УИХ-ын сонгуулиас лааз өшиглөн хоцорсон, аль нэг фракцид, фракцын “овгор”-уудынхаа сонгуульд хандив өргөсөн гээд засгийн бялуу хүртэх ёстой хэмээн өөрийгөө тодорхойлогчид өнгөрсөн хугацаанд бүтэн нойртой хонож, бүлээн цайгаа ууж чадахгүй догдолж байгаа. Гэвч сонгуулийн дараа сонгогдсон хэсгийнх нь ааш авир өөрчлөгдөж, амлаж байсан бүхнээ умартан бүхнийг өөрсдөө хамах ажиллагаанд шилжээд байгаа нь ийнхүү ил цагаан дайн дэгдэхэд хүрээд байгаа билээ.

Эл дайн явсаар өнөөх намын даргаас унагах гэсэн эцсийн шат руу дөхөх болоод байгаа тухай шум тус намын эргэн тойронд хөвөрч эхэлжээ.

Ийм сүрдүүлэг Н.Алтанхуягийг өнгөрсөн дөрвөн жилийн хугацаанд байнга дагаж ирсэн. Үндэсний зөвлөлдөх хорооных нь хурал болгоны өмнө ийм давалгаа явж тэр бүрд Н.Алтанхуяг их бага хэмжээгээр буулт хийсээр нэг ёсондоо дотоод фракцуудаа давраачихсан хэрэг. Ийм ч учраас түүнийг Ерөнхий сайд болмогц сүрдүүлгийн давалгаа өмнөхөөсөө хүчтэй түрж өнөөдөр өөрийг нь унагах эсэх тухайдаа тулан яригдаж эхлээд байгаа юм байна.

Н.Алтанхуяг Засгийн газраа бүрдүүлэхдээ өмнөх гашуун туршлагыг давтахгүй гэхдээ МАН-аас бусад төлөөллийг оруулан дөрвөн жил тэсэх санаатай ая эвийг олохыг хичээсэн. Харин энэ нь намынх нь нөхдөд таалагдаагүй. Бүр тодруулбал сонгуулиар лааз өшиглөсөн болгон засагт орохыг шууд тулгасан. Тэр хүсэлтийг биелүүлэхэд албан тушаалын тоо багадсан. Дээрээс нь олонх болж чадаагүйн гайгаар МАХН-МҮАН эвсэл, бие даагчид, ИЗНН-ын дарамтад орохоос өөр аргагүй нөхцөл байдал бүрдэв.

Иймээс “нам сонгуульд үнэмлэхүй ялалт байгуулаагүйн буруутан Н.Алтанхуягт, хариуцлага тооцно” гэх яриаг сонгуулийн маргаашнаас гаргасан хэсэг нөхөд өнөөдөр ахиад л яриад эхэллээ. Энэ улс төрийн хариуцлага тооцох шалтгаан мөн үү гэвэл мөн. Улс төрийн намын том зорилго бол парламентад олонх болж засаглалаа тогтоох. Харин тал талын ая тал олохоор нахилзсан Н.Алтанхуяг Ардчилсан намын энэ эрхэм зорилгыг биелүүлж чадаагүй.

Дээрээс нь Н.Алтанхуяг ганцаарчилсан тоглолт хийн улстөрчийнхөө хувьд оноо авах дуртай. Өнгөрсөн парламентын үед улс орон минь хэцүүднэ гэж үглэсээр намынхаа гишүүдээс зөрсөөр байгаад Засгийн газарт орон МАН-ын суганд хавчуулагдсан ч сонгуулийн өмнө гэнэт л нэг өглөө “гарлаа” гэж мэдэгдсэн. Энэ нь эргээд намынхаа гишүүдийг ундууцахад хүргэсэн. Энэ ерөөсөө л Н.Алтанхуягийн үндсэн хувь шинж чанар бололтой.

