Эхнэр, нөхөртэй болох гэсийм. Энийг шийдэж өгвөл юугаа ч өгөхөд бэлэн. Үрийн заяа хайрлаач, үнэ хөлс харамлахгүй. Тэнд, энд ажилд оруулж өгнө үү? Тохирно шүү. Төрийн албанд оруулж өгвөл төдийг өгнө. Төрийн албанд оруулж өгнө. Хоёр сая төгрөг өгнө. Зарууд энэчлэн ар араасаа хөвөрнө. Одоо бүр аймаар гоё нэг зар тараая. Харин итгэж үзээрэй. Хатуу үнэн шүү. Бидний хувьд баттай хэлэх бас хийж чадах ганц зүйл л байна даа. Тэр бол УИХ-ын эрхэм гишүүн болох юм. Танд хамгийн хэрэгтэй, таныг нойр, хоолноос гаргаад байгаа энэхүү асуудлыг шийдэхэд маш амархан. Алга эргүүлэхтэй л адил амархан гэдгийг баттай мэдэгдэж байгаа юм. Олон этгээд болзол, овоож оцоосон их барьцаа энэ тэр хэрэггүй ээ. Тодорхой хэдэн заалт бий. Архи, тамхины наймаа эрхэлдэггүй байх. АПУ-гийн Г.Батхүү, “Тамхи Со”-гийн Ц.Дашдорж мэт нь таарахгүй. Тэдний хувьд улс төрийн карьер хөөх нь энэ яваа насанд нь бүтэхгүй болсон. “17 Чингэлэг спирт”-ийн наймаанд өртөх дөхсөн бизнесмэн, УИХ-ын эрхэм гишүүн “Женко” Х.Баттулга тэдэнд тийнхүү азгүйдэл авчирсан. Гэхдээ гутрах хэрэггүй. Хойт нас, тэндэх улс төрийн амьдрал гэж сайхан юм буйг Бурхан Будда орхиогүй. Нээлттэй орхисон. Харин тэнд баян, хоосны ялгаа үгүй учир та нар нэр төр, эрх мэдэл сонирхоод нэмэргүй л болов уу. Тэнд бүгд адилхан учраас боломж хийгээд сонирхлоороо л болно. Хэдэн мянган Батхүү, Дашдорж бий ч ямар нэг зүйлээр ялгардаггүй юм.

Энд гуйлгачин байсан нөхөр тэнд түрүүлж очсоноороо /эрэмбээрээ/ дээр чинь залрах бөгөөд та хоёрыг “Баагий, Дашка” гээд л сууж байх вий. За, тэгээд хур хөрөнгө, уурхай баялгийн эзэн бол болохгүй. Иргэд, дэмжигчид хүлээж авахгүй шүү дээ. Тэрбумтнуудад манайхан тун дургүйг та мэднэ биз дээ. Тэгэхээр таны хөрөнгө 999 саяар үнэлэгдэж байхад л болно. “Сод Монгол”-ын Ц.Анандбазар, МСS-ийн Ж.Оджаргал, “Буян”-гийн Жагаа, “Алтжин”-гийн Г.Алтан, хураасан хөрөнгө нь тодорхойгүй, хувьцаа мувьцаа нь хаана байдаг, хэмжээ домжоо нь нууц ноёнтнууд, өөр хэн хэн ч билээ, Монголын саятнуудын хэмжээнд байхад гэмгүй. Тэд 999 саяас бага/итгэмээргүй юм. Юм авах болохоороо хэдэн тэрбумыг гаргаад ирнэ/ хөрөнгөтэй тухайгаа ил тодоор зарласан учраас тэнцэж байгаа юм. Тэрбумтан болоход нь ганцхан сая төгрөг дутчихаад байгаа билээ. Бичиглээч би бээр бичлэгийн шагнал, цалингаа нийлүүлж жилээр нь аваад түр зээлүүлье. Та тэрбумтан болоод авбал зүгээр юм гэсэн чинь “Аа, тэр ярихгүй. Тэгж үхэхгүй шүү. Чамд би яаж эргүүлж өгөх юм?” гэж байцгаана билээ. Их л сандарцгаахыг бодоход тэрбумтан болох дэмий юм шиг санагдсан. Тэгтэл нэг л биш болоод явчихав. Учир юу билээ гэхнээ ганцхан юманд л болохгүй гэнэ. Тэр нь УИХ-ын сонгуульд өрсөлдөх юм байна лээ, чааваас. Тэгэхээр та хүссэн ч, эс хүссэн ч тэдний жишгийг л дагаж таарна. Эхнэр, хүүхний асуудалд орооцолдож болохгүй шүү. Гадныхан шиг огцруулж, өөрчилж, “аав”-ынд хорьж сүр дуулиан болохгүй л дээ. Тэгэхдээ тийм болж магадгүй учраас тэр. “Эмсийн хүрээлэн” байгуулъя энэ тэр гэсэн сэдвээс хол явахгүй бол горьгүй. Та дотроо хүсдэг, дэмждэг ч гаргаж болохгүй. “Тэр дэмий” л гээд байгаарай. Бас нэг зүйлийг аминчлан захихад болж өгвөл “МАНАН”-д харьяалалгүй аваас нэн сайны ангилалд багтана. Ард түмэн энэ хоёр намыг ад шоо үздэг болсон шүү дээ.

