2012-10-142012 оны 12-р сард дэлхий сүйрэх тухай элдэв янзын ямар ч баримт судалгаа дээр
![](http://www.fact.mn/wp-content/uploads/2017/04/zar600x100.gif)
суурилаагүй солиотой гэмээр хий хоосон цуурхалууд бүр олон жилийн өмнөөс
интернэтээр эргэлдэж эхэлсэн билээ. Эртний Маяачуудын он тоолол дуусна, дэлхийн
соронзон орон солигдоно, Нибиру хэмээх гариг дэлхийг мөргөнө гэх мэт цуурхлууд
дэлхий дахинд сүүлийн хэдэн жил "мода"-нд орж байна. 2012 оны сүйрлийн тухай хэд
хэдэн кино бас нийт 300 гаруй зохиолын ном өнөөдрийн байдлаар Amazon.com дээр байна
гэж бодохоор дэлхийн хүн амд энэ цуурхал яаж тарж байгаа нь харагдаж байна.
Миний анзаарснаар манай Монголд харин иймэрхүү 2012 гэсэн дэмийрэл саяхныг
болтол хурц ажиглагдаж байсангүй, нөгөө л хэдэн бөө лам нар маань дошин дээрээ
галзуурч байснаас цаашгүй байх шиг байсан. Сая бас төрийн ордонд гал тахина, эмэгтэй
хүн оруулахгүй гэж манай хэд бас элгийг нь авсан шүү!
За тэр яахав, хэдэн сарын өмнө нэг зурагтын нэвтрүүлэг үзэхэд Монголдоо нилээн нэр хүндтэй нэгэн нэвтрүүлэгч 2012 оны сүйрлийн талаар хэдэн ном бичсэн гэнэ үү нэг бүдүүн хүүхэнг сайхан туулгаад сууж байхыг нь харлаа. Бас анзаараад байхад Монголчуудын хамгийн их үйлчлүүлдэг мэдээллийн вэб хуудаснууд дээр 2012 гэсэн солиотой баахан нийтлэл сүүлийн хэдхэн сарын дотор гарсан байсан. Мөн миний танилын хүрээнд 2012 оны сүйрэлд бэлдэнэ гээд хүмүүс хэдэн луйварчин бөө лам нарынхаа үгээр хоол хүнс нөөцөлж хорогдох "оков"
барьж эхэллээ гэх мэдээ чих дэлсэв (мэдээж бас бөө лам нартаа ингэж тусалж байгаад нь
хишиг хүртээлгүй яахав ). Ийн үүднээс миний бие энэхүү нийтлэлээрээ иргэдээс ирдэг
хамгийн түгээмэл хэдэн асуултад хариулахаар шийдлээ.
1. Яагаад эртний Маяачуудын он тоолол дэлхий 2012 онд сүйрнэ гэж хэлж байна вэ?
Би тэдний он тоолол нь гариг эрхэсийн байршилыг өндөр нарийвчлалтай тооцоолж
чаддаг гэж сонссон. Судлаачид эрдэмтэд та нар тэднээс илүү ихийг мэдэж байгаа
гэдгээ яаж мэдэж байгаа юм бэ?
Аливаа он тоолол нь өнгөрч буй цаг хугацааг тэмдэглэн бүртгэж, түүн дээрээ
тулгуурлан ирээдүйд болох тодорхой үйл явдлуудыг урьдчилан мэдэхийг зорьдог. Үйл
явдлууд гэдэгт улирал, өдөр хоног солигдох, нар, сар мөн зарим гаригуудын тэнгэрт
харагдах байршлыг тодорхой нарийвчлалтайгаар урьдчилан мэдэх явдалууд орох
болохоос биш хэзээ дэлхий сөнөх, хэзээ та үсээ засуулвал, хурим найр хийвэл бас
эхнэр/нөхөртэйгээ секс хийвэл сайн эсвэл муу вэ гэдэг орохгүй! Гэвч зарим хүмүүс
иймэрхүү зүйлийг он тоолол хэлж өгнө гэж итгэдэг. Энэ нь дэлхий даяар байдаг элдэв
янзын зурхай, Ностродамусын зөгнөл, лам, бөө, ид шидтэнгүүд аль ч нийгэмд ихэнх
хүмүүсийн дунд маш их алдартай байдаг гэдгээс илхэн харагдана.
Гэвч харамсалтай нь эдний аль нь ч үнэн биш юм. Хэн нэгэн ирээдүйг урьдчилан харж
чаддаг гэх ямар ч шинжлэх ухааны баримт нотолгоо байхгүй бөгөөд, монголчуудын дунд алдартай зөн
билэг, 6 дахь мэдрэхүй гэх мэт ойлголтуудыг дэмжсэн нэг ч баримт байхгүй. Манайхан
дотооддоо баахан ид шидтэн хардаг үздэг хүмүүстэйн дээр саяхнаас оросын тв шоув
"битва экстрасэнсов"-т хошууран дурлах болсон. Тв шоув бол тв шоув.
Маяачуудын (Месоамерикийн) он тоолол нь ирээдүйг зөгнөж хэлж чаддаг хүчтэй
мундаг гэх ойлголт өнөө нийгэмд маш түгээмэл болж. Гэвч эртний Маяачууд 2012 онд
дэлхий сүйрэх тухай нэг ч үг үсэг бичиж үлдээгээгүйг анхаараарай. 1966 онд Майкл Д.
