Ямар ч гоёл чимэггүй залуу нас...Тийм ээ...үнэхээр л орчлонгийн чимэг залуу нас байдаг. Хүсэл тэмүүлэл, гэгээн мөрөөдөл, хувирашгүй ариун хайр, адал явдал, бүхнийг чадагч омголон нас. Ёстой л энэ бүхнийг шингээсэн мэт залуу насны омголон зан, басхүү гал халуун хайрын дарсанд хөлчүүрхсэн залуу хосыг Тэнгис Халиун гэх. Их сургуулийн ширээнээс амьдралын их далайд өөрсдийнхөөрөө зүтгэхээр сэтгэл шулуудан ээж аавын гэрээс гараад тэд даруй 4 сарыг үджээ.

Тэнгис Халиун хоёр үнэхээр хэн хэндээ тохирсон царай зүс нуруу туруу сайтай үнэхээр л харсан бүхний нүдийг хужирлахаар сайхан хос байлаа. Өдгөө хорин гурван насны босгыг алхаж буй тэдний хэн хэн нь аав ээжийн гар дээр эрх танхи өсөж, амьдралын хатуу бэрхийг үзээгүй ажгуу. Тэдний гэрээсээ "оргох" болсон нь зовлон бэрхшээл үзэж хатуужих гэсэнд бус гагцхүү тэдний үнэн сэтгэлийн хайрыг гэр бүлийнхэн нь хүлээн зөвшөөрөөгүйд байлаа. Иймээс л тэд мөнгөгүй ч гэсэн хайртай байхад бүх юм болно хэмээн ярилцсаар гэр хорооллын дунд орших хоёр давхар нийтийн байранд амьдрах болжээ.

Гэвч хоёулаа бор зүрхээрээ амьдралаа босгоно доо хэмээн сэтгэсэн ч тийм амар биш байлаа. Тэнгис нь их сургуулийг биеийн тамирын багш мэргэжлээр төгссөн бол, харин Халиун гадаад хэлний орчуулагч мэргэжил эзэмшсэн боловсролтой залуус байлаа. Хөлсний байранд орсон даруй Тэнгис арайхийн гүйн байж нэгэн хувийн сургуульд мэргэжлийн дагуу орсон аж.Тэр эхнэрээ ажил хийлгэхийг хүссэнгүй "чамайгаа би хатан хаан шиг амьдруулнаа" хэмээн мундаг амлалт өгсөн аж. Халиунаа ч хайртынхаа үгнээс зөрж зүрхэлсэнгүй гэртээ байхаар шийджээ. Ийнхүү Тэнгис том мөрөөдөл өвөрлөсөөр ажилдаа явна. Уг сургуульд дандаа таваас дээш жил ажилласан туршлагатай өөрөөс нь ахмад хүмүүс байх. Тэд Тэнгисийг ажилд орсон эхний өдрөөс л дорд үзэх мэт гадуурхаж эхэлнэ. Гэсэн ч Тэнгис маань мэрийхээрээ мэрийж тэдэнд аль болох өөрийгөө харуулахыг хичээн ажилласаар. Түүний хичээл зүтгэл талаар болсонгүй. Сарын дараа Тэнгис маань ажилдаа нэр хүндтэй нэгэн болж бусад багш нар ч түүнтэй арай өөрөөр харьцдаг болжээ.

