Энэ машин Монголыг талцуулж, монголчуудыг хагалан бутаргаж байгаа нь нууц биш. МАН ба цагдаа нар гэсэн харъяаллыг өөрийн мэдэлд байдаг шүүхийн хүчээр зориудаар бий болгон, нөгөө талд нь АН ба шүүгчид гэсэн хүрээлэл үүсгэн тоглолтонд ороод байна. Ерөнхийлөгч Ц.Элбэгдоржийн УИХ-ын сонгуулийг угтсан төлөвлөгөө гэж үүнийг нэрлэж болно.

Ерөнхийлөгч хувь хүний цочмог зангаа гээж чадсан уу?

2009 оны Ерөнхийлөгчийн сонгуульд Ц.Элбэгдорж ялснаар монголчууд ардчилсан Ерөнхийлөгчтэй болсон. Гэвч ардчилсан Ерөнхийлөгч маань нийгмээ талцуулж, үл ойлголцлын уур амьсгал бүрдүүлнэ гэдгийг тэр үед хэн ч таамаглаагүй. Харин одоо Ц.Элбэгдоржийн “өшөө авалтад” нийгэм хэлмэгдэж, долдугаар сарын 1-ний үймээн улс төрийн ашиг хонжоо хайгчдын гол зэвсэг болж хувирав.
Ерөнхийлөгч, Ерөнхий сайдуудын хуулийн хүрээнд заасан эрх мэдэл, үүрэг хариуцлага хоорондоо “чулуу шидэхэд” хангалттай гэж хэлж болохоор ялгаатай. Тийм ч учраас өнөөг хүртэл засаглалын маргаан дуусашгүй сэдэв болон өрнөж, Монгол Улс Ерөнхийлөгчийн засаглалтай байх ёстой юу, парламентийн засаглал нь илүү зохимжтой юу гэсэн асуулт үе үехэн дэгдсээр ирсэн. Тийм ч учраас энэхүү хамгийн эмзэг сэдвийг зоригтой хөнддөг хүн үгүй.
Харин өнөөг хүртэл бүх ард түмний олонхийн саналыг авсан, итгэл хүлээж сонгогдсоор ирсэн Ерөнхийлөгч нар эв нэгдлийг сахих үүднээс аливаа зөрчилтэй асуудалд болгоомжтой, алтан дундажийг барьсан байр суурьнаас хандаж ирсэн байдаг. Угаас Ерөнхийлөгчийн тухай хууль ийм байхыг шаарддаг билээ. Гэтэл Ц.Элбэгдорж хууль зөрчсөн гэж хэлж болохуйц тоглолт хийж, Ерөнхийлөгч хэмээх өндөр сэнтий, өргөн олны итгэлийг мартаж орхиод хувь хүний цочмог араншингаар асуудалд хандаж байгаа нь нийгэм талцах нэг шалтаг болов. Өөрөөр хэлбэл, үе үеийн Ерөнхийлөгч, УИХ, Ерөнхий сайд нарын хооронд байсан алхаж болохгүй шугам, хэмжиж болохгүй хил хязгаарыг Ц.Элбэгдорж эрээ цээргүй давж, эв нэгдлын хэлхээг тас татаж орхилоо. Ингэснээрээ Ц.Элбэгдорж ямар алдаа гаргаж байна вэ?

Элбэгээгийн явсан газар элдэвтэй

Ц.Элбэгдоржийн үед АН дээр, доргүй бужигнадаг байв. Даргаа авч шиднэ, хурал хаяна гэхчлэн бужигнахгүй шалтгаан, талцахгүй шалтаг гэж үгүй. Адаг сүүлд нь хор найруулж, хол санадаг мань эрийг Ерөнхийлөгчийн сонгуульд нэр дэвшүүлснээр өөрсдөөсөө холдуулсан. АН-ынхан туургаа тогтоохгүй тулалдаж, дээврээ тогтоохгүй дэрвэж байсан үе Ц.Элбэгдорж нам бус болсноор эцэслэж, тогтвортой төлөвшсөн улс төрийн хүчин болох шатандаа орсон. Тэгвэл одоо АН-аас төрсөн Ц.Элбэгдорж Ерөнхийлөгч болсноор монголчууд дээр, доргүй бужигнаж, дээвэр туургаа дэнжигнүүлэх болов. Батгана суусан газар балагтай гэгчээр Элбэгээгийн явсан газар элдэвтэй ажээ.
Сэтгүүлч Ц.Элбэгдорж Ерөнхийлөгч болмогцоо мэргэжил нэгтнүүдээ алагчлан үзэж, ялгаварлан гадуурхахаа ч мартсангүй. 2008 оны долдугаар сарын 1-нд болсон жагсаалыг тараах, хэв журам сахиулах ажлыг удирдсан цагдаагийн удирдлагуудыг шүүх ажиллагаанд МҮОНТВ, “Eagle” , С1 телевизүүдийг оруулж, бусдынх нь мэдээлэл олж авах эрхийг хаасан явдлаа хамгаалалтынхан “Дээрээс ирсэн тушаал” гэж тайлбарласан. Харин Ц.Элбэгдорж юу гэж тайлбарлах юм бол?

