэр минь байгаагүй бол би хэд хэдэн анзааргагүй алдааг амьдралдаа хийх байжээ.

-Дэлхийн хөгжмийн ертөнцөд залуу дуучид ихээр төрөн гарч байна. Та тэднээс хэнийг нь илүү үнэлж байна вэ?

-Урлагийн ертөнцөд хөл тавьсан бүх дуучинг үнэлж, хүндэтгэж явах нь миний үүрэг. Гэхдээ өнөөдөр дэлхийн хөгжмийн урлагт нэр нь цуурайтаж яваа олон дуучинтай би хамтарч ажилласан. Тэднээс хамгийн их эрч хүчтэй, хөдөлмөрч, хичээнгүй нь Ней-Ёо санагдсан шүү. Түүний дуулж байгаа техник, бүжиглэж байгаа арга барил нь тэр чигээрээ өнгөт арьстны "бүтээгдэхүүн". Ней-Ёод би аминчилж ганцхан зүйлийг захисан.

-Нууц биш бол дүүдээ захисан захиасаа дэлгээч?

-Энэ арга барилаа хэзээ ч битгий алдаарай гэж захисан.

-Таныг аз жаргалтай болгодог зүйл юу вэ?

-Тайз, хөгжим, дуу гурав. Энэ гуравгүйгээр би хэзээ ч амьд явж чадахгүй. Хар багаасаа л хөгжимлөг гэр бүлд өссөн шүү дээ, Хьюстон гэдэг хүн. Мөн дээр нь нэмж хэлэхэд үргэлж надад хань болдог микрофон минь байна даа.