Тиймдээ ч өдийг хүртэлх таван жил гаруйн хугацаанд зогсолтгүй уран бүтээл туурвиж, амралтгүйгээр ажилласныхаа үр шимээр хүчирхэг хамтлаг болж чадсан. Урд хожид хэзээ ч байгаагүй гурван өөр өнгө төрх бухий шинэ содон бүхний илэрхийлэл болсон “Киви” хамтлагийг хэвлэлийнхэн “Интернациональ” хамтлаг ч гэж нэрийддэг. Яах аргагүй орчин цагийн рок попт “гол дүр” болсон “Киви” хамтлагийн гишүүн Б.Намуунааг бид “Гол дүр” буландаа урьсан юм.

КИВИ ХАМГИЙН АМТЛАГ тэр хамгийн секси

ТҮҮНИЙГ СГЗ Д.УХНАА ГУАЙН ЗЭЭ ОХИН ГЭДГИЙГ ИХЭНХ ХҮМҮҮС МЭДНЭ.

… урлагийн гэр бүлд төрж өссөн, эмээ өвөөгийн эрх бяцхан охин хар багаасаа л урлагт эргэлт…

Түүнийг СГЗ Д.Ухнаа гуайн зээ охин гэдгийг ихэнх хүмүүс мэднэ. Урлагийн гэр бүлд төрж өссөн, эмээ өвөөгийн эрх бяцхан охин хар багаасаа л урлагт эргэлт буцалтгүйгээр хөл тавьсан гэдэг. Айлын ганц охин, өвөө эмээгийн ганц зээ байсан бол одоо Намуунаа олон дүү нарын эгч болсон. Ээж аав, эмээ өвөөгийн хайранд умбаж өссөн ч эрх дураараа охин байгаагүй. Харин ч урлагийн хүмүүжил түүнийг хар багаас нь хэрсүү ухаанд сургасан аж. Үүндээ ч тэр сэтгэл хангалуун байдаг бөгөөд “гэр бүлийнхээ надад олгосон хүмүүжилд би маш их баярлаж явдаг” гэж хэлж байсан. Намуунаа анх таван настайгаасаа урлагт хөл тавьж ХБКоллежийн төгөлдөр хуурын ангид 14-н жил сурч төгссөн жинхэнэ мэргэжлийн төгөлдөр хуурч юм.

Үүний дараагаар СУИС-д мөн л төгөлдөр хуурч мэргэжлээр сурч байсан ч, бяцхан Намуунаа өсч том болохын хэрээр хүсэл сонирхол нь арай өөр зүйл рүү тэмүүлэх болсон гэдэг. Ингээд нэгдүгээр курсээсээ рок поп урлаг руу хөл тавьсан тэрээр төдөлгүй “Киви” хамтлагийн бүрэлдэхүүнд багтсан түүхтэй. Тэр хэлэхдээ “Миний амьдрал, уран бүтээл өвөөтэй минь салшгүй холбоотой” гэж байсан. Үнэхээр ч бяцхан охин өвөөгөө дагаад урлагийн байгууллагуудаар явж, тайзнаа тавигдсан бүх л концерт, жүжгийг алгасалгүй үзэж байсантай холбоотой. Тэр тусмаа Д.Ухнаа гуай зээ охиноо дагуулан дуурийн театрт балет үзүүлж, сонгодог урлагийн амт шимтийг мэдрүүлсэн нь цаанаа л учиртай. Гэр рүүгээ харих замдаа яг л балетын бүжигчид шиг эргэлдэн бүжиж, тэдэн шиг болох хүсэлдээ автан явдаг байснаа Намуунаа дурсаж байсан. Тэр багадаа тун сэргэлэн “галзуу” охин байжээ. Цэцэрлэгт байхаасаа л дуу бүжгийн тэмцээнд оролцож, зуслан явсан ч бүлгийн дарга хийж, ангийн даргаар сонгогдож байсан гээд нийгмийн идэвхтэй байв. Харин том болоод нэртэйгээ адилхан намуухан болсон гэж байсан. Эх үрсийн баяраар өвөө эмээгээсээ бэлэг авдаг уу? гэж түүнээс сонирхсон юм. “Хүүхэд байхдаа хамгийн сайхан бэлгийг өвөө эмээгээсээ авдаг байлаа. Одоо яаж дүү нартайгаа зэрэгцээд бэлэг авах вэ дээ. Харин энэ дашрамд дүү нартаа болон ээждээ эх үрсийн баярын мэнд хүргэе”. Бяцхан Намуунаа төрсөн өдрийн баяраа тэсэн ядан хүлээдэг байжээ. Түүний хувьд хамгийн сайхан бэлэг бол өөрт нь маш хэрэгтэй байсан зүйлээ авах. Гэхдээ өөрийг нь баярлуулах гэж өгсөн бүх л бэлгийг сайханд тооцдог гэж байсан юм.

