Гэтэл өнөө цагт эр хүн байна гэдэг үнэндээ тийм ч амар биш болжээ. Тэд мөнгө “хийж”, нөмөр болж, амьдралын төлөө зүтгэж, гэр бүлээ хамгаалж, бас ирээдүйг тооцоолох гээд нэгэн хүний биед үүрүүлэхэд төвөгтэй их ачааг үүрэх гэж хөмсгөө атируулан алхаж яваа гэхэд хилсдэхгүй.
Брэд Питт шиг сэтгэл татам гэх юм уу эсвэл Шрек шиг хүчирхэг байх ёстой гэж их үглэдэг. Гэтэл эрчүүд бүр ийм харьцуулалтад тэнцэхгүй.
Ингээд нэгэнт бүгдээрээ Брэд Питт юм уу Шрек биш тул тэдний төгс бус шинж чанарыг хүлээцтэй тэвчиж, басхүү хайрлан халамжлах шаардлага тавигдана. Дэлхий гэдэг гариг дээр амьдарч байгаа цагт эмэгтэйчүүд бид эрчүүдийгээ л тордож, амьдралаа сайхан авч явна шүү дээ.
Тэгээд ч төгс бус эрчүүд гэдэг жинхэнэ сонирхолтой хүмүүс.
Бидний сайн мэдэх “Амьдрал нулимсанд дургүй” хэмээх кинонд бэлэн сайхан амьдрал хайгч сэргэлэн нэгэн бүсгүй гардаг. Тэр генерал эрд хөл алдах хэрнээ алдартай, биелэгжүү тамирчин болох байсан залуухан, ирээдүйтэй хоккейчин залууг архичин болгоод алдчихдаг. Өөртөө таарсан тийм сайн эр, ийм сайхан боломжийг алдсан хэрнээ юу алдснаа ч мэдэхгүй алхаж яваа тэр бүсгүйн адил олон эмэгтэй бий.
Эрчүүд бол тэдэнд итгэж, урам хайрлаж чадсан цагт эрийн золбоогоо үзүүлдэг шидтэй. Харин тэднийг өөлж, муулсан цагт алслан холдох гэмтэй улс.
Алдаж онох цагт нь тулж, хүршгүй мэт зүйлийн төлөө зүтгэхэд нь арагш нь таталгүй урам өгч чадснаар л эрчүүд гайхамшгийг бүтээж, аз жаргал бэлэглэгч болон хувирдаг.
Ингэхээр эмэгтэйчүүд эрчүүдийг өөрсдөө л хөглөж, бас хүмүүжүүлж болодог гэдгээ санахад илүүдэхгүй.
Ер нь эрчүүдийг хүмүүжүүлнэ гэдэг тийм ч хэцүү ажил биш гэдэг.
Гэхдээ хүмүүжүүлж авахад бас хэд хэдэн арга, зарчим бий. Эдгээрээс өгүүлье.
Эмэгтэйчүүд эрчүүдийг өөрчлөгдөх дургүй улс гэж байнга үглэж янших нь элбэг. Хичнээн жил хамт амьдарсан хэрнээ нэг хүн шиг болж, эмэгтэйхээ өмнөөс сэтгэж бодож чадахгүй байх нь эрчүүдийн хувьд энгийн үзэгдэл. Хадам ээжийндээ зочлох байсан хэрнээ гэнэтхэн найзууд нь дуудахад түүнийгээ таг мартаад, шар айраг эргүүлэхээр үсрэн гарах нь тэдний шинж чанар ч гэмээр. Мөн мөдхөн зочид ирнэ гээд байхад зочдын өрөөндөө ганцхан дотоожтойгоо хээв нэг алхаж явах нь эрчүүдийн “гажиг” зангийн нэг илрэл.
Ингээд эхнэр нь үглэх тутамд л “Тийм ээ, хонгор минь миний буруу. Дараа дахиж ингэхгүй ээ” гэж жишим ч үгүй хэлнэ. Үүнийхээ дараахь хэдэн өдөр үнэхээр нөгөө алдаагаа давтахгүй байснаа эргээд л хэд хоногоос хэвэндээ орчихсон явах нь бий.
Ийм тохиолдолд ер нь яах вэ? Дахиад л болохгүй бүтэхгүй байгаа зүйлийг үглэж янших уу? Эсвэл бөөн хэрүүл тэмцэл хийж, нус нулимсандаа хүрэх үү? Эсвэл зүгээр л салчих уу?
За түргэн ууртай, хурц авиртай бүсгүйчүүд бол дээр дурьдсан хэдэн алхмын аль нэгийг сонгох байх. Харин тэвчээртэй ухаалаг эмэгтэйчүүд эрийгээ хэрхэн хүмүүжүүлж авахаа л сайтар тунгаана.
Эрчүүдийг хоёр янзаар хүмүүжүүлж болно. Нэг нь аргадан гуйх, нөгөө тулган шаардах. Таны эрийн сэтгэхүйд энэ хоёр аргын аль таарч байгаагаас сонгож ашиглаж үзээрэй.

