Монголыг зарах мөрөөдөлтэй Г.Алтан банкны мөнгөөр сонгуульд үзэх нь

2012-01-13

Нэгэн үе ааш, ар хоёроороо бизнесийн салбарт гялалзаж явсан “Алтжин”-гийн Г.Алтан “САПУ” худалдааны төвөө шатааснаас хойш усанд хаясан чулуу мэт алга болсон. Гэвч саяхнаас бизнесийн салбартаа эргэн ирсэн тэрбээр бүр даварч улстөрд хөл тавиад байна. Улстөрд хөл тавихдаа бүр том алхаж, сонгуульд үзэх сурагтай.

МАН-ын нөлөө бүхий сайдын дэмжлэгээр улстөрд орсон тэрбээр экс амраг гэх “Мон Уран”-ы Б.Наранхүүтэй зэрэгцэн МАН-ын бага хурлын гишүүн болсон. Сонгуулийн тухай хуулийн 27 дугаар зүйлийн 4.1-д шүүхийн шийдвэрээр тогтоогдсон зээл, батлан даалтын болон бусад гэрээгээр хүлээсэн хугацаа хэтэрсэн өргүй байх, 4.2-т шүүхийн шийдвэрээр тогтоогдсон татварын өр төлбөргүй байх, 4.3-т ялгүй байх хэмээн заасан байдаг.

Гэвч “Мон-Уран”-ы Б.Наранхүү, “Алтжин”-гийн Г.Алтан хоёр шиг тэрбум тэрбумаар нь өр тавьж, одоо хэр нь шалгагдаж байгаа хүмүүс цөөхөн. Харин эднийг МАН улстөрд шингээснээс үзвэл Монголын улстөр, цаашилбал УИХ аль хэдийнэ хөрөнгөлөг гэмт хэрэгтнүүдийг орогнуулж, шүүх, цагдаагийнхнаас хамгаалдаг газар болсон нь батлагдлаа. Цагтаа Г.Алтан, Б.Наранхүү нартай нийлээд дансны аргаар гэмт хэрэг хийгээд явж байсан нөхөд өнөөдөр УИХ-д сууж л байна.

Хамгийн гол нь Г.Алтанг төр түшилцээд явна гэхэд итгэх хүн даанч гарахгүй. Нэг удаа “Би Ерөнхий сайд болчих юм бол Монгол Улсыг зарах юмсан.

Үүн шиг амархан юм байхгүй юм байна” хэмээн салсан нөхөр С.Жамъяансүрэндээ бардамнаж байсан тухай өгүүлсэн байдаг. Тэгэхээр улстөрд орох эхний алхмаа хийчихээд байгаа Г.Алтан Монгол Улсыг зарж баяжихын тулд УИХ-д өрсөлдөж байгаа бололтой. Худалдааны төвөө шатаасан Г.Алтан олон түрээслэгчийн амьдралаар тоглосон. Өрөө төлөлгүй зугтааснаас нэг хэсэг нь орлогын эх үүсвэргүй болж, өр зээлтэй зарим нь гудамжинд гарсан. Харин одоо Г.Алтан нэгэнт банкны эзэн болсон учраас хохирлоо барагдуулж чадаагүй түрээслэгчид өрөө нэхвэл яасан юм бэ.

Сонгуульд үзэх бодолтой байгаа бол хэл амгүй тэр мөнгийг нь гаргаад өгчих биз. Г.Алтангийн хувьд таван жилийн өмнө хоёр тэрбум төгрөгийн өртөгтэй “САПУ” худалдааны төв шатсаны дараа дампуурч, 700 гаруй түрээслэгчийнхээ бараа, таваарын өрөнд унасан. Үүнээс болж “Алтжин” групп худалдаа, барилга, зам тээвэр, шатахуун түгээх станц, архи, пивоны үйлдвэрлэл, газар тариалангийн чиглэлээр үйл ажиллагаа явуулдаг 64 охин компаниа зарсан байдаг.

Энэ үед Г.Алтан “Алтжин” шатахуун түгээх станцуудаа “Жаст” группт, архины үйлдвэрээ зарим нэг бөхөд зарж, хохирогчдынхоо мөнгөний багахан хэсгийг барагдуулсан гэдэг. Хэдэн тэрбумын өрөнд орсны дараа хэл ам ихтэй зарим хохирогчдийг бага сага мөнгөөр хуурчихаад Солонгос руу зугтаж байсан Г.Алтан өнөөдөр банк худалдаж авах хэмжээний хөрөнгөтэй болоод иржээ.

