-Яамны тоог нэмэгдүүлж, агентлагийг багасгаснаар төсвийг хэмнэх боломжтой юу?
-Агентлаг цөөрсөн ч товчоо, хүрээлэн гэх зэрэг том том бүтэц гарч ирдэг. Тэдгээрийг өөрөө өөрийнхөө орлогоор санхүүжээд явдаг гэж тайлбарладаг. Хүмүүс тийм байх аа гэж ойлгодог. Гэтэл тэд бүгд төсвөөс санхүүждэг. Тэгэхээр ил бүтэц, далд бүтэц хоёрын хоорондын харилцааг их зөв тогтоох нэг асуудал байна. Эдгээрийг иж бүрнээр нь авч үзэх ёстой. Нөгөө талаас бүтцийн асуудал ярихаар концепцийн асуудал гарч ирдэг. Бид нэг хэсэг төрийн захиргааны төв байгууллага зөвхөн бодлого хариуцна гэсэн асуудал тавьж байсан. Энэ маань амьдрал дээр очихоороо их явцуухан болж ирсэн. Зөвхөн бодлого ярьдаг л улсууд бий болсон. Бодлогын хэрэгжилт, түүний үр өгөөж, ямар үнэ өртгөөр тэр бодлогыг хэрэгжүүлж байна вэ, хэрэгжилтийн явц ямар байна гэдгийг төрийн захиргааны байгууллага эргээд хянаж чаддаггүй. Тиймээс энэ хэрэгжилтийг хариуцсан бие даасан өөр бүтэц гараад ирдэг. Ил далд зэрэгцсэн яам, агентлагууд гарч ирдгийн шалтгаан бол энэ. Яам, агентлаг, тэнд ажиллаж байгаа хүмүүсийг нэгтгээд үзэхээр 4000 гаруй хүн л байгаа. Тэднийг хаана байршуулбал ажил нь давхцахгүй, ажил нь хоорондоо хийдэхгүй, мэргэжлийн төвшинд үр дүнтэйгээр ажлаа удирдаад явах байдал хаана бүрдэх вэ гэдэг дундаж, оновчтой харьцааг олох хэрэгтэй юм. Энэ үүднээс “Шударга ёс” эвсэл бүтцийн асуудал дээр нэлээд ажиллаж байна.
-Агентлагийн тоог багасгаснаар олон мянган төрийн албан хаагч ажилгүй болох нь гэж үзээд байна. Ямар нэг гарц байгаа юм уу?
-Бүтцийн өөрчлөлтийн асуудал нь зөвхөн орон тоог цөөрүүлэх, хүмүүсийн халж солих зорилго агуулдаггүй. Хамгийн гол нь оновчтой бүтцийг бий болгох, чадварлаг үр ашигтай ажиллах төрийн албан хаагчийг бий болгох зорилготой байдаг. Тийм учраас оновчтой бүтцийг бий болгох чиглэл рүү ажил маань хийгдэж байна. Үүрэг функц нь байж байгаа бол түүнийг хариуцах ажилтан албан хаагч байж л таарна. Хаана, хэн ямар ажлыг хариуцах вэ гэдэгт л нарийвчлан боловсрогдож байна.Өчнөөн хүнийг гудамжинд гаргах нь гэдэг нь дэндүү өнгөцхөн асуудал юм. Бүтэц бүрэлдэхүүн тодорхой болсоны дараа төрийн албан хаагчид ажлаа хийнэ. Агентлаг, яамдад ажиллаж байгаа 4500 хүний асуудлыг оновчтой зөв боловсруулах асуудал яригдаж байна.
-Яамдуудын үүрэг, хийх, хариуцах ажлын чиглэлд танай намаас чамлалтай хандаж байгаа гэсэн?
-Чамлалтай гэж хэлэх нь зохимжтой биш л дээ. Ямар үүргийг хариуцах, ямар хариуцлага хүлээх вэ гэдэгт асуудал байгаа юм. Тоо талаас нь дүгнээгүй. Цаана нь агуулга байгаа. Сангийн яам, шадар сайдын цаана хариуцах цар хүрээ машстаб ямар байх вэ гэдэгт тодорхой санал байгаа. Энэ асуудлыг тал талаас нь хэлэлцээд оновчтой байлгах хэлбэрт дөхүүлж чадна гэсэн итгэл үнэмшилтэйгээр ярилцаж байна.
-Ажлын хэсэг байгуулагдсан гэсэн. Ажлын хэсгээр ямар шийдэлд хүрсэн бол?
