-УИХ-ын гишүүн Ц.Нямдорж, Х.Баттулга хоёрын хоорондын маргаан олны анхаарлын төвд байна. Х.Баттулга солонгосчуудтай шинэ төмөр зам тавих асуудлаар нууц гэрээ байгуулсан. Засгийн газар нь мэдээгүй байсан энэ нууц гэрээг Ц.Нямдорж хэвлэл мэдээллээр задаллаа. Ер нь та энэ талаар ямар байр суурьтай байна вэ?

Хэзээ нэгэн цагт ийм юм болохыг мэдэж байлаа. Яагаад гэвэл энэ УИХ, Засгийн газрын үед маш олон нууц гэрээ байгуулсан. Цөмийн хог хаягдлын тухай гэрээ байна. Сая л гэхэд Зам, тээвэр, барилга, хот байгуулалтын сайд байсан Х.Баттулгын байгуулсан гэх нууц гэрээ ил гарлаа. Нууцад орох, үгүй нь маргаантай л даа. Гэхдээ иймэрхүү гэрээ олон бий. Хоёр дахь гэрээ нь ил болж байгаа нь энэ. Цаана нь гурав, дөрөв дэх нууц гэрээ байгаа байхгүй юу. Хаврын чуулганы эхний өдрүүдэд энэ талаар нухацтай ярьцгаах байх. Ер нь ноцтой асуудлыг аль аль нь гаргаж ирснээрээ зөв зүйтэй. Нөгөө талаасаа Монголын төрд ямар арчаагүй хүмүүс байна вэ гэж бодохоор харамслаа. Өмнөөс нь ичиж байна.

-Хэн нь үнэн яриад байгааг ойлгоход бэрх боллоо. Өөрөө өөрсдийгөө хамгаалж, хэвлэл мэдээллээр ярьж байна шүү дээ?

-Ийм гэрээнд маш нууц гэсэн тэмдэглэгээ байдаг юм. Улсын нууцад л аваагүй бол тэр гэрээг нууц гэж үзэх үндэслэл байхгүй.

Тухайн сайд, яамнынхан гэрээг нуун дарагдуулсан байж болно. Ингэх нь буруу. Хамгийн гол нь энэ гэрээ нууцын зэрэглэлтэй гэсэн тамга тэмдгийг би өөрийн нүдээр олж хараагүй болохоор сайн хэлж мэдэхгүй байна. УИХ-ын чуулган маргааш /өнөөдөр/ эхэлнэ. Ер нь энэ гэрээг үзэх болно. Үнэхээр нууцын зэрэглэлтэй гэрээ байв уу. Эсвэл улс төрийн шоу хийж, нуун дарагдуулсан гэрээ байв уу гэдгийг тодруулах болно.

-Нууц гэрээний эхнийхийг та цөмийн хог хаягдлын гэрээ байсан гэж дээр цухас дурдлаа. Үүнийг төр засгийнхан үгүйсгэдэг. Гэтэл та өнөөг хүртэл үнэхээр ийм гэрээ байдагт итгэсээр байгаа хэрэг үү?

-Цөмийн хог хаягдлыг Монголд булшлах гэрээний нууцыг дэлгэхгүй яваад л байна. Нууцын зэрэглэлд байна уу гэхээр ямар нэгэн мэдээлэл өгдөггүй. Гадаадын хэвлэл мэдээллийн хэрэгслээр байгуулсан гэдгийг хэдийнэ зарласан. Гэтэл манайхан байгуулаагүй гэдэг. Төр ард түмнээ хууран мэхэлж болохгүй шүү дээ. Энэ талаарх асуудал өдрөөс өдөрт бага багаар тодорхой болж байгаа.

-Дараагийн нууц гэх хууль бус гэрээ нь тэгээд юу байгаа юм?

-Олон байгаа. Энэ талаар материал цуглуулж байгаа. Цаг нь болохоор нийтэд дэлгэнэ.

-Шинэ төмөр замын нууц гэрээ байгуулсан нь Таван толгойтой зайлшгүй холбогдоно. Тавантолгойн асуудал юу болох гээд байна даа?

