Хамгийн сүүлийн тооллогоор албан ёсоор бүртгэгдсэн 107140 Монгол иргэд гадны улс оронд янз бүрийн хугацаагаар оршин сууж байна. Үүний цаана бүртгэлгүй, хараар хичнээн ч хүн хаана юу хийж явааг бүү мэд. Судалгаанаас харвал дэлхийн 30 гаруй улсад Монгол Улсын иргэд оршин суудаг аж. Үүнээс БНСУ-д хамгийн олон буюу 29534, дараа нь АНУ-д 17036, Хятадад 7273 иргэд оршин суудаг бол хамгийн цөөн нь Пакистанд 11, Хойт Солонгост 44, Филлипинд 51 Монгол иргэн амьдардаг тоо гарчээ.

Эдгээр иргэдийн 57185 буюу талаас илүү нь эмэгтэйчүүд гэж бүртгэгдэж. Тэдгээр бүсгүйчүүдийн 4269 нь Хятадыг зорьжээ. Суралцахаар болон гэрээгээр ажиллахаар явагсад тодорхой тэмдэглэгдсэн байдаг. Харин бусад зорилгоор гэх бүлэглэлд хамаарч гадаад улс орныг зорьсон 22486 иргэдийн хэд нь худалдагдсан, эсвэл биеэ үнэлэн мөнгө олж байгааг нарийвчлан гаргах боломжгүй нь ойлгомжтой. Зөвхөн 2010 оны байдлаар 13032 эмэгтэй шалтгаан тодорхойгүй гадагшаа гарсан байна. Статистикийн судалгаа албан ёсны бүртгэл баримтанд тулгуурлан гарсан байж таарна. Тэр тусмаа гадаадад нэг жилээс дээш хугацаагаар тухайн орныг зорьсон Монгол иргэдийн бүртгэлд тулгуурлан гаргасан тоо баримт шүү дээ. Гадаад харилцаа өргөжиж Монголчууд маань бусад улсын хөгжил, соёлтой танилцан нүд тайлж буй нь сайн хэрэг. Харамсалтай нь манай цөөнгүй иргэд амьдралын эрхээр ч юм уу биеэ үнэлэн мөнгө олох аргыг сонгох болсон нь нууц биш.

Бас хүний наймааны золиос болсон иргэд, тэр дотроо бага насны хүүхдээс эхлээд охид бүсгүйчүүд ч өртөөд байгаа нь анхаарал татах асуудал мөн. Хар тамхины болон хүний наймаа хамгийн эрэлттэй, унацтай наймаа гэдэг. Үүнээс болоод гэмт хэргийн бүлэглэлүүд унацтай уг наймааг голлон эрхэлдэг тухай судалгаа баримтууд цөөнгүй. Дэлхий нийтээрээ тэмцэж байдаг ч олигтой үр дүн хараахан гараагүй л байна. Саяхныг хүртэл Монгол Улс ийм төрлийн хар дансанд бүртгэлгүй байлаа. Тэгвэл өдгөө хар тамхины хэрэгт холбогдох нь өдөр өдрөөр нэмэгдэж, түрүүчээсээ цаазын ялын аваад эхэлчихэв. Хар тамхины хэрэгт гудамжныхан гэгдэх нөхдөөс эхлээд урлагийнхан, тэр ч байтугай дипломатууд, төрийн түшээдийн хүүхдүүд ч холбогдох болсон нь уг гэмт хэрэг нэлээд газар авсныг харуулж байна. Хүний наймаа ч үүнээс хоцорсонгүй. Хэвлэл мэдээллээр гарч олны сэтгэлийг түгшээсэн ч эцэслэн шийдэгдэхгүй цаг алдсаар байгаа нь сонин. Харин саявтархан нэг хэрэг шийдсэн байх. 2,5 жилийн ял өгсөн гэсэн. Хөнгөн хэрэг гэж үзсэн юм байлгүй дээ. Хүний наймаатай тэмцэх олон улсын байгууллагын судалгаагаар Монгол Улс маань хар тамхи болон хүний наймааны дамжуулагч орны тоонд ороод гурав дөрвөн жил болчихлоо. Бодвол холбогдох хууль хяналтын байгууллагууд анзаарч, тэмцэх, зогсоох төлөвлөгөө боловсруулж суудаг л байлгүй яав гэж.

