Сонгууль хэмээх олимпод хүч үзэхээр баруун, зүүн жигүүрээс МАН, АН өрсөлдөж байна. Нэр дэвшигчдэдээ батламж гардуулах тэрхүү торгон агшинд хоёр намын удирдлагуудын хэлсэн үг, батламж гардуулах ёслолын ажиллагааг зохион байгуулсан байдал нь энэ сонгуулийн өнгийг тодорхойлох шиг боллоо. Өөрөөр хэлбэл, сонгуульд намууд ямар зарчим баримталж, ямар дүрмээр тоглохоо сонгогч олонд харуулсан гэсэн үг. АН-ын сонгуулийн нээлт ихэд мөнгөлөг болов. Яармагт байрладаг спортын ордонд 8000 хүний оролцоотой хийсэн энэхүү нээлтийн ажиллагааг нүсэр болгох гэж тэрбум төгрөг зарцуулсан тухай гадуур шивэр авир хийлцэх болжээ. Ёслолын ажиллагааг сүржин болгох гэж тус намын удирдлагууд зориуд 21 аймгаас тус бүр 50 хүний зардлыг даан авчирсан гэнэ. Гэсэн хэдий ч спортын ордон ханхайгаад эл хуль оргисон тул оюутнуудад гарын мөнгө тарааж өргөж авчрах нь холгүй бөөндөж зөөвөрлөсөн юм байх. Үр дүнд нь спортын ордон дүүрч, АН-ын удирдлагууд үгээ сонсгох хүмүүстэй болж. Харин нөгөө талд МАН-ын нэр дэвшигчдэдээ батламж гардуулах үйл ажиллагаа энгийн хэрнээ өнгөлөг байгаа нь дэлгэцээр харагдав.

Төрийн сүлд, намын бэлгэдлээ өндөрт өргөж батламж гардуулж даруухан зохион байгуулжээ. Хоёр намын нээлтийн ажиллагаанаас харвал сонгуулиар АН сиймхий л гарвал мөнгөөр “зодож” олонд таалагдах гэж зүтгэх нь тодорхой болов. Танай намд санал өгөхгүй гэж сонгогч хэлбэл гарыг нь цайлгаж, өргөж аваачихаас буцахгүй аашлах нь илт болов. Мөнгөлөг болсон нээлтийн ажиллагааны бас нэгэн анхаарал татсан зүйл нь АН-ын удирдлагуудын хэлсэн үг байлаа. Н.Алтанхуяг “Энэ удаагийн сонгуульд ард түмэн ялах ёстой. Ялахдаа бүрэн дүүрэн ялах ёстой. Энэ ялалтыг АН парламентад олонхи болох явцуу утгаар бус ард түмний амьдралаас ургуулсан АН-ын мөрийн хөтөлбөр амьдралд бодитой хэрэгжих өргөн утгаар хэлж байна. Тийм учраас энэ сонгуульд ард түмэн ялах ёстой. Ард түмэн ялахын тулд АН нам ялах ёстой. Одоо бидний цаг ирсэн” хэмээн хэлэв. Ерөнхий нарийн бичгийн дарга Д.Эрдэнэбат, намын бүлгийн дарга Ч.Сайханбилэг нарын хэлсэн үг ч мөн л энэ утгаас нэг их гажсангүй. Ер нь сонгууль болохоос өмнө ялна гэж амладаг нь энэ намын тактик л даа. Харин сонгуулийн үр дүн гарсны дараа бодит амьдралд хөл тавих гэж сонгуулийн өмнөх өнөөх жингүйдлээсээ салж чаддаггүй шогтдог болохоор АН-ын даргын амлалтад ямар ч итгэл төрөхгүй байна. АН сонгуульд бид ялна гэдэг өнөөх үгээ л давтаж байгаад ялагдахаараа яаж цамнаж, ард түмний сонголт руу нулимдгийг хүмүүс андахгүй. Ингэж урьдчилж амлахын цаад утга нь сонгуульд ялагдал хүлээвэл үймээн самуунд турхирах, үүндээ олон нийтийн сэтгэл зүйд нөлөөлөх оролдлого агуулж байгааг ажиглагчид хэлж байна.