Санаанд оромгүй зүйл болж Тэнгис төгсөх анги даасан багшаар хувиарлагдлаа. Захирлууд түүнд итгэл хүлээлгэсэн болохоор татгалзах арга байсангүй. Ангийнх нь хүүхдүүд түүнийг багшаа хэмээхээсээ илүү гоочлох нь олонтаа. Энэ бүхэн Тэнгист хэцүү байсан ч шүд зуун тэвчээр заасаар. Ядаж байхад мөнөөх сургууль нь дандаа баячуудын хүүхдүүд сурдаг элит сургууль байж таарав. Баян айлын ихэмсэг хүүхдүүдийн арга эвийг олох амаргүй байлаа. Яг л энэ хүнд хэцүү үед ангийнхан дундаа хамгийн царайлагт ордог Сийлэн гэх ихэмсэг нэгэн охин Тэнгист хайртай болж орхижээ. Тэр охин Тэнгисийг хаана ч явсан элдэвлэн мессэж бичих зэргээр илтэд өддөг байлаа. Тэнгис мөнөөх охинд арга эвээр учирлан хэлээд ч нэмэр болсонгүй. Аргаа бараад би эхнэртэй гэж хэлтэл мөнөөх юм бүхнийг өөрийн болгоод сурчихсан баян айлын эрх охин амиа хорлох оролдлого хийнэ. Ингээд Тэнгисрүү сургуулийн захирал багш нар, за тэгээд мөнөөх охины аав ээж гээд хүн бүхэн дайрч давшлан ажлаасаа халагдах нь тэр. Түүгээр ч зогсохгүй насанд хүрээгүй хүүхдийн толгой эргүүлсэн хэмээгдээд цагдаагийн газар хүртэл дуудагдана. Эцэст нь мөнөөх охин Тэнгисийг ямар ч буруугүй гэдгийг хэлснээр ял зэмгүй өнгөрч, харин шуналтай нэгэн хэсгийн цагдаагийн торгуулийг төлөх болсноор энэ хэргээс хөндийрнө. Харин энэ бүхний эцэст ганцхан Халиунаа л түүндээ итгэж байсан юм. Үнэхээр л агуу хайр гэж итгэлцэл дээр л байдаг ажээ. Гэтэл зовлон үүгээр дуусаагүй байлаа.

Тэнгисийг ажил ч хайж амжаагүй байтал хөлсөлж байсан байрных нь хугацаа дуусаад хориод хоночихжээ. Шуналтай хэсгийн байцаагчид байрандаа өгөх байсан хэдэн төгрөгөө шавхан өгөөд халаасныхаа шороог гөвчихсөн байдаг. Гэтэл байрны эзэн гэх дөч гаруй насны будмал тарган авгай байсхийгээд л мөнгөө нэхэж дарамтлах нь хэцүү. Ам хэлтэй айхтар авгайг Гангаа гэх бөгөөд нэрэндээ тааруулах гэсэн мэт гангарч дэгжирхэх дуртай нэгэн аж. Хоног өдөр өнгөрөх тусам залуусын өр төлбөр нэмэгдэж байгааг сануулан орж ирсээр байх уг авгай нэг л өдөр залуусын хамаг л бичиг баримт диплом гээд л ер тэднийг гэж нотлох бүхнийг хураан авна. Ингээд л хөөрхий залуус хэрхэхээ мэдэхгүй гацаанд орно. Гэсэн ч тэд шантрахгүй ажил хайх боловч бичиг баримтгүй тэднийг хэн ч ажилд үл авна. Харин Гангаа авгай тэднийг байрнаас хөөгөөгүй боловч тогийг нь хүртэл тасдаж орхижээ. Аргаа барсан хос маань хажуу өрөөнд нь амьдран суух үеийн хос залуустай танилцан дотносож амжина. Хөрш айлын эзэн болох хорин таван настай бадриун бор залууг Баганаа гэх. Харин эхнэрийг нь Золоо гэх бөгөөд тэд ч бас амьдрал хөөхөөр нутгаасаа гараад нэлээд хэдэн жилийг үзэж байгаа ажээ. Ийнхүү үе тэнгийн дөрвөн залуу бие биенийхээрээ орж гаран нөхөрлөх болжээ. Тэдний дотносож байгаа нь Гангаа авгайд бас л таалагдсангүй.