Хуралдаанаар Засгийн газрын бүтэц ямар байвал оновчтой вэ гэдэг асуудлыг ярьсан. Үүрэг, чиглэл нь давхацсан, орхигдсон асуудал байна. Оновчтой биш хуваарилсан асуудал ч байгаа. Энэ бүгдийг нэг бүрчлэн авч үзсэн. Хэлэлцэж байгаа асуудлыг яриад байх хэрэггүй байх. Бүх гишүүдийнхээ байр суурийг нэгтгэж санал боловсруулаад бүлгийнхээ хуралд оруулж Ерөнхий сайдтай нэг бүрчлэн ярьж байна. Онолын хувьд Засгийн газрын чиг үүрэг таван чиглэлтэй байдаг. Эдгээр нь эдийн засгийн бүтцийн асуудал, нийгмийн асуудал, улс орны дотоод хэрэг, гадаад харилцаа, бүтэц бүрэлдэхүүн гэсэн багцад хуваагддаг. Чиг үүргийг хуваарилахдаа барьдаг зарчмууд гэж бас байна. Эрхлэх асуудлын хүрээ нэгдүгээрт, цогц, иж бүрэн байх ёстой. Хоёрт, давхардал гаргахгүй, хүчээ тарамдуулахгүй, олон тийш чангаахгүй байх ёстой. Гуравт, хэн юу хариуцах вэ, ямар хариуцлагатай байх, юуны төлөө хариуцлага хүлээх вэ гэдэг тодорхой байх ёстой. Дөрөвт, үр ашиг чухал. Эдгээрт анхаарлаа төвлөрүүлж, өчигдөр, өнөөдөр манай бүлэг ажиллаж байна. Ирэх дөрвөн жилд Монгол Улсад хэрэгжүүлэхээр зорьж буй шинэ том зорилтыг биелүүлж чадах оновчтой тэр бүтцийг бий болгохыг зорьж байна.
-Өмнөх УИХ-ын үед дэд сайд нарын тоог цөөлж байсан. Дэд сайдыг яаж томилох вэ?
-Тухай тухайн нөхцөл байдлаас шалтгаалаад асуудлын тавилт өөр өөр байдаг. Юуны өмнө төсөв, хөрөнгө, мөнгөний хомсдолтой үед хэрэглээгээ хязгаарлах асуудлыг илүүтэй анхаарч санал боловсруулж байсан. Тэр үед тийм нөхцөл байсан. Өнөөдөр ч шинэ бүтцийг бий болгож хэрэгжүүлэхэд орон тоо, зардал нь нэмэгдэхгүй байх нь чухал. Хоёрт, төрийн байгууллагууд ажлыг өндөр ур чадвартайгаар үр ашигтай эрхлэх оновчтой бүтцийг бий болгох асуудлыг хооронд нь оновчтой уялдуулах бүтцийг бий болгох хэрэгтэй. Тиймээс аль болохоор орон тоог нэмэхгүй байх нь нэгдүгээр зорилт. Хэмнэлт гаргах нь хоёр дахь зорилт. Гуравт, зайлшгүй ажил хариуцах бүтцийг бий болгохгүй бол зорилт эзэнгүйдэж үлддэг. Ийм байдал гаргахгүй байх учиртай.
-Засгийн газрыг бүрдүүлэхэд бүлгүүдийн санал зөрснөөс ажил удаад байгаа тал байна уу?
-Нам, эвслүүд хамтран ажиллах гэрээ байгуулсан. Энэ гэрээнд хамтран ажиллахад ямар зарчим барих вэ. Асуудалд ямар дэс дараатай хандах вэ гэдгийг тусгаад баталгаажуулчихсан. Гэрээг хамтран ажилаж байгаа субъект, нам, эвслүүдийн удирдах дээд байгууллагууд хүлээн зөвшөөрөөд баталчихсан. Одоо энэ дагуу ажил явж байна. Ажил явна гэдэг нь өөрөө хариуцлага. Аль болохоор үр ашигтай байх ёстой. Нөхцөл байдалдаа зохицсон, Монголын өвөрмөц байдалд тохирсон бодлогоо бид гаргаж авах ёстой. Түүнээс биш урьдаас ирснийг тэр чигээр нь механикаар хуулаад яваад байвал бүтээлч ажил болохгүй. Тиймээс бид яаж сайжруулах вэ гэдэг үүднээс л асуудлыг тал талаас нь үзэж байна. Үүн дээр л жаахан цаг хугацаа зарж байгаагаас биш удаашраад, асуудлаа тохирч чадаагүйгээс болоод ажил саатаад байгаа зүйл байхгүй гэж бодож байна. Ерөнхий сайд өчигдөр Засгийн газрын бүтэц, бүрэлдэхүүний талаар хуулийн төсөл өргөн барьсан. Өчигдрөөс энэ талаар бүлгүүд хэлэлцэж эхлээд байна. Түүний дараа байнгын хороод, чуулганаар хэлэлцэнэ.
