За нэг ингээд эхлэх юм бол райм холбосон хип хоп дууны үг болох юм шиг байна. Өнгөрсөн долоо хоног улс төрийн хүрээнд их ХАЛСАН гэж хэлж болох үйл явдлууд дүүрэн байлаа. Хамтарсан засгийн газар хагацаж салах нь гэсэн бор шувуу нисээд өндрөө ч авч амжаагүй байтал АН-ын дарга, Монгол улсын тэргүүн шадар сайд Н.Алтанхуяг эрийн цээнд хүрсэн хоншоортой нам нь Засгийн газраас гарах нь зөв гэсэн шийдэлд хүрснээ мэдэгдлээ. Энэ асуудлыг АН-ын ҮЗХ эцэслэн шийдвэрлэнэ. Яг энэ мэдэгдлийн өмнөхөн Зам тээвэр, барилга хот байгуулалтын сайд Х.Баттулга засгийн газрын хуралдаан дээр танхимын нөхөддөө "Өөрсдөө тохилог дулаахан байранд тухалчихаад, ард түмний амьдрах орон сууцны асуудал ярихаар нүүрээ буруулчихдаг хүмүүстэй хамтарч байхын оронд таръя" гэсэн утгатай маргаан өрнүүлсөн гэдэг. АН-ыг хамтарсан засгийн газраас гараасай гэж хүсч байсан гишүүд, нам доторх бүлэглэлүүд энэ асуудалд нааштай хандаж байгаа. Тэгэхээр МАН ч магадгүй дараагийн сайд нарынхаа товыг бэлтгэж эхэлсэн нь дамжиггүй.

Монголд нэгэн ТОМООХОН улс төрч гарч ирээд байгааг Сайханбилэг гэдэг. Тэрээр УИХ дахь АН-ын бүлгийн дарга гэсэн гуншинтай бөгөөд үгээ сөрсөн болгоныг "Битгий жижигхэн улс төр хийгээд бай" гэх мэтээр ТОМОРДОГ болоод байна. 2008 оны 7 сарын 1-ний үйл явдалтай холбогдуулан Монголын төр ард түмнээсээ уучлалт гуйх эсэхийг хэлэлцэх үеэр намын найз Х.Тэмүүжин гишүүнийг "Битний олон юм яриад бай, жижигхэн улс төр хийх гэж байгаа бол гудмандаа гарч жагсаарай!" хэмээн зандарсан. Энэ байдал өнгөрсөн долоо хоногт АН-ын бүлэг халамжийн асуудал ярьж байх үед завсарлага авахад ч харагдав. УИХ-ын гишүүн Д.Очирбат АН-ын бүлэг завсарлага авсан явдалд шүүмжлэлтэй хандаж байгаа нь түүнд бас л ЖИЖИГХЭН улс төр санагдсан байна. Тиймээс бүлгийн даргын том албан тушаалын өндөрлөг дээрээс бусдыгаа ийн зандарсаар. Хамгийн сайхан УИХ-ын гишүүн, Монголын сайхан хосуудын нэг хэмээн эхнэртэйгээ хамт нэрлэгдэж байсан "VIP нэвтрүүлэг, сувгаа битгий солиорой"-гийн хөтлөгчийн царайнд инээмсэглэл тодрохоо болиод, зангидсан хөмсөг, зандарсан харьлцаагаараа өөрийгөө ТОМ улс төрч болсон гэж бодож байвал томоо эндүүрсэн байна.

Улс төрийн бодлого, үйл явц нэг лоббигоос нөгөөд шилжин явсаар дараагийн сонгуулийн жилтэйгээ золголоо. Энэ хугацаанд та бидний амьдралд орсон өөрчлөлт тэнгэр газар шиг ялгаатай. Монголын эдийн засаг дэлхийн түүхэнд байгаагүй мэтээр өсөн нэмэгдсэн гэж сайрхаж байх хооронд иргэд талхны мөнгөө хэрхэн олох вэ гэдэг дээр тулаад байна. Зарим нь талх ямар үнэтэй байгааг ч мэдэхгүй болсон төрийн өндөрлөгүүдэд хандаж бензиний үнэ хөөрөгдөн, 2000 хүрсэн гэдгийг дуулгах хэрэгтэй. Тэд мэдээгүй байж магад. Гэхдээ дээр нь мэдээж энэ үнийн өсөлтөөс болж уйлахын наагуур байгаа энгийн иргэдийн татварын мөнгөөр төрийн унаанд бензин хийлгээд ажиллаж байгаа. Мэдээж бүр томчууд нь замын түгжрэл нь энэ үнэд ороод байгаа бензинийг нь ховх сороод алга болгож байгааг мэдэхгүй зам хаалгаад чөлөөтэй давхидаг.

Нэг хүнд оногдох ДНБ 3000 долларт хүрсэн гээд байгаа. Ханш нь өссөн вальютын нэгжээр тооцох юм бол та жилдээ 4 400 000 төгрөгийн орлоготой байгаа шүү дээ. Гэтэл амьдрал дээр ийм биш байгаа гэдгийг тасарчихсан амьдралтай ТОМЧУУД нэг хараад, өөрөө хэдэн хүний ДНБ-ыг хугасалж, дан ганц өөртөө нялзааж амьдарч байна вэ гэдгээ тооцоолоорой. Том улс төр хийж байгаа эрхмүүд жижигхэн иргэдээс сонгогдсон. Засаг төрөө би муулахгүй. Харин засаг төрийн толгойд хэн байгаагаас энгийн иргэдийн амьдрал ихээхэн хамаарна гэдгийг бодолцох учиртай.

Төрөөс өнчирсөн хүү дараа дараагийн удаад ихэс дээдэстэй дээрх болон бусад асуудлаар цэцлэх болно. Төрийн төлөө огтоно боож үхэхээс өмнө түшээ та нар минь улсаа сайхан болгооч. Иргэдийг улс төржихгүй, цалингаараа, орлогоороо сэтгэл хангалуун амьдарах боломж бий болгож, өөрсдийгөө ч гэсэн тайван ТОМ УЛС ТӨР хийлгээч. Жижиг чулуугаар ТОМ чулуу хөдөлгөхийн үлгэрээр цэцэлцгээе!