Элдвээр загнаж тачигнан хэн хэнийхээрээ орж гарах юм бол байрнаас хөөнө гэдгээ Баганаа Золоо нарт тулгана. Ингээд л Тэнгис Халиунаа хоёр аяга хоолоо ч хийж идэх аргагүй болжээ. Шийдвэр гаргах цаг болсон хэмээгээд хоёр залуу байрнаас явах болно. Өдөржин гадуур явж нүдэндээ харагдсан нийтийн байр болгон дээр очисоор сая арайхийн сайн санаатай өвгөний байранд суухаар болно. Мэдээж төлбөр байхгүй ч удахгүй өгнө гэсэн амлалт өгчээ. Ийнхүү хоёр залуу маань түр ч атугай сэтгэл амран шинэ гэртээ төвхнөж амжлаа. Гэсэн ч гай газар дороос гэгчээр мөнөөх Гангаа авгай тэднийг олоод л ирнэ. Байрных нь эзэнд элдвээр муулан тачигнаж байгаад мань хоёрыг арайхийн олсон байрнаас нь хөөлгөж орхилоо. Хөөрхий хоёр залуу аав ээждээ очъё гэсэн ч оргон байж гарснаа бодон очиж үл төвдөнө. Хоёр биенээ зоригжуулан бие биедээ урам өгөн гадаа хүйтэн бороотой ч, сэтгэлдээ галтай, сүүдрэвчинд тэврэлдэн хонох үе ч гарч байлаа. Гэсэн ч хэдий болтол тэвчих билээ. Тэнгис Халиунаа хоёр халган байж хуучин байран дээрээ ирлээ.Санасныг бодвол Гангаа авгай энэ өдөр яасан юм гэмээр сайхан зантай байв. Гангаа та хоёроос өрөө авахын тулд би ажилд оруулж өгье хэмээгээд нэгэн хүнтэй уулзахыг зөвлөнө. Ингээд л тэдний адал явдал эхлэх нь тэр. Мөнөөх уулзах ёстой хүн нь хэн ч үл таних тэрбумтаны менежер байлаа.

Менежер дөчөөд насны биерхүү эр байв. Залууст тавигдсан анхны шаардлага нь эхнэр нөхөргүй ганц бие байх шаардлагатай байлаа. Ингээд хос залуус маань өндөр цалин боломжийн нөхцөлийг нь бодоод эхнэр нөхөр гэдгээ тас нууж орхино. Ингээд залуусыг хотоос зайдуухан байх тансаг харшид авчирлаа. Тэнд манай хоёроос гадна өөр олон эрэгтэй эмэгтэй залуус байлаа. Тэдэн дунд мөнөөх хөршийн хоёр ч явж харагдана.

Тэд ч бас ажилд орохын тулд эхнэр нөхөр гэдгээ нуусан байв. Ажилд шалгуулахаар цугласан тэдгээр залуус үнэхээр хараа булаам сайхан бүсгүйчүүд хүдэр чийрэг эрчүүд байлаа. Харшийн эзэн тэрбумтан Ананд гэх хэн ч харсан төгс төгөлдөр гэмээр царайлаг,бас хэтэрхий гэмээр хээнцэр дэгжин залуу орж ирэн, залуусыг эрэгтэй эмэгтэйгээр нь шалгаруулах болсноо хэлнэ. Шалгаруулалт ч эхэлж эрчүүд нь хүч чадал авхаалж самбаа сорьсон аюулт даалгаврууд гүйцэтгэнэ. Бүсгүйчүүд нь сайхан бүсгүйн тэмцээнд орж буй мэт алхаа гишгээ авъяас чадвар гээд нэг бүрчлэн гүйцэтгэж үзүүлэв. Тэнгис тэнд цугласан булиа эрчүүдийн хаана ч хүрэхгүй байлаа. Халиунаа ч мөн өндөр гуалиг сайхан бүсгүйчүүдээс хувь дутуу хэмээн сэтгэнэ. Баян Ананд шийдвэрээ гаргаж тэнд ирсэн бүх залуус ажилтай болжээ. Хачирхалтай нь манай хоёр бүх шалгаруулалтанд бусад залуусаас муу байсан ч баян Анандын хамгийн ойрын бас хамгийн өндөр цалинтай ажилтнуудаар томилогдоно. Тэнгис тэрбумтаны хувийн бие хамгаалагч болсон бол Халиунаа түүний санхүүг хариуцан ажиллахаар болжээ. Харин Ананд Халиунааг илт сонирхож анхаарал халамж тавин бүхнийг Халиунаад зориулах болжээ. Энэ бүхэн Тэнгисийг ихэд зовоох боловч тэр юу ч хийж үл чадна.