Көү гэх хүн "Маяа" хэмээх номондоо анх Маяачуудын урт он тоолол нь дэлхийн сүйрлийг
зөгнөж байж болох юм гэсэн санааг анх гаргаж ирж байсан юм. Өдийг хүртэл тархаж, цар
хүрээ хамарсан сүйрлийн талаарх элдэв цуурхал солиорлууд нь энэ хүний номноос хойш
цэцэглэсэн гэж хэлж болно. Ингэхдээ ихэнх тохиолдолд өнөөдрийг хүртэл төв америкт
амьдарсаар байгаа 3 сая гаруй жинхэнэ Маяачуудаас юу ч асуулгүйгээр шүү.
Тухайн цаг үедээ мэдээж Маяачуудын он тоолол нь хүн төрөлхтний хувьд мундаг
лут амжилт байсан, гэвч энэ он тоолол нь зарим хүний бодоод байгаа шиг өнөөдрийн
бидний мэдлэг чадвараас давсан тийм нарийвчлалтай ердөө ч байгаагүй. Наад захын
жишээ гэвэл энэ тоололд өндөр жил гэж байдаггүй, тиймээс хэдхэн жилийн дотор улирал
солигдох мөчлөгүүдээс зөрчихнө. Энэ зөрөө нь хүнд анзаарагдаад ирэхээр төрийн дээд
хуврага нь түүнийг нь залруулж он тооллоо байнга шинээр шилжүүлэх шаардлагатай
байдаг байсан (яг л Цезарийн өмнөх эртний Ромын он тоолол шиг ). Ер нь аливаа эртний
он тоололууд нь түүх судлаачдын хувьд л чухал болохоос өнөөдрийн бидний цаг хугацааг
бүртгэхдээ өдөр бүр хэрэглэдэг нарийн он тоололын хажууд нарийвчлалаараа ойртож ч
очихгүй. Хамгийн гол нь эртний ч бай одоогийн бидний хэргэлж байгаа ч бай, аливаа он
тоолол нь ирээдүйн аль нэг цагт ирж буй аюулыг анхааруулах, дэлхийд юу тохиолдохыг
урьдчилан мэдэх байтугай яг тухайн 2012 он гэх мэт цаг үед хэн нэгэнд юу тохиолдохыг
урьдчилж харуулах ямар ч боломжгүй. Мөн нэмээд хэлэхэд, яг Маяачуудын он тооллыг
судалдаг хүмүүс энэ урт он тоололын мөчлөг нь яг хэзээ дуусах вэ гэдэгт одоог хүртэл
санал нэгддэггүй. Өөрөөр хэлбэл энэ урт он тооллыг бидний өнөөгийн он тоололтой
синхронизаци хийх судлаачидын санал нэгдсэн зам байдаггүй гэсэн үг, тиймээс дэлхий
сөнөнө гээд байгаа эдгээр хүмүүсийн 2012 оны 12р сарын 21 гэж хэлээд байгаа
Маяачуудын он тооллын өдөр нь угтаа аль хэдийнээ олон жилин өмнө өнгөрчихсөн эсвэл
ирээдүйд олон 10 жилийн дараа ч байж болно - нэг ѐсондоо ийм юм ярьж явдаг хүмүүс он
тооллоо ч эхлээд зөв яаж хөрвүүлэхээ мэддэггүй гэсэн үг.
Дэлгэрэнгүй - http://www.2012hoax.org/mayan-prediction
2. Туйл шилжих онол гэж юу вэ? Дэлхийн царцдас давхарга хэдхэн цаг/өдрийн дотор
180 градус эргэнэ гэдэг үнэн үү? Энэ нь манай нарны аймаг манай оддын айн
(галактикийн) хэвтээ тэнхлэг дор орохтой холбоотой юу?
Дэлхийн царцдас давхарга тэгж эргэнэ гэдэг боломжгүй зүйл бөгөөд, түүхэнд хэзээ
ч тэгж байгаагүй мөн хэзээ ч тэгэхгүй. Мэдээж хүний хумс ургахтай ойролцоо хурдаар
тектоникийн хавтангууд байнга хөдөлж байдаг (жишээ нь одоогийн Антарктид нь хэдэн
зуун сая жилийн өмнө дэлхийн гол бүслүүр хавьцаа байсан), гэвч энэ нь туйл гэнэт
шилжиж солигдоно гээд байгаатай ямар ч хамааралгүй. Харамсалтай нь маш олон ном
зохиол болон вэб хуудаснууд ямар ч шинжлэх ухааны үнэслэлгүйгээр дэлхийн туйл гэнэт
шилжиж, царцдас давхарга нь хэзээ ч боломжгүй байдлаар хөдөлнө гэж хэлдэг. Ямар ч
физикийн ойлголт үндэслэлгүйгээр шууд л дэлхийн эргэлтийн тэнхлэг болон соронзон
орны тэнхлэгийн хамаарлаас ийм юм 2012 онд болно гэж хэлж байгаа юм.