Сайнаар хэлж ойлгуулах буюу аргадан гуйх зам

Дуулгавартай байвал шагналтай
Нохойг сургахад дуулгавартай байсных нь төлөө идэх юм өгч шагнадаг шүү дээ. Түүнтэй л яг адил гэсэн үг. Дуулгавартай байж, үгэнд тань орж, алдаагаа зассаных нь төлөө яг л нохой шиг, бас хүүхэд шиг шагнаж болох юм.
Жишээ нь, шинэ жүжиг хамт үзсэн нь хичнээн сайхан сэтгэгдэл төрүүснийг бахдан сайшаах хэрэгтэй. Тэр жүжигт биш өнөөх л тамхины утаа суунагласан баарныхаа нэг буланд найзуудтайгаа мар мар гэж сууж чадах л байсан шүү дээ. Ингээд баарнаас татгалзаж эхнэртэйгээ театрт очсных нь төлөө түүний секс зөгнөлийн нэгийг биелеелж өгөхөд юу нь болохгүй гэж. Энэ бол эрчүүдэд нэлээн том шагнал шүү.
Алдаагаа засч, үгийг тань авсан нөхөртөө эсвэл дуртай хоолыг нь хийж өгөөд дураар нь идүүлж ч болно. Гэхдээ энэ сайхан хоол бол түүний сайн байгаагийн төлөө олгож буй шагнал гэдгийг л цаагуур нь сайн мэдрүүлэх хэрэгтэй.

Чи надад, би чамд
Энэ нь нохойг сургадаг эхний зарчимтай ерөнхийдөө адилхан. Гэхдээ эмэгтэй нь алдаагаа засч, дуулгавартай байсны төлөө юу өгөхөө шууд шулуухан хэлэхээрээ арай өөр. Эсвэл дуулгавартай байхгүй бол дургүй зүйлийг нь хийхээ шууд хэлчихэж ч болох юм.
Жишээлбэл, унтлагын хувцастайгаа гэрээрээ сэлгүүцэхэд тань нөхөр тань удргүй байж болно. Тэгвэл унтлагын хувцастайгаа оройжин гэрээрээ тэнэнэ гэж сүрдүүл. Эсвэл орондоо орохдоо толгой эргэм хурц үнэртэй ус цацаж болно. Эрчүүд угаасаа тиймэрхүү дезодранттай бүсгүйтэй оронд орохыг там л гэж төсөөлдөг. Тэгэхээр тэр сайхан амрах боломжоо жижиг муу зуршлаараа арилжихыг хүсэхгүй нь тодорхой.

Муу залуустай харьцуулах
Үе үехэн найз бүсгүйхээ нөхрийн муу талыг байн байн ярьж, хааяа нэг туу хэлэх нь сайн аргын нэг. Энэ ярианыхаа далимд эрчүүдийн юу нь таалагддаггүй болон өөрийнх нь юу нь болохгүй байгаа талаар далдуур цухуйлган ойлгуулж болно.
Жишээ нь, Долгорын нөхөр байнга баараар тэнэж, орой орондоо баарны баахан утааны үнэр тээсээр орж ирдэг тухай ярьж байсныг хэлэх хэрэгтэй. Тэгээд “Харин миний хонгор тийм биш надад их сайхан байдаг” гэж урам хайрлаж болно.
Энэ үгээрээ та тийм байж болохгүй шүү, намайг хүндлээрэй гэсэн ойлголтыг шууд өгч байгаа. Хэрвээ тэр танд хайртай, хүндэлдэг л юм бол энэ ярианы дараа бага ч гэсэн өөрчлөгдөхийг хичээнэ.
Ингээд сайнаар буюу аргадан гуйсан байдлаар асуудлыг шийдэж чадахгүй бол бас муугаар буюу тулган шаардах замаар амжилт олох боломж бий.

Муугаар буюу тулган шаардах зам
Энэ бол айлгах, сүрдүүлэх аргаар эрчүүдийг хүмүүжүүлэх зам юм. Гэхдээ мэдээж ямар нэгэн гэмт хэргийн шинж энд байх ёсгүй.

