1994 оны “Дэлхийн Мисс” тэрбээр маш олон тооны кинонд тоглосон ч нэгэнд нь ч үнсэлцэж байгаагаар гардаггүйгээрээ бас зартай билээ. Нүцгэлж кинонд тоглохыг нь хэзээ ч бид харахгүй харамсалтай мэт хэрнээ бахархах сэтгэлийг давхар төрүүлдэг.

Тэрбээр багадаа тун чалчаа хүүхэд байсан гэдэг. Англиар маш цэвэрхэн ярьдаг Рай ярилцлагын цагаас яг 10 минут хоцорж ирлээ.
“Уучлаарай, муухай юм боллоо. Би хоцорчихлоо. Уг нь ээж минь намайг хэзээ ч хоцордоггүй хүн болгож хүмүүжүүлсэн юм. Би хоцордог хүнд үнэхээр дургүй” гэсээр багын үглээ зангаа тээн өдийг хүрсэн Рай ярилцлагаа эхлүүллээ.
Тэр ярилцлагын турш тун даруухан байж, асуултуудад элдэв майггүй хариулж байлаа. Гэхдээ хуримынх нь тухай асуухад өөрийн эрхгүй уулга алдсан юм. “Өө, хурим гэж жинхэнэ бужигнаан болсон. Энгийн энэтхэг бүсгүй хуримдаа бүтэн гурван сар бэлддэг юм шүү дээ, уг нь” гэж тэр хэллээ.
-   Та нэрт жүжигчин Абхишек Баччантай гэрлэсэн. Тэгээд хуримдаа сайн бэлдэх ямар ч боломж олдоогүй хэрэг үү?
-   Энэтхэг бүсгүйн амьдралын хамгийн чухал мөч бол гэрлэлт нь байдаг. Хуримандаа хичнээн олон янзын уламжлалт ёс, дүрмийг сахиж бэлтгэх ёстой байдгийг та сайн мэдэхгүй байх. Ямар ч байсан бүтэн гурван сар энэ ёсонд шаардагддаг юм даа. Энэ хугацаанд гэр бүлийнх нь хуримлах гэж бүсгүйг хамгийн амттай, биед тустай хоолоор дайлж, хувцсыг нь бэлтгэж, гоо сайхны маск хүртэл өөрсдөө хийж өгдөг. Өөрөөр хэлбэл тэр ирээдүйн нөхөртөө хамгийн сайхан дүр төрхөө харуулж очих ёстой байдаг. Гэтэл би тэгж амжаагүй. Бараг байгаагаараа л яваад очсон /инээв/. Аргагүй дээ, хурим болохоос долоо хоногийн өмнө л Энэтхэгт ирсэн юм чинь. Тэгээд би ээждээ “Ээж ээ, тэр бүх уламжлал ёсыг богино хугацаанд эрчтэй хийчихье” гэж хэлсэн.
-   Энэ бүх бэлтгэл ажлыг тэгэд заавал гүйцээж хийх ёстой үүрэг юм уу?
-   Үүрэг гэхээсээ илүү уламжлал гэж ойлговол дээр. Банан, зөгийн балаар хийсэн гоо сайхны маск ээж надад хийж өгсөн. Өдөр бүр л гоо сайхны энэ арьс арчилгааг хийгээд ирэхээр өөрийгөө үнэхээр гүнж болчихсон юм шиг санагдаж байсан. Уламжлалын гол утга нь энд л байгаа хэрэг.
-   Та “Дэлхийн мисс”-ээр өргөмжлөл хүртсэн цөөхөн жүжигчин бүсгүйн нэг. Гэхдээ “Дэлхийн мисс”-ийг гоо сайхныг шалгаруулах гэхээсээ илүү улс орноо бусдад рекламдах нэг өрсөлдөөн байдаг мэтээр ярьдаг. Үүнийг та юу гэж боддог вэ?