Дунджаар 400,000 жил тутам (100,000 - 1.5сая жилийн давтамжтай) дэлхийн
соронзон орны туйл солигддог. Хамгийн сүүлд 780,000 жилийн өмнө болсон бөгөөд
бидний судалж мэдсэнээр энэ үйл явц нь хэдэн 1000 жилийн турш аажуу болж өнгөрдөг.
Энэ үер дэлхийн соронзон орон сансрын туяанаас гадрагаа хамгаалсаар байх бөгөөд, энэ
үйл явцтай холбоотой ямар нэгэн гамшиг болж байсан гэсэн баримт ерөөсөө байхгүй.
Тэглээ ч дараачийнх нь ойрын хагас сая жилд болох магадлал маш бага. Гэвч эдгээр
хүмүүс яг 2012 онд туйл солигдсоноор дэлхийн эргэлтийн тэнхлэг бас солигдоно гэж залж
байгаа юм.
Гол санаа нь юу вэ гэхээр нэгдүгээрт, дэлхийн эргэлтийн тэнхлэг соронзон орны
тэнхлэг 2 тэдгээр хүмүүсийн ярьж байгаа шиг хамааралгүй. Хоѐрдугаарт дор хаяж ойрын
хэдэн 10,000 жилд туйл солигдоно гэж үзэх ямар ч үндэслэл байхгүй бөгөөд, солигдлоо ч
дэлхий дээрх амьдралд энэ нь ямар ч муу нөлөөгүй. Гуравдугаарт дэлхийн эргэлтийн
тэнхлэг гэнэт өөрчлөгдөөд гадарга дээрх бүх амьдрал устана гэдэг байж боломгүй зүйл.
Мөн эдгээрийн аль нь ч манай нарны аймаг өөрийн оддын айн тэнхлэг доор орохтой ямар
ч холбоогүй.
3. Бүх гаригууд 2012 онд нэг шугаманд давхцаад, дэлхий өөрөө манай сүүн зам оддын
айн төвд нь ирэхэд энэ нь дэлхийд ямар нөлөөтэй вэ? Энэнээс болж туйлын
солигдолт болох уу?
2012 онд болон түүнээс цааших хэдэн жилд бүх гаригууд байтугай цөөн хэдэн
гариг ч нэг шугаманд орохгүй. Гаригууд нэг шугаманд орлоо ч дэлхийд ямар нэгэн хүнд
мэдрэгдэх нөлөөлөл үзүүлэхгүй. 2012 онд гаригуудын байршил ямар байхыг доорх
зурагнаас харна уу-"дэлхий өөрөө манай сүүн зам оддын айн төвд нь ирэхэд" гэдгээр яаг юу хэлээд
байгааг ойлгох ч юм алга үнэндээ. Манай нар сүүн замын төвийг 230 сая гаруй жилийн
давтамжтайгаар 30,000 гэрлийн жилийн зайд тойрж эргэдэг. 2012 онд шууд нэг жилийн
дотор сүүн замын төврүү очно гэсэн ойлголт огт байхгүй. Өмнөх асуултын хариултанд
хэлсэнчлэн, дэлхийн эргэлтийн туйл солигдоно гэдэг боломжгүй зүйл. Харин нөгөө галзуу
вэб хуудас номнуудын хэлдэг дээрхтэй холбоотой нэг юм нь нар дэлхий 2 сүүн замын
төвтэй нэг шугаманд ирснээр сүйрэл ирнэ гэдэг. Энэ үйл явдал нь дэлхий дээр ямар ч гай
гамшиг авчрахгүйгээр жил болгоны 12р сард болдог бөгөөд, 2012 оныход нь ямар нэгэн
юм түүнээс болж тохиолдоно гэсэн юм байхгүй.
4. Нибиру гариг гэж юу вэ? Хаанаас юунаас болоод хүмүүс гэнэт үүний талаар яриад
эхэлсэн юм бэ?
Зэкариа Ситчин хэмээх зохиолч 70-аад оны үеэс эртний Месопотамийн Сумерийн
соѐл иргэншлийн тухай хэд хэдэн номондоо тэрээр, нарыг 3600 жилд тойрдог Нибиру
хэмээх гаригын тухай Сумерчууд тэмдэглэж өгүүлснийг олсон тухайгаа бичиж байв
(жишээ нь "12 дахь гариг", 1976 онд хэвлүүлсэн). Түүнийхээр бол Сумерийн судрууд нь
харь гаригийн Аннунаки хэмээх "эртний сансрын нисгэгчид" дэлхий дээр зочилж байсныг
өгүүлдэг. Тэрээр мөн номондоо Аннунакичууд болон Нибиру гариг 21-р зуунд бидэн дээр
ахин ирнэ гэж хэлсэн байгаа юм.
Нэнси Лайдер хэмээх өөр нэг зохиолч, бас болоогүй өөрийгөө харь гаригийнхантай
холбогддог зөнч гээд байгаа нөхөр өөрийн вэб хуудсандаа түүний холбогддог цаадуул нь
дэлхий удахгүй Х-гариг буюу Нибирутай мөргөлдөх аюултай гэж бичсэн аж. Тэрээр
анхандаа 2003 оны 5 сард тийм юм болно гэж байсан ч, мэдээж тэр өдөр нь юу ч болоогүй
учир 2012 оны 12р сарын 21рүү мөргөлдөх өдрийг шилжүүлсэн юм.
