"Эрдэнэс Тавантолгой" - ХК-ийн хувьцааг аж ахуйн нэгжүүдэд худалдах, иргэдэд эзэмшүүлэх талаар НХХЯ-наас мэдээлэл хийлээ

2012-06-25

Засгийн газрын мөрийн хөтөлбөрт “Стратегийн болон томоохон орд газраас олсон орлогоос иргэн бүрт 1,5 сая

төгрөг хүртээх эрх зүйн орчин болон санхүүгийн эх үүсвэрийг бүрдүүлж хэрэгжүүлнэ” гэж заасны дагуу Хүний хөгжил сангийн тухай хуулийг УИХ-аар батлуулан иргэн бүрт хишиг, хувь хүртээх ажлыг НХХЯ зохион байгуулж байна. Үүнд:
1.    Бэлэн мөнгө, сургалтын төлбөр хэлбэрээр олгох хишиг, хувь:
2012 оны тавдугаар сарын байдлаар нийт 2799073 иргэнд 21,000 төгрөгийг олгоход 305,8 тэрбум төгрөг, оюутны сургалтын төлбөр хэлбэрээр хишиг, хувь хүртэх хүсэлт гаргасан 130377 оюутны сургалтын төлбөрт 64,1 тэрбум төгрөгийг зарцуулсан байна.
Зургаадугаар сард 23,000 төгрөг олгосноор бэлнээр олгож буй 500,000 төгрөгийг иргэн бүрт хүртээх арга хэмжээ дуусна. Харин гадаадад амьдардаг, иргэний бүртгэлийн зөрчилтэй, шинэчилсэн бүртгэлд хамрагдаж амжаагүй гэх зэрэг тодорхой шалтгаанаар 500,000 төгрөгийн хишиг, хувиа бүрэн аваагүй үлдэж буй цөөн иргэдийн хувьд шинэчилсэн бүртгэлд хамрагдаад нэр нь баталгаажин Хөдөлмөр, халамжийн үйлчилгээний газарт ирсэн тохиолдолд хишиг, хувийн мөнгийг саадгүй олгоно.
2.    Ахмад настан, хөгжлийн бэрхшээлтэй иргэдэд нэг сая төгрөгийн хишиг, хувийг бэлэн мөнгө хэлбэрээр олгох арга хэмжээ:
Засгийн газрын 2012 оны 96 дугаар тогтоолын дагуу нэг сая төгрөгөө бэлэн мөнгө хэлбэрээр авахаар хүсэлт гаргасан 302507 ахмад настан, хөгжлийн бэрхшээлтэй иргэнд эхний сарын 330000 төгрөгийн хишиг, хувийг бэлнээр олгоход 99,8 тэрбум төгрөг зарцуулаад байна. Үлдсэн 2 сарын 670,000 төгрөгийг 6 дугаар сард багтаан олгож дуусна.
3.    Эзэмшиж буй хувьцаагаа Засгийн газарт нэрлэсэн үнээр нь худалдах иргэдийн хүсэлтийг хүлээн авах, төлбөрийг олгох арга хэмжээ:
Иргэдэд бэлэн мөнгө болгон хувиргаж болох сонголт бүхий хувьцаа олгох ажлыг хүрээнд улсын хэмжээнд нийт 1532853 иргэн хувьцаагаа Засгийн газарт нэрлэсэн үнээр нь худалдах хүсэлтээ гаргасан байна. Тэдгээрийн 1505344 буюу нийт өргөдөл гаргасан иргэдийн 98,2 хувь нь хувьцаагаа зарж бэлэн мөнгө хэлбэрээр авах хүсэлтэй байна. Орон сууц худалдан авсны төлбөрт шилжүүлэх хүсэлтэй 6550 иргэн, банкны зээлэнд шилжүүлэх 20497 бусад хэлбэр (боловсролын болон эрүүл мэндийн үйлчилгээний төлбөрт)-ээр шилжүүлэх хүсэлтэй 462 иргэн байна.
“Эрдэнэс Тавантолгой” ХК-ийн хувьцааг иргэдэд эзэмшүүлэх, аж ахуйн нэгжид худалдах ажлыг зохион байгуулахтай холбогдуулан олон нийтэд хэвлэл мэдээллийн хэрэгслээр сурталчлах ажлыг тус яамнаас нэгдсэн байдлаар зохион байгуулан “Хувьцааны талаар хэвлэл мэдээллийн хэрэгслээр хийх сурталчилгааны ажлын төлөвлөгөө” гарган сайдын тушаалаар батлуулан ажиллаж байна.
Олон нийтийн мэдээллийн хэрэгслээр дамжуулан мэдээлэл авч хувьцаагаа Засгийн газарт нэрлэсэн үнээр нь худалдах хүсэлтээ гаргасан иргэдийн дунд өргөдлөө буцаан авч хувьцаа эзэмших хүсэлтэй байгаа талаар иргэдээс санал хүсэлтүүд ирсээр байна.
Энэ асуудлыг Засгийн газрын зургаадугаар сарын 13-ны 201 дүгээр тогтоолоор “Эрдэнэс-Тавантолгой” ХК-ийн хувьцааг үндэсний аж ахуйн нэгжүүдэд худалдах, иргэдэд хувьцаа эзэмшүүлэх, иргэдийн хувьцааг Засгийн газар худалдан авах үйл ажиллагааг зохицуулах журамд тусгалаа. Үүнд:

