Энэ сарын 12-ноос эхэлсэн боловсролын салбарынхны ажил хаялтыг Засгийн газар, багш нарын шаардлагыг үл тоомсорлож байгаа учраас соёл урлаг, эрүүл мэндийн салбар, төрийн үйлчилгээний салбарын ажилчид нийтээрээ нэгдэх болсоноо мэдэгдсэн юм. МҮЭХ, Монголын боловсрол, шинжлэх ухааны ажилтны ҮЭХ, Эрүүл мэндийн ажилчдын ҮЭХ, Ажилтан албан хаагчдын ҮЭХ-ны төлөөлөл болж Улсын драмын эрдмийн театр, Улсын филармони зэрэг урлаг соёлын байгуулгынхан, Яаралтай тусламжийн төвийн сувилагч, жолооч, төмчийн их сургуулиудын багш ажиллагсад хүрэлцэн ирсэн байлаа..
МҮЭХ-ны ерөнхийлөгч С.Ганбаатар “Улсын төсөв өнгөрсөн жилийнхээс бодвол гурван их наяд төгрөгөөр нэмэгдэж батлагдлаа. Засгийн газар төсөв мөнгө нь багадаад нийгэм эдийн засаг хямраад байгаа юм биш. Ард иргэдийн орлого байхгүй, тэтгэвэр авч байгаа хүмүүсийн орлого хүрэхгүй, ажилтай цалинтай ядуу хүмүүсийн тоо өдрөөс өдөрт ихсэж байгаа учраас эдийн засаг, нийгмийн хямрал газар аваад байна.
Энэ их мөнгөөр үйлдвэр бариад шинээр ажлын байр бий болгож, бүтээн байгуулалтанд зарцуулж байгаа бол энэ өөр асуудал. Энэ мөнгийг гэтэл улстөрчид өөрөө өөрсөддөө баталж, конторын барилга, сандал ширээ, жийп худалдаж авахдаа төсөвлөчихсөн байна.

Гэтэл иргэдийн дунд ядуурал 40 хувиас давж байна. Ийм шудрага бус, тэгш бус нийгмийн хуваарилалтыг зогсооё гэсэн тэмцлийг бид хийж байна. Энэ тэмцэл, ажил хаялтыг зөвхөн багш нарынх гэж өрөөсгөл ойлгоод байх шиг байна. Энэ бол нийт ард түмний, нийт ажилчдын хөдөлмөрийг үнэгүйдүүлж, доройтуулж байгаатай хийж буй тэмцэл.
Сангийн сайд С.Баярцогт “та нарын цалинг нэмвэл инфляци нэмэгдэнэ” гэж хэлж байгаа. Тэгвэл инфляцийг жирийн иргэдийн ядуу өлсгөлөн гэдсээр хэмжиж, өнөөдрийг хүртэл 20 жил авч явсан болж таарч байна. “та нарыг цатгачих л юм бол инфляци хөөрөгдөх гээд байна” л гэсэн үг шүү дээ.
Гэтэл өнөөдөр инфляцийн үндсэн шалтгаан нь банк санхүүгийн үнийн хөөрөгдөл буюу мөнгө хүүлж, монополчилж байгаа явдал юм. Өнөөдөр кг элчэн чихэрийг 420 төгрөгийг оруулж ирчихээд 2000 төгрөгөөр зарж байгаа энэ мөлжлөгийг ярихгүй мөртөө энгийн ажилчин ардын гэдэстэй инфляцыг уяж байна.

Нэг зүйл хэлэхэд өнөөдөр манайхаас бусад орны хувьд багш нар хамгийн бага цалин авдаг нь Буриад байдаг. Гэтэл тэндхийн багш нар сарын 800-1200 ам.доллар авдаг юм. Энэ нь бусад оронтой харьцуулахад яагаад бага байна гээд үзэхэд төрөөс бүх багш нартаа орон сууцыг үнэ төлбөргүй олгодог байгаа юм. Тиймээс энэ цалин багш нарынх нь амжиргаанд хангалттай хүрдэг гэсэн үг. Гэтэл монгол багш нар төдийгүй, эрүүл мэнд, төрийн үйлчилгээний ажилчид бүгд 250 хүрэхгүй ам.доллартай тэнцэх цалингаа аваад “дуугүй” явбал эдгээр салбар тогтолцоогоороо уналтанд орно. Тиймээс энэ тогтолцоогоо аврахын тулд, эдэнд нөлөөлөхийн тулд хууль ёсоор олгогдсон ажил хаялт хийх эрхээ эдэлж байна. Засгийн газрыг ард түмнээ сонсож, хүсэлтийг нь хүлээн авдаг болтол нь тэмцэнэ.
Харин ажил хаялтанд саад учруулж, багш нарыг дарамталж байгаа захирал, Засаг дарга нарыг болон өнөөдрөөс эхэлж шүүхэд өгнө. Мөн ажил хаях хугацаанд ажлаас нь халвал түүний хариуцлагыг энэ байгууллагын тэргүүний хувьд би хариуцна” гэлээ.