Ерөнхийдөө энэ 2 эх үүсвэрээс Нибирутай холбоотой хий хоосон цуурхал газар авч
эхэлсэн гэж ойлгож болно.
Дэлгэрэнгүй- http://www.sitchiniswrong.com/
http://www.badastronomy.com/bad/misc/planetx/
5. Сумерчууд анхны агуу соѐл иргэншил байсан, мөн тэд дэлхий ван, далай ван,
тэнгэр ван зэрэг гаригуудыг байдгийг нь мэдэж байсан гэх мэт одон орны маш олон
зөв мэдээлэлтэй байсан. Тиймээс яагаад бид тэдний Нибиругийн талаарх асуудалд
итгэхгүй байх ѐстой гэж?
Нибиру гэдэг нь Вавилоны зурхайд Мардук хэмээх бурхантай холбоотой нэр. Мөн
Нибиру гэдэг нь заримдаа "тэнгэрийн огтлолцол" гэж орчуулагддаг. Ассир хааны үед
(668-627 МЭӨ) тэмдэглэгдэн үлдсэн Энума Элиш хэмээх Вавилоны ертөнцийн үүслийн
тухай шүлгэнд нэгэн жижиг дүрийн нэрийг бас Нибиру гэж тэмдэглэсэн байдаг. Яг
Месопотамийн эртний сурвалжуудыг судалж орчуулж амьдардаг эрдэмтдийн нэг нь ч
Нибиру гэж гариг байдаг бөгөөд эртний Сумерчууд түүний талаар мэддэг байсан гэдэгтэй
санал нийлдэггүй. Сумер бол мэдээж хөдөө аж ахуй, усны менежмент, хот төлөвлөлт мөн
бичиг үсгийн суурийг тавьсан тухайн цаг үедээ мундаг лут соѐл иргэншил байсан. Гэвч
тэд одон орны мэдлэгийнхээ тухай маш цөөн баримт үлдээсэн байдаг ба Тэнгэрийн ван,
Далай ван мөн Дэлхий вангийн талаар мэддэг байсан гэдэг бол ямар ч үндэслэлгүй зүйл
юм. Тэд гаригууд нарыг тойрдог гэдгийг ч мэддэггүй байсан, бүр сүүлд 2000 жилийн
дараа эртний герегт нар төвт санаа анх цэцэглэсэн шүү дээ. Сумерчууд бидний одоо
мэддэггүй одон орны мэдлэгийг мэддэг байсан, мөн Нибиру хэмээх гаригийн талаар
мэддэг байсан гэх мэт нь Ситчин гэж анх энэ санаануудыг гаргаж ирсэн хүний дэмийрэл
солиорол төдий.
6. НАСА өөрөө 1983 онд Нибируг нээгээд, тэр үедээ сонин хэвлэлээр шуугиад, тэд
чинь бүр Х-гариг, мөн Эрис бас Тайки гэж нэрлэж байсан байхад Нибиру байхгүй
гэж яаж хэлж чадаж байна аа?
АйРАС(IRAS) хэмээх НАСА-ийн инфра-улаан туяаны одон орны сансрын дуран нь
1983 онд сансарт 10 сарын турш самналт хийж маш олон тооны инфра-улаан туяны мужид
хүчтэй цацаргалт хийдэг эх үүсвэрүүдийг олсон. Гэвч тэдний нэг нь ч Нибиру эсвэл Х-
гариг байгаагүй. Товчхондоо бол, ИРАС дуран нь 350,000 обьектийг ангилсан бөгөөд
эхэндээ тэдний ихэнхийг нь яаг юу гэдгийг нь мэддэггүй байсан (мэдээж ингэж үл
мэдэгдэх объектуудыг хайж олно гэдэг чинь л ийм судалгааны зорилго). Эдгээр бүх
объектуудыг хожим нь сансраас болон гадаргаас илүү хүчтэй дуран төхөөрөмжөөр
судласан бөгөөд, "10 дахь гариг нээгдлээ" гэх цуурхал нь 1984 онд Astrophysical Journal
Letters сэтгүүлд хэвлэгдсэн "АйРАС бичил самналтын үл мэдэгдэх эх үүсвэрүүд" хэмээх
цөөн хэдэн тэр үедээ ойлгомжгүй байсан объектуудын талаарх нийтлэлээс үүдэлтэй юм.
Гэвч 1987 онд хэвлэгдсэн судалгаагаар тэдгээр эх үүсвэрүүд нь бүгд алсын оддын ай
болох нь тогтоогдсон бөгөөд (нэгээс бусад нь, тэр нь од хоорондын бичил мананцар байж
таарсан), АйРАС самналтанд нэг ч гариг эх үүсвэр болж бүртгэгдээгүй. Хамгийн гол нь
НАСА-ийн эрдэмтэд хэзээ ч Нибируг олоогүй бөгөөд, хэзээ ч олсон гэж хэлээгүй, энэ бол
шал худал цуурхал.
Одон орон судлалд ерөнхийдөө яг бат нээгдэж тодорхой болоогүй байгаа нарны
аймгийн гариг (мөн одой гариг) - ийг Х-гариг гэж түр зуртаа л нэрлэдэг "заншил" байсан.