Ардчилал нэртэй анархизм гэж юу вэ?

Шүүгдэгчдийн өмгөөлөгчид “Нэгэнт биднийг байсан байгаагүй Ч.Амарболд, Ш.Батсүх, О.Зоригт, Г.Ганбаатар нарыг яллах нь тодорхой байна” гэсэн шалтгаанаар өмгөөлөл явуулахаас татгалзсан. Тэр шөнөдөө өмгөөлөгчдийг цагдан хорих гэж байна гэсэн мэдээлэл ямар ч хяналтгүй тарж амжсаныг бид мэднэ. Энэ байдалд Монголын өмгөөлөгчдийн холбоо шүүмжлэлтэй хандаж, өмгөөлөгчдийг шүүх хуралд оруулах гэж хүч хэрэглэн чирсэн явдлыг эсэргүүцэн, өнгөрсөн баасан гарагт ажлын хэсэг байгууллаа.
Энд болоод өнгөрсөн хоёр явдал нэг зүйлийг гэрчилнэ. Өмгөөлөгчдийг үнэхээр барьж хорих гэж байсан уу, эсвэл ийм оролдлого хийгээгүй байхад нь эл мэдээлэл нэг шөнийн дотор тархав уу? Үйл явдал хяналтаас гарахад ойрхон байгааг өмгөөлөгчидтэй холбоотой энэхүү мэдээлэл, түүний тарсан хурд харууллаа. Тэднийг шүүх хуралд хүчээр ч хамаагүй оролцуулаад, шүүгдэгчдийг шүүн таслах гэж яарсан нь мөн л дээрээс өгсөн заавар хэрэг үү? Тийм бол шүүх засаглал хэний гарт оччихоод байна вэ гэдэг асуулт гарч ирнэ. 2008 оны долдугаар сарын 1-ны үймээний үеэр амиа алдсан иргэдийн асуудлыг шийдэж, тэдний зүг буу онилсон этгээдүүдийг буруутган шүүх нь зүй ёсны асуудал. Гэвч эдүгээ энэ хэрэг нэгэнт хэмжээ хязгаараас хальж, МАН ба АН, шүүгдэгчид ба шүүгчид гэсэн хоёр туйлд хуваагдчихаад байна. Хэвлэлийнхнийг ч бас энэ хоёр туйлын дагуу ялгаварлан гадуурхаж эхэлжээ. Ингэхэд ноён Ц.Элбэгдорж, Д.Дорлигжав нар таван иргэний амийг хороосон буруутныг олж яллах гээд байна уу, эсвэл ард түмнээ талцуулж, дараагийн үймээний дэвсгэр хөрсийг бэлдэн, ардчилал нэрээр анархизм бий болгох үүд хаалгыг нээх гээд байна уу?

Н.Энхбаяр, С.Баяр, Ц.Мөнх-Оргил, Д.Лүндээжанцан тэгээд бас Ц.Элбэгдорж

Шүүх хуралд гэрчээр оролцохоор ирэхдээ Н.Энхбаяр нэгэн үнэн үгийг хэлэв. “Үймээн болсон өдөр жирийн иргэнээсээ эхлээд Ерөнхийлөгч миний бие хүртэл алдаа гаргасан. Энэ бүгдийг ойлгож асуудалд хандах ёстой. Үүргээ гүйцэтгэсэн цагдаагийн дөрвөн ажилтныг яллах нь асуудлыг төгс шийдэхэд тус болохгүй” гэж өгүүлсэн байдаг. Цагдаагийн дөрвөн ажилтныг ялласнаар үүний цаана жинхэнэ гэмт хэрэгтнүүд нь нуугдан хоцорч, үймээнийг өдөөн турхирсан намууд нь алгаа ташаад үлдэх боломж бүрдэнэ гэдгийг ч тэрбээр онцолсон. Ингэхэд тэр турхирсан намууд гэдэгт хэн харъяалагдах вэ?
МАН-ынхан өөрсдийнхөө байрыг галдан шатааж, сонгуульд байгуулсан ялалтаа үймээн болгож хувиргахгүй нь лав. Тэр өдөр юу болсныг бүгд харсан.
БНН-ын Б.Жаргалсайхан, АН-ын гишүүнчлэлд багтах болсон О.Магнай, Ж.Батзандан, АН-ын Ц.Элбэгдорж нар талбай дээр үймээн дэгдээгчдийн дунд уухайлан орилж, гараа зангидан зогсож байх түүх бий.