“Өндөр цалинтай ажилд зуучлах” зарын цаана хүний наймаа явагддаг

Ийм баримт мэдээлэл сонин хэвлэлээр зөндөө л гардаг. Хүмүүс “ийм зүйл бас байдаг аа. Итгэмээргүй юм” гэх байдлаар уншаад л мартана. Харин хууль хяналтын байгууллагынхан анхааралдаа авч хянаж шалгадаг эсэхийг мэдэхгүй юм. Бараг л үгүй болов уу. Шалгаж нягтлаад үзэхээр хэн нэгэн нэр нөлөө бүхий нөхөд холбогдоод асуудлыг хүндрүүлээд байж мэднэ гээд зайлсхийдэг үү, эсвэл асуудал биш гар нь хүндрээд анзааралгүй орхидог уу ёстой чөтгөр бүү мэд.

Зарим баримтуудыг эргэн сөхвөл өдгөөгөөс арваад жилийн өмнө байх МАХН одоогийн МАН -ын байран дотор үйл ажиллагаа явуулдаг байсан нэгэн компанийн зүгээс 18-25 насны охидыг өндөр цалинтай ажилд зуучлана гэж зарлаж байгаад 100 шахам охид бүртгэн авч 12-ийг нь Японд гаргасан. Тэдгээр охидыг Төмөр замын “Замчин” чуулгын хөгжимчин, “Түмэн эх” чуулгын бүжигчин гэх үнэмлэхтэйгээр виз гаргуулж, Осака хотод аваачаад хэвийн биш байдлаар садист бэлгийн дур хүслээ хангадаг япончуудад үйлчилдэг янхан болгосон байдаг. Тэдгээр охидоос тав нь сар гаруй хүчиндүүлсний эцэст сиймхий гарган оргож чадсан бөгөөд өдгөө гурав нь Монголдоо буцаж ирсэн дуулддаг. Охидыг наймаал сан байгууллагын захирал нь тухайн үеийн Аялал жуулчлалын агентлагийн дарга Г.Шийлэгдамбын орлогч байсан гээд бодохоор тэд учрыг мэдэж байсан болов уу гэхээр. Энэ тухай өмнө нь бичиж байсан болохоор товч дурдлаа. Уг нь бараг л адал явдалт зохиол шиг түүх байдаг юм. Ийм тодорхой баримт нотолгоотой хэргийг цагдаагийнхан дуулаагүй л мэт өнгөрсөн юм даг. Энэ бол нэг л жишээ.

Тэгвэл үүнээс нэлээд хожим буюу одоогоос хоёр гурван жилийн өмнө яг ийм үйлдэл давтагдсан юм. “New voise” гэх нэртэй гадаад хэлний сургалтын төв мөн л “Гадаадад өндөр цалинтай ажилд зуучилна” гэсэн зар хэвлэлээр гаргасан байна. Тэд бүртгэж авсан охидоо Япон, Макао, Австрали зэрэг улсад өндөр цалинтай ажилд илгээнэ хэмээн итгүүлээд хүн бүрээс 1350 ам.доллар хураан авчээ. Мөнгөө бэлнээр аваагүй “Голомт” банкинд Моломжамцын Март гэдэг хүний хувийн дансанд шилжүүлүүлсэн байна. Ийнхүү мөнгөө тушаасан эхний 12 охинд хөгжимчин, бүжигчин гэсэн үнэмлэх олгоод виз даруулж. Дээр дурдсан орны элчин сайдын яамдад виз хүссэн хүсэлтийг “Green capital” гэх компани гаргасан байх бөгөөд захирал нь Цэрэнбалтавын Түвшинзаяа гэнэ. Түвшинзаяагийн аав Цэрэнбалтав нь Улсын Ерөнхий Прокурорын орлогч тухайн үеийн албан тушаалаар нь бичив байсан учир тэр эрхэм нөлөөлсөн гэж шууд тааж болохгүй ч, компаниа бүртгүүлэхээс эхлээд, виз хурдан гарах зэрэг” аар саар” ажилд нь тусалдаг байсан тухай мэдээлсэн эх сурвалж бий. Харин нөгөө “хөгжимчин”, “бүжигчин” охид очсон улсдаа биеэ үнэлэгч болсныг нэг улсынх нь иргэн гадаад хүн сайн мэдэх юм байна лээ. Цэрэнбалтав прокурор шударга сайн хүн байх л даа. Хаанаас л ийм жижиг сажиг наймаа маймаанд оролцоо аж. Охин нь “сайн хүний нэрийг гурав худалдаж идсэн” байж ч магадгүй л юм.

