Тэр Британийн хамгийн баян жүжигчдийн жагсаалтын хоёрт бичигддэг. Түүний өмнө Харри Поттерт тоглосон Даниел Рэдклифф л орж чадсан юм. Кираг саяхан ханхүү Уильямтай нэр холбож байсан үе бий.

Гэвч “Үгүй ээ, Уильям миний сонирхдог залуу биш. Тэр чинь морьтой адилхан” гэж хэлсэнээр олон хүнийг “цочоосон” удаатай. Түүнд авьяаслаг, хөгжилтэй залуус таалагддаг. Хэдийгээр найз залуу Руперт Френд нь авьяастай бас хөгжилтэй ч гэсэн тун шийдэмгий бус эр. Ямартаа л зургаан жил Британийн хамгийн үзэсгэлэнтэй жүжигчин бүсгүйтэй найзалж буй хэрнээ гэрлэх саналаа хэлэхээс жийрхсээр явах вэ дээ. Ингээд Кира Найтлигийн ертөнцөөр түр зуур аялья. “AIF” сонинд өгсөн ярилцлагыг нь товчлон хүргэж байна.

- Уучлаарай Кира, ярилцлагаа нэгэн таагүй гэмээр асуултаар эхэлье. Та сүүлийн хэдэн жилийн турш Британийн 30 нас хүрээгүй жүжигчин бүсгүйчүүдээс хамгийн үзэсгэлэнтэй нь байлаа. Үргэлж л таны нэр үзэсгэлэнтэй жүжигчин бүсгүйчүүдийн жагсаалтыг тэргүүлж байсан. Гэтэл энэ онд “Харри Поттер”-д дүр бүтээсэн Эмма Уотсон таны өмнө бичигджээ. Танд энэ мэдээг дуулахад харамсалтай санагдаж байна уу?

- Таны итгэх эсэх чинь хамаагүй ээ, надад үнэндээ хамаа алга. Тэгээд ч би саяхан эрчүүдийн дунд явуулсан санал асуулгаар Британийн хамгийн үзэсгэлэнтэй жүжигчин бүсгүйгээр намайг нэрлэсэн тухай уншсан юм байна. За тэр, үзэсгэлэнтэй гэх мэт яриа ч яахав. Жүжигчин хүний хувьд би Анна Каренинагийн дүрийг авсандаа л их баяртай байгаа шүү. Домогт Грета Гарбо, Вивьен Ли, Софи Марсо нарын эгнээнд орлоо гэсэн үг. Тэгэхээр юун Эмма Уотсонтой өрсөлдөх тухай ярих сонирхол ч төрөхгүй байна. Харин байр сууриа алдаж буй тухайд бол...үнэхээр өсвөр насныхаа зарим зүйлийг гээгээд байгаа юм билээ. “Бекхэм шиг тогло” кинонд зураг авахуулж байхдаа би тусгай бэлтгэл хийсэн юм. Тэгэхэд тун дажгүй тоглодог болчихсон байсан. Гэтэл саяхан зүлгэн дээр найз нартайгаа бөмбөг хөөтөл нөгөө сурсан бүхнээ гээчихснээ ойлгосон. Ичээд тэр дороо тоглохоо болиод суучихсан. Хөгширч байна даа (Инээв).

- Найз залуу Рупертийнхээ хамт саяхан сая паундын харш Францын өмнөд эрэгт худалдан авсан гэсэн. Руперт кинонд хамтран тоглож буй жүжигчин бүсгүй Софи Майлзтай учир ургуулсан тухай цууг дуулаад таныг гэрлийн хурдаар түүн рүү очсон гэдэг юм билээ. Та хардалт гэдэг мэдрэмжийг амсаж үзсэн үү?

- Хардалтаас зовж шаналж үзсэн гэвэл илүү онох байх. Хардалт бол цус сордог могой л гэсэн үг. Хардалт намайг шулам шиг болгодог.

- Хардалт хүнийг тэгж их өөрчлөх чадвартай гэж үү?
- Тэгэлгүй яахав, өөрийгөө хянаж, удирдаж чадахаа болиод, ухаангүй болчихсон мэт байдал ордог. Тиймээс аль болох хардахгүйг хичээн, өөрийгөө хянаж байх хэрэгтэй.

-   Таныг хуурсан бол та уучилж чадах уу?
-   Яаж хуурсанаас л шалтгаална даа. Сэтгэл санаандаа хуурсан байлаа ч гэсэн уучилж чадахгүй гэж зарим нь ярьдаг. Гэхдээ энэ бол эмэгтэйчүүдийн үг л дээ. Харин эрчүүдийн хувьд бие эрхтнээрээ хуурах нь сая хууралтад тооцогддог байх. Ер нь бид өөр хүнийг шүүх эрхтэй гэж үү? Гэнэт өөрсдөө хэн нэгнийг хуурахыг хэн үгүйсгэх юм бэ? Хэн ч хэнийг ч хуурахгүй гэсэн бүрэн баталгаа байхгүй шүү дээ. Мөн хууруулахгүй байх жор гэж үгүй. Хүн тохиолдол бүр дээр өөрөө шийдвэрээ гаргаж амьдардаг. Тэгэхээр бусдыг шүүх хэрэггүй. Өөрийгөө л хичээх хэрэгтэй.
-   Та өөртөө их шүүмжлэлтэй ханддаг уу?

