Хүсэн хүлээсэн хөлбөмбөгийн их наадам хүрээд ирлээ.Бразил,Аргентин,Уругвай 3-аас бусад бүх дэлхийн аваргууд тоосоо үздэг болохоор үнэхээр нэр хүндээрээ ч,чанар чансаагаараа ч бага дэлхийн аваргын дайтай үнэлэгддэг том тэмцээн эхлэхэд ганц өдөр л үлджээ.Ердөө 2-хон хоногийн дараа хар багаасаа дэмжсэн "энхрий хайрт" Германаа Португалтай тоглохыг нь хараад сууна гэхээр сэтгэл догдлоод сайхан байна.Энэ спортод зүрх сэтгэлээ өгсөн сая сая фэнүүдийн нэгэн адил дэмждэг багийнхаа дээлийн захыг мушгин хүлээж суугаа энэ л өдрүүдэд өөрийн зүгээс өмнөх ЕВРО-нуудын талаархи бяцхан дурсамж хүүрнэе гэж бодлоо.

ЕВРО96

Түүх сөхвөөс тэртээ 60 оноос үүсэлтэй ч миний хувьд бол эхнээс нь шимтэн үзэж немцүүдээ бишрэн шүтсэн анхны тэмцээн бол яах аргагүй буурал тивийн будант Альбионд болсон ЕВРО96 байлаа.Чухам энэ л цагаас эхэлж Германы хүчирхэг машинуудыг эргэлт буцалтгүй үнэнчээр дэмжих болсон юм.Усыг нь уувал ёсыг нь дагаа гэсэн ардын үгийг миний бие хэлийг нь сурвал багийг нь дэмж хэмээн өөрийнхөөрөө ойлгон өнөөг хүртэл үнэнчээр дэмжсээр иржээ.Гэхдээ ганц үүнээс ч болсон биш тухайн үеийн Германы шигшээ бол үнэхээр хүчирхэг бүрэлдэхүүнтэй уран гоё тоглолтоороо бүхний талархлыг татаж чадсан юм.Лотар Маттеус,,Руди Феллер,Пьер Литтбарски нарын 90 оны дэлхийн аваргуудын залгамж халаа болсон Маттиас Заммер,Оливер Бирхофф нарын залуучууд ид гялалзаж Юрген Клинсманнаар ахлуулж Берти Фогтсоор удирдуулсан германчууд хэсэгтээ Чех,Оросыг хаалгандаа гоол алдалгүй буулган авч Италитай хуурай тэнцэн хэсгээсээ төвөггүй шалгарсан.

Шөвгийн 8-д хуучин Югославын хэлтэрхий Хорватыг 2:1-ээр буулган авахад Клинсманн,Заммер нар гоолдсон.Харин айлаас Франц98-ын баатар Давор Шукер нэр төрийн нэг гоолыг оруулсан.Хагас шигшээд талбайн эзэн Англитай таарлаа.Одоо ч гэсэн энэ тоглолт ой тоонд минь тодоос тод санагдаж байна.Чухам л эртний өст 2 багийн хооронд хөлбөмбөгийн талбай дээр ч,энгийн үзэгч миний сэтгэл дотор ч дайн болж байлаа.Гэрийн нохойн сүүл өөдөө гэж тоглолт дөнгөж эхлээд л энэ тэмцээний мэргэн бууч болсон Алан Ширер салхи хагалсан ч 16 дахь минутанд Штефан Кунц тэнцүүлж улмаар пеналтаар ялагч тодрох болоход эхний 5 цохилтоо аль нь ч алдсангүй аз болж сүүлчийн цохилтоо Саутгэйт алдсанаар манайхан финалд үлдсэн түүхтэй.Ингээд аваргын төлөө энэ тэмцээний нээлтийн тоглолтоо хийж байсан өнөөх Чехүүдтэй хаалтын тоглолтоо хийхээр ахин нэг хийхээр болов.59 дэх минутанд Патрик Бергер торгуулийн цохилтоор эхний гоолыг оруулж сандаргасан ч нөгөө л герман зангаараа тоглолтын хэмнэлээ алдалгүй тоглосоор 73 дахь минутанд тоглолтын гол баатар Оливер Бирхофф тэнцүүлж улмаар нэмэлт цагийн 95 дахь минутанд алтан гоолоор аваргын цом,алтан медалийг авчирсан билээ.Тиймээ тэр л алттай тэнцэх алтан гоол бидэнд тивийн аваргын 3 дахь түрүүг авчирч байсан одоо ч энэ амжилт эвдэгдээгүй хэвээр л,тэр л алтан гоолыг хийсэн Бирхофф алтан жаал болтлоо өргөмжлөгдөж өнөөдөр ч нэр алдар нь дуурсагдсаар л байна.

ЕВРО2000

Голланд,Бельги улсууд хамтран зохиосон ЕВРО2000-д манайхан А хэсэгт Англи,Португал,Румынтай багтсан.Франц98 дэлхийн аваргын дараа хуучны томчууд зодгоо тайлж шинэ залуучууд шигшээ багт олноороо багтсан өөрөөр хэлбэл шилжилтийн үе дээрээ явж байсан болохоор амжилт тааруу оролцсон.Эхлээд Румынтай 1:1-ээр тэнцэж Англид 0:1-ээр Португалд 0:3-аар ялагдан тэмцээнээ дуусгасан.Багийн ахлагчаар өнөөх Бирхофф тоглож,Мехмет Шолль Румыний хаалганд ганц гоол оруулснаас өөр гавьтай гайхуулах гавьяагүй өнгөрсөн.