-Таван толгойг анхнаас нь ингэж олон хэсэг болгон яриад, ард түмнийг төөрөгдүүлэх хэрэгтүй. Нүүрсний таван илэрцийг Таван толгой гээд байгаа юм. Ард түмэндээ өгөх гээд байгаа Таван толгой чинь зөвхөн нэг толгой нь байгаа байхгүй юу. Яагаад Монголын ард түмэн тавуулангаас нь баялаг хүртэж болохгүй гэж. Гэтэл олигархиуд үүнийг хүлээн зөвшөөрөхгүй байгаад хамаг учир байгаа юм. Төмөр замын талаар баримтлах бодлогыг баталсан. Хойшоо ч, урагшаа ч төмөр замаа татна гэж. Бэлээхэн ингэнэ гэсэн бодлого нь байсаар байхад түүгээр нь явах хэрэгтэй биз дээ. Гэтэл олон жил төрд ажилласан Ц.Нямдоржийн өчигдөр / уржигдар/ "Сайдын ярилцлага" буланд өгсөн ярилцлагыг харлаа. Үнэхээр арчаагүй зүйл ярьж байнаа.

-Яагаад ийм сэтгэгдэл төрөв?

-Би хойно Нүхтэд нэг байртай. Хотод тур байх нэг байртай. Яг нарийн ярих юм бол "МСS"-ийн олигархиудын амьдардаг байрны жижүүр хийж байгаа юм билээ ш дээ, Ц.Нямдорж. Ярьж байгаагаас нь тэгж ойлгогдоод байгаа юм. Олигархиудын хэсэг биш доод давхар хавьд нь амьдардаг гэнэ. Ер нь энэ Монголын олигархиуд дэндүү даварч байна. Монгол Улсын Засгийн газрын гишүүн, Хууль зүй, дотоод хэргийн сайдаар орцны жижүүр хийлгэж байна гэдэг хэтэрхий даварч байгаа хэрэг. Дэндүү доромжилж байгаа юм биш үү. Нөгөөх нь орцны жижүүр хийгээд байрныхаа мөнгийг төлдөг ч юм уу, үгүй юм уу бүү мэд. Тэр ашиглалтын 300 мянган төгрөгийг төлдөг гэсэн баримт хаана ч байгаа юм. Байдаг, үгүй нь ч мэдэх зүйл алга. МАН нь ч нам юм, ямар нэгэн зүйл болоход энэ нөхрөө урдаа барьдаг. Нөгөөх нь ч яасан их дуртай юм. Тэрээр дээрх ярилцлагадаа хэлсэн ш дээ. Надад 10 мянган ажиллах хүч оруулж ирэх зөвшөөрөл өгчих. Тэгвэл би энэ орон сууцны үнийг буулгаад өгье гэж байна. Юун гадаадаас ажиллах хүч авах. Монгол иргэд нь ажилгүй, амьдрал хүнд байхад. Засгийн газрын гишүүн, сайд хүн ингэж ярина гэдэг Монгол Улсын төлөө сэтгэл зүрх энэ Засгийн газарт, энэ намд байгаа юм уу. Ярилцлагын төгсгөлдөө амь настайгаа холбоотой зүйл ярилаа. Юундаа айгаад, хачин зүйл яриад байгаа юм. Бас би эхний удаа бас эцсийн удаа гэрээ байгууллаа гэж байна. Эцсийн удаа байгуулсан юм бол Ц.Нямдорж, сайд байх хэрэг байна уу.

-УИХ-ын гишүүн Х.Баттулгын яриад байгаа зүйлд ямар бодолтой байна вэ?

-Х.Баттулга аа, энэ асуудлаа Засгийн газарт сайд байхдаа ярихгүй яасан юм бэ. Хэзээ хойно, хамтарсан Засгийн газраас гарсан хойноо улс төрийн шоу хийх ямар хэрэг байгаа юм. Энэ Засгийн газар өнгөрсөн хугацаанд юу ч хийгээгүй. Тэдний нэг нь Х.Баттулга өөрөө байдаг. Засгийн газрын гишүүн, сайд байхдаа миний мэдэхийн Дорнодын чиглэлийн хатуу хучилттай замыг нэг ч км ахиулаагүй. Харин төмөр замын тал дээр яриад байгаа зүйлийг нь би дэмждэг.

