-"Anemone" хамтлагийнхан одоогоор ямар уран бүтээл дээр ажиллаж байна вэ?
-Жанна: Манай хамтлагийнхан байгуулагдаад жил гаруй болчихлоо. Шинэ уран бүтээлүүд дээрээ шаргуу ажиллаж байна. Зун гэдэг утгаараа илүү их ажиллахыг хүсч байгаа. Цомгийнхоо ажилд орчихсон. Ерөнхийдөө 70 хувьдаа явж байна. Зөндөө олон шинэ дуу, клипний ажилтай яваад байна. Саяхан "Надад мөрөөдөл бий" дуугаа сонсогчдод хүргэсэн байгаа.

-Анхны цомгоо хэзээ сонсогчдын гар дээр хүргэх гэж байна даа?
-Жанна: Наймдугаар сард дуусгахаар төлөвлөөд ажиллаж байна.

-Танай хамтлагийн хувьд цэвэр поп стилиэр дуулдгийг мэдэх юм байна. Энэ цомогт ч гэсэн дандаа поп дуунууд багтсан уу?
-Жулиа: Манай хамтлагийн хувьд "Up Music" продакшнтай хамтран ажилладаг. Цомогт орсон дуунуудын ихэнх нь Чука, Халиун ахын аялгуу. Тэгэхээр бид стильд баригдахгүйгээр аялгуулаг сайхан дуунуудыг хийж байгаа.

-Жанна: Ер нь манай хамтлагийн продюсер Чука, Халиун ах хоёр цаашдын дуулах стилийн тухай ярилцдаг л даа. Анхны "Anemone" цомгийн хувьд нэрэндээ илүү тохирсон өсвөр үеийнхэнд хандсан уянгалаг поп дуунууд ихэнхдээ орсон. Эхний цомог гэдэг утгаараа аялгуулаг, хүний чихэнд хоногшсон дуунаас бүрдүүлье гэж бодож байгаа. Харин дараагийн цомгийн хувьд тэсрэлт хийсэн огт өөр стилиэр дуулахаар төлөвлөсөн.

-Та нарыг анх эргэн тойрныхон чинь л мэддэг байсан бол "Making the band" шоунд оролцоод тодорхой хэмжээнд олонд танигдлаа. Гадуур явахад хүмүүсийн харилцаа хэр өөрчлөгдсөн бэ, таньж байгаа нь таалагдаж байна уу?
-Жанна: Өмнө нь биднийг танилын хүрээллээс өөр төдийлөн хэн ч танихгүй, жирийн оюутнууд байсан бол одоо багахан ч гэсэн хүмүүс таниад арай өөр болсон. Анх "Making the band" шоунаас гарсан бол одоо "Up Music" продакшнд харьяалагдаад явж байна. Гадуур явахад хүмүүс таньдаг шүү. Энэ нь бидэнд хариуцлага ирж байгааг сануулдаг. Наад зах нь гадуур явахдаа биеэ зөв авч явахаас эхлээд л олон зүйл дээр суралцаж байна. Гэхдээ хүмүүс танилаа гээд гадуур явахдаа өөрийнхөөрөө бус ч юм уу, жүжиглэнэ гэж байхгүй.

-Жулиа: Ганцаараа явахад хүмүүс таних нь арай бага байдаг. Ялангуяа дөрвүүлээ гадуур явахаар хүмүүс маш их таньдаг. Жанна нэг иймэрхүү стилиэр хувцасладаг, Жулиа тийм гэх мэтчилэн бүр мэдчихсэн байдаг нь анзаарагдсан.

-Шоуг үзэж байхад муудалцах, үл ойлголцол их гардаг байсан. Одоо үл ойлголцлоо хэрхэн шийдвэрлэдэг вэ?
-Жанна: Шоуны үед бид энд тэндээс ирсэн нэгнийхээ ааш араншинг мэддэггүй охид байсан. Одоо бол тодорхой хэмжээнд хамтдаа уран бүтээл хийчихсэн, нэгнийхээ араншинг мэддэг болсон учраас ойлгож харилцахыг хичээдэг болсон. Ер нь үл ойлголцол гарлаа ч 30 минут, нэг цагаас хэтэрдэггүй шүү. Дор бүр нь асуудлаа шийдвэрлэчихдэг учраас хэрүүл маргаан нэг их гардаггүй дээ.

