Э.Цолмонбаяр: Битүүн хурдан болоосой, эмээгийнхээ буузыг идэх юмсан

2012-02-21

“TV cocktail”-ийн жүжигчин Э.Цолмонбаяртай ярилцлаа.

-Сүүлийн үед хүмүүс Цагаан сарыг тэмдэглэхгүй байх санал гаргах нь олширчээ. Таны хувьд энэ баярын гол утга учир нь юундаа байдаг вэ?
-Цагаан сарыг тэмдэглэхгүй байна гэдэг чинь юу гэсэн үг вэ. Шинэ сар гарч, монгол ёсоор шинэ жил ирж байна. Уул усаа тахин шүтэж, идээ ундаа элбэг байхыг бэлгэдэн, тэр бүр уулзаад байж чаддаггүй ах дүүстэйгээ уулзаж, гэр хотлоор нь зочилж, заслаа хийлгэж, зам мөрөө гаргана гээд л монгол түмний бэлгэдэл, соёлыг харуулсан хамгийн чухал баяр шүү дээ. Харин зарим нь энэ баярын утга учрыг буруу ойлгоод, хэтэрхий сүр оруулаад байдаг нь зөв биш байх.
-Таны хувьд цагаан сараар авч байсан хамгийн мартагдашгүй бэлэг юу байв?
-Өнгөрсөн жилийн цагаан сараар нагац эгч маань надад хурган дотортой, торгон дээл, монгол цамц, гутал өгсөн. Тэр надад хамгийн мартагдашгүй бэлэг болсон бөгөөд анх удаа л Цагаан сараар дээл өмссөн юм даа.

-Та энэ Цагаан сарын бууз хийх ажилд оролцов уу. Гурил элдэх, мах хэрчих, чимхэх, эсвэл идэхийн аль үүргийг та хамгийн сайн гүйцэтгэж чаддаг вэ?
-Гурил элдэж, бас хийсэн буузыг хамгийн сайн амсаж чаддаг хүн дээ. Энэ жил харин бууз хийхэд оролцож чадаагүй. Одоо бол хурдан битүүн болоосой л гэж хүсэж байна. Эмээгийнхээ хийсэн буузыг очиж иднэ (инээв).

-Та шинийн нэгэнд хамгийн түрүүнд хэнийд очиж золгодог вэ?
-Эмээгээ хамгийн түрүүнд очиж золгодог.

-Би ерөөсөө л жүжигчин болох ёстой юм байна гэж хэзээ анх шийдсэн бэ?
-Бага байхдаа нэгэн кинонд тоглож байлаа, гэхдээ тэр үе энэ шийдвэрт нөлөөлж байгаагүй байх. Харин ээж минь хүүгээ жүжигчин болгоё гэж хүсээд, би СУИС-д элсэн орсон. Тэр үед л би жүжигчин болох ёстой юм байна гэж шийдсэн дээ.

-Кино урлаг танд юу өгсөн бэ?
-Би яг одоо л урлагийн сайхныг бас хэцүүг мэдэрч байна. Энэ агуу урлаг надад маш их урам зориг, эрч хүч, тэмүүлэл өгдөг.

-Харин та өөрөө кино урлагт юу өгсөн бэ?
-Үүнийг үзэгчид шүүж, цаг хугацаа л харуулна. Бид одоогоор кино урлагт өөрсдийн гэсэн өнгө төрх, стиль, санааг гаргах гэж зүтгэж байна, цаашдаа их зүйл хийх нь л бидний кино урлагт өгч чадах бүхэн.

-Жүжигчид яаж кино үздэг бол гэж гайхдаг юм. Жишээ нь, сэтгүүлчид бид юм уншихаараа үг үсгийн алдаатай хөөцөлдөөд байх талтай?
-Урлаг өөрөө хүнийг салахын аргагүй болтол нь дурлуулдаг увдистай аж. Миний хувьд аливаад бүх сэтгэл зүрхээ зориулан ханддаг учраас киног, ямар ч уран бүтээлийг дотор нь орж үздэг. Зарим нэг тааруу дүр, дүрслэлийг ингэсэн бол болох байж гэхчилэн дотроо шүүж, үнэхээр хэцүү, сайн дүрийг чадварлаг гаргасныг хараад хэрвээ би байсан бол яах бол гэж толиныхоо өмнө зогсоод дуурайх тохиолдол байдаг шүү.

-Жирийн үзэгч байх, өөрөө жүжиглэх хоёрын хооронд хэр том ялгаа байдаг бол?
-Маш их ялгаа бий. Намайг болоод бидний бүтээлийг үзэх гээд ирсэн хүмүүст дутуу, ядмаг зүйл үзүүлээд явуулна гэдэг хамгийн аймаар. Жишээ нь, бидний бодож боловсруулсан дүр, дүрслэл үзэгчдэд яг тэр хэвээр буухгүй байх тохиолдол бий. Энэ бүхэн уран бүтээлийн шаналанд хүргэдэг.

