Сонгууль явагдахад зөрчил гарах нь гайхшраад байх зүйл биш.

Гэвч сонгуулийн зөрчил, маргаан шуугиан тэр бүү хэл олон нийтийг хамарсан эмх замбараагүй байдалд хүргэх нь бий. Гэвч дуулиан шуугиантай болсон сонгуулийн дүнг тун ховор тохиолдолд эргэн хардаг. Өнгөрсөн ням гаригт ОХУ-ын Думын сонгууль болж өндөрлөлөө. Бусад сонгуулиудын адилаар төн л зөрчилтэй байсан гэх. Улс орон бүрт л ийм зүйл тохиолддог байх. Тиймдээ ч сүүлийн 10 жилд явагдсан хамгийн дуулиантай сонгуулийг “Forbes” сэтгүүлээс нэрлэжээ.

 19000 зөрчилтэй саналын хуудас 

2000 оны 11 дүгээр сарын долооны өдөр болсон АНУ-ын Ерөнхийлөгчийн сонгуульд долоон хүн нэр дэвшиж бага Жорж Буш ялалт байгуулж байлаа. Энэ сонгууль тус улсын түүхэнд тохиосон хамгийн зөрчилдөөнтэй сонгууль гэсэн тодотголыг хүртсэн юм. Сонгуулиар Жорж Бушийн өрсөлдөгч Альберт Гор хагас сая гаруй хүнээр илүү санал авсан ч Буш Ерөнхийлөгчийн албыг авсан. Сонгуулийн дүн Флоридад шийдэгдсэн юм. 2000 онд энэ мужийнхан 25 саналаа Бушт өгсөн. Сонгуулийн дүн ч бодит саналаар биш харин мужийн хүн амын тооноос сонгогчийн санал хамаардаг электораль системээр явагдаж байсан тул Жорж Буш ердөө таван саналаар давуу байсан юм.

Үүний шалтгаан нь Альберт Горын төлөө өгсөн 19000 саналын хуудсыг гэмтэлтэй, илүү тэмдэглэгээ хийсэн гэсэн үндэслэлээр тооцохгүй орхисон байж. Хэрэв үүнийг тооцсон бол Гор ялалт байгуулах байлаа. Флоридагийн дээд шүух Горын багийнхны гомдлыг авч хэлэлцээд маргаантай саналын хуудсуудыг тодорхойлох шалгуур байхгүй гэж үзсэний улмаас Буш ялагч хэвээр үлдсэн юм.

“Амьгүй албатууд” буюу “азаартсан” тоон үзүүлэлт

2003 оны 12 дугаар сарын долооны өдөр болсон Оросын Парламентын сонгуульд 23 нам оролцож, тав нь ялалт байгуулсан. Харин сонгуулийн дүн аль ч талаараа шуугиан тарихгүй байж чадсангүй. Учир нь 12 дугаар сарын 26-ны өдөр Сонгуулийн төв хорооны дарга Александр Вешняков Чечень болон Ингушетэд сонгогчдын бодит тооноос 11 хувиар илүү сонгогч санал өгсөн гэж мэдэгдлээ. Тууний өгүүлснээр өөр субъектуудад ч ийм явдал гарчээ. Энэ хэрэгт эрүүгийн болон захиргааны хэрэг үүсгэсэн эсэх нь тодорхойгүй. Харин бидний сайн мэдэж байгаагаар сонгуулийн дүнд өөрчлөлт оруулаагүй.

 Ордноо барьцаалсан сонгогчид

2004 оны 10 дугаар сарын гуравны өдөр Абхазид Ерөнхийлөгчийн сонгууль болж таван нэр дэвшигчээс Сергей Баганш 50.08 хувийн саналаар ялалт байгуулав. Харин Москвагаас дэмжлэг авдаг Рауль Хажимба ердөө 32 хувийн санал авсныг Сонгуулийн төв хороо найм хоногийн дараа мэдэгдсэн. Үүний дараа Сонгуулийн төв хорооны тэргүүн Багапшийн талынхны зүгээс дарамт шахалт ирсэн тул ялалтыг түүнд өгөх болсон хэмээн мэдэгдээд албан тушаалаасаа огцорсон юм. Ийн мэдэгдсэний дараагаас л тус улсын удирдлага Сергей Багапш болон Хажимбагийн талынхан гэж хоёр хуваагдсан. Сөргөлдөөн 11 дүгээр сарын 30-ны өдөр уламж идэвхжив, харин 12-ны өдөр Багапшын талынхан Сухуми дахь Засгийн газрын ордон руу дайран орсныг Ерөнхийлөгч төрийн эргэлт хэмээн нэрлэж байв. Сонгуулийн дүнг цуцалж, 2005 оны нэгдүгээр сарын 12-нд болсон сонгуулиар Багапш Ерөнхийлөгч болсон бол Хажимба дэд ерөнхийлөгч болсон юм.