-Эмэгтэй хамтлагууд нэг үеэ бодвол олноороо гарч ирж байна. Ямар хамтлагийг өөрсдийнхөө хүчтэй өрсөлдөгч гэж боддог вэ?
-Жанна: Өрсөлдөгч гэхээсээ илүү тэр хүмүүсийн дуулах чадвар зэргээс нь суралцаж судлахыг хичээдэг. Бидний дуулах жанр стиль, хэв маяг өөр учраас өрсөлдөөд байхгүй. Эмэгтэй хамтлагуудаас гэвэл "Sweetymotion", "3 Охин", "Киви"-ийн эгч нарыг хүндэлдэг. Ялангуяа "Sweetymotion" хамтлагийг үнэлдэг. Эмэгтэй хамтлагийн хувьд 15 жил оршин тогтноно гэдэг асар их хугацаа. Тиймээс манай хамтлаг "Sweetymotion" шиг урт удаан настай байхыг мөрөөддөг. "Extacy", "Honeymoon", "Catwalk" гээд охидын хамтлаг их гарч ирж байна. Цаашид ч зөндөө хамтлаг гарч ирээд хоорондоо өрсөлдөн тэр дундаас нь сайн уран бүтээл гарч ирнэ. Гэхдээ биднийг өөр хамтлагийнхантай өрсөлдүүлэхээр биш л дээ. Яагаад гэхээр бидний дуулдаг стиль жанр өөр.

-Эмэгтэй хамтлагууд уран бүтээл гэж яваад хувийн амьдралаа оройтуулах асуудал их байдаг. Танай хамтлагийн хувьд үүнийг хэрхэн зохицуулах бол?
-Жанна: Урлаг гэдэг маш нарийн зүйл. Эмэгтэй хүнээс их зүйлийг шаарддаг. Тэр ч утгаараа бид дөрөв ч гэсэн хамтлаг гэдэг дээрээ нэгдээд хувийн амьдрал, найз залуу гэдэг зүйлийг түр хугацаанд хойш нь тавьчихаад байна. Найз залуу гэдэг хамтлагийн дараагийн асуудал.

-Цаашид хэдэн жил оршин тогтоох төлөвлөгөө гаргасан зүйл бий юу?
-Жанна: Анх бид тавуулаа хөгширтлөө хамт байна гэж ярилцдаг байсан. Гэсэн ч Ооноо маань Япон явах болсон. Бидэнд их хэцүү байсан л даа. Ооноогоо явуулахгүй, хамтлагтайгаа гоё байна гээд их хэлсэн. Гэхдээ Ооноо өөрөө "Надад алдаж болохгүй боломж ирлээ. Дуучин болох хүний хувьд алдаж болохгүй боломж" гэж хэлсэн. Бид яаж ч гүрийгээд үлдээж чадаагүй. Энэ утгаараа охидын хамтлагт ар гэрийн гэх мэт олон асуудал гарч санаснаар болдоггүй юм байна гэдгийг ойлголоо. Харин одоо бол бид дөрөв атгасан гар шиг салахгүй, олон жил уран бүтээлээ туурвина. Түрүүн хэлсэн дээ, найз залуу, ар гэрийн асуудал тэр битгий хэл хувийн шалтгаанаар гадаад явахыг хүртэл хойшлуулчихаад байна.

-Ооноо хамтлагаасаа гарах болсон шалтгаанаа анх яаж хэлсэн бэ?
-Жулиа: Анх бид нарт Японд суралцах шалгалт өгчихөөд байна гэж хэлсэн. Яг явна гэдэг нь тодорхой болоогүй байсан. Тэгсэн дараа нь тэр сургуулиас Ооноог тэнцсэн гэсэн хариу ирсэн.

-Жанна: Тэр сургууль нь Японы Токио хотод байрладаг. Монголоос хэр баргийн хүн явж чаддаггүй сургууль Ооноогийн маань авьяас чадлыг үнэлээд авахаар санал ирүүлсэн. Мөн Ооноогийн Япон аав нь тэнд амьдардаг. Тэр хүнээс нь бас санал ирээд яалт ч үгүй явсан. Одоо анхан шатны нэгдүгээр курсдээ суралцаж байгаа. Магадгүй дөрөв таван жилийн "Anemone" хамтлагаас төрөн гарсан Ооноо гэж чадалтай дуучин ирэх байх.