Яалтай ч билээ. Нэгэнт л эхнэр нөхөргүй хэмээн гэрээн дээр гарын үсэг зурчихснаа бодон тэвчсээр. Бүсгүйчүүд дунд Жимсээ гэх өндөр царайлаг ч яггүй хэл амтай хорон санаатай хүүхэн байх. Тэр элдвийг сэдэн баян Анандад хов хүргэн Халиунааг хорлохоор оролдох боловч үл бүтнэ. Тэр тоолонд Жимсээ хүүхний хор буцлан өө сэв хайн явсаар. Тэр нэгэн өдөр Анандын багын найз Боби гэх ер бусын хувцасласан чамин эр, жартайсан айлгүй нүдээ эргэлдүүлсэн эмэгтэйлэг бөгөөд эзний насны тийм нэгэн айлчлан ирлээ.Үнэхээр дуу нь хүртэл гайхмаар уянгалаг, бас этгээд сонсогдоно.Нэг гартаа хаваа тэврээд нөгөө гараа байсгээд л нүүрэндээ аваачиж,хацраа алгадах бөгөөд нэг ёсондоо гараараа ярих мэт аяглах аж.

Тэр ирсэн даруйдаа багын найзаа эхнэртэй болж байгаа эсэхийг асуухад Ананд ч Халиуныг сүйт бүсгүй минь хэмээн хэлж орхино. Ингээд л Халиун Бобиг яван явтал баян Анандын хуурамч сүйт бүсгүйн дүрд тоглох даалгавар авна. Гэтэл учир битүүлэг шалтгаанаар Боби найз нь явахаа больж Анандынд амьдрах болсноо дуулгана. Ингээд Халиун Тэнгис хоёр хэрхэхээ шийдэхээр нууцаар уулзан ярилцахыг мөнөөх Боби сонсож орхино. Бас тэдний яриаг гагц тэр ч биш Жимсээ гэх мөнөөх гайт хүүхэн ч сонсчихжээ. Харин Боби тэдний яриаг сонсчихоод юу ч мэдээгүй мэт явахдаа мөнөөх Жимсээг аргандаа оруулж авна. Боби Жимсээд одоохондоо энэ талаар хэнд ч хэлж болохгүйг сануулан их хэмжээний мөнгө амална. Учрыг үл ойлгосон Жимсээ ч их мөнгөний сургаар хэлгүй мэт явах аж. Баян Ананд багын найзаа ирснийг далимдуулан бяцхан үдэшлэг зохион байгуулна. Тэр үдэшлэг дээр Халиунаад үнэтэй машин бэлэглэж сүй тавих болсноо дуулгана. Энэ бүхэн Тэнгисийг ч тэр Халиуныг ч тэр балмагдуулна.Үдэш нь Ананд Халиуны өрөөнд цүнхтэй зуун сая төгрөг барьсаар орж ирэх бөгөөд чи надад анхны шөнөө зориулхыг зөвшөөрвөл энэ мөнгө чинийх болно хэмээн тулгана. Хариуг цүнхтэй мөнгө авсан үгүйгээр мэдье Хэмээгээд гарч одно.

Тэнгис Халиун хоёр бүх үнэнээ хэлээд харшаас явъя хэмээн ярилцана. Ийнхүү Тэнгис цүнхтэй мөнгийг хүргэж өгөхөөр өрөөнөөс гарч харин Халиун үүдэнд хүлээж байхаар тохирлоо. Тэнгисийг Анандын өрөөнд орохоор явж байх замд Боби түүнийг саатуулан наад мөнгөө одоохон авч яваад ойн захад байх цэнхэр байшинг худалдаж ав хэмээн учир битүүлгээр ятгана.

