гээд баяр баяр давхацсан хаврын тэргүүн сарын шинийн наймны энэ сайхан өдөр Архангай аймгийн НАМЗХ-ны дарга, Архангай аймгийн ЗДГТ-ын Нийтлэг үйлчилгээний газрын дарга Базарын Отгонбаяртай ярилцлаа. Монгол эр хүний хийморлиг, төлөв төвшин, ноён нуруутай сайхан шинжийг агуулсан энэ залуу ажил үйлс, ааль байдлаараа магтагдаж явдаг нэгэн.

Хаврын тэргүүн сарын наран ээсэн энэ сайхан өдрийн мэндийг хүргэе. НАМЗХ-ны салбар зөвлөлийн дарга нартай хийж байгаа ярилцлагын “Баясгалан” хэмээх усан луу жилийн анхны зочин болсонд баярлалаа. Сайхан хаваржиж байна уу? Хангай нутгаар цаг агаар хир байна вэ?

- Билгийн тооллын ХХYII жарны “Баясгалан” хэмээх усан луу жилийн тэргүүн сартай золгосны мэндийг МАН-ын анхны үүр байгуулагдсан голомт нутаг, МАН-ын анхны дарга Солийн Данзангийн төрөлх нутгийн НАМЗХ-ны мянга мянган залуусынхаа нэрийн өмнөөс болон хувиасаа Монгол орны өнцөг булан бүрт суугаа үе үеийн эрхэм журмын нөхдийнхөө амрыг эрэн мэндчилж байгаадаа баяртай байна. Улиран одож байгаа туулай жил Архангайчуудын маань хувьд амжилт бүтээл дүүрэн, зунаа зуншлага сайхан, өвөлдөө өнтэй, хүн ам өсөн нэмэгдсэн жил болж өндөрлөлөө. Энэ хавар аймгийн хойд сумдаар цас их орсныг эс тооцвол малчдын хотонд төлийн дуу хангинаж онцгой сайхан жил болно гэхэд эргэлзэхгүй байна.

Өнгөрсөн онд аймгийн НАМЗХ-ноос олон арга хэмжээ зохион байгуулсан тухай мэдээлэл авсан. Үүнээс онцолж нэрлэвэл:

- Өнгөрсөн оны эхээр МАН-ын бат илэрхийлэл шинэчлэлийн аяны хүрээнд намын болон холбооны үйл ажиллагааг сурталчлан эгнээндээ шинээр элсэх хүсэлтэй 1000 гаруй залуусаар бүл нэмлээ. Мөн ерөнхий боловсролын сургуулийн ахлах ангийнхан, МСҮТ, Багшийн сургуулийн оюутнууд, аймагт ажиллаж байгаа нийт залуусынхаа дунд хүмүүнлэгийн ажил, сургалт, АХА, Эссэ бичлэг, волейбол, дэвжээ зэрэг тэмцээнийг зохион байгуулж, аймагтаа хангайн бүсийн намрын академи, бүсчилсэн сургалт чуулга уулзалтуудыг шат дараалалтайгаар зохион байгууллаа..

“Алтан сарнай” арга хэмжээ сайхан болсон уу? Энэ жилийн онцлог нь юу байсан бэ?

- Өнгөрсөн жилийн Алтан сарнайг урд жилээс бүр сайхан болгохыг хүн бүр эрмэлзсэн. Учир нь улс төрийн ууган хүчин МАН-ын 90 жилийн сүүл, УИХ, орон нутгийн ИТХ-ын хаалт болсон он дуусаж байгаа. Аймгийн МАН-ын дэргэдэх НАМЗХ, НАМЭХ, Зүүний хүчний холбоо хамтран зохион байгуулж, 8 номинацид өрсөлдөж буй салбар салбарын шилдэг 20 гаруй залуус материалаа ирүүлснээс 8 залууг санал асуулгаар Алтан сарнайн эздийг тодоруулсан. Онцлог нь гэвэл аймгийн МАН-ын хороо залуустайгаа хамтран 2 дахь жилдээ сум болгонд Алтан сарнай наадмыг өргөн дэлгэр тэмдэглэдэг болсон явдал юм.

Аймгийн НАМЗХ-ны тэргүүлэгч, сумдын дарга нар холбоогоо гэсэн чин сэтгэлтэй, хариуцлагатай, чадвартай залуус бий гэж хүмүүс ам дамжин магтах юм билээ. Ийм баг, хамт олныг хэрхэн яаж бүрдүүлсэн бэ?

- Андууд маань МАСЗХ-ныхоо түүхийн нэгэн үед ажиллаж, дүгнэж дараагийн бас нэгэн хуудсыг бүтээлцэж явна. Уламжлалт болон шинэ арга барилаар ололт амжилтыг хүлээж хүрэхийн тулд хоёргүй сэтгэлээр зүтгэж яваа холбооныхоо мянга мянган гишүүд, салбар холбоод, тэргүүлэгчид болон хамтран ажилласан хүн болгонд энэ хорвоогийн сайн сайхан бүхнийг хүсэн, ерөөл ерөөлийн дээжийг өргөн баярлалаа гэж хэлье.

Ирэх жил энэ багаараа ямар ажил хийх төлөвлөгөөтэй байна вэ?