-Өмнө танай хамтлагт байсан Аарий гэж охинтой хэр холбоотой байдаг вэ, Ооноогийн оронд буцааж авах бодол бий юу?
-Жанна: Аарийгийн хувьд cap гаруйн хугацаанд манай хамтлагт байсан. Үнэхээр манай хамтлагийн гишүүн байж чадсан. Одоо ч гэсэн бид мессеж бичиж, утсаар яриад холбоотой байдаг. Бидний дууг сонссон гээд их дэмждэг. Ооноог нөхөх хүн хайгаагүй биш хайсан. Гэхдээ тэр орон зайг нөхөх хүн байхгүй. Аарийг авна гэж байхгүй л дээ. Ооноо байхгүй ч гэсэн манай хамтлаг уран бүтээлээ туурвиад явах л болно.

-Юмыг яаж мэдэх вэ, нэг нь найз залуутай болоод нууж байсан бол яах вэ?
-Жанна: Мэдээж хэзээ нэг цагт найз залуутай болно. Тэгвэл хамтлагтаа зарцуулах цаг заваасаа хумслахгүй байвал яахав. Гэхдээ манай хамтлагийн охидын хувьд ойрын дөрөв таван жилдээ найз залуу гэсэн ойлголт толгойд нь байхгүй гэж бодож байгаа шүү.

-Анхны тоглолтоо хэзээ хийнэ гэж боддог вэ, магадгүй мөрөөддөг байх?
-Жанна: Анхны тоглолт нүдэнд маань харагддаг шүү. Үнэхээр сайхан зассан тайз, салют. Бид нар үс гэзгээ гоё засуулчихсан гар гараасаа бариад "Охидуудаа бид нар гарлаа шүү" гээд тайзны ард чичрээд, сандраад зогсч байна гэж мөрөөддөг. Гэхдээ одоохондоо тоглолт хийх арай болоогүй. Биднийг зөндөө олон хүн үздэг, хүлээн зөвшөөрөгдсөн цагтаа тоглолт хийнэ. Дөнгөж суралцаж эхэлж байна. Цаашид ч гэсэн суралцсаар байх болно. Тоглолт хийнэ гэдэг одоогоор мөрөөдөл. Гэхдээ маш ойрхон мөрөөдөл гэж бодож байгаа.

-"Надад мөрөөдөл бий" гээд дуу гаргасан. Танай хамтлагийн мөрөөдөл цомог гаргах гэж ярьж байсныг санаж байна. Мөрөөдлүүд ар араасаа биелсээр байна?
-Жулиа: Тийм. Бидэнд маш их мөрөөдөл байдаг. Анхны цомгоо гаргах нь бидний мөрөөдөл байсан бол одоо удахгүй. бэлэн болох гэж байна. Тэгээд ханахгүй хоёр дахь цомог гээд цаашаа ч гэсэн зөндөө олон зүйлийг мөрөөдсөөр байх болно. Мөн бас нэг нууцхан мөрөөдөл болох хамтлагийнхаа нэрээр нэрлэсэн онгоцтой болох хүслээ "Надад мөрөөдөл бий" дууныхаа клипээр гаргасан.

-Магадгүй хэдэн жилийн дараа танай хамтлагийнхан "Up Music" продакшнаас тусдаа гарч бие даасан хамтлаг болно байх?
-Жанна: Одоохондоо тийм бодол байдаггүй. Чука, Халиун ах нарын өмнө бид асар их өртэй. Энэ хоёр бол бидний аав ээж шиг хүмүүс. Энэ хоёр л биднийг хаяхгүй бол бид хамтдаа байхыг л хүсдэг.

-Продакшны хажуу дахь хамтлаг гэдэг утгаараа уран бүтээлийн тал дээр санаа зоволтгүй байдаг байх. Харин эцэг эхээсээ санхүүгийн хувьд бүрэн хараат бус болж чадсан уу?
-Жанна: Бүрэн хараат бус гэж хэлж болохгүй. Бид оюутнууд, хамтлагаасаа нэг их мөнгө олоод байдаггүй. Харин хамтлагийн санхүү, цомог гээд асуудлыг "Uр Music" продакшн, Чука, Халиун ах нар хариуцдаг. Ямар ч байсан уран бүтээлийн тал дээр эцэг эхээсээ тусламж авдаггүй. Харин бусдаар бол оюутан хүүхдүүд учраас одоохондоо эцэг эхээсээ санхүүгийн тусламж авалгүй яах вэ.

Б.Золзаяа

"Anemone": Тоглолт хийнэ гэдэг одоохондоо мөрөөдөл, гэхдээ тун удахгүй биелнэ
Tweet
Bolod.mn