Тэдний гаргасан, өөрсдийгөө төдөд, өдөд яваа гэх элдэв рейтинг, зэрэглэлд нь бүү автаарай. Манай худалдааныхан янз бүрийн тоо хэлж хулхи хямдрал зарладагтай адилхан худлаа байдаг юм. Нэг шөнө хуралдаад л нэг тоо тогтоож аваад түүнийгээ маргааш нь хэвлэлийнхэнд мөнгө төлөөд гаргуулчихдаг юм л даа. Тэр нам тэргүүлж, тэр нь удаалж явна гээд л сүйд болно. Яс юман дээр ямар ч чансаагүй болчихсон байдаг билээ. Манайхан бичиг үсэгт нийтээрээ тайлагдсан нь ийм үед заримдаа гай болдог. Тэрийг нь хаанаас ч олоод харчихдаг юм. Маргааш нь хөгшин, хөвөөгүй ярилцаад л эхлэдэг байхгүй юү. Бас нэг болзол эх орончийн дүрд тоглож сурах. Та мэдээж хятадуудтай хавсайдан эх нутгийнхаа газар шорооноос зарсан л байж таарна шүү дээ. Тэр яах вэ. “Миний нутгийн шорооноос Бурхан гуйсан ч бүү өг” гэдэг Галдан бошготын үгийг сайн цээжилж авна уу. Хэрэгтэй үед аминд ордог ганц афоризм байгаа юм. Хөдөө баг энэ тэрээр явахдаа массыг сэм ажиглаж байгаад гучин таваас доош насныхан голдуу харагдвал өөрийн сэтгэл зүрхний үг гээд хэлчихээрэй. Манай залуус ном, сонин унших биш. Зурагтаар Солонгосын киноноос өөр зүйл үздэггүй тул мэдэхгүй гэдгийг баттай хэлье. Харин өвөө, эмээ нар оролцсон хурал дээр ам алдав аа, тэд андахгүй. Аягүй бол та мэдэхгүй байгаа шүү дээ. Таны мэдэхгүй маш олон юмыг тэд мэднэ. Таныг явахаар онигоонд оруулаад дуу, муу зохиочихно шүү. Өөлдийн Галдан өөрийн биеэр ирээд явлаа гээд л дуулчихна. Аль ч аймаг, суманд очсон тэр нутгийн хүн болчихвол их сайн. Би энэ нутгийн хүн болохоор нутаг орондоо санаа их зовох юм гээд л хэлж орхи.

Хүүхээ, аль сумых вэ гэвэл тухайн суманд төрөөд хот руу шилжсэн гэдэг ч юм уу аймгийн төвийн 10 жилийн сургуульд шилжиж ирээд 10 хоноод шилжээд явчихсан, 10 хоносон учраас амин хайртай болчихдог гэх зэргээр залахгүй юү. За, тэгээд манай эхнэр энэ нутгийнх энэ тэр гэхэд юу нь болохгүй байхав. Энэ мэт болзлыг хангасан байхад болно. Бусдыг бид хариуцна. Таны сонгуулийн штабыг зөвхөн бид удирдана. Та өмнө нь нэр дэвшиж байсан бол туршлагатай байж мэднэ. Хамаатан садан, ахан дүүс, найз нөхдөө л авч бүү үхээрэй дээ. Аль муу муухайг тань мэддэг болохоор ам алдах нь амархан шүү дээ. Та биднийг, бид таныг мэдэхгүй учир бүхнийг шинээр эхэлнэ гэсэн үг. Ганцхан зүйл дээр гарын үсэг зурж баталгаажуулахаа мартавзай. Байр орон сууц, хөрөнгө мөнгө, гадаадад сургуульд явуулах мэт жул юм ярьж хөгтөв өө. Тиймхэн юм бидэнд хэрэггүй. Тэгээд ч бид хууртахгүй. Бас дэмий. Биднийг Төрийн ямар нэг албан тушаалд л оруулаад өгчих. Баг, хорооны Засаг дарга байхад л хангалттай. Төрийн албанд шургаж байвал л болох нь тэр. Бүгдийг бид өөрсдөө амжуулж орхино. Төрөөс төрсөн тэрбумтаны эгнээнд л алхмаар байна.