Чимидцэрэн худлаа хэлсэн бол хүн гүтгэсэн хэргээр дахин шийтгүүлнэ

Дашрамд сонирхуулахад 2007 онд “Хадгаламж банк”-ны Чимэдцэрэнгийн хэрэг гэж 14 тэрбумын хэрэг мандсан даа. Чимидцэрэн хуулийнханд өгсөн мэдүүлэгтээ нөгөө олон тэрбумаасаа хэн хэнд хэдэн төгрөг өгснөө мэдүүлсэн байдаг. Тухайлбал төрийн ордны ар талд баригдсан хоёр том барилгад хөрөнгө оруулсан гэж. Нэг нь “Хүрээ төв”, нөгөөх нь “Алтаргана ” хэвлэлийн бирж байсан барилга хоёр л доо. Бас мөнгийг хамтран үрэн таран хийсэн хүмүүсийн дотор тэр үеийн УИХ-ын гишүүд болох Т.Бадамжунай одоогийн сайд гишүүн, Г.Занданшатар одоогийн сайд гишүүн, У.Хүрэлсүх одоогийн МАН-ын ЕНБД нэр орсон нь шалгах үндэ слэлтэй гэж үзээд тухайн үеийн Ерөнхий прокурор М.Алтанхуяг эдгээр гурван хүний гишүүний бүрэн эрхийг нь түдгэлзүүлэн шалгах саналаа УИХ-д тавьсан байдаг. Тухайн үед нь УИХ хуулиа дээдлээд шалгуулчихсан бол олон хэргийн учиг тайлагдаж, улс хохирохгүй ч байсан юм билүү.

Хэргийг дахин дахин буцаасан хүн нь Цэрэнбалтав прокурор байсан тухай тэр үед хэвлэлд бичигдэж байж. Бас болоогүй Чимидцэрэнгийн мэдүүлгээр бол У.Хүрэлсүхэд хоёр орон сууц авахад нь зориулж тус бүр 250 сая төгрөг өгсөн тухайгаа хэлсэн нь оргүй гүтгэлэг гэхэд хаашаа ч юм. Үнэхээр гүтгэсэн бол төрийн түшээдийг онц ноцтой хэрэгт гүтгэсэн учир дахин ял зэмлэл хүлээмээр ч юм шиг. Хөнгөнийг нь хүндэд нь багтаасан ч байж болох л доо. Уг нь энэ хэрэг хүний наймаанд хамаагүй л дээ. Өөр төрлийн наймаа байх. Зүгээр л Цэрэнбалтав прокурорын нэр холбогдсон болохоор цухас дурдсан юм.

Олхонууд ШААБАР

Хүний наймаанд прокурор оролцсон
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
ХҮНИЙ НАЙМАА ХИЙГЧИД ДОТОР ЯМАР ХҮН БАЙГААГ САЙН ТОГТООЖ ИЛРҮҮЛЭХ НЬ ХУУЛЬ ЦАГДААГИЙН АЖИЛ.ХҮН БОЛ АМЬДРАХ АМЬД ЯВАХ ЭРХТЭЙ ГЭТЭЛ ХУУЛЬ ХЭЗЭЭ Ч МАНАЙ УЛСАД ХЭРЭГЖИХГҮЙ БАЙГАА НЬ СОНИН БАЙНА ДАА.ЯЛАНГУЯА ЭРХ БҮХИЙ ХҮМҮҮСТ ҮЙЛЧЛЭХГҮЙ ЖИРИЙН ИРГЭД ТЭДНИЙ ЗОЛИОС БОЛОХ НЬ ИХ БОЛЖЭЭ.АРАЙ Ч ДЭЭ МОНГОЛЧУУДАА

2015-02-12 | 14:26:30 | 103.26.195.253 |

Мэдээ
Гадаад мэдээ
Видео