Хэрэв үнэхээр ямар нэгэн гариг гэдэг нь тогтоогдвол энгийн нэртэй болно. Жишээ нь
Дэлхий Ван гаригийг нээгдэхээс нь өмнө Х-гариг гэж байсан, бас Эрис одой гаригийг яг
бат нээгдэхээс нь өмнө Х-гариг гэж байсан. Хэрвээ эсрэгээрээ гариг биш бол тэгээд л
судлаачид ахиж тэрний талаар ярихгүй. Эрис нь манай нарны аймгийн гадаад хэсэгт
байдаг хэд хэдэн одой гаригуудын нэг нь бөгөөд Дэлхий ваны адил манай сарнаас ч
жижигхэн. Бүх одой гаригийн тойрог зам нь тэднийг хэзээ ч дэлхийн ойролцоо авчрахгүй
бөгөөд Эрисийн хувьд хэзээ ч дэлхийрүү 6.5сая км-ээс илүү ойртохгүй.
Харин Тайки бол манай нарны аймгийн захад байж болзошгүй гэж тухайн үедээ
үзэж байсан биет юм. Анх 1999 онд нарны аймгийн сүүлт одуудын тойрог замыг судалсны
үндсэн дээр яригдаж эхэлсэн. Энэ биет нь хэзээ ч ажиглагдаж байгаагүй бөгөөд хэрвээ
үнэхээр байдаг байсан бол хичнээн нарнаас хол ч орчин үеийн маш мэдрэг инфра-улаан
туяаны самналтанд (жишээ нь ВАЙЗ (WISE)) хэмжигдэх ѐстой байсан. Тиймээс ч өнөөдөр
ийм гариг манай нарны аймгийн захад байдаг гэдэгт итгэдэг одон оронч гэж байхгүй. Бас
байдаг байлаа гэж бодоход ийм биет нь нарны аймгийн бусад гаригуудад ямар ч
таталцлын нөлөө үзүүлэхгүй (бүр маш маш бага).
Дэлгэрэнгүй- http://spider.ipac.caltech.edu/staff/tchester/iras/no_tenth_planet_yet.html
www.badastronomy.com/bad/misc/planetx/science.html#iras
7. Google Sky болон Microsoft Telescope дээр (5h 53m 27s, -6h 10m 58s) гэх координат
дээр яагаад юу ч байхгүй харласан байдаг юм бэ? Нибиру тэнд одоо байгаа болохоор
засгийн газар нуух гээд харлуулчихсан юм биш үү?
Google Sky болон бусад интернэт дээрх тэнгэрийн зурагууд нь олон тооны тусдаа
зурагнуудыг нийлүүлж бүтээгдсэн. Тэдгээр зургуудын ихэнх нь 50 гаруй жилийн өмнө
хийгдсэн Паломар Тэнгэрийн Самналтын зурагнууд, зарим нэг нь арай сүүлийн үеийн
Слоан Дижитал Тэнгэрийн Самналтынх. Гол нь хүмүүс Google Sky-ийг яг одоо байгаа
тэнгэрийг харуулж байна гэж ойлгоод байна, таны Google Sky дээр харж байгаа бол 8-50
жилийн өмнөх тэнгэрийн зурагнууд гэсэн үг. Тиймээс үнэхээр Нибиру байдаг байлаа ч
эдгээр хуучны зурагнууд дээр байх боломжгүй. Юу ч байхгүй харлаж байгаа нь эдгээр
хуучин самналтууд тэр хэсгийн зургийг аваагүй л байна гэсэн үг. Энэ хэлсэнтэй адилхан
Охины ордны орчинд мөн төстэй харласан хэсэг байгаа.
Хэрвээ үнэн байсан бол түүнийг хэдэн жилийн өмнө мэргэжлийн болоод сонирхогч
одон орончид аль хэзээний олчихсон байх байсан. Өнөөдөр дэлхий дээр 10,000 гаруй
мэргэжлийн одонорончид мөн 100,000 хол давсан сонирхогчид өнцөг булан бүрт бий.
Мэргэжлийн одонорончид дээрээс амаа хамхих даалгавар авсан байлаа ч амаа хамхиад
суух хүмүүс биш. Мөн Америкт ихэнх одонорончид их сургуулиудад ажилладаг,
академийн байгууллагад, тэрнээс биш засгийн газарын харьяанд ажилладаггүй. Их сургуулиуд ихэнх дуран авайг удирддаг, бүр алдарт сансрын Хаббл дуранг хүртэл их
сургуулиудын нэгдсэн консорциум удирддаг. НАСА болон бусад засгийн газрын харъяа
агентлагууд нь гаднаас ихэнхидээ мэдээлэл авдаг болохоос эсрэгээрээ биш.
Дэлгэрэнгүй- http://www.2012hoax.org/google-sky
8. Нибуру худлаа цуурхал гэдгийг батлаж чадах юм уу? 2012 онд янз янзын юм болно
гэж цаана чинь зөндөө хүмүүс ярьж байна. НАСА болон Америкийн засгийн газар
биднээс хамаг юмыг нууж байна.
