Барууны эдийн засаг бүрэн сэхээгүй

2012-07-02

Санхүүгийн зах зээлийн 2012 оны 21, 22 дахь долоо хоногийн тойм

АНУ-ын үл хөдлөх хөрөнгийн салбарын хямрал арилаагүй

АНУ-д хуучин орон байрны борлуулалт сүүлийн гурван сар дараалан өсч байснаа дөрөвдүгээр сард эргэн буурсан тухай National Association of Realtors байгууллагаас тавдугаар сарын 30-ны өдөр мэдээллээ. Тус байгууллагаас тооцоолон гаргадаг “Pending home sales” нэртэй индекс гуравдугаар сард өмнөх сараас 3.8 хувиар өсч байснаа дөрөвдүгээр сард 5.5 нэгжээр буурсан тул судлаачид АНУ-ын үл хөдлөх хөрөнгийн зах дээрх байдал тогтворжоогүй байна гэж дүгнэж байна. Дэлхийн хамгийн томд тооцогдох АНУ-ын эдийн засгийн эмзэг хэсэг болох орон сууцны зах зээл 2007-2008 оны хямралаас хойш төдийлөн сэргэхгүй байгаа бөгөөд үүнд орон сууцны үнэ болон орон сууцны зээлийн хүү өмнө байгаагүй бага түвшинд байгаа явдал ч нэмэр болохгүй нь. Энэ тухай Нью-Йорк дахь BNP Paribas банкны эдийн засагч Yelena Shutlyatyeva хэлэхдээ “Нийлүүлэлтийн асуудал бүрэн шийдэгдтэл үнэ цаашид ч унаж орон сууцны зах зээл дээрх байдал таагүй хэвээр байх болно” гэжээ. Тэрээр “нийлүүлэлтийн асуудал” гэдгээр зээл олголт харьцангуй хязгаарлагдмал байгаагаас гадна иргэд орон сууцны зээлээ эргэн төлөх чадваргүй болсны улмаас орон байраа хураалгах явдал үргэлжилсээр байгааг хэлсэн билээ.

АНУ-ын ажил олголтын нэг хэмжүүр болох цалингийн цэсийн хэмжээ энэ оны тавдугаар сард өмнөх сараас дөнгөж 69 мянгаар нэмэгдсэн тухай тус улсын Хөдөлмөрийн яамнаас зургадугаар сарын 1-ний өдөр мэдээллээ. Блүүмберг агентлагаас явуулсан түүвэр судалгаанаас харахад судлаачид дөрөвдүгээр сард өмнөх сараас 77 мянгаар нэмэгдээд байсан уг үзүүлэлтийг тайлант хугацаанд хамаагүй ихээр буюу 150 мянгаар нэмэгдэнэ гэсэн хүлээлттэй байжээ. Дээрх мэдээнд АНУ-ын хөдөлмөрийн зах зээлийн тухай дурдсан өөр нэгэн таагүй мэдээ бол тус улсын ажилгүйдлийн түвшин дөрөвдүгээр сард 8.1 хувьтай тэнцэж байснаас нэмэгдэн тавдугаар сард 8.2 хувьд хүрсэн тухай байлаа.

Евро-бүсэд ажилгүйдлийн түвшин өндөр хэвээр байна

Евро-бүсийн хамгийн том эдийн засаг болох ХБНГУ-ын эдийн засаг энэ оны эхний улиралд өмнөх улирлаас 0.5 хувиар тэлэхэд тус улсын экспорт тайлант хугацаанд 1.7 хувиар нэмэгдсэн явдал голлон нөлөөлсөн тухай Холбооны статистикийн албанаас тавдугаар сарын 24-ний өдөр мэдээллээ. Өрийн хямралын улмаас хүндхэн байдалд ороод байгаа Евро-бүсийн бусад орнуудтай харьцуулахад ХБНГУ-ын эдийн засаг өсөлттэй гарахад БНХАУ тэргүүтэй хөгжиж буй орнуудын импорт буураагүйгээс гадна ХБНГУ-ын ажилгүйдлийн түвшин буурч хэрэглэгчдийн мөнгө зарцуулалтад эерэгээр нөлөөлсөн зэрэг үйл явдлууд нөлөөлсөн гэж судлаачид дүгнэж байна. 2012 оны I улиралд хувийн хэрэглээ 0.4 хувь, төсвийн зарлага 0.2 хувиар тус тус өссөн бол хөрөнгө оруулалт 1.1 хувиар буурчээ.

Евро-бүсийн ажилгүйдлийн түвшин дөрөвдүгээр сард өмнөх сараас өөрчлөлтгүй 11 хувьтай тэнцэж байгаа тухай мэдээллийг Люксембург улсад төвтэй Европын холбооны Статистикийн албанаас зургадугаар сарын 1-ний өдөр өгчээ. Тус байгууллага Евро-бүсийн ажилгүйдлийн түвшинг гуравдугаар сард 10.9 хувь гэж өмнө нь тооцоолж байснаа залруулан мөн 11 хувь болгосон байна. Дөрөвдүгээр сарын байдлаар 17 орныг нэгтгэсэн энэхүү бүс нутагт нийт 17.4 сая буюу 1995 онд энэхүү нэгтгэсэн судалгааг гаргадаг болсноос хойш хамгийн олон хүн эрхэлсэн ажилгүй байгааг судлаачид Евро-бүсийн санхүүгийн салбарт нүүрлээд байгаа хямрал бүс нутгийн экспорт болон хэрэглэгчдийн мөнгө зарцуулалтад сөргөөр нөлөөлж байгаатай холбон тайлбарласан билээ.
Улс тус бүрийн ажилгүйдлийн түвшинг харахад, Испани улсад энэхүү үзүүлэлт тайлант хугацаанд хамгийн өндөр буюу 24.3 хувьтай тэнцэж байгаа бол Грек улсад 21.7 хувь, Португал улсад 15.2 хувь, Итали улсад 10.2 хувьтай тус тус тэнцэж байна.