- НАМЗХ-ны дэвшүүлэн тавьсан бодлого, зорилт болон залуусаа мэргэжил сонирхлоор нь хөгжүүлж, мэдээ мэдээллээр сурч боловсроход нь хангаж, цаашлаад хоршооллох хэлбэрт оруулж, аж ахуй эрхэлж, амьдралаа төвхнүүлэхэд нь залуу хүн бүрийг ажилтай байх талаар төлөвлөсөн ажлуудыг хийнэ.

Архангай аймаг бахархах түүхтэй, бахдам сайхан байгалтай, Монголын үзэсгэлэнтэй сайхан нутгийн нэг билээ. Манай холбооны залуус нутаг орныхоо энэхүү сайхан онгон дагшин байдлыг байгаагаар нь хадгалах үйл ажиллагааг зохион байгуулсан уу?

- Миний нутаг үзэсгэлэнтэй уул ус, өнө эртний түүх соёлоороо дэлхийд гайхагддаг гэж боддог. Мөн өнгөрсөн зун Өндөр-Улаан сумын нутгаас Хүннүгийн үеийн хааны булш олдсонд сонордуулахад баяртай байна. Байгаль ээждээ бид үнэндээ мод тарихаас хэтрэхгүй юм даа.

Та төрийн ажлыг залгуулна, бас холбооны ажил гээд их завгүй байдаг байх. Гэр бүлдээ хэр цаг гаргадаг вэ? Гэр бүлээ танилцуулаач. Өөрийгөө хэр сайн аав гэж боддог вэ?

- Өглөө гараад шөнө ирнэ. Амралтын өдрөөр энд тэнд алба ажилтай гээд явна, буудалд байгаа хүн шиг л гэж эхнэр, ээждээ зэмлүүлнэ дээ, хөөрхий. Одоо ч эхнэр бид хоёр нийлээд 12 дахь хавраа үзэж байна. Эхнэр маань МУБИС-ийн салбар Архангай аймаг дахь Багшийн сургуулийн нягтлан бодогч Галбадрах гээд бүсгүй бий. Том хүү Билгүүн маань 2-р анги, бага хүү Ананд маань цэцэрлэгийн дунд бүлэгт сурдаг. Өрөмний өт шиг хүн бий.Инээв/ Аавын сайн мууг гэр бүл минь дүгнэнэ дээ.

Залуу гэр бүл хүүхдийнхээ хүмүүжилд хэрхэн анхаарах ёстой вэ?

- Би хоёр хүүхдээрээ төсөөлөхөд гэр бүлийн халуун дулаан уур амьсгал, аав ээжийн хайр халамж, эмээ өвөө, багш гээд энэ бүхнээс шалтгаалж сайн хүн болно.

Та энэ нутгийн хүү гэдгээрээ бахархдаг л биз. Аав ээж тань аль нутгийн хүн бэ? Бага насаа эргэн дурсаач.

- Энэ нутагт төрж Базарын гурав дахь хүү болон мэндэлсэн нь миний бахархал омогшил юм. Аав Базар маань Чулуут сумынх. Ядамсүрэн өвөө маань монголд анх удаа үнээг гурав саах, эрлийзжүүлэх ажлыг санаачилсан хүн. Нэгдүгээр ангид орох жил аав маань бурхан болсон. Үр хүүхдүүд болсон бид ээж Долгорсүрэнгээ бидний амьд бурхан гэж бодож зальбирч явдаг юм. Би дугуй түрж, тэвэг өшиглөн зүггүйтэж сургуульд орж, сайн мууг хольж явсаар 10 жил төгссөн. Амьдралын шаардлагаас болж 2 жил энд тэнд ажил хийж, амьдрал ахуйдаа нэмэр болох гэж явлаа.

Холбоонд хэдэн онд элссэн бэ? Юу таныг дуудаад энэ их гэр бүлийн гишүүн болгосон бэ?

- Оюутан байхын бидний хэсэг найзууд маань зүрх сэтгэлийн дуудлагаар МАСОХ-нд ажиллаж, үүнээс улбаалж МАСЗХ хэмээх айлын үүд хаалгыг 2004 онд татан орж, 2005 оноос одоог хүртэл бага хурлын гишүүнээр сонгогдон ажиллаж байна.

Сүүлийн асуултыг танд үлдээе.

- Өнгөрсөн, одоо, ирээдүйн залгамж чанарыг хадгалж, өнгөрсөн түүхээсээ сургамжлан, ирээдүйдээ зорилготой, итгэл төгс алхах залуу хүн бүрийн хийх ажил, зорьсон зорилго, үүрэг оролцоо нэн чухал билээ. Тиймээс залуус бид атгасан гар шиг эвтэй, ассан гал шиг өөдөө байж, ажил үйлсдээ манлайлагч болж, сайн сайхан гэрэлт ирээдүйг цогцлоохын төлөө зорьж зүтгэсэн тань бүтэж, хийморлиг цог золбоотой байхын билэгтэй ерөөлийг өргөн дэвшүүлье. Сайхан Монгол орноо хамтдаа хөгжүүлье залуусаа.

ЯРИЛЦСАН ИНДРА

Архангай аймгийн НАМЗХ-ны дарга Б.Отгонбаяр: Манай холбоо 1000 гаруй залуусаар бүл нэмлээ
Tweet
Bolod.mn