-   1994 онд “Дэлхийн мисс” болсон маань энэтхэг бүсгүйчүүдэд “Райг дэлхийн миссээр өргөмжилсөн юм чинь бидэнд ч бас тийм өндөрлөгт хүрэх боломж байна” гэсэн бодлыг төрүүлсэн. Гэхдээ би гоо бүсгүйг шалгаруулахдаа улс орныг нь төдийлөн анхаарч үздэггүй гэж ойлгодог. Тэнд тиймэрхүү PR гэмээр зүйл гаргах боломж бага. Миний хувьд Дэлхийн мисс-т орохдоо маш их сэтгэлийн хямрал, дарамтыг мэдэрч байсан. Учир нь тэр уралдааны дүрэм горим маш хатуу юм билээ.
-   Та загвар өмсөгчөөр хэзээнээс ажиллаж эхэлсэн юм бэ?
-   Оюутан байхаасаа л загвар өмсөгчөөр ажиллаж эхэлсэн. Гэхдээ энэ миний амьдралын зорилго, хүсэл маань байгаагүй. Харин жүжигчин болохыг үнэхээр хүсдэг байлаа. Зурагтаар гарч, алдар нэр хөөсөн хэрэг биш би олон хүний дүрд хувилж, тэр баатруудынхаа сэьгэл зрхийг мэдэрч, өөр хүнийг амьдралыг ойлгож мэдрэхийг л их хүсдэг. Харин загвар өмсөх бол утга тааруутай, хүнд өөрт нь ч хэрэггүй шахам эд шиг санагдсан.
-   Та архитекторч мэргэжилтэй. Энэ мэргэжилдээ дуртай юу?
-   Тийм ээ, уг нь би архитекторч. Мэргэжлээрээ ажилласан бол дажгүй л явах байсан байх. Гэхдээ одоо бол энэ мэргэжлээрээ ажиллах юм уу анхаарал тавих ямар ч боломж алга.
-   Таныг жилдээ олон кинонд тоглодог гэж ярьдаг юм билээ?
-   Жилдээ долоон кинонд тоглож байсан үе бий. Найруулагч, продюсерүүд тоглоод бай л гэж зөвлөдөг. Эхний хэдэн жил би зөвхөн Дэлхийн мисс гэхээс өөр тодотголгүй нэгэн байлаа. Кино ертөнцөд тэр дэлхийн мисс байх нь нэг их хамаагүй шүү дээ. Тийм болохоор л би жүжигчний хувьд алдар нэрд хүрэхийн тулд богино хугацаанд олон кинонд тоглодог байсан үе үнэхээр бий. Тэгээд ч тэр үеийн дүрүүд маань төдийлөн сайн болоогүй. Намайг нэг удаа биширдэг жүжигчин болох Роберт Де Ниротой танилцуулж билээ. Гэтэл Де Ниро надад “Үгүй ээ, тэгээд чамд тухтай ажиллах цаг хэзээ гарах юм бэ?” гэж хэлж билээ. Тэгэхэд л би энэ жилийг дуустал бүх ажлаа төлөвлөчихсөн байгаагаа гэнэт анзаарсан. Тэгээд Де Нирогийн хамтран ажиллах саналд татгалзсан хариуг өгөхөөс өөр аргагүй болж билээ.
-   Та эрчүүдийг ямар зан чанарт дуртай вэ?
-   Эрэлхэг, зоригтой занд дуртай. Эр хүн зоригтой л бол сайхан санагддаг. Энэтхэгт сайхан залуус бий. Гэхдээ мэдээж холливудад сайхан залуус бүр олон л доо.
-   Энэтхэг киног таалдаггүй хүмүүс нэлээд байдаг…?
-   Энэтхэгт сайн, сайхан кинонууд зөндөө бий. Тийм ээ, манай кинонууд үргэлж шахуу сайхан төгсгөлтэй байдаг. Учир нь хүмүүсийн маань амьдрал хэцүү байна шүү дээ. Тэдгээр хүмүүс киноноос мөрөөдөл, ирээдүйгээ олж харах хэрэгтэй гэж би боддог. Ийм л учраас Энэтхэг кинонд тий шинж их агуулагддаг байх. Жишээлээд хэлбэл, их халуун ногоотой хоол идсэн хүн түргэхэн шиг ус уухыг хүсдэг шүү дээ. Үүнтэй л адил юм.
-   Энэтхэг эрчүүдийн махлаг эмэгтэйг илүү таалдаг гэдэг. Таныг туранхай гэж гоочлох тал байдаг уу?
