хамтлагийн ахлагч Л.Өнөржарагалтай уран бүтээл цаг үеийн талаар ярилцлаа.

-Анх удаа драмын жүжигт маш амжилттай тоглож үзэгчдийн талархлыг хүлээсэн таньд юуны түрүүнд баяр хүргэе? Жүжгийн тухай эргэн дурсахад сэтгэгдэл хэр өндөр байв?

-Маш их баярлалаа. Сэтгэгдэл мэдээж өндөр байлгүй яахав. Жүжигчин гэдэг мэргэжлийг эзэмшснээсээ хойш телевизийн болон дэлгэцийн уран бүтээл л хийж байсан. Харин манай хамтлаг энэ жилээс жүжиг хийвэл ямар вэ? гэдэг дээр бүгдээрээ ярилцаад 1999 онд бичигдсэн Францын зохиолч Эрик Эммануэль Шмиттийн бүтээлээс сэдэвлэсэн “Хоёр ертөнцийн буудал” жүжгийг албан ёсны эрхтэйгээр тавьсан.

Ер нь манай улсад төдийгүй Азид иймэрхүү утга агуулгатай, энэ жүжиг тавигдаж байгаагүй учраас анх удаа гэж ойлгож болох байх. Өмнө нь Герман, Франц, Оросод тоглогдож байсан. Харин Азид бол энэ жүжгийг тавьж байгаагүй. Зохиолын хувьд маш сайн байсан болохоор үзэгчид ч үнэхээр сайхан хүлээж авсан. Жүжигчин мэргэжилтэй хүн ямар нэгэн жүжгэнд тоглоогүй бол жүжигчин гэж хэлэхэд ер нь хэцүү шүү.

Номыг нь үзэж ногоотой шөлийг нь уусан ч тайзан дээр гараагүй нэлээд удсан болохоор урлаг, спорт аль алинд нь бэлтгэл маш чухал байдаг. Бидний хувьд маш их бэлдсэн. Мөн энэ жүжгэнд маань урилгаар Амбий ах Навчаа эгч гээд туршлагатай жүжигчид тоглосон нь манай жүжгийг амилуулсан.

-Жүжгийн бэлтгэл хэзээнээс эхлэсэн бэ? Бэлтгэлийн хувьд хэцүү зүйл юу байв?

-Жүжигчдээ сонгоод мөн өөрсдийн дүрээ аваад л бэлтгэлдээ орсон. Зуны гурван cap л бэлтгэлээ хийсэн дээ. Жүжиг гэдэг бол дэлгэцийн уран бүтээл шиг камерын өмнө гараад хийчихдэг зүйлээс тэс ондоо байдаг. Бэлтгэлийн хувьд хэцүү гэвэл хэцүү юм зөндөө л гарна. Тэр бүхний ард хийчээл зүтгэл байхад л гардаг юм. Тухайн үедээ хэцүү байсан бол одоо харин энэ бүхний ард гарсан байхад хэцүү гэж байсан юм болгон одоо харин сайхан санагддаг.

-Таны хувьд хоёр ертөнцийн буудал байдаг гэдэгт итгэдэг үү?

-Байдаг гэдэгт итгэдэг. Ер нь хүн болгон амьдралын өөр өөр гүн ухаантай байдаг байх. Миний хувьд өнөөдөр би ийм байна. Харин маргааш ямар байхыг үнэхээр хэлж мэдэхгүй. Гэхдээ хүн бүр ямар нэгэн буддын ч юм уу христын ч юмуу эсвэл бөөгийн шашинд итгэдэг. Ингэснээрээ шашин гэдэг бол хүний сайн сайхан явахын тулд л зориулагдсан зүйл гэж боддог. Хоёр ертөнцийн буудал үнэхээр байдаг гэж боддог. Гэхдээ урьд нь энэ тухай мэддэггүй байсан ч байж болох юм. Ямар ч хүн модны навчис шарлах яг тэр агшныг харж чаддаггүй. Нэг л мэдэхэд шарлачихсан байдаг. Үүнтэй адилхан бид “хоёр ертөнцийн буудал” жүжгийг үзсэнээрээ л нээрээ ийм зүйл байдаг байх гэж бодож эхлэдэг. Тэрнээс өмнө хүний анзаарамгүй урьд нь бодож үзээгүй ийм далд ертөнцийг бид анзаарч хардаггүй байх гэж боддог. Үнэхээр амьдрал дээр тэнд очоод ирсэн. Дайраад гарсан хүмүүс байсан болохоор л магадгүй энэ зохиол бичигдсэн байгаа байх.