•    Засгийн газарт хувьцаагаа худалдахаар өмнө нь хүсэлт гаргасан иргэн хувьцаа эзэмшихээр шийдсэн тохиолдолд энэ тухай хүсэлтээ сум, хорооны нийгмийн ажилтанд 2012 оны наймдугаар сарын нэгний дотор гаргаж болохоор зохицуулсан.
•    Иргэн Засгийн газрын 2012 оны 116 дугаар тогтоолын 1.3-т заасны дагуу хасч тооцсон хувьцааг төлбөрийг нь төлсний үндсэн дээр буцаан эзэмшиж болох бөгөөд хүсэлтээ сум, хорооны нийгмийн ажилтанд 2012 оны наймдугаар сарын нэгний дотор гаргах боломжтой.
•    Харин хувьцаагаа Засгийн газарт худалдах хүсэлт гаргаагүй иргэнийг хүсэлтийг нөхөж авахгүй ба хувьцаа эзэмших сонголт хийсэнд тооцно.
Үндэсний аж ахуйн нэгжүүдээс хувьцааны төлбөрт төвлөрүүлсэн орлогыг харгалзан иргэдэд төлбөрийг олгох зарчим, дарааллыг тогтоохоор холбогдох байгууллагууд ажиллаж байна.
4.    “Хүний хөгжил сан”-ийн дэвтэрт иргэдэд эзэмшүүлсэн хувьцааны бичилт хийх арга хэмжээ:
Засгийн газрын 2012 оны тавдугаар сарын 30-ны өдрийн 192 дугаар тогтоолоор Монгол улсын иргэнд эзэмшүүлсэн “Эрдэнэс Тавантолгой” ХК-ийн хувьцааг “Хүний хөгжил сан”-ийн дэвтэрт нь бичилт хийж баталгаажуулах ажлыг зохион байгуулж байна.
Эхний ээлжинд өмнө нь бэлэн бус хэлбэрээр хишиг, хувь хүртэж байгаагүй 764,350 иргэнд тус бүр 1072 ширхэг хувьцаа эзэмшүүлсэн тухай бичилтийг сум, хорооны нийгмийн ажилтан хийж байна. Өмнө нь бэлэн бусаар хишиг, хувь хүртсэн бусад иргэдийн нэрсийг “Үнэт цаасны төлбөр тооцоо, төвлөрсөн хадгаламжийн төв” ХХК-иас нягтлан шалгаж байгаа бөгөөд ирүүлсэн даруйд эдгээр иргэдийн хувьцаа эзэмшсэн тухай бичилтийг хийх юм.
5.    Эрдэнэс Тавантолгойн хувьцааг аж ахуйн нэгжүүдэд худалдах ажиллагаа 2012 оны зургаадугаар сарын 30 ны өдөр дуусна
    Эрдэнэс Тавантолгой хувьцаат компаний хувьцааг аж ахуйн нэгжүүдэд худалдах ажиллагаа 2012 оны зургаадугаар сарын 30 ны өдөр дуусах тул татвар төлөгч та бүхэн өөрийн татвар төлөгчийн бүртгэлээр харъяалагдах татварын албанд хандаж хувьцаа худалдан авах захиалгаа яаралтай өгөхийг мэдэгдэж байна.
    Засгийн газрын 201 дүгээр тогтоолоор худалдан авах хувьцааны төлбөрийг 2012 оны долоодугаар сарын нэгнээс өмнө төлсөн аж ахуйн нэгжүүдэд худалдахаар заасан. Худалдан авах хувьцааны дээд хэмжээ 36240 ширхэг бөгөөд худалдах нэгж хувьцааны үнэ 933 төгрөг. Хувьцааг 2010 оны зургаадугаар сарын 30 ны өдөр буюу өмнө байгуулагдсан, мөн өдрөөс өмнө болон хойших хугацаанд аль нэг төрлийн татвар төлсөн, үндэсний аж ахуйн нэгжүүд авах эрхтэй.
Хувьцаа худалдан авах хүсэлтэй аж ахуйн нэгжүүд худалдан авах хувьцаанд ногдох үнийн төлбөрийг шилжүүлэхдээ: Төлбөр хүлээн авагч банк “ҮЦТТТХТ”, Төлбөр хүлээн авагч байгууллагын нэр “Үнэт цаасны төлбөр тооцоо, төвлөрсөн хадгаламжийн төв” дансны дугаар 3603005, гүйлгээний утга “Эрдэнэс таван толгой ХК-ний хувьцааны үнэ” гэж шилжүүлэхийг анхаарна уу. Дээрхи дансанд төлбөрийг байршуулсны дараа хувьцааг худалдан авах эрх нээгдэх болно.
    ЖИЧ: Аж ахуйн нэгжүүд хувьцаагаа захиалсан боловч, хувьцаа худалдан авах төлбөрөө 2012 оны зургаадугаар сарын 30 ны дотор амжиж хийгээгүй тохиолдолд таны захиалга хүчингүй болохыг анхаарна уу.
    Аймаг, орон нутгийн татварын албад та бүхний захиалгыг авах зорилгоор 2012 оны зургаадугаар сарын 20 ны өдрөөс зургаадугаар сарын 30 ны өдөр хүртэл өдөр бүр оройн 21 цаг хүртэл ажиллах болсныг мэдэгдье.