Тэнгис түүний ятгалагад авталгүй Анандад мөнгийг өгөхдөө Бобигийн ярьсныг хэллээ.Хэрэг явдал санаснаас өөрөөр эргэж Тэнгисийг Халиунтай эхнэр нөхөр гэж үнэнээ хэлж амжаагүй байтал Ананд түүнд мөнгийг өгч ойн захын байшинг худалдан авахуулахаар явуулав.Гайхшаа барсан Тэнгис эхнэрт нь бэлэглэсэн машиныг унасаар харшаас гарна. Харин энэ үед шатан дээр хүлээж байсан Халиун нөхрөө хайн дотогш орж ирэхэд Боби угтан уулзаж Тэнгис зуун саяыг аваад зугатсан хэмээн хэлнэ. Халиун намайг зуун саяар зарчихлаа гэж үү? Хэмээн уйлан хайлсаар өрөөндөө гүйн оржээ. Харин Тэнгис мөнөөх учир битүүлэг байшинг худалдан авахын даваан дээр бүх зүйл буруугаар эргэж юу ч мэдэхгүй гэнэн залуу хүн алсан алуурчин хэмээн гүтгэгдэх нь тэр. Мөнөөх байшингийн эзэн настай эмгэн байх бөгөөд байшингаа зарах зар явуулснаар хамгийн түрүүнд зуун саяыг авч ирсэн хүн түүний хүүг алсан алуурчин байх ёстой хэмээн урхи тавьсан байжээ. Учир нь гурван жилийн өмнө уг байшинд эмгэний том хүүг хэн нэгэн шуналтан хөнөөгөөд зугатсан аж. Ийнхүү Тэнгис хийгээгүй хэргийнхээ төлөө шоронруу ачигдана. Энэ бол Боби Ананд хоёрын шатрын нүүдэл байлаа. Хэрэг явдал үүгээр дуусаагүй байлаа.Тэр шөнө Боби Ананд хоёрын ч үнэн нүүр царай илэрч хар багын найзууд биш харин хэзээ ч нэгнээ харж байгаагүй хүмүүс байж таарав. Боби Анандад таниулах тэмдэгтэй ирсэн аж.

Мөнөөх нь Анандын дурсамжаас аль гурван жилийн өмнө арчигдсан аймшигт аллагыг сануулсан буу байв. Бобид энэ бүхнийг Анандын нас барсан ахынх нь бие хамгаалагч байсан Сорвит хэмээгч ярьсан байжээ. Төдөлгүй Халиун нөхрөө хэлмэгдсэн гэдгийг мэдэж Бобигоос тусламж хүснэ. Хариуд нь Боби түүнийг Анандын сүйт бүсгүй болж түүний ээж дээр айлчлан оч хэмээн ятгана. Анандын ээж бол танай нөхрийг аврах цорын ганц хүн хэмээнэ.

Учир нь Анандын ээж мөнөөх Тэнгисийг очиход байсан настай эмгэн юм санж. Ингээд Ананд Халиун хоёр ээжрүү нь очин эхнэр нөхрийн дүрд тоглож эхэлнэ. Мөнөөх ихэмсэг хатагтай Халиунд нэг л тааламжгүй хандаж байлаа. Уг нь Халиун нөхрөө авраад өөрөө Анандын эхнэр болохоор шийдсэн байжээ. Гэсэн ч тэр Анандын ээжтэй чин сэтгэлээсээ ярилцаж бүх үнэн учрыг мэдэж авна. Ананд ээж дээрээ сүүлийн гурван жил ирээгүй аж. Түүний ирэх болсон шалтгаан бол ердөө л уг байшинг өөрийн нэр дээр шилжүүлэх байлаа. Анандын ээж Халиун хоёр ойлголцож чадна. Маргааш нь мөнөөх гурав өглөөний цай уух үедээ Халиун санаачлан усаар байлдан тоглох мөчид ээжийн барьж ирсэн байшингийн бичиг баримтыг юу ч гүй болтол норгож орхино.