Эрх мэдэлтэй аваас бүхнийг хийж болох хөгийн боломжийг манай төр бий болгосон байна лээ. Захиран зарцуулах гэдэг “жанжин” албан тушаалд очсон байхад самарч өгнө дөө, гайгүй. Хороо, сумын Засаг дарга нар хориод тэрбумын хөрөнгө эргэлдүүлэх юм гэсэн. Монголын бүх сэхээтний хараа түүн дээр л тусаад байгааг мэдэрч байгаа гэдэгт итгэнэм. Харин та “Манийгаа яаж УИХ-ын эрхэм гишүүн болгох гэж байна” хэмээн тэнэгтэв. Тэр чинь бидний “ноу хау” хэвээр үлдэг. Таны хийгээд бидний өрсөлдөгчид мэдчихвэл дэмийгээр барахгүй юм болно. Сонгуульд тавиулчихаад халамцуухан доголон нулимстай буцаж явах шиг гунигтай юм хаана байх билээ. Олимпийн аваргын төлөө үзээд бүтэлгүйтсэн тамирчин шиг л усан нүдлээд ч нэмэргүй болохын дээр дахиад дөрвөн жилийг хүлээнэ гэдэг чинь жинхэнэ амьдын там байхгүй юү. Хөл бөмбөгтэй ч зүйрлэсэн болно. Яг л бразилчүүд шиг хожигдчихоод л дахиад дөрвөн жилийг хүлээдэг биш бил үү? Ер нь дөрвөн жилээр хэмжигддэг юм бүхэнтэй жишихэд болох юм.
Г.Мөнхнасан

/www.wikimon.mn/

УИХ-ын гишүүн болгож өгнө өө, хө
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Ta iPhone 4S–тэй болмоор байна уу тэгвэл манай 1000zahia c o m-оос лизингээр авах боломжтой боллоо та ороод vзээрэй (мөн хvссэн бараагаа та лизингээр авах боломжтой ) Vvнээс илvv хямдаар Монголд iPhone 4S (Factory Unlocked) олдохгvй гэдэгт 100% итгэлтэй байна! Манай бvх бараа Америкаас 100% оригналь, цоо шинэ, vйлдвэрийнхээ баглаа, боодол, битvvмжлэлтэйгээ орж ирдэг . Та манайхаар ороод л vз таньд гарцаагvй таалагдна. Манайх Монголдоо хамгийн хямд нь хэрвээ та манайхыг хамгийн хямд нь гэдэгт эргэлзэж байгаа бол манай дээр байгаа комьютерuuдийн uнийг, uзuuлэлт, өнгө uзэмж, брэнд нэртэй нь цуг бичиж аваад өөр дэлгuuрuuдээр ороод харьцуулаад хараарай Манайх бuх бараагаа Америкаас оруулж ирдэг бөгөөд бuгд Америк стандардын дагуу uйлдвэрлэгдсэн, 100% оригналь, цоо шинэ, uйлдвэрийхээ баглаа, боодол, битuuмжлэлтэйгээ байдаг Манайх бuх электрон бараандаа 3 сарын баталгаа өгж байгаа Эцэст нь, та манайхаас зuгээр л бараа аваад uз гэж хэлмээр байна Сэтгэл ханамжийн баталгаа 100% байна гэдэгт бид 100% итгэлтэй байна Баярлалаа 1000zahia c o m Монголын хамгийн хямд интернет дэлгuuр!

2011-12-15 | 09:34:12 | 202.126.91.246 |

Мэдээ
Гадаад мэдээ
Видео