Үүнийг батлах ердөсөө ч хэцүү биш. Тэдгээр солиотой хүмүүсийн хэлж байгаагаар
Нибиру нь Бархасбадьтай ойролцоо хэмжээтэй, нарыг 3600 жилийн давтамжтай тойрог
замаар тойрдог бөгөөд дэлхийг 2012 оны 12р сард (яг 21 энэ тэр гэхээ бүр больѐ л доо)
мөргөнө гээд байгаа. Хэрвээ үнэхээр байдаг бол одоо (2012 оны эхээр) тэр гариг шөнийн
тэнгэрт хүн болгонд харагдах зайнд ирсэн байх ѐстой. Мэдээж тийм гаригийг хэн ч
хараагүй. Жил хүрэхгүй хугацаанд ирж мөргөх гээд байгаа гаригийг дэлхий дээрх
ажиглагч болгоноос нуух ямар ч бололцоогүй. Цаашлаад, жинхэнээсээ ирж яваа бол манай
нарны аймгийн гаригуудын тойрог замыг өөрчилж нөлөөлнө. Ийм нөлөөлөл байна уу
үгүй юу гэдгийг хэмжих нэг арга зам нь дэлхийгээс өдөр тутам ангараг гаригийг тойрон
буй хиймэл дагуулуудтайгаа харилцах холбоог харж болно. Тэдгээр хиймэл дагуул болон
дэлхий нь хоорондоо радио сигналаар харилцах бөгөөд, тэр сигнал дэлхийд/хиймэл дагуул
дээр хэзээ хаана ирж байна вэ гэдэг нь дэлхий ангараг хоѐрын харьцангуй хурд болоод
хоорондох зайнаас маш нарийн хамааралтай. Хэрвээ жаахан л өөрчлөлт гарах юм бол
хиймэл дагуулыг удирддаг хүмүүс шууд анзаарах бөгөөд яаралтай арга хэмжээ авах хэрэг
гарна. Эцэст нь бид дотоод нарны аймгийн дундуур ямар ч гариг байнга "шумбаж"
байгаагүйг бат хэлж чадна. Хэрвээ тийм зүйл болдог байсан бол манай сар өдийд дэлхийг
тойроод байж байхгүй бөгөөд дотоод гаригуудын эксцентриситет болон тойрог замын
налуу нь маш өндөр байх байсан. Зөвхөн Нибиру гээч юм байхгүй ч биш, сүүлийн хэдэн
зуун сая жилийн турш манай нарны аймгийн дотоод хэсэгт ямар ч гаригийн хэмжээтэй
зүйл орж ирээгүй гэдэгт эргэлзэх зүйл байхгүй.
Миний үгэнд та итгэх ямар ч шаардлагагүй л дээ. Утгаа бол ямар ч шинжлэх
ухааны мэдлэггүй хүнд ч энэ нь тодорхой зүйл. 2008 онд маш олон вэб хуудаснууд 2009
оны хавар Нибиру нүдэнд харагдана гэж байсан. Мэдээж тийм юм болоогүй, тэгээд л 2012
он болсон. 2012 онд ч тийм юм болохгүй болохоор ахиад л нөгөө хэдэн луйварчид маань
цагаа урагшлуулахаас өөр замгүй. 2012 онд нарны аймгийн дотоод хэсэгрүү бүхэл бүтэн
гариг ирж яваа бол одоо дэлхий даяар тэрнийг чинь хэдэн 10,000 мэргэжлийн болоод
мэргэжлийн бус хүмүүс судлаад хараад сууж байна. Хэн нэгэн Нибиру гаригийг харсан
гэж хэлээгүй л биз дээ?! үнэхээр байдаг байсан бол хэн ч түүнийг нууж чадахгүй.
9. Дэлхий нар 2 манай асар их масс бүхий хар нүхтэй сүүн замын тэнхлэгтэй нэг
шугаманд ороход ямар нэгэн зүйл болохгүй гэж үү? учир нь хар нүх маш их
таталцлын хүчтэй шүү дээ.
Манай оддын ай сүүн замын төвд маш их масстай хар нүх байгаа нь үнэн. Гэвч дээр
хэлсэнчлэн сүүн замын төв нь манай нарнаас 30,000 гэрлийн жилийн асар их зайд оршино,
тиймээс манай нарны аймагт, дэлхийд, бидэнд анзаарагдах нөлөөллөл гэж байхгүй. Зөвхөн
нар сарны таталцлын хүч л дэлхийд хүнд мэдрэгдэхээр нөлөөлнө (татлага, түрлэгэ). Манай
одны айн тэнхлэгтэй эсвэл төвтэй нь дэлхий нар нэг шугаманд орж гарахад ямар ч гойд
гоц юм байхгүй. Дайрч гарахын хувьд сүүлийн удаа хэдэн сая жилийн өмнө манай нарны
аймаг сүүн замын тэнхлэгээр дайрч гарсан, тиймээс энэ жил ахиад дайрч гарна гэдэг
худал.
10. Би 2012 онд түүхэн дахь хамгийн хүчтэй нарны шуурга болоход соронзон орны
туйл солигдоод хүн төрөлхтөн мөхнө гэж сонссон. Энэ үнэн үү?