 Дуулианы “эзэн” нь хэвлэх үйлдвэр

Зургаан нэр дэвшигчтэй Ерөнхийлөгчийн сонгууль Башкирт 2003 оны 12 дугаар сарын долооны өдөр явагдсан. Ерөнхийлөгчийн сонгуулийн эхний шатанд Муртаза Рахимов, Сергей Веремеенко нар ялалт байгуулсан бол хоёр дахь шатны сонгуулиар Муртаза Рахимов 78.01 хувийн саналаар ялалт байгуулсан юм. Санал хураалтын эхний шатанд нэр дэвшигчдээс нэг нь ч талаас илүү хувийн санал аваагүй бөгөөд хамгийн өндөр саналтай хоёр нь дараагийн шатанд орж байлаа. Харин энэ шатнаас Рахимов ялахад тухайн үеийн Ерөнхийлөгчийг эсэргүүцэгчдийн талынхан илрүүлсэн илүүдэл 200000 саналын хуудас ч нөлөөлсөнгүй. 12 дугаар сарын дөрөвний өдөр саналын хуудас илүүгээр үйлдвэрлэж байгаа нь илэрсэн хэвлэх үйлдвэр тэр шөнөдөө асар их хэмжээний саналын хуудсынхаа хамт шатсан юм. Энэ хэргийг эрүүгийн мөрдөн байцаалтанд оруулж, хэрэг мөрдөлтийн эхний шатанд дэндүү нээлттэй тайлбар өгсөн Башкирийн прокурорын газрын дарга, орлогч нар ажлаасаа халагдав.

Гэвч энэ хэрэгт төгсгөл гэж байсангүй. Дээд шатанд хэргийг авч хэлэлцсэнгүй, хэвлэх үйлдвэрийн газрыг буруутган, 300000 рублийн торгууль ноогдуулав. Энд онцлоход Рахимовд ялагдсан бизнесмен Веремеенко яг энэ үеэр явагдсан парламентын сонгуульд ялалт байгуулсан “Нэгдсэн Орос”-ын гишүүн байсан юм.

 Парламентаа барьцаалж, ерөнхийлөгчөө огцруулав

2000 оны есдүгээр сарын 24-нд Югославт дөрвөн нэр дэвшигчтэй Ерөнхийлөгчийн сонгууль болов. Энэ сонгуулийн саналыг тоолж дууссаны дараа Югославын Сонгуулийн төв хороо аль ч нэр дэвшигч шаардлагатай хэмжээний санал аваагүй учраас хоёр дахь шатны сонгууль явуулах хэрэгтэй хэмээн мэдэгдэв. Гэвч Слободан Милошевичийн сөрөг хүчний 18 намын улс төрийн эвслээс дэвшүүлсэн Воислав Коштуницын талынхан түүний төлөө талаас илүү хувь нь санал өгсөн тул нэмэлт сонгууль явуулах шаардлагагүй хэмээн мэдэгдсэн юм. Удалгүй улс орон даяар эсэргүүцлийн арга хэмжээ эхэлж, 12 дугаар сарын тавны өдөр Белград хотноо олон мянган хүн оролцсон жагсаал болж тун удалгүй цагдаагийнхантай мөргөлдөв. Жагсагчид Югославын Парламентын барилгыг дараа нь Белградын телецентрийг барьцаалж үүний дараа армийн болон хууль сахиулах байгууллагын төлөөлөгчид жагсагчдын тэргүүлэгчидтэй хэлэлцээр явуулан, хүчирхийллийг нэн даруй зогсоох амлалт авсан юм. Дараагийн өдөр нь Слободан Милошевич огцрон, Холбооны Үндсэн хуулийн шүүх сонгуулийн протоколд өөрчлөлт оруулах шийдвэр гарган Коштуницд ялалтыг өгөв.