Тэр эргээд л дэд сайдын суудалгүй засаг байгуулна гэсэн гэнэтийн шийд гаргаж. Энэ нь энэ л суудлыг харж байсан намынх нь гишүүдэд таалагдсангүй. Бүр намын бүлгийн дарга нь ч энэ тухай мэдээгүй төдийгүй “үгүй” байлгүй дээ гээд сууж байх жишээтэй. Эргээд түүх давтагдан эрх мэдэлд хүрсэн намын дарга гишүүдээ тоолгүй ганцаарчилсан тоглолт хийхийг завдав. Мэдээж энэ нь намын гишүүд, бусад намуудад таалагдсангүй. Иймээс ч ИЗНН дэд сайдын суудал байхгүй тул засгаас гарах шийд гаргачихав. Тэгмэгц Н.Алтанхуяг яаралтай уулзъя гэж дуудав. Өнөөдрөөс дэд сайдуудын нэрсийг намдаа, эвссэн хамтрагчидтайгаа ярьж наймаалцаж эхэлнэ. Тэр шийд гаргадаг. Амжилт олдоггүй. Тэгээд буулт хийдэг. Төрд төмөр нүүр хэрэгтэй үедээ хэрэгтэй. Түүнээс эргэж буцсан, ийш тийш самгардсан хандлага хэрэггүй.

Өөрийг нь унагахын тулд “Шонхор” фракц байгуулж байсан нөхдөд Ерөнхий сайдаар арай удаан тэсэхийн тулд томоохон бялуу хүртээв. Хамгийн том дайсан З.Энхболдыг спикер болгож, нөгөөдүүлд нь сайд өгөв. “Зүүн хойт Ази”-ийн Л.Болд, “МоАХ” фракцийн толгойлогч Х.Баттулга хийгээд эдгээрийн аялдан дагалдагчдад бялуу хүртээв. Бүр засгаасаа даваад намаа фракцууддаа адил тэнцүү хувааж эхэллээ. Энэ бүхний цаана өөрөө л Ерөнхий сайд хийгээд намын даргын сэнтийд тэсэх хүсэл байгаагаас лидерийн бодлогоор намаа, улс орноо чирэх, өөд татах зорилго харагдахгүй байгааг өөрийнх нь “цэргүүд” ил тодоор ярих болоод байгаа. Иймээс Ардчилсан нам өнөөдөр Н.Алтанхуяг гэдэг ганц даргатай бус хэд хэдэн даргатай болов. Фракцаасаа улс төрийн шагнал хүртэн намын хэлтсийн дарга болсон хүн намын даргынхаа биш фракцийн даргынхаа үгийг сонсч, ажлаа явуулах нь тодорхой. Ингэдэг ч жамтай. Иймээс өнөөдөр Ардчилсан нам хэлтсийн дарга, нарийн бичгийн дарга нараар өртөөлсөн хагаралд ороод байна. Засгийн газар ч ялгаагүй тул Монгол төр арван хэдэн толгойтой болов. Н.Алтанхуягийн араншин намаа, төрийг ингэж бутаргав.

БУУЖ ӨГӨХ НЬ Н.АЛТАНХУЯГИЙН Л АРАНШИН
Tweet
Bolod.mn

Сэтгэгдэл (4)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
хурдан унаасаа тыи чорт

2013-03-09 | 20:10:30 | 122.201.18.233 |

Зочин
ёстой муухай хүн байгаа биз юуг ч хэзээ ч хаана ч хамаагуй солино доо

2012-08-30 | 19:41:20 | 203.194.115.242 |

Зочин
угаасаа Энэ нөхөр амжихгүй уу есөн шидийн баахан хог шаарнууд цугларчихсан юун Тэрбишдагва Улаан бэ

2012-08-30 | 18:22:29 | 92.224.197.197 |

Зочин
АН ийхан одоо өнгөрсөн борооний хойноос цув нөмрөөд хэрэгүй АЛТАНХУЯГИЙН засагын газарыг ажлуулаад үзэх нь зӨв юун албан тушаалд дуртай новошнууд вэ МОНГОЛОО гэсэн сэтгэл байна уу АЛТАНХУЯГИЙГ ХЭРБЭЭ САЙН АЖЛАЖ ЧАДАХГҮЙ БОЛ СОЛХОД АМАРХАН АЖЛУУЛААД ҮЗЭХ НЬ ЗӨВ ДАРАГ БОЛОХ ГЭЖ БҮҮ САНДАР ТААРУУХАН ХҮНИЙЛ ЗАН

2012-08-30 | 10:15:23 | 202.126.91.60 |