Нарны хүчтэй идэвхжилийн үеэр (ойролцоогоор 11 жил тутам болно) нарны
гадарга дээрх толбонууд, тэсрэлт, титмийн масс шидэлт мөн нарны шуурганы хэмжээ
болон хүч нь идэвхжил бага үеэс эрс ихэснэ. Титмийн масс шидэлт болон нарны шуурга
нь дэлхийн гадарга дээрх хүнд болон бусад амьтдад аюулгүй, харин тойрог замд эсвэл
саран дээр байгаа сансрын нисгэгчдийг гэмтээж болно. Сансар судлалын агентлагууд
сансрын нисгэгчидийн хувьд яаж үүний учрыг олохыг бодох хэрэгтэй, тэрнээс биш та бид
хоѐрт хамаагүй. Гадарга дээрх бүр хүчтэй тэсрэлт нь радио холбоонд нөлөөлж, тод туйлын
туяаг татуулж мөн зарим хиймэл дагуулуудын цахилгаан эд ангийг гэмтээж болно.
Өнөөдөр ихэнх хиймэл дагуулууд эдгээрээс хамгаалах ямар нэгэн арга барилтай болсон,
жишээ нь идэвхжилийн үеэр унтаа байдалд шилжих буюу зарим эмзэг цахилгаан эд ангиа
унтраах гэх мэт. Бүр хүчтэй нарны идэвхжил нь зарим тохиолдолд гадарга дээрх
цахилгаан холбоонд гэмтэл учруулж болох авч иймэрхүү үзэгдэл нь маш ховор л
тохиолдоно.
Сүүлийн нарны идэвхжил 2001 онд болсон, түүний дараачийн идэвхжилгүй үе нь
ер бусын "чимээгүй" байсан. Наран дээр бүтэн 2 жилийн турш бараг ямар ч толбо
идэвхжил ажиглагдаагүй гэхэд болно. Дараачийн идэвхжилийг 2012 биш харин 2013 онд
болно гэж судлаачид тооцоолоод байна.
Дэлхийн соронзон орон маань нарнаас ирж байгаа материалыг "шингээж" эсвэл өөр
тийш нь ойлгож дэлхийн гадарга дээрх амьдралыг хамгаалдаг. Соронзон орны тууль
дунджаар 400,000 жилд нэг удаа хэдэн 1000 жилийн турш аажмаар солигддог, тэр үед
соронзон орон байнга байсаар байх болохоор гадарга дээрх амьдралд ямар ч нөлөөлөлгүй
гэж дээр хэлсэн билээ.
11. 2012 онд дэлхийг том солир чулуу ирж мөргөх үү?
Үгүй. Дэлхий түүхэндээ солир болон бага гаригуудад дэлхийн настай
харьцангуйгаар хэлвэл "байнга" бөмбөгдүүлсээр ирсэн. Гадрага дээрх амьдралыг
хэсэгчлэн эсвэл бүтнээр нь устгах хэмжээний том биеттэй мөргөлдөх нь маш ховор бөгөөд
хамгийн сүүлд 65 сая жилийн өмнө аварга бага гариг дэлхийг мөргөн үлэг гүрвэлүүдийг
устгаад, сүүн тэжээлтнүүдэд дэлхийд ноѐрхох боломжийг олгосон билээ. Өнөөдөр НАСА
нь дэлхийтэй мөргөлдөж магадгүй сүүлт одод болон бага гаригуудыг тийм юм болохоос
хамаагүй урьтаж олохын тулд хэд хэдэн судалгааны ажлыг тогтмол хийдэг. Биднийг 2012
онд ирж мөргөөд сүйрүүлэх сүүлт од, бага гариг байхгүй гэдгийг баттай хэлж чадна.
Тэдгээр тандалтын судалгаанууд бүгд өөрийн хийсэн бүх нээлтээ өдөр бүр олон нийтэд ил
тод байлгаж байдаг бөгөөд дэлхийн орчмын биетүүдийг судлах тэнхимийн вэб хуудаснаас
та өөрөө 2012 онд биднийг юм тоож мөргөх нь үү гэдгийг үзэж болно-
http://neo.jpl.nasa.gov
12. Хэрвээ энэ 2012 гээд байгаа чинь цуурхал юм бол яагаад дэлхий дээр хүчтэй газар
хөдлөлтүүд, хар салхи, далайн шуурганууд ихсэж нар улам идэвхжиж манай
гаригийн температур өсөөд байгаа юм бэ?
Нарны идэвхжилийн талаар дээр хариулсан билээ. Хар салхи, далайн шуурга мөн
газар хөдлөлтийн тухайд бол 2011 болон түүнээс өмнөх онуудад болсон үйл явдалууд
олон жилийн дундажаас гажсан юм ердөөсөө ч байхгүй. Өнгөрөгч 3р сард Японд ер бусын
хүчтэй газар хөдлөлт болсоныг эс тооцвол 2011 онд болсон газар хөдлөлтийн хэмжээ
болон давтамж нь өмнөх жилүүдийнхээс статистикийн хувьд ялгаагүй. Японд болсон шиг
хүчтэй газар хөдлөлтүүд угаасаа хэдэн жилийн давтамжтай болж л байдаг, миний санахын
хамгийн сүүлд 2004 онд Индонези орчимд бас л маш хүчтэй газар шилгээсэн билээ. Одон
орончид болон геологчид дэлхий дээр болон дэлхийн эргэн тойронд болж байгаа
процессуудыг тогтмол судалж ажиглаж байгаа, хэрвээ ямар нэгэн ер бусын ихэссэн эсвэл
багассан зүйл ажиглагдвал эдгээр мэргэжилтнүүд тэр дор нь анзаарна шүү дээ.