Харин МАН-ын дарга С.Батболдын нээлтийн ажиллагаанд хэлсэн үг дөрвөн жил ард түмнийхээ төлөө юу хийснээ тайлагнаж, юу хийхэд чиглэснээрээ онцлог байв. Тэрбээр “МАН бол Монгол Улсын тусгаар тогтнол, ХХ зууны хөгжлийн түүчээ, ХХI зууны ардчиллын манлайлагч нь болж гарч ирсэн бахархалтай нам. Мөн Монгол Улсынхаа хөгжил дэвшлийн төлөө бусад улстөрийн нам хүчнийг манлайлж ирсэн нам. Өнгөрсөн жил эдийн засгийн өсөлт 17.2 хувьд хүрсэн, энэ өсөлтийг хангахын төлөө цаашид тууштай ажиллах шаардлагатай. Тийм ч учраас МАН монгол хүнээ хөгжлийн бодлогын төвд байлгаж монгол хүн эрүүл чийрэг, монгол хүн эрдэм боловсролтой, монгол хүн ажилтай орлоготой, монгол хүн нийгмийн халамжаар дэмжигдсэн байх ёстой гэж үзэж, бодлого шийдвэрээ хэрэгжүүлж ирлээ. Хоёр дахь гол бодлого нь баялгийг тэгш хуваарилах зарчим. Монгол Улсын Засгийн газар нь бүрэн эрхийнхээ хугацаанд 2.7 сая иргэндээ 1.5 сая төгрөгтэй тэнцэх мөнгө, хувьцааг сонголттойгоор хүргэх ажлыг амжилттай хэрэгжүүлж байна. Цаашид бидний хувьд, МАН-ынхны хувьд хийх ажил их бий. Монгол Улсын эдийн засгийн өсөлтийг тогтвортой хангах, чинээлэг дундаж давхаргыг бий болгох, шударга ёсыг тогтоох, нийгмийн амьдралын бүхий л салбарыг хөгжүүлэх гээд олон олон зорилт өмнө тавигдаж байгаа. Зорилго зорилтыг хэрэгжүүлэхийн тулд “Ард түмний хөгжлийн хөтөлбөр”-т нэг сая гаруй иргэнийхээ санаа бодлыг сонсч, 220 мянга гаруй гишүүнээрээ хэлэлцүүлж, Их хурал, Бага хурлаар тус бүр батлуулснаар 2012-2016 онд баримтлах хөтөлбөрийг боловсруулсан. Эл хөтөлбөр маань УИХ-ын 2012 оны сонгуулийн хөтөлбөр болж ард түмэнд хүрнэ. Нэг үгээр хэлбэл, манай намынхан 2012 оны УИХ-ын сонгуульд хийсэн ажилтай, хэлэх үгтэй, тодорхой дэвшүүлсэн зорилттой орж байгаа. Дэвшүүлсэн зорилтоо хэрэгжүүлэхэд ард түмний итгэл дэмжлэгийг хүлээнэ гэдэгт эргэлзэхгүй байна” гэв. Түүний хэлсэн үгнээс ард түмэн өнгөрөгч дөрвөн жилд хийсэн ажил болон ирэх дөрвөн жилд хийхийг төвөггүй олж мэдэж байна. Гэтэл АН-ын даргын хувьд хийсвэр амлалтаас өөр юуг ч олж харсангүй. Ялна гэсэн хий хөөрцөглөл л үнэртэж байна. Юм хийгээгүй хүмүүс амлахаас өөр юу ч гэж хэлж чадах вэ дээ.

Өнгөлөг, мөнгөлөг нээлтийн хооронд мөн ч их ялгаа байна даа.