Энэ бол Халиун Анандын ээж хоёрын хуйвалдаан байлаа.
Энэ үеэр цагдаа нар Сорвит Тэнгис нараар хэргийн газрын таниулга хийлгэхээр мөнөөх байшингийн ойролцоо авчирна. Тэнгис хайртай эхнэрээ Анандтай аз жаргалтай гэгч нь хөөцөлдөн тоглож буйг хараад зүйрлэшгүй ихээр гомдон цагдаа нараас зугатана. Харин байшинд эмгэн Ананд нар байшингаа нэр дээр шилжүүлэх мөчид мөнөөх тоглоомноос болж юу ч гүй норсон бичиг баримтыг хараад Ананд багтартлаа уурлав.Тэр үнэн нүүр царайгаа илчлэн бачуурч ээжийгээ Халиуны хамт хүлэн байшин доторхийг нэгжиж эхэлнэ. Тэр гурван жилийн өмнө ахыгаа алах болсон шалтгаан нь энэ байшингийн хаа нэгтээ нуусан хайрцагтай алт эрдэнэсд шунасан аж. Өдгөө түүнийгээ авахаар ийн улайрч буй ажээ. Энэхэн мөчид алтан хамтрагч Боби ирж хүч нэмэгдүүлснээр тэд мөнөөх хайрцагтайг олно. Харин Боби байшингийн ойр тойронд цагдаа нар байгааг хэлж эндээс явахыг сануулна. Ингээд тэд хайрцагтайгаа мөн Халиуныг аван тэндээс гарна. Гэвч төдий л холдсонгүй ойролцоох модон дунд ирэн хайрцгийг онгойлголоо. Их санасан газар есөн шөнө хоосон хонов гэгчээр шуналт сэтгэлтэй хоёрын санаснаар болсонгүй. Хайрцагнаас дархны төмөр багаж сэлт л гарч ирлээ. Ангайтлаа хуурагдсан Боби Анандыг иймхэн зүйлээс болж ахыгаа хүртэл аллаа гэж үү? хэмээхэд багтартлаа уурссан Ананд Бобиг буудан аллаа. Адгийн алуурчин Ананд Бобиг буудсныхаа дараа хажууханд нь хүлээтэй хэвтэх Халиуныг хүчирхийлэхээр дайрна.Аз болж Тэнгис амжиж ирэн, эхнэрээ аврахаар Анандтай тулалдах боловч хорон санаатай өөдгүй эр эхнэрийнх нь нүдэн дээр түүнийг буудаж орхино.Орильё ам нь боолттой хөдөлье хөл нь тушаатай хөөрхий бүсгүй нулимс мэлтэрсэн нүдээр нөхрийнхөө өнхөрч одсон газар луу харсаар. Харин энэ үед цагдаа нар Анандыг баривчлахаар бүчих үед тэр Халиуныг барьцаалан хясааны оройд гарч ирлээ. Гэтэл яг энэ үед жалгын уруу буудуулан өнхөрч одсон Боби сэргээд Тэнгисийг татан сэрээнэ. Тэр Анандын бууны суманд нойрсуулагчтай хуурамч сум хийсэн байжээ. Тэнгис баярлан эхнэрийн зүг очихоор хясааны зүг гүйлээ.

Харин Халиун хайртай нөхрөө алдсан уй гашуудаа автан Анандыг хясааны уруу түлхэн өсөө авлаа. Гэвч бүсгүйн сэтгэл амарсангүй. Түүнгүйгээр амьдарч чадахгүй ээ хэмээгээд Тэнгисийнхээ араас одохоор хясаан дээрээс үсэрч орхилоо. Саяхан баяраар бялхаж байсан сэтгэлд хагацлын хар шуурга бүрхэн ирлээ. Чи минь даанч яав даа... хэмээн гашуудан уйлах Тэнгис дээр тэнд байсан цагдаа нарын ахлагч Лутаа ирэн тэр зүг очиж харвал аз жаргал харагдах ч юм билүү хэмээхэд Тэнгис алгуурхан дөхсөөр ирмэгт нь хүрлээ.Нүдэнд нь доор байгаа зүйлс тодрон тодорсоор асар том улаан зүрх харагдлаа.Тэр алмайран дахин сайн харав.Үнэхээр хясааны чанх доор зориуд бэлтгэсэн зүрхэн хэлбэртэй зөөллөвч,түүний голд хайрт Халиун нь даллан зогсоно.Тойроод үй олон хүмүүс баяр хүргэж,өнгө өнгийн бөмбөлөг, цаасан салют хөөргөж, Халиунтай нь хамт нэгэн дуугаар
- Би чамдаа хайртай...хэмээн цуурайтуулан хэлнэ.Тэнгис алмайран Лутаа руу эргэж харахад, " Одоо хэлэх цаг чинь болсоон гээд байна шүү дээ " хэмээн чангаар орилно.
Тэнгис шийдлээ.Нүүрэндээ сайхан инээмсэглэл тодруулж байгаад,амаа хамгийн томоор нээж, энэ хөвч хангайд цуурайттал өндөр дуугаар,
- Би ч гэсэн чамдаа хайртай хэмээн гурвантаа орилоод улаан зүрх тийш тэмүүлэн үсэрлээ. Яг хайртынхаа хажууд зөөлөн газардаж, бас түүнтэйгээ дээш ойж буун байв..Учрыг ойлгоогүй Тэнгис эхнэрээсээ юу болоод байгааг асуулаа. Хос хоёр маань орон даяар цацагдсан реалити шоунд оролцож байсан аж.

