-Манай хамтлагийнхан энэ сарын 15-наас эхлэн шинэ тоглолтоо тавих гэж байна. “Гайхамшиг үргэлжилсээр” гэсэн нэртэй. Шинэ уран бүтээл, шинэ тоглолт бүрээ урьд урьдынхаасаа сайжруулна гэсэн зорилготой байдаг. Тухайн уран бүтээл бүртээ сэтгэлээ шингээгээд яаж тасархай тоглолт тавих вэ гэж байнга санаа зовж явна. Түүнийхээ нэгэн адил одоогийн шинэ тоглолтдоо ч гэсэн хичээгээд зүтгэж л байна даа.

-Тоглолтын нэр “Өргөө” кино театрын уриатай адилхан юм?

-Манай тоглолтууд тав, зургаан үзэгдлээс бүтсэн байдаг шүү дээ. Одоогийнх ч гэсэн тийм. Энэ тоглолтын төгсгөлийн хэсэгт олон сайхан гайхамшигт үзүүлбэр, содон сайхан үзэгдэлтэй байх юм. Тэгэхээр тэр хэсэгтээ тааруулж тоглолтынхоо нэрийг өгсөн.

-Саяхан хөдөө орон нутгаар яваад ирсэн гэсэн. Хаагуур тоглоод ирсэн бэ?

-Сэлэнгэ, Дархан, Эрдэнэт, Хөвсгөл, Зүүн хараагаар тоглоод ирлээ. Яг арав хоног явсан байна лээ. Тоглолтгүй өдөр нэг ч байсангүй. Нэг аймгаас нөгөө аймгийн хооронд машинаар давхиад. Очингуутаа орой нь шууд тоглох жишээтэй л явлаа. Хугацаа нэлээн яаруу давчуу байсан. Ингэж явахдаа бид Зүүн хараагийн засан хүмүүжүүлэх газарт нь очиж тоглосон. Угаасаа манайх Зүүн хараа явах бүртээ хорих ангид заавал ч үгүй тоглоод сурчихсан юм. Тэнд бараг тав зургаан удаа тоглочихсон байх шүү. Яахав дээ амьдралын эрхээр алдаж, эндээ л биз. Тэр хүмүүс чинь цаг тутам хийсэн гэм, нүглийнхээ тухай бодож суугаа. Тэгэхээр хоёр цаг ч болтугай инээж, сэтгэлийн таашаал аваасай гэдэг үүднээс манайхан өөрсдийнхөө саналаар очиж тоглодог юм.

-Үзэгчид “Х ТҮЦ” хамтлагаас томоохон уран бүтээл хүлээж байдаг. Кино ч юмуу жүжиг. Энэ намар харин чимээгүй байх чинь?

-Манайх уг нь тоглолтоо хийхээс гадна жилдээ нэг удаа драмын жүжиг, кино хийх төлөвлөгөөтэй байдаг. Хамтлагаараа ярилцаж суугаад жилийнхээ төлөвлөгөөнд ингэж тусгасан. Ийм төлөвлөгөөтэй болсноосоо хойш “Хориотой жүжиг”, “Аянгын бороо”, Төрийн шагналт Д.Сосорбарамтай хамтраад “Сайтар эргэцүүл” зэрэг драмын жүжиг, “Миний хөрш чөтгөр”, “Болсон явдал” гээд кино хийсэн. Тэрнээс өмнө “Сэргээш” цувралуудаа хийдэг байсан юм. Харин энэ жил Н.Онон ах бүр эртнээс төлөвлөөд “За хэдүүлээ нэг зун ч болтугай амарч үзье дээ. Энэ зун л яаж ийгээд нэг сайхан амарцгаачихъя” гэж шийдсэн юм. Манайхан чинь зогсоо зайгүй ажилтай, олигтой амарч чаддаггүй хүмүүс шүү дээ. Гэхдээ бас амарсан ч гэж дээ. Сонгууль гэж манаргаж байгаад наймдугаар сараас ажилдаа орцгоосон. Хавраас шинэ жүжиг тавих байх аа. Одоохондоо сайн зохиол хайж байна. Өмнө нь мундаг уран бүтээл дээр ажиллачихсан болохоор тэрнээсээ давсан зүйл л хийхгүй бол болохгүй.

-Та болон танай гэр бүлийнхэн амралтаа хаана өнгөрөөсөн бэ?

-Би Хэнтий аймгийн “Аварга тосон” рашаан сувилалд очиж амарсан. Манай Тэмка гурван сараас эхлээд “Боловсрол” суваг телевизийн “Хувь тавилан” гээд 60 ангит уран сайхны киноны зураг авалтад орчихсон нэлээн завгүй байсан болохоор “Аварга тосон”-д гэр бүлээрээ очиж нэг сайхан амраад ирсэн дээ.

