МАН-тай эвсвэл ингэнэ. МАХН-тай эвсвэл тэгнэ.

2012-07-05

Гуйна гэдэг гутамшиг, гуйлгана гэдэг гайхамшиг гэж үг бий. Гэхдээ арай ч монгол ардын зүйр цэцэн үг биш л дээ.

Гэхдээ л яг оносон хэлц. Энэ хэлц яг одоо улстөрийн намуудын уур амьсгалд тохирно. Сонгуульд хэдэн саналын илүүгээр ялсан Ардчилсан намыг МАН, МАХН-МҮАН-ынхан горьдлогын харцаар харж, ирмэж дохиод сүйд майд. Харин цаадуул нь байж бай, харан байж сонгоё, нүүрээ угааж, нөгөө хувцсаа өмсчихөөд хүлээж бай гэчихсэн. Нэг нэгээр нь авч уулзаад л. За тэгж тэгж, аль нэгэнтэй нь эвсч таарна. Харин алинтай нь эвсэхээс намынх нь нэр хүнд унах, өсөх нь шалтгаална. МАН-тай эвслээ гэж бодъё. МАНАН дахиад татсан хэргээр сөрөг хүчин болох МАХН-МҮАН-ынханд гөвшүүлж эхэлнэ. Бүлэг байгуулах хэмжээний гишүүдтэй хоёр намын “Шударга ёс” эвслийнхэн тэднийг ажил хийлгэх нь юу л бол.

Өчүүхэн юман дээр ч нээнтэглэж, зогсоохыг урьтал болгоно. Айлгана. Үнэмлэхүй олонхийн суудал авч чадаагүй ч засаг байгуулах эрх АН-д бий болохоор асуудлыг тэд л зохицуулна. “Тавуулаа биш тавиулаа эргэж ирнэ” гэсэн уриатай оролцсон 1996 оны сонгуулиар АН үнэмлэхүй олонхиор ялалт байгуулж, дөрвөн жилийн хугацаанд гурван засгийн нүүрийг үзсэн гашуун туршлагаасаа санамж авсан болохоор алдах эрх байхгүй. МАН-д хадаг барьж очлоо гэж бодъё. Цаадуул нь мэдээж уухайн тас зөвшөөрнө. Өнгөрсөн дөрвөн жилийн гурвыг нь хамтарч туулсан хувь заяагаа бодож, хэн хэнийхээ занг мэддэг болсны хувьд энэ нь “хаан сонголт” байж болох ч “Шударга ёс” эвслийн арван хүнээс жийрхэхээс аргагүй. “Хаан сонголт”-ыг хийж МАН-тай эвсвэл яах вэ. Гол гол яамуудаа Ардчилсан нам өмчилж, Боловсрол, эрүүл мэнд, хөдөө аж ахуй, батлан хамгаалахын сайдуудыг МАН-д хуваарилж болох юм. Ингэвэл энэ удаагийн сонгуулийн пиарыг амжилттай хийсэн Т.Бадамжунай ХХААХҮЯ-аа, Ё.Отгонбаяр БСШУЯ-аа, Ж.Энхбаяр БХЯ-аа, Н.Хүрэлбаатар ЭМЯ-аа толгойлж үлдэх нэг хувилбар байна.

Аль эсвэл суудалгүй үлдсэн Г.Занданшатар, Д.Одбаяр, Р.Буд, Д.Дамба-Очир, Д.Арвин, Ч.Ганхуяг, Д.Зоригт нарын “хөзрийн тамгуудаа” дэлгэх үү гэдгийг шийднэ. Аймаг, дүүргийн Засаг дарга, яам агентлагийн сайд, дарга байгаад сонгуульд ялагдсан нөхдүүдийнхээ гомдлыг дэд сайдаар мялааж болох. МАН-ын дарга, генсек хоёрын хувьд тусдаа асуудал. Намаа сонгуульд ялагдуулсан намын дарга, ялагдвал хариуцлага үүрэхээ амласан генсек хоёрыг одоо ямар ирээдүй хүлээж байгаа бол гэдэг нь сонин байна. Энэ хоёр даргатайгаа хариуцлага тооцох гэсэн хүмүүс МАН-д олон байна. Ёс суртахуунаа бодвол өөрсдөө зайгаа тавьж өгнө, хуучин тогтолцоогоо бодвол ширэн нүүрлэнэ. Ийм л хоёр зам үлдсэн. Сүүлийн үед МАН-аас жагсаалтаар УИХ-д орж ирэх эрхмүүд хоорондоо ярилцаад эмэгтэй нэр дэвшигчдээ боломж олгож, нэг нь жагсаалтаас өөрийн хүсэлтээр сугарч гарч магадгүй тухай яриа гарсан. Тодруулбал, Д.Дэмбэрэл дарга нас өндөрт гарлаа гээд өөрийн хүсэлтээр УИХ-аас татгалзаж, намын нэрсийн жагсаалтаар хоншоороороо тастуулсан намын нарийн бичгийн дарга Д.Сарангэрэлд боломж гаргаж өгөх тухай яриа. Ийм зүйл байж болох эсэх нь эргэлзээтэй. Ийм асуудал байж болохгүй, байх ч ёсгүй гэдгийг олон хүн хэлж байна. Хэрэв ингэвэл шударгаар нөхөн сонгууль явуулах хэрэгтэй. Эс тэгвэл МАХН-ын О.Баасанхүү нас балчир байна гэж нэрээ татаад Н.Энхбаяр даргыгаа УИХ-д оруулъя гэвэл яах уу. ИЗНН-ын дарга С.Оюун тэртэй тэргүй ганц хоёулхнаа юм чинь та нар барьж иднэ, би болилоо гээд намынхаа жагсаалтад орсон дуртай нэгнийг нь парламентад суулгах уу. МАН ингэж шийдвэл, бусад нь яг ингэж дагана. Инээдтэй хэрэг.