-МАН-ынхны зүгээс яамдын эрх мэдлийг хэтэрхий их нэмсэн учраас хүрээнээсээ халиад хөрөнгө мөнгө хуваарилдаг, аж ахуйн ажилтай зууралддаг болох гэж байна хэмээн шүүмжилсэнтэй санал нэгдэх үү?
-Энд концепцийн том асуудал хөндөгдөж байгаа юм. Өмнө нь яам зөвхөн бодлогын яам байна гэсэн концепц байсан. Тэнд дутагдал байсан. Тийм байхад яам өөрөө бодлогын хэрэгжилтийг хянаж чаддаггүй, ямар үүрэг, хариуцлагыг хүлээх вэ гэдэг тодорхой бус байсан. Зөвхөн тоон талаас нь харвал асуудал юуг ч хэлэхгүй. Тооны цаана агуулга байх ёстой. Давхардал гарахгүй. Хариуцлага хүлээх үү, хүлээхгүй юу гэдэг тогтолцоо нь ил тод байх болно. Бүтэц нь бүхэлдээ үр дүнтэй ажиллах зарчмыг барьж энэ асуудлыг боловсруулж хянаж байна. Аль болох бүтцийн өөрчлөлт гаргах байх аа.
-Энэ Бүтцийн хуулийн дагуу сайд гэдэг хөрөнгө мөнгө захиран зарцуулах том эрхтэй болоод байгаа юм биш үү?
-Ер нь сайд гэдэг чинь өөрөө хөрөнгө мөнгө захиран зарцуулах эрхтэй. Төсвийн ерөнхийлөн захирагч гэдэг бол өөрт оногдсон төсвийн багцийн хүрээндээ төсвөө захиран зарцуулах бүрэн эрхээ эдэлдэг хуультай. Өөрөөр хэлбэл, тухайн салбарн хүрээндээ төсвөө захирч, орлогоо бүрдүүлнэ. Гарсан үр ашгийг хариуцана. Цаашдаа ч тийм байх болно. Одоо шинэ нөхцөл байдал бий болж байгаа. Улсын төсвийн тухай хууль шинэчлэгдэж батлагдсан. 2013 оны нэгдүгээр сарын 1-нээс бүрэн хэмжээгээр хэрэгжих хуулийн бэлтгэл эхэлсэн байна. Энэ хуулиар бол төсвийн эрх мэдлийг орон нутагт шилжүүлэх, төвлөрлийг сааруулах, төр засгийн бодлого боловсруулах төсвийн хөрөнгийн бодлогыг тодорхойлох үүрэг иргэдэд шилжинэ. Иргэдийн оролцоонд тулгуурласан цоо шинэ бодлогоороо онцлог болж байна.
-Сайд нарын нэр урьдчилсан байдлаар яригдаж эхэлсэн үү?
-Сайд нарыг ярьж эхлээгүй байна. Одоо Засгийн газрын бүтцийн асуудлыг ярьж байна. Бүтцийн асуудлын дараа хуулийн дагуу Ерөнхий сайд хамтран ажиллаж байгаа субъектуудтайгаа хамтраад Засгийн газрынхаа бүрэлдэхүүний тухай саналаа оруулж ирэхэд сайдын асуудал тодорхой болно.
-Ц.Оюунбаатар гишүүн тангараг өргөх үү?
-Бүлгээр яриад байх асуудал биш. Энэ асуудал тодорхой шалтгаантай. Сонгуульд намын жагсаалтаар орж ирсэн манай хүний эрхийг түдгэлзүүлсэн байгаа. Анхнаасаа энэ шийдвэртэй эвлэрээгүй. Тийм учраас хууль хяналтын байгууллага энэ асуудлыг магадлан шийдвэрлэх ажил явагдаж байна. Үндсэн хуулийн цэцэд хандсан. Шийдвэрээс хамаарч дараагийн асуудал шийдэгдэнэ.

Б.Өнөртогтох

Ч.Улаан: Сайд гэдэг чинь өөрөө хөрөнгө мөнгө захиран зарцуулах эрхтэй байдаг
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
аймгууд, хот, сум хоорондын км за********тийг вэб сайтандаа тавьж өгнө үү тэгэхгүй бол ганцхан хот хооронд л 1км хүн тутамд 50н төгрөг гэхээр бусад аймаг сум хоорондын 1хүн кмыг хэд гэж үзэхийн бэ энэнийг тодорхой болгож өгнө үү

2014-02-12 | 17:41:13 | 202.179.11.70 |

Мэдээ
Гадаад мэдээ
Видео