Харин нэг бодит өөрчлөлт бол дэлхийн дулаарал, түүнийг шинжлэх ухаан маш
сайн судалж бүртгэсэн байгаа. 2012 онтой ямар ч холбоогүйгээр сүүлийн хэдэн арван
жилийн дунджаар ган,үер, шуурга, мөн манай Монголын малчидыг маань зовоодог зудны
давтамжийн ихсэлт нь агаар мандал дахь нүүрстөрөгчийн давхар исэлийн хэмжээ
ихэссэнтэй салшгүй холбоотой. Хэрвээ бид хэрэглээ, хөгжилөө зохицуулахгүй бол дэлхий
2012 оноос ч цааш улам дулаарч, ган гачиг, зудны давтамж мөн хүч нь улам ихсэж,
дэлхийн ихэнх хэсэгт цаг агаарын өөрчлөлт улам хүчтэй явагдана.13. Энэ бүгд үнэхээр цуурхал юм бол яагаад НАСА няцаасан мэдэгдэл хийдэггүй юм
бэ? Яагаад ийм худал хуурмаг юм олон нийтэд ингэж тараагдахыг зөвшөөрч байгаа
юм бэ? Яагаад дэлхийн засгийн газрууд юу ч хийхгүй байгаа юм бэ?
Хэрвээ та НАСА-ийн албан ѐсны хуудсыг үзэх юм бол 2012-ын талаар зөндөө
нийтлэлүүд байгаа. Хайлтын самбар дээр нь "2012" гэж бичихэд л хэдэн зуун тайлбар
нийтлэлүүд байгааг олж харна. Үүнээс илүүг НАСА хийж чадахгүй. Эдгээр цуурхал худал
хуурмаг яриа зохиол нь НАСА-тай ямар ч хамаагүй бөгөөд НАСА-ийн дата мэдээлэл дээр
үндэслэгдээгүй. Дэлхий дээрх бүх л эрдэмтэд энэ цуурхал хуурамч яриа солиорол нь
дэлхийн ард иргэдийн анхаарлыг жинхэнэ бодит асуудлуудаас холдуулж байгаад эмзэглэж
байна. Жишээ нь дэлхийн дулаарал, ан амьтдын болон байгаль орчны мөхөл гэх мэт
бодит, үнэхээр хүн төрөлхтөнд ойрын ирээдүйд (мэдээж 2012 онд биш) аюул занаж
мэдэхээр асуудлууд үстэй толгойноос их байна. Мөн эдгээр цуурхалууд цагаан цаас шиг
сэтгэлтэй бидний ирээдүй болсон хүүхдүүдийн сэтгэхүйд яаж бууж байгаад санаа зовж
байна.
Бүгдийг нь хумиад хэлэхэд, Нибиру гэж гариг байхгүй! Жилийн дотор ирж мөргөх
гэж байгаа гаригийг өдийд хүн болгон хараад түүний таталцлын нөлөөг нь хэмжчихсэн
байна. Бүхэл бүтэн удахгүй ирэх гэж байгаа гаригийг дэлхий даяарх 10,000 мэргэжлийн
болон 100,000 сонирхогч одонорончидоос хэн ч нуух боломжгүй. 2012 онд ямар ч
гаригуудын онцгой нэг шугаманд орох үзэгдэл болохгүй, тийм юм боллоо ч дэлхий дээрх
амьдралд тэр нь нөлөөлөхгүй. Дэлхийн соронзон орон солигдох хаа байсан, солигдлоо ч
тэр нь мөн л амьдралд халгүй. За тэр дэлхийн эргэх тэнхлэг солигдоно гэдэг бол бүр огт
боломжгүй зүйл. Нарны идэвхжил үе үеийн дундажаас огтхон ч даваагүй, 2013 он болтол
идэвхжил нь дээд цэгтээ хүрэхгүй.
Америкт ч бай, Монголд ч бай бид ардчилсан нийгэмд хүн бүр л үг хэлэх эрх
чөлөөгөө эдлээд явж байна. Үг хэлэх эрх чөлөө гэдэгт худлаа ярих эрх чөлөө ч гэсэн орно.
Гэхдээ та энгийн логикийг дагавал бодит үнэн-худал цуурхал хоѐрыг ялгах тийм ч хэцүү
биш байх болов уу гэж миний бие найднам.
2012той холбоотой тайлбар мэдээлэлийг англи хэл дээр дараахь вэб хуудаснуудаас үзэж
болно:
http://www.nasa.gov/topics/earth/features/2012.html http://www.badastronomy.com/bad/misc/planetx/
http://www.sitchiniswrong.com/
http://en.wikipedia.org/wiki/2012_phenomenon
http://en.wikipedia.org/wiki/2012_doomsday_prediction
хамгийн өргөн агуулгатай бүрэн хуудас нь - http://2012hoax.org
Энэ нийтлэлээр хамруулж чадаагүй, эдгээртэй холбоотой таны сонирхож байгаа
асуудлууд байвал, эсвэл та намайг худлаа хоосон мэдэмхийрлээ гэж бодож байгаа бол
доорх хаягаар холбогдоно уу
sukhbold at ucolick dot org
С. Төгөлдөр
2012 оны 1р сарын 5