Их Британийн эдийн засгийн уналтад барилгын салбар нөлөөлжээ

Их Британи улсын инфляцийн түвшин дөрөвдүгээр сард жилийн гурван хувьд хүртэл буурсан нь судлаачдын таамаглаж байсан жилийн 3.1 хувиас бага гарлаа. Их Британи улсын Статистикийн албанаас тавдугаар сарын 22-ны өдөр гаргасан тус мэдээнээс харахад инфляцийн түвшин гуравдугаар сард жилийн 3.5 хувьтай тэнцэж байснаа ийнхүү буурахад тээврийн хөлс, согтууруулах ундаа болон бэлэн хувцасны үнийн өөрчлөлт нөлөөлсөн байна. “Capital Economics Ltd”-ийн эдийн засагч Vicky Redwood-ын хэлснээр энэхүү үзүүлэлт нь Английн Төв банкны Мөнгөний бодлогын зөвлөлд мөнгөний тэлэх бодлогыг хэрэгжүүлэх замаар Их Британи улсын эдийн засагт Евро-бүсийн өрийн хямралаас үзүүлэх сөрөг нөлөөг бууруулах боломжийг нээж өгөх нь. Тэрээр үйлдвэрлэл буурч, цалингийн өсөлт удааширсан энэ үед суурь инфляцийн түвшинг цаашид ч буурна гэж тооцоолж байна. Сараар авч үзвэл, Их Британийн инфляцийн түвшин дөрөвдүгээр
сард өмнөх сараас 0.6 хувиар өссөн байна.

Тавдугаар сарын 23-ны өдөр Их Британи улсын Статистикийн албанаас гаргасан
мэдээнд тус улсын жижиглэнгийн худалдаа гуравдугаар сард өмнөх сараас 2 хувиар нэмэгдээд байснаа дөрөвдүгээр сард 2.3 хувиар буурсан тухай мэдээлжээ. Судлаачид энэхүү бууралтыг дөрөвдүгээр сард 1910 оноос хойш байгаагүй их хэмжээний бороо орсноос гадна инфляци болон ажилгүйдлийн түвшин харьцангуй өндөр байгаа зэрэгтэй холбон тайлбарлаж байна. Бүтээгдэхүүний төрлөөр авч үзвэл, хүнсний бус бүтээгдэхүүний борлуулалт тайлант хугацаанд 1.7 хувиар буурсан бол хүнсний бүтээгдэхүүний борлуулалт мөн хугацаанд арай багаар буюу 0.6 хувиар буурчээ. Дөрөвдүгээр сард хамгийн ихээр буюу сарын 5.2 хувиар бэлэн хувцасны борлуулалт буурсан байна.

Их Британийн эдийн засаг энэ оны эхний улиралд 0.2 хувиар хумигдсан гэсэн урьдчилсан тооцооллыг тус улсын Статистикийн албанаас дөрөвдүгээр сард гаргаад байсан билээ. Гэтэл тавдугаар сарын 24-ний өдөр эдийн засгийн өсөлт тайлант хугацаанд тооцоолж байснаас ихээр буюу 0.3 хувиар хумигдсан болохыг албан ёсоор зарлалаа.

Эдийн засгийн өсөлт ийнхүү удаашрахад барилгын салбарын гарц 2012 оны I улиралд өмнө тооцоолж байсан гурван хувиас хамаагүй ихээр буюу 4.8 хувиар буурсан явдал голлон нөлөөлжээ.
Орон сууцны үнэ Их Британид тавдугаар сарын байдлаар өмнөх сараас 0.3 хувиар
өссөн талаарх мэдээллийг Nationwide Building Society-гаас тавдугаар сарын 31-
ний өдөр өглөө. Энэхүү үзүүлэлт дөрөвдүгээр сард өмнөх сараас 0.3 хувиар буураад байсан билээ. Жилийн өмнөх мөн үетэй харьцуулахад орон байрны дундаж үнэ тавдугаар сард 0.7 хувиар буурч 166,022 фунтстерлинг (257,600 ам.доллар)-т хүрчээ.
Их Британийн орон сууцны зах зээлийн талаар гарсан өөр нэгэн мэдээлэл нь Английн Төв банкнаас тавдугаар сарын 30-ны өдөр гарсан орон сууцны зээлийн тухай мэдээлэл байлаа. Уг мэдээнээс харахад, шинээр олгогдсон орон сууцны зээлийн хэмжээ гуравдугаар сард 51,067-той тэнцэж байснаа нэмэгдэн дөрөвдүгээр сард 51,823-т хүрсэн хэдий ч энэ нь санхүүгийн хямралаас өмнөх үе буюу 2007 оны түвшинтэй харьцуулахад талд нь ч хүрэхгүй байгаа билээ.

Эх сурвалж: Bloomberg, Reuters, Financial Times