Үгэнд ороогүйн төлөөх шийтгэл
Танай нөхөр эмэгтэйчүүдийн тухай бүдүүлэг, явуургүй тоглоом тохуу байдаг хэлж байдаг бол “Бүсгүйн хүн бүр тийм муу муухай юм бол эрчүүдтэйгээ нэг оронд орж болно шүү дээ” гэж хэлж болно.
Хэрвээ нөхөр чинь ажлаасаа аль эрт ирэх боломжтой байсан хэрнээ замдаа найз нартайгаа саатаж, “сүүлийн үеийн мэдээ” сонсон оройтсон бол хааяа түүнийг хоолгүй сойчих.
Мөн нөхөр тань зарим нэгэн муу зуршлаасаа татгалзахыг хүсэхгүй байвал цаашид тав тухтай байдал нь улам л үгүй болохыг анхааруулахад гэмгүй.

Ичээх зүйрлэл
Одоо харин яг эсрэгээр нь хий. Эрчүүд өөрийг нь бусадтай харьцуулж муулахад үнэхээр дургүй. Хэрвээ өмнө нь та нөхрөө найз бүсгүйнхээ нөхрөөс дээр гэж магтаж байсан бол одоо яг эсрэгээр хийх тухай энд зөвлөж байна. Түүнд түүний хийсэн муу муухай бүхнийг сануулж, нулимс унагасан ч яахав. “Яахаараа надад ийм “жаргал” оногдож байгаа юм бэ? Би чамайг хайрлаж, халамжилж сайн сайхан яваасай л гэж хүсдэг. Хамтдаа сайхан амьдрахын төлөө л зүтгэж байна. Чи тэр Тунгаагийн нөхрийг хар л даа. Эхнэрээ хичнээн сайхан авч явж байна вэ? Хүссэн бүхнийг нь л биелүүлдэг гэсэн. Гэтэл чи, арай ч дээ. Энэ тал дээр чамд би баярлаж чадахгүй, за” гэх мэтээр үгээр харамгүй бөмбөгдөж болно.

Эцсийн хөшүүрэг
Эрчүүдийг хүмүүжүүлж авах аргын хамгийн эцсийн эрсдэлтэй нь салах сарних тухай хөшүүрэг хэрэглэх. Хичнээн янзаар үзээд засрахгүй байгаа хүнд эцэстээ ийм л алхам үлддэг. Ер нь тэгээд та засрах дургүй хувиа бодсон эр хүний төлөө өөрийнхөө залуу нас, халуун сэтгэлээ зарах хэрэг байна уу.
Түүний баараар тэнэх “ур чадвар”, найз бүсгүйчүүдтэй чинь марзганах хүсэл, тэнэг гэмээр жижиг муу зуршлууд хэвээрээ л байгаад байх юм бол цаашид тэгж уур цухлаа барж хажууд нь халамж үзүүлэх шаардлага юу байна вэ?
Ингэж байснаас шууд л хөшүүрэг хэрэглэж, сүрдүүлэх үамыг сонгочих. Хэрвээ ингэж хэлээд байхад хүмүүжихгүй юм бол тэр таны эр биш юм биш үү. Өөр хаа нэг газар илүү сэтгэлтэй, чамайг хүндлэх хүн олдох л болно гэдэг итгэ.
Хөшүүрэг хэрэглэх арга нь үнэхээр ямар нэгэн өөрчлөлтөд хүргэнэ. Гэхдээ үр дүн нь яг ямар байхыг төсөөлж, таамаглахад бэрхтэй. Энд бас эр хүний өөрийнх нь сэтгэхүйгээс бүх зүйл хамаарна. Хэрвээ тэр танд их үнэтэй хүн бол хамаагүй ийм алхам хийхгүй байхыг зөвлөе. Түүнийг сэтгэхүйг сайн мэдэж, хийх алхмыг нь багцаалж буй үед л энэ аргыг эцсийн мөчид хийж болох юм.

Ер нь эрчүүд өөрийг нь хүмүүжүүлэхийг яагаад хүлээн зөвшөөрдөг вэ? Ямар тохиолдолд тэд засрахыг хүсдэг бол? Энэ асуултын хариулт их энгийн хэрнээ эрхэм. Учир нь тэр танд хайртай. Таныг хайрлаж, хүндэлдэг. Танд сайн сайхныг хүсдэг. Гэхдээ хамтдаа сайхан байхыг хүсдэг гэсэн үг. Тиймээс л эр хүн өөрийнхөө олон жилийн зуршлаасаа татгалзаж, олон сайхан найзтайгаа уулзахаас цэрвэж эхэлдэг. Таны төлөө л өөрчлөгдөж байгаа нь тэр. Гэхдээ та түүнийг хүмүүжүүлж, өөрчлөхдөө эр хүн өөрөөс чинь бас ийм зүйлийг хүснэ шүү гэдгийг сайтар санаарай.