гуравдугаар байрын шагналт, “Азийн супер модель-2009” тэмцээний дэд байрын шагналт, топ модель О.Уянга загварын ертөнцөд авьяас чадвараа таниулсан хөдөлмөрч бүсгүйчүүдийн нэг билээ. Боловсрол мэдлэгтээ чамгүй анхаардаг тэрбээр өдгөө урд хөршид сурахаар одсон нь саяхан мэт. Харин топ бүсгүй тун саяхан Бүх хятадын хятад хэлний “China Bridge” тэмцээний тэргүүн байрт шалгарч, эх орныхоо нэрийг гаргасан сайхан мэдээ дуулгалаа. Хятад хэлний тэмцээнд шилдэг оролцогчидтой өрсөлдөж, мэдлэг оюунаа гайхуулж чадсан О.Уянгатай онлайнаар ярилцсанаа та бүхэнд хүргэж байна.

-Өдрийн мэнд. Бүх Хятадын хэлний тэмцээнд амжилттай оролцсонд тань баяр хүргэе. Аль сургуульд ямар чиглэлээр сурч байгаа вэ?

-Баярлалаа. Би БНХАУ-ын шилдэг сургуулиудын нэг болох Shandongni их сургуульд Олон улсын улстөрч мэргэжлээр магистрын зэрэг хамгаалж байгаа. Тэгээд энэ жил Бүх хятадын хятад хэлний хамгийн том тэмцээн болох “China Bridge”-д оролцоод бүх мужаасаа шалгарч, тэргүүн байрт орлоо. Энэ тэмцээнийг Хятадын “CCTV” телевизээс бас хамтран зохион байгуулдаг юм билээ. Тэмцээний шалгаруулалт сар гаруй хугацаанд үргэлжилсэн шүү.

-Тэргүүн байр эзэлсэн гэдгээ мэдээд хамгийн түрүүнд юу мэдэрсэн бол?

-Монгол Улсынхаа, эх орныхоо нэрийг өндөрт гаргаж чадсандаа үнэхээр их баярласан. Тэмцээний ялагчийг зарлах яг тэр мөчид “Монголын Уянга” гэж эх орноор минь овоглож дуудахад өөрийн эрхгүй сэтгэл хөдөлж, бахархалтай санагдсан даа.

-Тэмцээнд нийт хэчнээн хүн өрсөлдсөн бэ. Шалгаруулалт нь яаж явагддаг вэ?

-Энэ тэмцээнд оролцохын тулд сургууль дээрээ зохиогдсон хятад хэлний тэмээнд амжилт гаргах ёстой. Жишээ нь, манай сургуульд л гэхэд хятад хэлний мэдлэгээрээ тэргүүлж буй мундаг хүүхдүүд хоорондоо өрсөлдөж эхний гурав, дөрөвдүгээрт байрт орох ёстой байдаг. Тэгээд сүүлд нь Хятадын бүх хот, бас бүх сургуулиас ирсэн оюутнууд хоорондоо өрсөлддөг гэх үү дээ. Миний араас Африк охин, Энэтхэг залуу, Орос болон Солонгос охид шагналт байрын эздээр тодорсон. Энэ ч утгаараа, Бүх Хятадын хятад хэлний хамгийн том тэмцээнд тооцогддог гэсэн үг.

-Хятад хэлийг бүр дунд сургуульд байхаасаа эхэлж судалсан гэл үү. Одоо тэгвэл бараг ус цас болох нь аргагүй л юм?

-Тийм ээ, хятадаар чөлөөтэй ярьж бичнэ. Гэхдээ дунд сургуульд байхаасаа эхэлж хятад хэл сураагүй ээ. Харин энэ тэмцээнд өрсөлдсөн бусад орны хүүхдүүдийн хувьд ихэвчлэн дунд сургуульд байхдаа юм уу, аль эсвэл зургаа, долоон жил хятад хэл судалсан ёстой мундаг оролцогчид байсан шүү. Миний хувьд, урьд нь Бээжингийн загварын агентлагт ажилладаг байхдаа хятадаар муугүй ярьж сурсан хэрэг. Яг зорилго тавьж судлаагүй боловч тухайн орчинд нь ажиллаж, амьдарч байгаа хүний хувьд өөрийнхөө оролдлогоор л сурч байлаа. Тэгж байгаад аяндаа сайхан ярьдаг болчихсон байсан.

-Тэгвэл яг ном ёсоор нь хэдийнээс эхэлж судалсан хэрэг вэ?

-Хятадаар бичиж, ном ёсоор нь сурсан гэж тооцвол хоёр жил болж байна. Гэхдээ одоо надад хятад хэлний хувьд ойлгохгүй зүйл байхгүй л дээ.

-Тэмцээний тэргүүн байрын шагнал юу байв. Ямар нэгэн өргөмжлөл, бусад зүйл дагалддаг болов уу?

-Байлгүй яахав. Мэдээж Бүх Хятадын хамгийн том тэмцээн учраас цом, өргөмжлөл дагалдана. Бас надад маш их нэр хүндийг авчирсан даа. Мөн Хятадын томоохон сургуульд сурах тэтгэлэг өгдөг төдийгүй сургуулийн болон мужийнхаа бүхий л арга хэмжээнд оролцох эрхтэй болдог юм билээ. Одоо би ирэх наймдугаар сараас эхлэх улсын хэмжээний тэмцээн буюу хамгийн сүүлчийн шалгаруулалтад нь оролцохоор бэлтгэж байна.