-Үзэж чадаагүй олон үзэгчид дахин тоглооч гэсэн санал тавьсан гэсэн. Дахин тоглох тухай боломж байгаа юу?

-Бидэнд дахин тоглох хүсэл маш их байгаа. Яагаад гэхээр үзэгчдээс дахин тоглооч гэдэг санал манай цахим хуудсуудаар маш их ирсэн. Харин манай жүжгийн хувьд бүх зүйл нь театрт тавигдахаар зориулагдсан болохоор энд, тэнд очоод дахиж тавих боломжгүй. Дуурийн театрын бүтэн жилийн нээлтийн ажил эхлэсэн учраас бидэнд дахин тоглох боломж ховор байна. Ер нь чөлөөт уран бүтээлч бидний хувьд театрын асуудал байнга проблем болж байдаг. Боломж бололцоо нь олдвол үзэгчдийнхээ хүсэлтийг биелүүлэхийн төлөө зорьж байна.

-Монголд театр хүрэлцдэггүй нь урлагийн хүмүүсийн хувьд том асуудал бололтой.

-Тиймээ Монголд Улсын драмын эрдмийн театр, Дуурийн театр гэсэн хоёр л театр байна. Энэ хоёр театр бол Улаанбаатар хотын хамгийн анхны барилгууд шүү дээ. Харин одоо түүнээс хойш хэдэн жил болж байна. Гэтэл СУИС-ыг жилд хэдэн хүн төгсөж байгааг бодох хэрэгтэй. Ганцхан СУИС ч биш хувийн урлагийн сургуулийг төгсөж байгаа оюутнууд ч гэсэн өчнөөн бий.

Мөн урлагт хүчин зүтгэх сонирхолтой хувь хүмүүс чөлөөт уран бүтээлчид ч байдаг. Ер нь театр гэдэг бол урлагийн ариун сүм. Манайхан улсын нэг барилга барья, бүтээн байгуулъя гэхээсээ илүү эх орныхоо өрийг цөмлөж газар шороогоо ухдаг хүмүүс л их болж. Бидний энэ баялаг нэг л өдөр дуусна шүү дээ. Магадгүй бидний үед дуусахгүй ч гэлээ бидний хүүхдийн үед ч юмуу хүүхдийн минь хүүхдийн үед дуусах л байх.

Эх орныхоо эд баялгийг гадаад руу экспортлохын оронд энэ урлаг гэдэг зүйлээ гадагшаа таниулах хэрэгтэй. Урлагаар дамжуулан нийгэм гэдэг зүйл өөрчлөгдөх бүрэн боломжтой. Нэг үеэ бодвол Монголын соёл урлагыг гадныхан бага гэж голохооргүй мэддэг болсон байна. Энэ бол Монголын соёл урлаг хөгжиж байгаагийн л шинж байх. Манай улс соёл урлагаа дэмжих тал дээр муу л юм шиг санагддаг. Танай сониноор дамжуулан соёл урлагаа дэмжээч гэж хэлмээр л байна.

-Ярианыхаа сэдвийг жаахан өөрчилье. Анх СУИС-д санамсаргүй байдлаар орчихсон уу? Жүжигчин болохыг хүсдэг байв уу?