“Eagle”, С1 телевизээр ярилцлага өгч суусан АН-ын хоёр ч эмэгтэй гишүүн “Залуус аа, би эндээсээ шууд талбай руу явлаа. Тэнд болж байгаа жагсаалд оролцохоор явлаа” хэмээн үзэгчдийг өдөөн турхирч, уриалж байсан бичлэгийг бүгд үзсэн. Эцэст нь үймээн дээд цэгтээ хүрч, олон арван машин шатаж, МАН-ын байр дайралтанд өртөн, хүн хохирч эхлэхэд Ц.Элбэгдоржоос эхлээд цагийг нь олж бултсан улс ч энд бий. Харин тэдний өдөөн хатгалга, турхиралтаар иргэд болон цагдаа нар хоорондоо нүдэлдсээр үлдсэн билээ. Одоо ч яг иймэрхүү байдлаар ард түмэн болон тэднийг хамгаалдаг цагдаа нар хагаралдаж, дундаас нь улс төрийн хонжоо хайгчдын золиос болж байгаа нь үнэн. Нэгэнт шүүхэд гэрч хэрэгтэй бол, эл үймээний буруутныг үнэн зөв тогтоох гэж байгаа бол С.Баяр, Ц.Мөнх-Оргил, Д.Лүндээжанцан нар дээр нэмээд Ц.Элбэгдорж, О.Магнай, Ж.Батзандан, Б.Жаргалсайхан нарыг гэрч, холбогдогчоор дуудъя.

Тэр үед сонгуульд өмнөхийг бодвол цөөн оноогоор ялагдал хүлээчихээд, багтарсандаа гудамжинд гүйн гарч, жагсаал үймээнд олон нийтийг уриалан турхирч, хоолойгоо цахиртуулан хашгирч явсан Элбэгээ өнөөдөр өөр болжээ. Ерөнхийлөгчийн суудалд тухалсан түүнд албан тасалгааны цонхоор амьдрал сайхан харагдах болж. Хэдэн муу цагдаа нь хэргийн золиос болон үзэгдэж, МАН яаж ч чирч, чичилж болох “гэрч” мэт бодогдон, ард түмэн амных нь хөдөлгөөнөөр захирагддаг албат мэт санагдаж, шүүх прокурорынхон хуруу хүүхэлдэй мэт харагддаг болоо юу?
Шударга байцгаая л даа, Элбэгээ! Ерөнхийлөгч хэмээх эв нэгдлийг сахигчийн алба эрхэм анд Элбэгээгийн хувийн араншинд зохицохгүй байгаа нь энэ үү?
Лидер байх дуртай, лидер болох хүсэлтэй хүнд хууль эрх зүйн талаасаа аргагүй л зохимжгүй алба бол Ерөнхийлөгчийн суудал. Зохихгүй байгаа бол зодог тайлчих амархан л даа, уг нь.
Дэвж, шавж, дэвхэрч үсчээд, улс төрийн хувийн болон хувьсгалын өш хонзон, өвөр зуурын амбицаа барьж чадахгүй бачуураад, улс төр хийж ундууцаад байдаг хүнд Монгол Улсын Ерөнхийлөгчийн суудал ахдана л даа. Эсвэл Ардчилсан Ерөнхийлөгч гэхээрээ өөр байдаг юм уу?

Р.Эмүжин

sonin.mn

Ц.Элбэгдоржийн машин
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
элбэгдөрж муу пизда гэмт хэрэгтнүүдээр ööрийн багийг бурдуулсэн байна тэр хурц тэр дорлигжав баттулга энхбаатар 1,3 жилийн дараа энхбаярийн араас орох болно.

2012-04-18 | 02:39:01 | 89.144.192.224 |

Мэдээ
Гадаад мэдээ
Видео