Төгсгөл. Тайз.
Асар том дэлгэц дээр хосуудын сүүлийн дүрс, хөгжилтэй ярианууд гарч, танхим дүүрэн үзэгчид алга ташин уухайлах үест гэрэл анивчсан том тайзан дээр хоёр баатар маань хөтлөлцөн гарч ирлээ. Боби харин энэ удаа жинхэнэ өөрт зохисон ажлаа хийж байсан нь энэхүү ер бусын шоуны билиг танхай хөтлөгчийн ажил байлаа.Түүнтэй хамт мөн Сийлэн гэх мөнөөх бардам охин ч бас гоёмсог даашинз өмсөн шоуг хөтлөж байв.

- Оо ямар уярууштай үдэш вэ, Яасан бахархууштай залуус вэ?Тиймээ эрхэм хүндэт үзэгчид ээ.Монгол орон даяар дэлхийн олон улсын өнцөг булан бүрт хүрч байгаа манай реалити шоу ийнхүү амжилттай өндөрлөж байна. Та бүхний өмнө үнэнч хайрын ялагчид маань үзэгчдийг байлдан дагуулсан өхөөрдөм төрхөөрөө гарч ирлээ.Тэд үнэндээ адармаатай, аюултай, аз туршсан, авхаалж шаардсан олон даалгаврыг туулж, гайхалтай ялагчид болж чаджээ.Та хоёр Үнэнч хайрын баатрууд билээ.Та хоёр өөдрөг амьдарлын дуулал юм.Та хоёр өгүүлэшгүй аз жаргалын элч нар юм.Ингээд хайрын оддынхоо сэтгэлийн үгийг хүргэе. Тэнгисээ...Халиунаа...та хоёрыг дэлхий сонсож байна.Хайрын ертөнц сонсож байна.Хайрын тухай сэтгэгдлээ хэлэхгүй юу...

Тэнгис эхнэртэйгээ микрофоноо зэхэж бариад хоёр биенээ харлаа.Инээмсэглэнэ.
- Хайр бол хүн бүхэнд байдаг. Харин энэ хайраа том хайр байлгах уу, бүүр жижигхээн хайр байлгах уу гэдэг нь бас л хүн бүрээс шалтгаалдаг. Тиймээ баяр баясгалан байгаа газар хайр том байдаг юм байнаа.Бид хоёр одоо энэ олон хүмүүсийн дээр байгаа том хайрыг харж байна. Агуу хайр гэж байдаг юм шүү хүмүүсээ...Алдаж болохгүй ээ.
Тэнгисийн энэ үгэнд талархсан олон уухайлан дэмжлээ. Халиун хоолой засав.
- Хүмүүсээ миний хажууд хамгийн том хайр зогсож байна. Би ч бас энэ хайраа алдахгүй ээ.Яагаад гэвэл миний хайр маань хүн бүхэнд харагдана. Зарим нэг нь түүнийг маань авах гээд байвал яана. Хамгийн их зовлон чинь тэр юм билээ.Тэр зовлонд хайр маань жижигхэн болчихдогийг мэдэрсэн. Миний бодлоор том хайр нь жижиг хайрыгаа ойлгож байвал хайр өөрөө нэг л хэмжээтэй, жаргалтай байх болно.Хүмүүсээ хайраа хамгаалж яваарай...
Халиунаагийн үгэнд хүмүүс хий орилж баяссангүй, харин ч нэгийг тунгаан эрэгцүүлж, зарим нь нулимс дуслуулж байна. Өнгө өнгийн гэрэл салют туузнууд сүлэлдэж, хөгжимт нүргээн дуурсаж,хөтлөгч Боби аялгуулан дуу алдлаа.