-   Тэгэлгүй яах вэ, ер нь ихэнх эрчүүд нь намайг сайн хооллох хэрэгтэй гэж хэлэх байх шүү. Гэхдээ сүүлийн арван жилийн хугацаанд энэтхэг залуусын үэл бодолд багагүй өөрчлөлт орсон. Ямар ч байсан энэтхэг хөвгүүдийн гоо сайхны мэдрэмж аавынхаасаа нэлээд өөрчлөгдсөн. Гэхдээ хэтэрхийн туранхай эмэгтэйчүүдийг таалдаггүй хэвээрээ л байгаа. Энэтхэг эрчүүдийн энэ үзэл намайг гэртээ оройн хоол идэхэд илүү чөлөөтэй болгодог гэх юм уу даа /инээв/.
Дэлхийн хамгийн сайхан бүсгүй Айшвария Рай
Болливудын од Айшвария Рай бол эх орныхоо жинхэнэ нүүр царай нь болсон нэгэн. Түүний нэр алдар Энэтхэгийн хилийг аль хэдийнэ адвж, Дэлхийн хамгийн сайхан бүсгүй хэмээн эдүгээг хүртэл яригдсаар, шагшигдсаар байгаа билээ. Түүний гоо сайханд автан, тэнгэрийн бүсгүй гэж биширсэн залуус дэлхийн өнцөг булан бүрт олон мянгаараа бий.
Тэр маш богино хугацаанд алдрын оргилд хүрч чадсан. Загвар өмсөгчөөс дэлхийн мисс, дэлхийн миссээс нэрт жүжигчин гээд түүний амьдрал маш эрчтэйгээр урагшилсаар байлаа.
Энэтхэг кинонд тоглоод нэрд гарсан нь тодорхой мэт боловч Рай яг чухам ямар эмэгтэй вэ гэдэг нь одоо хэр нь оньсого хэвээрээ л байгаа. Түүний нүдний өнгийг тодорхойлж хэлэхэд ч хэцүү гэж ойрын хүмүүс нь ярьдаг гэнэ.
Интернэтээр түүний тухай мэдээлэл авч болох 17 мянга гаруй цахим хаяг бий. Энэ хаяг бүр түүнийг гоо сайханд бишрэн дурлагчдын бүтээл.
Түүнийг Аш гэж дууддаг. Аш энгийн энэтхэг бүсгүйн дүр төрхтэй юм шиг хэрнээ орчин үеийн хамгийн сайхан царай төрхтэйд бас тооцогддог. Түүнийг нэгэн судлаач итали, ливан, африк, швед бүсгүй гэж андуурмаар. Түүний дүр төрх тийм олон сайхан шинжийг зэрэг агуулсан байдаг гэж шагшин бичсэн байдаг.
Тэгээд ч тэр тосгоны бүсгүйгээс хотын ажил хэрэгч бүсгүй, хөнгөн явдалтай эмэгтэйгээс хашир буурь суусан авгайн гээд хүссэн бүх дүрдээ тэр хувирч чаддаг. Энэ тухай Аш “Би үнэхээр хүссэнээрээ хувирч чаддаг” гэж бардам хэлсэн удаатай.
Тэр 50-аад кинонд тогложээ. Эх орондоо илүү олон кинонд тоглож болох байсан ч тэр сүүлийн хэдэн жилд холливудад хүчээ сорьж байгаа. “Яагаад холливуд руу зорьж байгаа юм бэ? гэж үү. Тийм ээ, би энд бас алдар нэртэй гайхалтай жүжигчин хэмээн хүндлүүлмээр байна” гэж Аш инээмсэглэн хариулдаг.
1973 оны арваннэгдүүгэр сарын 1-нд худалдааны хөлөг онгоцны офицер, зохиолч бүсгүйн гэр бүлд мэндэлсэн Аш багаасаа сонгодог хөгжим, бүжигт тун дуртай байжээ. Тэр англи, хинди, каннад, тамиль, урду хэлээр чөлөөтэй ярьж, ойлголцдог. Түүнийг 1994 онд дэлхийн мисс болоход нь тус уралдааныг зохион байгуулсан Ричард Стейнметс хэмээх эр өвөртөө оруулахыг хүсчээ. Харин хариуд нь Аш “Би зүгээр л мэргэжлийн загвар өмсөгч болохоос мэргэжлийн биеэ үнэлэгч биш” гэж эрс хариулсан гэдэг.