-Манайд кино шүүмжлэлийн салбар олигтой хөгжөөгүй болохоор шинэ бүтээлийн араас шүүмж гарах нь ховор. Ер нь ч байдаггүй. Тэгэхээр та бүхэн уран бүтээлийнхээ сайн, муу болсныг чухам яаж мэддэг вэ?
-Өөрсдөө үзнэ, бас хүмүүсийн амнаас ер нь андашгүй байдаг. Ер нь манайд өдгөө шүүмжлэлийн салбар ус агаар мэт хэрэгтэй байна. Чөлөөтэй нийгэм бий болсон учраас хүн бүр кино зохиол бичиж, найруулж, дөнгөж сурч байгаа оюутан залуус кинонд тоглож байгаа учраас урлагийнхны ярьдгаар “шатах” тохиолдол их байна. Хэрэв шүүмжлэгчид үнэн, зөвийг тунгааж байдагсан бол ийм зүйл болохгүйн дээр үзэгчид шинэлэг, сайн бүтээл хүлээн авах болно шүү дээ.

-Хэрэв таны амьдралаар Холливудын кино хийхээр болбол та өөрийнхөө дүрд ямар жүжигчин тоглуулах байсан бэ?
-Роберт де Ниро. Учир нь бид хоёрт адилхан зүйл их бий (инээв). Тэр хүн л миний амьдрал болоод зан чанарыг яг гаргаж чадна. Роберт их шударга, бас дайчин хүн. Би нэг ярилцлагыг нь уншиж байхад тэр ээжийгээ шүтдэг, нөхөрлөлийн төлөө юу ч хийж чадна гэж хэлсэн. Би ч мөн тийм.

-Та ер нь хэзээ өөрийгөө том хүн боллоо доо гэж бодсон бэ?
-Ээж маань “За миний хүү одоо сургуулиа төгсөж, сайхан ажилтай боллоо. Илүү ихийг хийнэ шүү, миний хүү. Хүүдээ итгэж байна” гэж хэлсэн тэр өдөр л би чинь том хүн болжээ гэж анх бодсон доо.

-Өнөөдрийн Э.Цолмонбаяр хувь хүн болж төлөвшихөд хамгийн их үүрэг гүйцэтгэсэн хүн хэн бэ?
-Мэдээж миний сайхан ээж, бас хэзээд дэргэд минь байдаг найзууд минь.

-Та яг одоогийнхоо карьерт хэр сэтгэл хангалуун байдаг вэ. 10 жилийн дараа жүжигчин Э.Цолмонбаяр юуг амжуулж, бас хэн болсон байгаагаар та төсөөлж байна вэ?
-Өнөөдрийн карьертаа зуун хувь сэтгэл хангалуун байдаг. Гэхдээ зүтгэж, мөрөөдөж байж нэг газар ирэхэд, цаана нь ахиад даваа бас олон зам байдаг нь жам юм. Би мөрөөдөл, зорилго, хичээл зүтгэлээ алдаагүй учраас ирээдүйдээ ч мөн адил сэтгэл хангалуун байдаг. Харин 10 жилийн дараа хэн болж, юу бүтээсэн байхыг минь цаг хугацаа л харуулна даа. Тэр үед би сайхан аав, хүний сайн хань болсон байна байх даа.

- Танд хавар болсныг юу хамгийн түрүүнд мэдээлдэг вэ?
-Бүсгүйчүүд хувцсаа нимгэлээд ирэхээр л хаврыг мэдэрч эхэлдэг дээ (инээв).

-Луу жилд та ямар зүйлийг амжуулахаар төлөвлөж байгаа вэ?
-Бид маш олон зүйл төлөвлөсөн. “TV Cocktail” нэвтрүүлгээ дахин хийж, бас нэг том уран бүтээлийн төсөл дээр ажиллаж байгаа.

-Та манай “Time”-ын уншигчдад хандан ирж буй усан луу жилийн мэндчилгээ дэвшүүлнэ үү.
-Луу бол тэнгэрийн амьтан учраас нийт монголчуудад маань ивээлээ их хайрлах болтугай. Монголчууд хотлоороо санасан бүхэн нь сэтгэлчлэн бүтэж, айл өрх бүхэн инээд хөөрөөр цалгиж, дүүрэн сайхан байх болтугай. Танай хамт олон болон уншигчдад аз жаргал, сайн сайхан бүхнийг хүсье. Сар шинэдээ сайхан шинэлээрэй.