-   Хэлэхэд хэцүү л юм. Заримдаа өөрийгөө толинд хараад чи үнэхээр сайн тоглолоо гэж магтах нь бий. Харин маргааш нь найруулагчдаа загнуулаад, урам унтраад ирэхээрээ өөрийгөө үзэн ядаж ч эхэлнэ шүү.
-   Тийм үед яаж тайвширдаг вэ?
-   Харин ийм үедээ би нарийн аргатай шүү. Аяга тавгаа угаадаг юм. Гал тогоогоо гялалзтал цэвэрлэж эхэлдэг. Бас бухимдсан үедээ хэрэглэнэ гээд хадгалчихсан хямдхан тавагнууд бий. Гэхдээ таваг шидэж хагална гэдэг хүмүүс дэргэд байхад хийх үйлдэл л дээ. Ганцаараа байхдаа бухимдлаа тайлахын тулд их иддэг. Гэхдээ намайг нулимс унагатал уурлуулж, гомдооно гэдэг амаргүй.

- Та их идэж тайвширдаг юм байна. Гэтэл ихэнх эмэгтэйчүүд дэлгүүр хэсч тайвширдаг шүү дээ?

- Би хувцас хунарт тэгтлээ дурладаггүй. Хэдэн жилийн өмнө бол хэдэн туфль авах гэж дэлгүүр хэсдэг л байлаа. Харин эдийн засгийн хямрал нөмөрсний дараа больсон. Одоо үнэтэй, загварын туфль авахгүй, зөвхөн прокатаар нэг өдөр авч өмсөөд буцаагаад өгчихдөг. Анх алдар нэртэй болоод мөнгө их олоод ирэхдээ юмны үнийг мэдэлгүй хамаагүй үнэтэй туфль их авдаг байж. Харин одоо хэзээ хамгийн сүүлд туфль авсанаа ч санахгүй болжээ. Нэг өдрөөр прокатлаад л буцаагаад өгчихдөг.

- Өнгөрсөн гуравдугаар сард таныг 25 нас хүрэхэд Руперт үнэтэй бөгж бэлэглэсэн тухай дуулсан. Тэр бөгж сүйний бөгж биш юм уу?

- Тийм ээ, бөгж бэлгэнд авсан. Гэхдээ Руперт “Хайр сэтгэлийн минь илэрхийлэл” гэж л хэлсэн. Бид хоёр 2004 онд киноны зураг авалтын үеэр танилцсан. Тэр өөрийгөө нүүдэлч цыгануудтай төстэй гэдэг юм. Тиймээс гэр бүлийн амгалан тайван амьдралд одоохондоо бэлэн биш байгаа. Эхэндээ ч би хурдхан нөхөрт гарахын хүсэлд автчихсан байж. Одоо бол нөхөрт гарах гэж яардаггүй. Одоогийн амьдралаа харахад үргэлж зураг авалтад гүйж байгаа хүн гэрийн эзэгтэй болох боломж ч үнэхээр бага байна гэдгээ ойлгодог. Гэр бүл эмэгтэй хүний амьдралд маш чухал гэдгийг би мэднэ. Гэхдээ би төлөвлөж сураагүй, аяндаа болох биз дээ. Хааяа “Амьдралын утга учир юунд байдаг юм бэ?” гэж бодох үе бий. Зөвхөн жүжигчний замнал маань чухал гэж үү гэж бодож үздэг. Нэг л их нэр төртэй жүжигчин бүсгүй яваад байдаг гэтэл хувийн амьдрал нь жигдрээгүй байвал бас л ихээхэн зүйл дутуу байна гэсэн үг. Тиймээс бүх зүйл минь өв тэгш байгаасай гэж хүсдэг.

- Та өнгөрсөн онд дөрвөн кинонд тоглож жүжигчний хувьд ургац арвинтай байлаа. Гэвч нэгэн урт гарт этгээд танай гэрт орж, хоёр зөөврийн компьютерийг тань хулгайлсан хэрэг гарсан...
- Үнэхээр муухай хэрэг гарсан. Алдсан зүйлдээ харамсаад, халаглаад байгаа юм алга. Гэхдээ хэн нэгэн танихгүй этгээд бусдын амьдралд гараа дүрж байгаа нь хичнээн муухай санагдсан гээч.

- Сүүлийн үед таныг мөрдөж мөшгих, танайд хулгай орох явдал гарах боллоо. Марек Данилюк хэмээх этгээд таныг мөрдөж мөшгөөд байсан хэрнээ хэргийн нотолгоо бүрэн биш гэсэн үндэслэлээр ял үүрэлгүй суллагдсан...
- Би энэ түүхийг эргэж дурсахыг үнэндээ хүсэхгүй байна. Миний амьдралд бусдын нөлөө орж ирэхэд би үнэхээр дургүй. Жүжиг тараад гарч явтал тэр гэнэт бугуйн дээрээс барьж аваад “Миний бэлгийг авсан уу?” гэх мэт юм асуугаад эхэлсэн. Би мултраад зугттал араас мөшгөөд байсан шүү дээ. Дараа нь зөндөө олон захидал илгээсэн байсан. Би түүнд хариулах албагүй. Гэтэл заавал хариулахыг шаардаад, дагаад байсан. Тиймээс би түүнийг шүүхэд өгсөн юм. Гэлээ ч шүүх хурлын үеэр би тэнд сууж тэвчээгүй, орхиод гарсан.

Р.Гэгээ