Загвар өмсөгчөөр ажиллах байхад нь түүнийг загварын компаниуд булаацалддаг байж. Энэ үед Pepsi түүнийг шинэ нүүр царайгаараа сонгосон нь нэр хүндийг өргөх эхний алхам байлаа. Харин дараа нь дэлхийн мисс болсон юм. 1997 онд Аш анхныхаа кинонд тогложээ. Үүнээс зургаан жилийн дараа түүний тоглосон “Девдас” нэртэй кино Каннын кино наадамд өрсөлдөх үеэр тэр анх удаагаа Европь улаан хивсэн дээгүүр гоо үзэсгэлэнгээ гайхуулан, жүжигчний хувиар алхжээ. Нэрт жүжигчин бүсгүй Жулиа Робертс Каннын наадмын үеэр Ашийг хараад дуу алдан “Тэр бол дэлхийн хамгийн сайхан бүсгүй” гэжээ.
Мөн Майкл Дуглас түүнтэй хамтарч тоглох хүсэлдээ хөтлөгдөөд байгаагаа ил зарлаж байлаа. Мөн Мерил Стриптэй “Хаос”-д хамт тоглож, “Астерикс Олимпийн наадамд” кинонд Аш Жерар Депардье, Ален Делон нартай хамтран тоглосноор нэр хүнд бүр өслөө.
Мөн нэгэн үе Жеймс Бондын шинэ бүсгүйн дүрийг бүтээх бүсгүйчүүдийн тоонд багтаж явлаа. Гэхдээ Бондын бүсгүй болоогүй нь “Кино урлагийн онгон бүсгүй” алдрыг хүртэхэд хүргэсэн. Аш жүжигчин болохдоо “Кинонд үнсэлцэх болон нүцгэлж зургаа авахуулахгүй” гэж өөртөө андгайлсан гэдэг. Энэ андгай олон эрчүүдэд харамсал төрүүлдэг ч түүгээр бас бахархах сэтгэлийг эрхгүй бий болгодог юм. Ийнхүү кинонд тоглох дүрдээ андгайгаа биелүүлсээр байгаа ч хувийн амьдрал дээрээ Аш тийм ч гэлэнмаа шиг нээн биш ээ. Тэр Энэтхэгийн кино урлагийг хамгийн сайхан бас хамгийн нэртэй жүжигчин Салман Кхантай амрагийн холбоотой байсан. Салман Кхан “Девдас”-д Ромеогийн дүрийг бүтээсэн ч үнэн амьдрал дээрээ хүүхнүүдийг бээлий шигээ сольдгийг Аш мэдэж байлаа. Гэвч Салманд тэр сэтгэл алдрахгүй байж чадаагүй. Болливуд оргиол болсон хоёр од амрагийн холбоотой болсон тухай хэвлэлүүд байнга бичнэ. Салман оройн цагаар Ашийн хаалгыг нүдэж байгаа зургийг хүртэл номлох баримт болгон хийтлэх болжээ. Тэд сүй тавьж, ирээдүйн амьдралаа холбох тухай ч ярьж байв. Гэвч Салман Ашийг зоддог нь олны нүдэнд ил болж, Ашийн ч тэвчээр барагдсанаар тэд гэрлээгүй юм. Үүнээс хойш Аш хэсэг хугацааны тэрш гэрлэх тухай бодох ч хүсэл үгүй болжээ. Жүжигчин Вивектэй учир ургуулсан нь ч төдийлөг удаан үргэлжилсэнгүй. Харин үүний дараа нэр жүжигчин Абхишек Баччан Ашийн сэтгэлийг эзэмдэж чадлаа. Баччанаас Ашийн юу нь танл хамгийн их таалагддаг вэ? гэж сэтгүүлч асуухад “Тэр бол маш энгийн бүсгүй. Бүр хэтэрхий энгийн. Мөн гэрсэг. Энэ нь надад хамгийн их таалагддаг” гэж гоо үзэсгэлэнгийнх нь тухай нэг ч үг дурсалгүй өнгөрсөн нь бий.