-Та хоёр нэг хэсэг “Temka\’s family” гээд хамтлаг байгуулчихсан байсан. “Жаргалтай гэр бүл”-ээс өөр уран бүтээл хийсэн үү?

-Одоохондоо ажилдаа гол анхаарлаа хандуулаад явж байна. “Жаргалтай гэр бүл”-ийг бид хоёр “АПУ” компанийн санаачилгаар гаргасан юм. Ерөнхийдөө цаашид үргэлжлүүлэх бодол байгаа. “АПУ” ч гэсэн бидний уран бүтээлийг дэмжиж ажиллана гэсэн. Даанч одоохондоо хувийн уран бүтээлдээ анхаарлаа хандуулах цаг ёстой алга.

-Тэмка “Х ТҮЦ” хамтлагийн сүүлийн хоёр ч тоглолт дээр харагдаагүй. Дэлгэцийн уран бүтээлд хүч үзэх гэж байгаа юм уу?

-Үгүй ээ. Түрүүн хэлсэн “Боловсрол” суваг телевизийн олон ангит кинонд тоглоод түр чөлөө авчихаад байгаа юм. Зураг авалт нь хавар эхэлсэн. Одоо хэр нь дуусаагүй л байна. Аргагүй биз дээ, ганц ангитай кино хийх гэж хэдэн сар болдог юм чинь. Гэхдээ шинэ тоглолтод оролцоно. Өмнөх хоёр ч тоглолтод шинэ залуучууд маань оролцсон байгаа.

-Шинэ залуус гэснээс сүүлийн тоглолт дээр нэлээн хэдэн шинэ хүнээр бүл нэмсэн байгаа харагдсан?

-Манай хамтлаг шинэ залуу уран бүтээлчдэд их нээлттэй байдаг. Хамгийн гол нь манайд ирээд юу хийж чаддагаа батлан харуулж чадах юм бол үлдэх боломжтой. Манай хамтлаг чинь угаасаа “Хэн чадаж байгаа нь хийнэ” гэсэн уриатай. Би хамтлагтаа ороод 10 жил болж байна. Оюутан байхад Ч.Найдандорж багш маань “Х ТҮЦ”-ийн тоглолтод оролцуулдаг байсан. Анх тайзны ард сандал ширээ зөөх, жүжигчид хувцсаа өмсөхөд нь тусална. Дараа нь тайзан дээр олны хэсэгт гардаг болно доо. Тэгж байгаад ганц нэг үг хэлдэг болно, сүүлдээ өгүүлбэр хэлдэг болно. Нялх хүүхэд хөлд орж байгаа юм шиг. Угаасаа ямар ч мэргэжил дээр хүн туршлага хуримтлуулж байж сайн ажилладаг биз дээ. Хамтлаг маань байгуулагдаад 16 жил болж байгаа. Би ороод 10 жил болж байна. Сургуулиа төгсөөд шал ногооноороо байсан намайг өлгийдөж авсанд нь баярлаж явдаг юм. Хамтлагийнхаа “Сэргээш” цуврал, драмын жүжиг болон уран сайхны кинонд тоглож, тэр мундаг бүтээлүүдэд өөрийгөө үлдээж чадсанаараа бахархдаг.

-Анх бол загнуулж зэмлүүлэх юу ч биш биз дээ?

-Тэгэлгүй яахав. Би дунд сургуулийн сурагч байхдаа “Ромео Жульетта”-г үзсэн. Тэгэхэд Одноо эгч ямар гайхалтай тоглосон билээ. Үзээд шууд биширч байгаа юм чинь. Яаж Одноо эгч шиг болох вэ гээд мөрөөдөөд эхэлсэн. Тэгээд СУИС-аа төгсөөд өөрийнхөө хүндэлж явдаг жүжигчинтэй мөр зэрэгцэн хамтарч ажиллана гэдэг надад гайхалтай байсан шүү. Хаа байсан холын мөрөөдөл болсон хүмүүстэйгээ нэг тайзан дээр хамтдаа тоглоно гэдэг нөгөө “Зүүдэнд ч оромгүй явдал” байлаа. Онон ах, Аглуу ах, Одноо эгчдээ их баярлаж явдаг юм. Ялангуяа Ч.Найдандорж найруулагч байна. Тэд миний амьдралд чухал нөлөө үзүүлсэн хүмүүс. Манай Ч.Найдандорж багш шаардлага өндөртэй. СУИС-ийн багш нар дотроос хамгийн хатуу, чанга нь байлаа. Ерөнхий эрдмийн хичээл дээр унах л юм бол мэргэжлийн хичээлийн шалгалтад оруулахгүй. Би жүжигчин болох юм чинь ерөнхий эрдмийн хичээл дээр уначихгүй явж чадаж байвал яахав гэсэн бодолтой оюутнууд байдаг. Багш тэрний эсрэг ганц зогсох хүн шүү дээ. “Та нар ерөнхий эрдэм сурахгүй, мэдлэг мэдээлэлгүй бол яаж хүнд хүрсэн дүр бүтээх юм бэ” гэж загнана. Багш хатуу шаардлагатай болохоор манай ангийн 12 хүүхдийн долоо нь онц төгсөж байсан юм.