-Сургуулийнхан тань үнэхээр сэтгэгдэл өндөр байгаа нь тодорхой биз ээ?

-Энэ сарын 21-нд манай Shandongni их сургуулиас надад “Оны шилдэг оюутан” шагналыг гардуулах гэж байгаа тухай өчигдөр /уржигдар/ сонслоо.

-Сурахын хажуугаар томоохон шоу тоглолт, загварын арга хэмжээнд байнга оролцдог уу?

-Мэдээж хэрэг, загварын долоо хоног болгонд Бээжин явж шоундаа оролцож байгаа. Энд бас хичээл ном маань багагүй байдаг учраас тэр болгон шоу тоглолтод оролцож амждаггүй юм. Харин томоохон шоу тоглолт, арга хэмжээнүүдэд заавал оролцоно оо. 2009 онд Хятадын Намнинг хотод болсон моделиудын тэмцээнд нэгдүгээр байр эзэлж, тус тэмцээний шүүгчдийн саналын дагуу “China Bentley” компанийн агентлагийн гэрээт загвар өмсөгчөөр ажиллах болсон л доо.

-Олон улсын загварын болон миссийн тэмцээнд оролцох санал ирж байгаа юу?

-Монголд амьдрахаа болиод нэлээд удаж байгаа болохоор тиймэрхүү санал ховордсон. Өөрөөр хэлбэл, Монголын загварын ертөнцөөс жаахан хол байгаа гэсэн үг. Гэхдээ би МДХ-ноос жил бүр уламжлал болгон зохион байгуулдаг “Гоёл” наадам болон томоохон хэмжээний загварын шоунуудад тогтмол оролцдог. Бүр эх орноо зорьж очиж орно шүү.

/инээв/

-Хүний нутагт сурч, амьдарч байгаа хойно ч эх орноо санагалзах үе бишгүй л байдаг байх даа?

-Энд тэгээд л яг оюутны сайхан, тайван амьдрал байдаг шүү дээ. Цаг хугацаа ч хурдан юмаа. Нэг л мэдэхэд өдөр хоног харвасан сум шиг урсчихсан байх юм. Хичээлдээ суугаад хажуугаар нь энд тэнд илтгэл тавиад л... Би ч ер нь өөрийнхөө цаг хугацаанд их харам хүн гэх үү дээ. Нэг хором бүрийг ч зүгээр суулгүй, үр бүтээлтэй өнгөрүүлэхийг хүсдэг.

-Чөлөөт цагаараа юу хийж байна даа. Хөөрхөн нохойтой болсон байна лээ?

-Тийм ээ, 18 жил хамт амьдарсан Бэйби нохой маань нохой маань өнгөрөөд багагүй хугацаа өнгөрч байна. Харин найман сарын өмнөөс Жэкитэйгээ хамт байх болсон л доо. Одоо ч бүр том, яг л чоно шиг болсон байна дээ./инээв/

-Эзэнтэйгээ хамт цагийг их л хөгжилтэй өнгөрүүлдэг юм шиг байна лээ. Гэрийнхнээ санаж байна уу?

-Хятад хэдийгээр ойрхон ч гэсэн, гэрээсээ хол байна гэдэг хааяа хэцүү л санагддаг. Хэдийгээр нас биед хүрсэн ч гэлээ ээж аавыгаа их санана шүү дээ. Монголд очихоороо зав л гарвал гэрийнхэнтэйгээ хамт байхыг хичээдэг.

-Энэтхэг үндэсний сари, панжаби өмсөх дуртай юм шиг санагдсан. Энэ төрлийн хувцас цөөнгүй байдаг бололтой?

-Сари өмсөх их дуртай. Монголд өмсөхөөр хүмүүс гайхаад байдаг л даа. Гэхдээ би тоодоггүй. Би хэн нэгэнд таалагдах гэж хичээж амьдардаг хүн биш. Зарим үед их хэцүү шүү дээ, Монголд. Миний тухай элдэв янзын худал мэдээлэл гаргаад л, би ч бараг залхсан даа. Сүүлдээ бүр нүдэн балай, чихэн дүлий явдаг болсон.

-Тэр ч тийм шүү?

-Яахав завтай, бас амтай хүмүүс нь тэгээд худлаа үнэн яриад л явдаг юм байгаа биз. Харин би өөрийнхөөрөө, энгийн сайхан амьдралаар амьдраад аз жаргалтай байна. Миний бодлоор манай мисс моделиуд дунд иймэрхүү, ялангуяа улсын хэмжээний томоохон оюун ухааны тэмцээнд оролцож, өндөр байр эзэлж байсан модель лав байхгүй ээ. Би үүгээрээ бас моделиудын дунд шинэ цензур бий болгосон байх гэж бодож байна. Одоо манайхан “Модель бол хоосон толгойтой, тэнэг хүүхнүүд” гэдэг бодол нь жаахан ч атугай арилна биз дээ.

-Таныг нэлээд шүтлэгтэй байх гэж бодлоо?

-Үгүй ээ, надад ямар ч шүтлэг байхгүй. Би ээж аавдаа болон өөртөө итгэдэг. Тэгээд л болоо.

Р.МӨНГӨН

Топ модель О.Уянга: Хятад хэлээр өрсөлдөж, Монгол Улсынхаа нэрийг өндөрт гаргасандаа үнэхээр их бахархсан
Tweet
Bolod.mn