ТОМ ШАГНАЛЫН ЭЗЭН

Намуунаа таван настай байхдаа “Бяцхан эстрадын дуучин”тэмцээнд оролцож хүрэл медаль авч байсан нь түүний анхны шагнал байв. Сургуульд орсноосоо хойш Испани улсад болсон өсвөрийн төгөлдөр хуурчдын тэмцээнд хоёрдугаар байранд орж байжээ. Үүний дараагаар Парис хотноо ОУ-ын хүүхдийн өсвөрийн төгөлдөр хуурчдын тэмцээнд оролцож Гран при шагналыг авч байсан аж. Шагнал авчихаад Монголдоо ирэхэд улсаас түүнийг “Авьяас” алтан медалиар шагнаж байжээ. Бусдаас арай л өөр Намуунааг багад нь үеийнх нь хүүхдүүд гоочилж шоглодог байсан эсэхийг түүнээс асуухад “Аз болж надад ёстой тийм зүйл тохиолдоогүй. Би маш олон найзтай байсан. Олон хүмүүсээр хүрээлүүлдэг байсан болохоор тэр дундаа харин ч их нэр хүндтэй байсан” гэж хариулсан. Хүүхэд насныхаа хамгийн сайхан дурсамжтай үеэ тэр бидэнтэй ийн хуваалцсан юм.

ДЭГЖИН…

Намуунаагийн хувцаслалт, стиль имижийг сүүлийн үед олон охид даган дуурайх болсон. “Киви”-гийн охид гурван өөр зүс царай шигээ өөр өөр сонирхол, стильтэй охид. Хэн нэгний зөвөлгөөг дагах биш өөрт таалагдсан хувцсаа тэр сонгож өмсдөг. Ихэвчлэн бие барьсан, дэгжин хувцас өмсөх дуртай Намуунаа LV брэндээр гоёх дуртай. Гоо сайхны тал дээр Эрдэнэсувд гэдэг бүсгүйгээр нүүрээ будуулдаг бол “Vidal” салонд үсээ даатгадаг аж. Намуунаа хамтлагийнхаа хоёрыг бодвол төрөлхийн буржгар үстэй болохоор зарим үед нэг их янзлуулах шаардлагагүй, угаагаад л болчихдог аж. Бас Укагаас нэлээн зөвөлгөө авдаг гэсэн шүү.

“КИВИ” БОЛОВСОРЧ ДУУСАХ БОЛООГҮЙ

“Киви” хамтлагийг бусад хамтлагтай харьцуулахад өндөр зохион байгуулалттай, диктатуртай хамтлаг гэдэг. Мэдээж тэр онцлогоороо рок попын хатуу ширүүн “амьдралд” удаан оршин тогтнож байгаа. Нөгөө талаар энэ бүхэнд охид дасан зохицоход амаргүй л байсан байх. Намуунаагийн хувьд энэ тал дээр харин ч бэрхшээлтэй байгаагүй гэсэн. Учир нь тэр ХБКоллеж хэмээх урлагийн том сургуульд мэргэжлээс гадна урлагийн хүн ямар байх ёстойд суралцсан. Хүүхдийг багаас нь тэвчээр хатуужилтай болгож, биеэ даахад сургадаг гээд эндээс их зүйлийг сурсан болохоор Намуунаа үргэлж сургуулиараа бахархаж явдаг. Хамтлагийн хувьд ачаалалтай ажилладгаа тэр хүлээн зөвшөөрч байсан. Гэхдээ тэр бүхнийг багаасаа мэдэрч хүмүүжсэн болохоор түүний хувьд огтхон ч хэцүү байгаагүй гэж байсан юм.

Алдарт Наоми Кэмблийг “хар сувд” хэмээн нэрийддэг шиг Намуунаа бол энэ цаг үеийн урлагийн ертөнцийг авъяас, гоо үзэсгэлэнгээрээ чимж яваа нэгэн. Гэхдээ тэр амжилтандаа ханаж цадан, хойш суугаагүй. Тэр хэлэхдээ хамтлагаа урлаг хэмээх “сургуульд” сурч яваа, одоо дөнгөж 6-р ангид орж байгаа сурагчид гэж хэлж байсан. Зургаан жилийн турш сурч яваа “Киви”-гийн “исгэлэн” охид урлагийн “сургуулийг” төгсөх болоогүй. 10-р ангиа төгсөнө. Цаашаа дахиад “их сургуульд” сурна гэж байсан. “Киви” хамтлагийн проект бол маш шинэлэг санаа байсан. Тийм ч учраас бид өөрсдөөрөө биш харин багшаараа бахархдаг”

