Дэлхийн саятнууд 11 саяулаа болов

2012-06-21

Дэлхийн саятнуудын тоо энэ жил 11 саяд хүрснийг Канадын “Royal Bank of Canada” болон консалтингийн “Сар

Gemini” компанийн хамтран гаргасан тайланд дурджээ. 11 сая саятны нийт хөрөнгө 42 их наяд ам.доллар болж байгаа аж.

Эзэмшдэг үнэт цаасных нь үнэлгээ нэг сая “ногоон” давсан дэлхийн 71 орны баячуудыг энэ тайланд оруулсан бөгөөд үл хөдлөх хөрөнгө, онгоц, машин болон үнэт эдлэлийг тооцоогүй байна. Эдгээр 71 оронд дэлхийн ДНБ-ий 98 хувь оногдож байгаа ажээ. 16 дахь жилдээ гаргаж буй энэ судалгаанд Ази, Номхон далайн орнууд баячуудынхаа тоогоор Хойд Америкийг анх удаа гүйцжээ. АНУ, Канадад 3.35 сая саятан байгаа нь өнгөрсөн оныхоос 39 мянгаар цөөрсөн хэрэг болов. Хятадын эдийн засгийн эрчимтэй өсөлтийн үр нөлөөгөөөр Ази, Номхон далайн орнуудад саятнуудын тоо 3.37 саяд хүрч өнгөрсөн оныхоос 1.6 хувиар нэмэгджээ. Гэхдээ энэ бүс нутаг болоод Хойд Америкийн баячуудын нийт хөрөнгө 2011 оныхоос 1.1 ба 2.3 хувиар буурч 10.7 болон 11.4 их наяд болсон байна. Ер нь Ойрхи Дорнодоос бусад бүсийн баячуудын хөрөнгө бүхэлдээ багасчээ. Европт гэхэд л саятнуудын тоо нэмэгдэж 3.2 сая болсон боловч нийт хөрөнгийнх нь хэмжээ 1.1 хувиар буурч 10.7 их наяд болсон байна. “Үүний гол шалтгаан нь хөгжингүй орнуудын эдийн засгийн өсөлт буурч, еврогийн бүсийн орнууд өрийн асуудалд орсон явдал” хэмээн тайланд тэмдэглэжээ. Харин Ойрхи Дорнодын хувьд саятнуудын тоо 2.7 хувиар нэмэгдэж 450 мянга болсон бөгөөд хөрөнгө нь 0.7 хувиар өсч 1.7 их наяд ам.доллар болсон байна. Мөн Орос, Хятадад саятнууд нэмэгдсэн бол Энэтхэгийн баячуудын тоо даруй 18 хувиар буурч 125.5 мянга болжээ. Энэтхэгийн дараа хамгийн ихээр “ядуурсан” Хонконгод саятан нь 17.5, Польшид 7.8, Сингапурт 7.3 хувиар буурсан гэнэ. Нийт баячуудын тоогоорАНУ (3.068 сая) тэргүүлж, Япон (1.822 сая) Герман (951 мянга) улмаар Хятад, Их Британи, Франц, Канад, Швейцарь, Австрали, Итали удаалжээ.