-Ч.Найдандорж найруулагч одоо УДЭТ-т ажиллаж байгаа. Та бүхэнтэй холбоотой юу?

-Тэр чинь багшийн ажил юм чинь. Хэдийгээр багш УДЭТ-т ажиллаж байгаа ч гэлээ бид нар шалгалтад орох гэж байгаа хүүхдүүд шиг шинэ тоглолтоо бэлдэж яг таг болгочихоод багшийгаа дуудаж эхнээс нь дуустал тоглож үзүүлнэ. Багш үзчихээд ингэмээр байна, тэгмээр байна гэж зөвлөнө. Түүнийх нь дагуу дахин шинэчилж засаад тайзан дээр тоглодог юм.

-Хошин урлагийнхан сэтгэл хөдлөл ихтэй хүмүүс. Уран бүтээлээс болоод сайндаж муудах асуудал гарна биз?

-Өө тэгээд гаралгүй яахав. Хамгийн сүүлд л гэхэд “Миний ээж хөөрхөн” тоглолтын үеэр Төөтөө хулгайч болдог үзүүлбэр байдаг юм. Тэрэн дээр уг нь буутай гарах ёсгүй. Тэгсэн мань нөхөр яагаад буутай гарсан юм бүү мэд. Миний араар ордог хэсэг дээрээ гэнэтхэн буу гаргаж ирж буудаад. Яг миний чихэн дээр. Дуу нь чанга гэж жигтэйхэн. Тэрнээс нь болоод миний чих хоёр, гурав хоногтоо л дүнгэнээд хачин болж байгаа юм чинь. Мэдээж хэрэг тайзан дээр яаж ч чадахгүй. Хөшигний ард ороод Төөтөөтэй айхтар ширүүн муудалцсан юм байна.

-Та жүжигчин болоод удаагүй байхдаа тайзан дээр нэг уйлсан гэдэг байх аа?

-Тэгсэн. Дөнгөж сургуулиа төгсөөд удаагүй байхдаа тайзан дээр Б.Баатархүү ахтай хамт гарах болсон юм. Хөгжим тавьчихсан дуулаад л. Цэцэг навч барьчихаад зугаалж байгаа хоёр болсон юм. Тэгсэн гэнэт техникийн саатал гараад хөгжим зогсчихдог юм. Сандарсан гэж жигтэйхэн. Яанаа хүмүүс одоо намайг шоолж байгаа даа гэж бодоод шууд уйлчихсан. Тэгсэн чинь Б.Баатархүү ах над руу нэг том харснаа барьж явсан цэцгээрээ миний нүүрийг таглаад тайзны араар гялс аваад орчихож билээ. Хөшигний араар оров уу үгүй юу Одноо эгч бүр гайхаад “Чи чинь ямар сонин юм бэ. Жүжигчин хүн ийм үед яаж өөрийгөө эвтэйхэн авч гарах вэ гэж боддог байхад тайзан дээр шууд уйлж байгаа чинь ямар учиртай юм бэ” гээд.

-Одоо тайзан дээр тийм алдаа гаргахгүй биз дээ?

-Өөрөөсөө шалтгаалсан алдаа аль болох гаргахгүйг хичээнэ. Гэхдээ санамсаргүй алдаанууд мэр сэр гарна. Түрүү жил нэг тоглолт дээр Онон ах халаад өмсөөд эмэгтэй хүн болдог юм. Хувцсаа өмсөөд трикогоо татахдаа халаадныхаа хормойг хавчуулчихгүй юу. Хэн ч анзааралгүй тэр чигээрээ тайзан дээр гарчихсан. Тоглож байхдаа эргэхээр л үзэгчид инээлдээд байдаг. Бид нар наанаас нь шуудхан хэлчихэж болдоггүй. Гэх мэтчилэн алдаа гарна.

