Мансардтай барилгуудыг улсын комисс хүлээж аваагүй

2012-09-19

2007 оноос хэрэгжиж эхэлсэн бүх нийтийг орон сууцжуулах төслийн хамгийн хямдхан хэсэг буюу мансардны орон

сууц төсөл үр дүнгээ өгөөгүйн дээр чанаргүй баригдаж, олон зуун иргэдийг хохироож байгаа аж. Мансардны орон сууцны барилгажилтыг “Шинэ-Адар” нэртэй төслийн хүрээнд гүйцэтгэж, хамтран зохион байгуулагчаар Монголын сууц өмчлөгчдийн холбооны дээд зөвлөл гэх байгууллага оролцсон билээ.

Тухайн үедээ одоогийнхоос харьцангуй хямдаар борлуулагдсан орон сууцны анхны оршин суугчид 2008 онд байрныхаа түлхүүрийг авсан ч үл хөдлөх хөрөнгийн гэрчилгээ нь өдийг хүртэл байхгүй, зарж борлуулж болохгүй, банкны барьцаанд тавьж болохгүй, дээрээс нь байнга өөрсдийн зардлаар байрандаа засвар хийдэг хүндрэл, чирэгдэл ихээр учирч байгаа аж. Ийм байрны иргэд яахаа мэдэхгүй олон жил, сар өнгөрч байхад “Шинэ-Адар” төслийн удирдлагууд “Байрны гэрчилгээ намар гарна, өвөл гарна, хавар гарна” гэж жил тойрон хуурсаар нэг л мэдэхэд дөрвөн жил өнгөрчихсөн аж. Бид мансардны орон сууцыг худалдаж аваад өдий хүртэл гэрчилгээгээ авч чадаагүй байгаа П.Алтаагаас хэдэн зүйлийг тодрууллаа.

-Та байраа хэдэн онд худалдаж авсан бэ?
-Би 2008 оны дөрөвдүгээр сард захиалга өгч, 10 сард нүүж орсон. Тухайн үед одоогийнхоос байрны захиалга хаа сайгүй авахгүй цөөн байрнууд л байсан. Байр дөнгөж л үнэд орж эхэлж байсан юм. Тэр үед 1мкв-ыг нь 800 мянгад бодож байраа авч байсан.

-Одоо танай байранд яг ямар асуудал гараад байна?
-Эхний жил цонхоор ус шүүрээд өвлийг өнгөрөөсөн. Зун болоход манай бүх өрөө мөөгөнцөртөж, чийгний хөгц үүссэн байсан. Дээрээс нь ажлын орлого бага болохоор банкны барьцаанд тавьдаг ч юм уу, байраа ямар нэгэн байдлаар эдийн засгийн эргэлтэд оруулмаар байна. Байрыг хариуцаж байсан Сүхбаатар гэж “Шинэ-Адар” төслийн захирал залуу байнга биднээс зугтааж худлаа ярьдаг. Дээвэр, хана тааз маш муугийн дээр мансардны байшин гэж хэлээд байрны орцны жижүүрүүд тог, ус салгах бол энүүхэнд болсон хэвийн үзэгдэл. Цахилгааны холболтыг бас буруу хийсэн байна гэсэн. Тог, ус бол байнга тасардаг. Ер нь бол газраа үнэгүй авсанаас өөрцгүй байж. Ийм хямдхан, чанаргүй материалаар ингэж байр барьж биднийг хуурч зарсан нь их л муухай юм даа.

-Тантай адилхан зовлонтой хүмүүс энэ байранд бий юү? Эсвэл ганцхан танайд ийм асуудал байгаа юм болов уу?
- Ганцхан манайх биш ээ. Хааяа гадаа салхилж суухад хажуугийн орцны мансардны нэг хөгшин, манай хөршийнх гээд л хүмүүс хөгшин хөвөө улсуудтай, нялх нойтон хүүхэдтэйн дээр байр нь үргэлж асуудалтай байдаг тухай хууч хөөрдөг. Хамгийн гол нь улсын коммис яагаад хүлээж авахгүй байна гэдэг нь их сонин. Шаардлага хангаагүй болоод л хүлээж авахгүй байгаа хэрэг. Айлууд өөрсдөө 200 мянган төгрөг гаргаад засууллаа, 500 мянган төгрөг гаргаж засууллаа, сантехникээ бүгдийг нь солиуллаа гээд л байнга ярьж байдаг. “Шинэ-Адар” төслийнхөн өөрсдөө засч, янзалж өгнө гэдэг боловч жил тойрон явдаг, утсаа салгаад байнга зугтаадаг учраас манайх засвар хийж амжаагүй, хөгц мөөгөнцөртэйгээ чигээрээ л 4 жил шахам болж байна.