-Жүжигчин болно гэдэг бол миний багын мөрөөдөл байсан. Гэхдээ жүжигчин болно гээд нэг сургууль төгсөөд бакалаврын диплом авах бол биш шүү дээ. Харин би гэдэг хүн өөрөө л энэ мэргэжлээ эзэмшиж чадсан байх хэрэгтэй. Гэхдээ миний мөрөөдөл хараахан биелээгүй л байна. Жүжигчин болохыг мөрөөддөг байсан нь үнэн. Харин одоо хүртэл жүжигчин болох гээд л суралцсаар л байна.

-Анх хамтлагаа байгуулаад гарч ирж байхад шантрах зүйл олон л байсан байх?

-Анх TV cocktail хамтлаг байгуулагдаад гарч ирж байхад нэг ч төгрөгний орлогогүй, камер ч байхгүй бүр компьютер ч үгүй эхлэж байсан. Харин бидэнд байсан ганцхан зүйл бол нэвтрүүлгийн санаа л байсан. Ямар ч нэвтрүүлгийн багаж зэвсэг байхгүй байхад бидний хийх юмны санаа бол маш том зэвсэг болж байсан. Ер нь хүнд зорилго байхад цаашаа явах бүрэн боломж байдаг.

Мэдээж ямарваа нэгэн юм эхлэхэд хэцүү зүйл маш их тохиолддог. Тэр бүгдийг даван туулж ард нь гарсны дараа хэцүү санагдаж байсан бүхэн биднийг өдий зэрэгтээ явахын тулд хурцалж байждээ л гэж бодогддог. Тийм зүйлүүд байсан болохоор л магадгүй өнөөдөр бид урлагт өөрсдийн гэсэн өнгө аясыг гаргаж тодорхой хэмжээний нэр хүндийг олж авсан болов уу гэж боддог. Эргэн дурсахад дурсамж гэдэг маш сайхан байдаг.

-Танай хамтлагийн хувьд цалингаар ажилладаг уу? Чөлөөт уран бүтээлчид болохоор орлогоороо цалинждаг уу?

-Тиймээ манай хамтлагийн хувьд чөлөөт уран бүтээлчид болохоор орлогоороо цалинждаг. Яг үнэнгээ хэлэхэд орлого ордог cap байхад орлого орохгүй хичнээн сараар суух ч үе бас байдаг. Бид нарын хувьд юм хийж л байж өөрсдийгөө санхүүжүүлдэг.

-Саяхан бүл нэмж охинтой болсон. Ер нь гэрлээд хэдэн жил болж байгаа вэ?

-Тэгсэн. Би хүү охин хоёртой. Хүү маань одоо гурван настай. Харин охин маань гурван сартай. Охинтой болно гэж мэдээгүй. Ээж нь нэг болохоор хүү гээд л нэг болохоор охин гээд байсан. Гэхдээ надад бол аль нь ч байсан би баярлах л байсан. Хүүхэд бол хүүхэд шүү дээ. Хүү охинтой хүний хувьд амьдрал тэгширлээ гэж ярьдаг шиг хүүтэй бас охинтой болно гэдэг бол маш том аз жаргал шүү дээ. Би гэр бүлийнхээ хүнтэй ханилаад арван жил болж байна. Бид хоёр их сургуулиа төгсөөд л танилцаж байсан.

-Гэр бүлийн хүн тань хүн ямар мэргэжилтэй вэ? Одоогоор ямар ажил эрхэлж байна?

-Эхнэр маань герман хэлний мэргэжилтэй. Одоогоор сурч байгаа. Гэхдээ хувиараа бизнес хийдэг юм.

-Нууц биш бол ямар бизнес хийдэг вэ?

-“Fashion “ гэх үү дээ. (Инээв)

-Ярилцсанд баярлалаа

Эх сурвалж: “Тэргүүн”

“TV Cocktail” хамтлагийн ахлагч Л.Өнөржаргал: Бид орлогоороо цалинждаг учраас хэдэн сараар ч цалин авахгүй суух тохиолдол бий
Tweet
Bolod.mn