-Танай хамтлагийнхныг дотроосоо гэр бүл боллоо гэдэг. Гэр бүлийн хүнтэйгээ хамт ажиллах сайхан биз?

-Хүмүүс “Х Түц”-ийнхэн хоорондоо гэр бүл боллоо гэж ярьж л байдаг юм. Яахав дээ цаанаасаа тэгэх учиртай байсан юм байлгүй. Яагаад ч юм хоорондоо суугаад таарчихлаа шүү дээ. Бурхны зурсан заяа төөрөг юм байлгүй. Гэр бүлийнхээ хүнтэй хамт ажиллана гэдэг, тэр дундаа хоёулаа урлагийн хүн байна гэдэг сайхандаа сайхан, хэцүүдээ хэцүү. Өглөө ажилдаа хамт ирж, орой зэрэг тараад харих нь нэг бодлын сайхан. Бие биенийгээ ойлгоод, мэдэрч байгаа болохоор нэгэндээ зөвлөөд тусалж байгаа нь гоё. Хэцүү нь гэр бүлийн асуудал хаягдчих гээд байдаг юм. Сайн аав, ээж нарынхаа буянд өдий зэрэгтэй яваад байгаа. Түүнээс хүүхэд өвдөх ч юмуу, халуурч бүлээрэхэд зэрэгцээд орой тоглолттой гээд гараад явах нь жаахан бачууруулах гээд байдаг юм.

-Хүү нь одоо хэдэн нас хүрч байгаа вэ. Аав ээжийгээ жүжигчин гэдгийг мэддэг болсон уу?

-Хүү маань хоёр ой хүрч байна. Жинхэнэ хөөрхөн дээрээ байгаа. Их сүрхий ярина. Аавыгаа зурагтаар хараад “Ээж, аав өөр эмэгтэй үнсээд муухай тээ. Аав өөр эмэгтэй үнсэх ёсгүй тээ” гэнэ. Хүүхэд аав ээжийгээ жүжигчин гэдгийг мэдэх мөртлөө бас харамлаад байдаг юм шиг байна лээ. Ямар сайндаа Аглуу ахын хүүхэд нэг өдөр аавдаа “Та надад биш тэр Одноодоо л хайртай биз дээ” гэж уурласан байгаа юм. Тэр хоёр бол яах аргагүй алтан партнёр. Хоорондоо тохиролцохгүйгээр нэг нэгнээ мэдрээд сурчихсан. Нэг нь шинэ үг хэллээ гэхэд нөгөөх нь тэрийг шууд үргэлжлүүлээд аваад явчихдаг. Тийм мундаг.

-Зарим эмэгтэй жүжигчин уйлсан, нулимсаа гоожуулсан дүр бүтээхгүй. Муухай харагдуулна гэдэг гэсэн. Та харин тайзан дээр өөрийнхөөрөө байдаг юм шиг ээ?

-Наадах чинь жүжигчдийн хөндөх ёстой сэдвийн нэг болчихсон юм билээ. Өөрийнхөө гоё сайханд дурлаад уйлж унжсан хэсэгт тоглохгүй байна гэж юу байхав. Тийм хүнээс чинь юм гардаггүй байхгүй юу. Ер нь анзаараад байхад сайн эмэгтэй жүжигчид их эршүүд байдаг юм шүү дээ. Эмэгтэйлэг байх арга, боломж ч байхгүй. Бусадтай адил ханцуйгаа шамлаж ажил руугаа орж байж тэндээс бүтээл төрдөг.

-Орой бүр тоглолттой байхаар гоо сайхандаа анхаарах цаг гарах уу. Тоглолттой үедээ үсчин, гоо сайханчидтай ёстой нэг найзална биз?

-Нүүр ам, үс гэзгээ өөрөө янзалчихдаг юм. Одоо тэгээд муухан үсчнээс илүү болж байх шиг байна. Яарч сандарсан үедээ хэдхэн минутын дотор л үсээ индүүдээд янзалчихна. Нүүрээ ч гэсэн заримдаа машин дотор түгжээнд явж байхдаа амжуулаад будна шүү дээ. Олны өмнө гардаг болохоор гоо сайхандаа хайнга хандаж болохгүй. Тэглээ гээд учиргүй их цаг, мөнгө зарцуулж чадахгүй. Би хөөрхөнсөөд байх юу билээ. Гэхдээ өөрийгөө тийм муухай гэж бодохгүй ээ. Надаас хөөрхөн эмэгтэй хорвоогоор нэг байна. Надаас царай муутай нь ч байна. Гэхдээ өөртөө сэтгэл хангалуун шүү.

С.АЛТАНЦЭЦЭГ

URL: http://www.yanaa.mn/yanaa/?p=63255