Тодруулбал Г.Алтанг “нэгэн” банкны 51 хувийг авсан талаар шивэр авир хийж байна. Түүний хувьд банк худалдаж авахад ганц мөнгө байгаад хангалтгүй байсан. Харин нөлөө бүхий эрхэм сайд Г.Алтангийн сөнөсөн бизнесийг сэргээж, дараа нь улстөрд оруулж байгаа аж. “Жаст” группийн ерөнхийлөгч Ш.Батхүү, “Алтжин”-гийн Г.Алтан нарын наймааг учир мэдэх хүмүүс олон янзаар тайлбарладаг.

Нэг хэсэг нь Ш.Батхүү Г.Алтангийн сайд хамсаатны дарамтад орсон гэдэг бол нөгөө хэсэг нь тэдний дунд эртний наймааны үлдэгдэл байсан гэх юм билээ. Тухайлбал Г.Алтан шатахуун түгээх станцаа 14 тэрбум төгрөгөөр Ш.Батхүүд зарсан гэх яриа бий. Тухайн үед Ш.Батхүү одоогийнх шиг бэлжээгүй байсан тул тал мөнгийг нь төлсөн гэнэ. Тиймээс шатахуун түгээх станцын наймааны үлдэгдлийг “нэгэн” банкны 51 хувьтай тулгасан байх магадлал өндөр байгаа аж. Ш.Батхүү саяхан хэвлэлд өгсөн ярилцлагадаа Г.Алтантай хамтарч бизнес хийж эхэлснээ олон нийтэд зарласан.

Гэхдээ Г.Алтан ямар ч эрийг өөрийн болгож дөнгөдөг уран аргатай эмэгтэй. 50 хэдийнэ гарсан тэрбээр Солонгос яваад ирэхдээ гоо сайхны косметик хагалгаанд орж, төрөл арилжсан мэт болсон тухай зарим сайтад өгүүлж байлаа. Иймдээ ч олон эрийн өвөр дамжсан гэгддэг Г.Алтан бизнесээ босгохын тулд дахин залуужсан бололтой. Түүний экс нөхөр С.Жамъяансүрэнгийн ярьснаар Г.Алтан өөрөөс нь өмнө арав гаруй хүнтэй хамт амьдарч байсан гэнэ билээ.

Анхны эр хүн нь Жанел гэдэг араб хүн байсан бол дараагийнх нь АУДС-д багшилж байсан Энхтөр, Эдвард, МИАТ-ийн захирал асан Б.Эрдэнэбилэг, Байгаль орчны Төрийн нарийн бичгийн дарга асан Адъяа, Мэргэжлийн хяналтын Ерөнхий газрын дарга асан Ц.Шийрэвдамба, С.Жамъяансүрэн, “Мон-Уран”-ы Б.Наранхүү гээд л хөвөрнө. Г.Алтангийн эдгээр сонголтоос харахад зөвхөн хайр сэтгэлийг урьтал болгодоггүй аж.

Ашиг сонирхол, албан тушаал түлхүү байгаа нь анзаарагдаж буй биз ээ. Тэгэхдээ Г.Алтанг нялх амраг Б.Наранхүүтэйгээ дотносоноос хойш нохойн замаар орсон гэдэг юм билээ. Тэдний анхны том луйвар нь алдарт “Номаранг”-ийн хэрэг. Г.Алтан, Б.Наранхүү нар эл хэргийг Манлай уяач Б.Билэгдэмбэрэл болон түүний эхнэртэй хамтран үйлдсэн байдаг. Г.Алтангийн хувьд Б.Наранхүүгээс 20 насаар эгч бол уяач Б.Билэгдэмбэрэл эхнэрээсээ мөн л 20 насны зөрүүтэй байв. Б.Билэгдэмбэрэлийн эхнэр нь зохиолч Ч.Лодойдамба гуайн хүү, Солонгосын Элчин сайд асан Л.Галбадрахын анхны гэргий байсан. Ингээд гэр бүлийн найзууд Солонгосын “Дэү”, “Эл Жи” компаниас “Номаранг” компаниар дамжуулан 120 сая ам.долларын зээл авсан ч эргэж төлөлгүй гүрийсээр хэргийг хав дарсан гэгддэг. Тухайн үед Г.Алтан МАХНын томоохон санхүүжүүлэгчдийн нэг байсан тул солонгосчуудаас 120 сая ам.доллар залилж, намынхаа буянаар нам дарсан түүхтэй.

Одоо Г.Алтан Нүхтэд барьсан том том тансаг харшууддаа түшиж тулдаг бизнес, улстөрийн түшээдээ суулгаж, хаяа залган амьдарч байна. Ямартай ч янаг явдлаараа алдаршсан Г.Алтан, луйварчин хулгайчаараа алдартай “МонУран”-ы Б.Наранхүү нар сонгуульд үзэж, хүүхэд нохойн доог болох вий дээ. Билгийн нүд нь хаагдчихаагүй л бол Г.Алтан, Б.Наранхүү нарыг Монголын ард түмэн хэзээ ч сонгохгүй нь ойлгомжтой.

Т.Энхмөнх Ogloonii sonin