Нийслэлийн хэмжээнд Ерөнхий боловсролын 89 сургууль, 98 цэцэрлэгийн багш нар ажил хаяад байгаа гэв. Харин хөдөө орон нутгийн хувьд арав гаруй салбар хороодын 8690 гишүүн ажил хаялтанд шилжсэн бөгөөд цаашдаа 14 салбар хороодын 6660 гишүүн ажил хаялтанд оролцохоо мэдэгдээд байгаа аж. Мөн ажил хаялтын үеэр “Боловсрол” телевизээр цацагдаж буй теле хичээл нь үнэн хэрэгтэй хоёр жилийн өмнө гахайн ханиадны үеэр гаргаж байсан хичээлийн бичлэг гэдгийг 47-р сургуулийн багш Р.Бямбадулам гэж байв. Хоёр жилийн өмнөх буюу хоцрогдсон агуулгатай бичлэг тавьчихаад “шууд” гэсэн тодотголтой явуулж байгаа нь эцэг, эхчүүдийг хуурсан үйлдэл гэлээ.
Монголын ажилтан албан хаагчдын ҮЭХ-ны хувьд төрийн захиргаа, төрийн тусгай алба, соёл урлаг, мэдээллийн салбар зэргийг багтаадаг бөгөөд үүнд соёл урлагийн ажилтнууд, хэвлэл мэдээлэл, цэрэг, цагдаа, онцгой албаныхан хамаардаг аж. Тус ҮЭХ-ны тэргүүн М.Алтанцэцэг “Биднийг дэмжиж Олон улсын Үйлдвэрчний эвлэлийн холбооноос захидал ирүүлсэн. Захидалд ҮЭ-ийн Зүүн Азийг хариуцсан дарга “зохих цалин хөлсний төлөө хийж буй тэмцэл нь амжилттай болно гэж найдаж байна, та бүхнийг дэмжиж байна” гэсэн байсан. Одоо бид бүгд ажил хаялтанд шилжихэд бэлтгээд байна. Тангараг хүлээсэн хүчнийхэн ажил хаяхгүй ч биднийг дэмжиж байгаа” гэв.
Төрийн тусгай албан хаагчдын ард ажилладаг энгийн ажилчид гэж хэсэг хүмүүс байдаг бөгөөд яг л хүчний байгууллагын алба хаагчид шиг дуудлага бүрт бэлэн байдаг үүрэгтэй ч 144 мянган төгрөгөөр цалинждаг. Тэд мөн ажил хаялтад нэгдэх аж.

Хуралд мөн Эрүүл мэндийн ажилчдын ҮЭХ-ны төлөөллүүд оролцсоноос Яаралтай тусламжийн төвийн жолооч Б.Төрмандах “Бид өөрсдийн хийж буй ажлын онцлогт тохирсон үнэлэгдээгүй хөдөлмөрийн хөлсийг нэмүүлэх шаардлага тавьсан боловч хариу алга. Бид шөнө нойргүй, өдөр цаггүй ажиллаж, уулын орой дээр гэртэй айлуудад очихын тулд эмчтэйгээ хамт уул руу мацаж, нохойноос айж ажилладаг. Гэтэл бид 200 гаруйхан мянган төгрөгний цалингаар амьдралаа залгуулна гэхэд үнэхээр хэцүү болоод байна. Тиймээс бид багш нарыг дэмжиж, ажил хаяхад бэлэн байна” гэв.
Эмнэлгийн салбарт 11 мянган үйлчлэгч, 17 мянган сувилагч байдаг бөгөөд бүгд ажил хаялтад шилжихэд бэлэн болсон гэж тус салбарын ҮЭХ-ны тэргүүн Б.Мягмар хэлж байв. Эмч нар ч гэсэн дэмжиж байгаа бөгөөд хэрэв байдал нааштай шийдэгдэхгүй бол нэг л өдөр бүх нийтээрээ ажил хаяна гэлээ.
МҮЭХ-нд Монголын Хүний эрхийн үндэсний комиссоос мэдэгдэл иржээ. Энэ мэдэгдэлд хүний өрх гэрээ тэжээн тэтгэхүйц цалин хөлс авах эрхийг зөрчиж байна гэж дүгнэн, ажил хаялтыг дэмжиж байгаагаа илэрхийлсэн тухай хурлын үеэр дуулгалаа.

Бүх нийтийн ажил хаялтын үндсэн шаардлага нь Төрийн үйлчилгээний албан хаагчдын /боловсрол, эрүүл мэнд, соёл урлаг, онцгой байдал, цагдаа/ цалинг болон. ахмадуудын тэтгэврийг 2012 оны 1 дүгээр сарын 1-нээс нэмэгдүүлэх, хувийн хэвшил, үйлдвэрийн ажилтнуудын цалинг энэ жишгээр хамтын гэрээ хэлэлцээрээр нэмэгдүүлэх байх юм байна . Мөн инфляци ард иргэдийг ядуугаар барих арга биш гэдгийг хүлээн зөвшөөрүүлэхийн төлөө тууштай тэмцэнэ гэлээ.
Ш.Эрдэнэчимэг /МОНЦАМЭ/

Монголд бүх нийтийн ажил хаялтад шилжих гэнэ
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
өнөөдөр цалин хөлс бага болохоор багш эмч нар хүндээ хүрч ажиллахаа больж жирмэсэн эх төрөхи йн үүдэнэд төрж, авраач гэсэн нэг нь эмнэлэгийн үүдэнд үхэж, сурагчид хичээлээ ойлгохгүй байна багшаа гэхэд мөнгөө төлөөд заалга гээд ардын багш сууж байна. Харин бага цалин хөлсөөр үнэхээр олон цаг ажиллаж хоолтой хоолгүй урт цагаар ажилчихраад нэмэгдэл хөлсөө авч чадахгүй хүнд дарамт шахалтад ажиллдаг хүмүүс бол хувийн хэвшлийнхэн байна. Монголд бүгд боломжоороо хулгай, хээл хахуул авах сонирхолоор амьдарч байна. Баячууд нь эх орноо худалдаад сайхан амьдарч болоод байхад бид зовох ёстой юм бэ. гэсэн сэтгэлээр энэ нийгэм явж байна . Өөрчлөлт хэрэгтэй байна. Нийгэмд шудрага ёс хэрэгтэй байна. Хуулийнхан бүгд хэн нэгний хараат байдалд ажиллаж байна.

2011-12-15 | 11:41:27 | 202.179.20.139 |