ЕВРО2004

Португалд болсон 04 оны ЕВРО миний хувьд хамгийн их уур хүргэсэн нерв барсан тэмцээн болж өнгөрсөн.Уг нь World Cup 2002-оос мөнгөн медаль хүртэж Оливер Кан,Мирослав Клозе,Михаэль Баллак нар ид гялалзаж байсан болохоор дор хаяж хэсгээсээ гарна гээд дотроо тооцчихсон байсан болоод ч тэр үү тааруухан тоглохоор нь дагаж баахан шатсан даа.Руди Феллерээр удирдуулсан германчууд эхлээд заналт дайсан Голландтай таарч Торстен Фрингс чөлөөт цохилтоор тэргүүллийг авчирсан ч Рууд Ван Нистелрой тэнцүүлж 1:1-ээр дууссан.Дараа нь анх удаагаа том тэмцээний утаа үнэрлэж буй Латвитай хуурай тэнцэн даанч дээ гэмээр тааруу тоглосон.Гоолын олон боломж гаргасан ч чулуу болгож чадаатүй дээ.Заавал хожих даалгавартай хэсгийн сүүлчийн тоглолтоо Чехтэй хийсэн.Баллакийн гоол итгэл найдварын гал бадраасан ч Марек Хайнц,Милан Барош нарын гоол биднийг дахиад л дэндүү эрт гэрт минь хариулсан.Тэмцээний аварга болсон Грекийн шигшээг Отто Рехагель гэдэг герман дасгалжуулагч удирдсаар түрүүлүүлсэн нь ганц тайвшруулах зүйл байлаа.Өөрсдөө чаддаггүй юм бол өрөөлийг удирдаад түрүүлүүлж болно шүү гэмээр л юм болсон доо.

ЕВРО2008

Австри,Швейцар улсууд хамтран зохиосон энэ тэмцээн газар нутгийн хувьд ч,гаргах амжилтын хувьд ч арай ойрхон санагдаж байлаа.Шигшээ багийн амжилт ч тогтворжиж шижигнэсэн залуучууд ч байр сууриа хэдийнэ олж ганцхан амжилтаар л цангаж байлаа.Эхний тоглолтоо Польшийн эсрэг хийж польш цустай Лукаш Подольски дубль хийж гараагаа амжилттай хийсэн ч дараа нь Хорватад 1:2-оор бүдэрлээ.Дарио Срна,Ивица Олич нарын гоолоор Хорватууд илт давамгайлж эхэлсэн ч манай машинууд тасралтгүй довтолсоор Подольски тооны зөрүүг ойртуулсан ч харамсалтай нь Швайнштайгер улаан хуудас авч хөөгдсөнөөр хүн дутуу тоглолтыг дуусгасан.Талбайн эзэн Австритай хийсэн хэсгийн сүүлийн тоглолтонд Баллак хаалттай цохилтоос гайхалтай гоол оруулснаар хэсгээсээ шалгарч шөвгийн 8-д Португалтай таарлаа.Тэмцээнд түрүүлэх багийн тааварт дээгүүр орж байсан Португалтай хийсэн тоглолт ширүүхэн болж Швайнштайгер,Клозе нар гоолдож манайхан давуу байдалтай болсон ч Нуну Гомеш 1-р үеийн төгсгөлд тооны харьцааг ойртуулж сүүлийн үед манайхаас Баллак айлаас Поштига тус бүр гоолдож 3:2-оор эвгүй өрсөлдөгчөө буулган авлаа.Хагас шигшээд Турктэй хийсэн тоглолт мөн л сонирхолтой болж Угур Бораль 22 дахь минутанд манай хаалганд эхний бөмбөгийг оруулсан ч эцсийн мөч хүртэл тэмцдэг герман машинууд маань 2 гоол дараалж хийн давуу байдалтай болсон.Энэ 2 гоолыг нөгөө л Швайнштайгер,Клозе нар оруулсан юм.Гэвч 86 дахь минутанд Семих Сентюрк тэнцүүлж бараг л цаг сунгах нь дээ гэж бодож байтал Филипп Лам гайхамшигийг бүтээн хожлын гоол хийж 12 жилийн дараа ахин финалд шалгарсан.Аваргын төлөөх тоглолт дэлхийн 2 шилдэг хаалгачаар хаалгаа мануулсан 2 багийн хооронд өрнөж Фернандо Торресын ганц гоол тоглолтын хувь заяаг шиидэж аваргын цом ялагдашгүй Армадануудад очсон.

Өөрийн хувийн дурсамжаа уудлахад 1 иймэрхүү.Цаг зав хэмнэх үүднээс зөвхөн Германыхаа тухай л бичлээ.Дараа илүү дэлгэрэнгүй бичнээ.

ЕВРО2012-ын өмнөх сэтгэгдэл
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Европын аварга чамд бас надад ямар хамаатай юм мал аа? Роман шиг юм биччихээд бас дараа нь дэлгэрэнгүй бичнэ ч гэх шиг...

2012-06-09 | 19:28:52 | 203.194.116.135 |

Мэдээ
Гадаад мэдээ
Видео