-Цаашид тэгээд яах бодолтой байна вэ?
-Байраа буцаая гэж олон удаа хандаж, өргөдөл гаргаж үзсэн. Гэвч энэ хүсэлтийг хүлээж авах боломжгүй гэж тайлбарлаж байна лээ. Тэгэхээр надтай адилхан зовлонтой байгаа мансардныхаа оршин суугчдыг бөөгнүүлж байгаад холбогдох газруудаар нь явъя гэж ойрноос ярьж байгаа. Зун долоодугаар сард л “Намар 9 сард байраа улсын коммист хүлээлгэж өгнө” гэж хуураад явсан. Одоо 9 сар бараг дуусч байна. Коммисын гэсэн нэг ч хүн үзэгдээгүй. Угаасаа байрны хана нь хүртэл маш нимгэн, тэрнээсээ болоод өвөл их хүйтэн өвөлждөг юм. Ер нь асуудал их бий дээ. Хятадууд барьсан юм гэсэн.
-Бидэнд мэдээлэл өгсөнд баярлалаа.

- Би байрныхаа болон хаалганыхаа тоотыг нууцалмаар байна -

Ийнхүү мансард төслийн хүрээнд мансардны орон сууцыг сонгосон айлууд өнөөдрийг хүртэл байртай гэдгээ батлах гэрчилгээ ч үгүйгээр амьдарч байгаа аж. Хүн л болсон хойно байраа барьцаанд тавих, бусдад зарж борлуулах гээд шаардлага олон гарч байгаа. Гэтэл улсын комиссын хүлээж аваагүй эдгээр мансардны барилгуудад байгаа айл өрхүүд төслийн гүйцэтгэгчид, барилгыг нь барьсан хятадуудаас, чанаргүй барилгаас болж дөрвөн жил хохирч байгаа ажээ. Мансард төслийн хүрээнд СӨХ-ны дарга нар болон тухайн байрны хамгийн дээд давхарт оршин суудаг иргэд 1мкв-г 600 мянган төгрөгөөр бодож авсан ажээ. Тэдний хувьд хэвлэлд ярилцлага өгдөггүй зугтдаг байна. Учир нь, өөрсдөө тэр байрандаа амьдардаггүй, оюутан болон залуучуудад хөлслүүлчихдэг учраас нарийн ширийн зовлонг нь тэр бүр мэддэггүй байна. Тэдний хаалганы дугаарыг өгчихсөн, мөн айл бүрээс СӨХ-ийн мөнгө хураадаг хэр нь байрны ядаж орцны засварыг ганц ч удаа хийж байгаагүй гэнэ.

“Шинэ-Адар” төслийг гүйцэтгэгч компаниар “Эн-Ти-Ай-Си” гэгч компани ажилласан бөгөөд найз нөхөд, ах дүүсийн сүлжээ гэж зарим оршин суугчид хэллээ. Мансардны барилгаас зарим үед хаанаас нь мэдэгдэхгүй ус алдаж, дээврээр дамжин үндсэн орон сууцны айлууд руу ч орох тохиолдол олон гардаг гэнэ. Одоогоор хамгийн их асуудал гарч байгаа чанаргүй мансардууд нь БЗД-ийн 15-р хорооны 110, 111, 112, 36-р байруудад баригдсан мансардууд аж. Мансард худалдаж авсан иргэд ийнхүү хохирч байхад хэрэглэгчийн төлөө гэсэн тэдний эрх ашгийг хамгаалдаг байгууллагуудаас нэг ч хүн байдалтай танилцаж, арга хэмжээ авах талаар үг дурсч байгаагүй ажээ. Үүнээс төрийн байгууллагууд, төрийн нэрийн дор төсөл авсан газрууд иргэдийг хэрхэн, яаж хохироож байгаа нь тодхон харагдаж байгаа биз ээ.
С.Пэрэнлэй (www.wikimon.mn)

Мансардтай барилгуудыг улсын комисс хүлээж аваагүй
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
үүнийг ХУД-т 19-р хорооллын 4-р байранд 2009 онд барьж эхлэхээс нь өмнө УМХЕГ-аар хөөцөлдөөд дийлээгүй. Улсын байцаагч Батхүү гэдэг нөхөр булзааруулаад өмөөрөөд улаан зураастай байцаагчийн акт гээч бичиг харуулсаар байгаад л бариулчихсан Одоо тийм хариуцлагагүй байцаагч нараар буулгуулах хэрэгтэй

2012-10-16 | 16:09:20 | 203.91.118.156 |

Мэдээ
Гадаад мэдээ
Видео

Архив ангилал

Мансардтай барилгуудыг улсын комисс хүлээж аваагүй

Сэтгэгдэл (1)