За одоо АН-ыг МАХН-МҮАН-ын “Шударга ёс” эвслийнхэнтэй гэрлүүлье. АН-ынхан 14 сайдынхаа ядаж дөрвөөс тавыг нь тэдэнд бэлэглэх нигууртай. Эвсэхийн гол утга учир энэ. Эвслийнхэн намын жагсаалтын эхний таваас зургаан хүнээ тойрогт ялалт байгуулагчидтайгаа нийлүүлж байгаад бүлэг байгуулчихаж дөнгөнө. Мэдээж жагсаалтаас гадуур байгаа “нууц ноёнтнууддаа” Засгийн газарт орох томилолт өгнө. Хэрэв ингэсэн тохиолдолд энэ удаагийн Засгийн газар нэлээд хүчирхэгжих магадлалтай. МАХН-МҮАН-ын эвслээс сонгуульд ялалт байгуулж чадаагүй лидерүүд олон бий. Нэгэн цагт Ерөнхий сайд болж явсан М.Энхсайханаас эхлээд Монголбанкны ерөнхийлөгчөөр чамгүй хугацаанд ажилласан О.Чулуунбат, эрдэмтэн Ч.Хурц, Эрүүл мэндийн сайд асан, МАХН-ын нарийн бичгийн дарга Н.Удвал, ЗТБХБ-ын сайд асан, дипломатч Ц.Цолмон гээд “аюул”-ууд бий. Эдний хэн нь ч яамны сайдыг өлхөн хийчихнэ. Ямар хийж үзээгүй ажил биш. МАН үүнээс л их айж байгаа даа.

Б.Оюунгэрэл

Тоймч

МАН-тай эвсвэл ингэнэ. МАХН-тай эвсвэл тэгнэ.
Tweet
Bolod.mn

Сэтгэгдэл (2)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
МАН, АН - ынхан ОДОО БАЙГАА ЛУЙВАРЧИДЫН, АЛУУРЧДЫН, ГАДНЫ ХУЛГАЙЧ НАРЫН ГАР ХӨЛ БОЛСОН, ЭХ ОРОН ГАЗАР ШОРОО, БАЯЛГАА ХУДАЛДСАН Сү. БАТБОЛД, ХҮРЭЛСҮХ, СОДБААТАР, ЗОРИГТ, НЯМДОРЖ, МИЕГ. ЭНХБОЛД, БАДАМЖУНАЙ,ГАНСҮХ, БАЯРЦОГТ ГЭХ МЭТ МАШ ОЛОН ХУВАЛЗНУУД, ХОГИЙН ШААРНУУДААС САЛАХ ХЭРЭГТЭЙ???? МАН, АН - ын ШУДАРГА, ЭХ ОРОНЧ ҮЗЭЛТЭЙ ГИШҮҮД ЭР ЗОРИГ ГАРГАН ЭНЭ ХУВАЛЗНУУДААС САЛЖ НАМЫНХАА НЭР ХҮНДИЙГ ӨРГӨХ, НАМАА БУЛШЛАГДАХААС НЬ ӨМНӨ АВРАХ ХЭРЭГТЭЙ????

2012-07-05 | 16:56:45 | 124.158.73.17 |

Мэдээ
Гадаад мэдээ
Видео

Архив ангилал

МАН-тай эвсвэл ингэнэ. МАХН-тай эвсвэл тэгнэ.

Б.Оюунгэрэл

Сэтгэгдэл (2)