-Сая АН-ын дарга мэдээлэл хийлээ. Нэг сая төгрөгийг ард түмэндээ олгосон байх ёстой байсан. Яагаад олгосонгүй гэж. Энэ мэдэгдэл дээр Ерөнхий сайдыг оролцохыг хүссэн ч тэрээр ирсэнгүй?

-Энэ чинь ээлжит жүжиг. Хэдхэн хоногийн өмнө Засгийн газартай хамтарч ажиллаж байсан. Өнөөдөр төрөл арилжсан юм шиг зүйл ярихаа боль. Яг энэ жүжгийг АН хорин хоёр жил тоглож байгаа байхгүй юу. Одоо жүжиг дууссан. Ард түмэндээ хөгжих бололцоог нь МАН, АН ч нээж өгөх хэрэгтэй. Ямар хэрэгтэй гэж төрд хулгайчид байх ёстой гэж. Зүгээр л зайгаа тавиад өгөөч. Энэ хоёр намаас одоо юу ч гарахгүй гэдэг нь ойлгомжтой болсон. Нохойд барьдаг мод гэгчээр хоёр намын жүжигт тоглодог хэд нь цааш явахаа болилоо.

-Сонгууль дөхөөд байдаг. Хоёр сонгуулийг зэрэг явуулна, үгүй гээд байдаг?

-Аргаа барахаараа аавынхаа толгойг маажив гэгчээр хоёр сонгуулийг хамт явуулна, явуулахгүй гэж байна. Нэг сонгуулиа явуулж чаддаггүй байж, хоёрыг явуулна гэж байна. Мунгинаад байх юм даа.

-Х.Баттулга, Ц.Нямдорж хоёрын хэрүүлийг олны анхаарлыг татах зорилгоор үүсгэлээ гэж яриад байна. Үүний цаана сонгуулийн булхай хийж байна гэх хардлага төрөөд байгаа?

-Сонгуулийн будилаанаа хийх, Оюу толгойн булхайгаа нуух гэсэн байхыг үгүйсгэхгүй. Гол нь цаг хугацаа хожих гэж л энэ жүжгийг тавьж байна. Гэхдээ хоёр намын топ жүжиг нь энэ. Энэ жүжигтээ АН Х.Баттулгыг татан оролцууллаа. Улсын бүртгэлийн ерөнхий газрын даргаар МАН-ын нарийн бичгийн дарга байсан Амарсанаа томилогдлоо. Юу хийх гээд байгаа нь тодорхой байгаа биз дээ. Шинэ хүн учраас Амарсанаа сонгуулиар ямар нэгэн хариуцлага хүлээхгүй гэсэн. Сонгуулийн тооллого, санал хураалтыг автоматаар явуулна. Гэтэл энэ бүх зүйлийг хийхийн тулд тендер зарлахгүйгээр компаниудад эрх олгосон. Энэ бүхнээ нуух гэж байгаа юм. Одоо хийх гэж байгаа ажил бол аймгуудын Иргэний бүрдэл мэдээллийн газрын дарга нарыг солих гэж байна. Түрүүчээсээ зарим аймгийн газрын дарга нарыг ажлаа өг гэж шахаж дарамталж эхэлжээ.

Ш.Ундармаа

tsag.mn

Ц.Шинэбаяр: Ц.Нямдорж олигархиудын орцны жижүүр хийж байгаа юм биш үү
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Үүдний жижүүр Нямдорж нь л гэхэд сая сая долларуудаар байшин босгосон дүхийж байхад ард нь байгаа эзэд нь яаж байдаг гэсэн үг вэ???????????????????????????

2012-04-12 | 15:10:18 | 202.131.225.226 |

Мэдээ
Гадаад мэдээ
Видео