НАЙЗ ЗАЛУУ ба Дурлал

“Киви”-гийн охид эрчүүдтэй нэр холбогдож, хайр дурлалын сенсааци үүсгэх тал дээр харин ч “томоотой” гэгддэг. Бас болоогүй, продюссер Б.Ангирмаа хатагтайг тэдэнтэй хатуу гэрээ хийж, хүнтэй сууж хүүхэд гаргахыг хориглодог гэх мэдээлэл нэг бус удаа хэвлэлд гарч байсан. Намуунаагийн хэлснээр тэд одоо дөнгөж 6-р ангийн хүүхдүүд юм бол сургуулиа төгссөөр байтал 10 гаруй жилийн дараа гэрлэх тухай бодож эхлэх нь ээ. Үүнийг ч Намуунаа үгүйсгээгүй юм. Гэхдээ энэ бол хошигнол байлаа. Мэдээж тэдэнд хайр дурлалын асуудал нээлттэй. Гэхдээ урлагийн төлөө ихэнх цагаа зарцуулж, зорьсон зорилгодоо хүрэхийн тулд хувийн амьдралаа хойш тавиад байгаа аж. Нэгэн үе Намуунааг Д.Болдын клипэнд тоглосон Билгүүн гэдэг залуутай үерхэж байгаа хэмээн хэвлэлүүд тэдний хамтдаа авхуулсан фото зургийг ч нийтлэж байсан. Гэхдээ энэ бүхэнд Намуунаа одоо хэр нь хариулт өгөөгүй. Энэ талаар тодруулахад тэд ХБК-д хамт сурч байсан багын найзууд. Гурван жилийн өмнө нэр холбогдож байснаас өөр зүйл байхгүй аж. Түүний ойрын зорилтонд гэрлэх бодол байхгүй. Одоо бол тэр найз залуутай. Хайр дурлалаас болж хамтлагаа орхин хувийн амьдралаа сонгох болов уу гэдгийг нь сонирхсон юм. Харин Намуунаа энэ тал дээр сэтгэлийн хөдөлгөөнөөр хандахгүй гэж байлаа. Хамтлагийн ажил, хувийн амьдрал хоёроо ялгаж салгана, тэгээд ч хамтлагийнхаа зорьсон зорилгод хүрсэн цагтаа хувийн амьдралдаа анхаарна гэсэн юм.

ТӨГӨЛДӨР ХУУРЫН ТОГЛОЛТ ХИЙНЭ

Түүнд үе дамжсан төгөлдөр хуур бий. “Намайг төрөхөд л гэрт маань байсан тэр төгөлдөр хуурыг би л тоглож элээх хувьтай байсан юм шиг ээ. Манай ээж эгч хоёр төгөлдөр хуур тоглодог байсан боловч цааш нь үргэлжлүүлээгүй орхисон байсан. Би одоо ч төгөлдөр хуураа тоглодог. Тас хар өнгөтэй “Лира” гэдэг Оросын төгөлдөр хуур бий. Одоо хэр нь цоо шинээрээ гялалзаж байгаа. Би төгөлдөр хуурандаа маш их хайртай” Түүний мөрөөдлүүдийн нэг нь төгөлдөр хуурын тоглолт хийх. Олон жил сурч эзэмшсэн мэргэжлийнхээ үр шимийг харуулж, найз нөхөд, эцэг эх, хамаатан садандаа, өөрийг нь сонсохыг хүсдэг хүмүүст зориулж тоглолт хийхийг тэр хүсдэг. Биелэж болох мөрөөдөл учраас хэзээ нэг өдөр биелүүлнэ гэж байсан. Тайзан дээр дуулах, төгөлдөр хуурынхаа ард суугаад тоглох хоёрт шал өөр мэдрэмж төрдөг болов уу. Энэ талаар түүнээс асуухад санал нэгдэж байсан. Төгөлдөр хуурын ард суугаад тоглоно гэдэг дуулахаас хэцүү, гэхдээ маш гоё мэдрэмж төрдөг гэж байсан. Бас дуулаад тайзан дээр бүжиглэж байхад их том кайф авдаг аж.

ХАЛУУХАН БҮСГҮЙ….

“Киви”-гийн охидыг яг л тайзан дээр, клипэнд гардаг шигээ халуухан, секси бүсгүйчүүд гэж ханддаг эрчүүд байдаг. Яг үнэндээ тэд харин ч даруу бүсгүйчүүд. “Гэхдээ тайзан дээр тэс ондоо хүн болж хувирдаггүй. Тэнд бас л миний зан араншин байгаа”. Тэгэхээр Намуунааг нэр шигээ намуухан бас халуухан бүсгүй гэж тодорхойлж болох юм. Ихэмсэг зан эмэгтэй хүнийг чимдэг гэдэг ч зарим фенүүд нь Намуунааг хэтэрхий ихэмсэг, их зантай гэдэг. Энэ тал дээр тэр санал нийлээгүй. Хэрвээ тэгж харагддаг бол алдаагаа засъя гэж байсан юм.

Ийнхүү цаг үргэлж хөдөлмөрлөж байдаг “Киви” хамтлагийн гишүүн Б.Намуунтай ярилцсан цөөн хором өндөрлөсөн юм. Мөрөөдсөн бүхэн нь биелэх болтугай. Чамд амжилт хүсье!

soronz