Сонгуулийн үр дүн-хоёр сарын эсэргүүцэл

2004 онд Украинд явагдсан сонгууль арваас 12 дугаар cap хүртэл сунан үргэлжилсэн урт хугацааны сонгууль болсон гэхэд болно. Энэхүү Ерөнхийлөгчийн сонгуульд эхний шатанд 24 нэр дэвшигч өрсөлдсөн бол хоёрдугаар шатанд хоёр нэр дэвшигч тунан үлдэж Виктор Ющенко ялалт байгуулсан юм. Эхний шатны дүнгээр Виктор Ющенко болон Виктор Янукович нар бараг л ижил тэнцүү саналтай байсан бол Янукович хоёрдугаар шатанд 49.42 хувийн саналаар ялсан. Харин 46.69 хувийн саналаар ялагдсан Ющенко Украины Дээд шүүхэд сонгууль шударга бус болсон хэмээн гомдол гаргалаа. Баруун Европын байгууллагуудыг төлөөлөн ирсэд олон улсын ирсэн олон улсын ажиглагчид ч сонгуульд маш муу үнэлгээ өгөв. Ющенког дэмжигчид сонгуулийн хоёрдугаар шатны дүнг хүлээн зөвшөөрөхгүй, иргэдийн эсэргүцлийн жагсаал байгуулж байсны дотроос хамгийн алдартай нь Майдан дахь жагсаал байв. 12 дугаар сарын 26-ны өдөр дахин сонгууль явах хүртэл хоёр сарын хугацаанд жагсаал цуглаан тасралтгүй гарч байв. Нэмэлт сонгуулиар Виктор Ющенко 51.99 хувь, харин Виктор Янукович 44.20 хувийн санал авав. Янукович мөн л дээд шүүхэд гомдол гаргасан ч түүний гомдлыг авч хэрэгсээгүй.

10 хүний үнэтэй сонгууль

Одоогоос гурван жилийн өмнө буюу 2008 оны хоёрдугаар сарын 19-ний өдөр Арменд Ерөнхийлөгчийн сонгуульд есөн нэр дэвшигч өрсөлдөн Серж Саркисян (52,82 %) ялалт байгуулав. Хоёрдугаар сарын 20- ны өдөр сонгуулийн албан ёсны дүнг танилцуулсны дараа ялагдсан нэр дэвшигч буюу Армены анхны Ерөнхийлөгч Левон Тер-Петросяны дэмжигчид Ереван хотын Эрх чөлөөний талбай дээр олон өдрийн эсэргүүцлийн арга хэмжээ зохион байгуулав. Энэ сонгууль маш их зөрчилтэй явагдсаны улмаас хууль ёсны хэмээн хүлээн зөвшөөрч болохгүй хэмээн жагсагчид үзэж байлаа. Гуравдугаар сарын нэгний өглөө жагсагчдын майхант хуаран руу цагдаа нар дайрав. Жагсагчдыг албадан хөөн тараах үеэр мөргөлдөөн гарч найман жагсагч, хоёр цагдаагийн ажилтан амь үрэгджээ. Үүний хариу болгон дахин шинэ эсэргүүцлийн жагсаал үүсэв. Энэ удаагийн жагсаалын оролцогчид хотын захаар хүчнийхнийг “нам дарж” байлаа. Олон нийтийг хамарсан эмх замбараагүй байдлыг таслан зогсоохын тулд Армены Ерөнхийлөгч Роберт Кочарян гуравдугаар сарын хоёрны өдөр улс орондоо 20 өдрийн онц байдал тогтоожээ. Хэдийгээр ширүүхэн мөргөлдөөн гарч, олон хүний амь нас эрсэдсэн ч сонгуулийн үр дүнг эргэн харсангүй. Серж Саркисян дөрөвдүгээр сарын есний өдөр тангараг өргөлөө.

Парламентын үймээн

2009 оны дөрөвдүгээр сарын тавны өдөр Молдавт Парламентын сонгууль болов. Энэ сонгуульд 17 нам оролцож, дөрвөн нам ялалт байгуулсан юм. Санал хураалтын дүнгээр Молдавын коммунистууд 49.48 хувийн санал авсан тухай албан ёсоор зарласны дараачаас л Кишиневт сөрөг хүчний намын дэмжигчид ширүүхэн жагсаал эхлүүлэв. Жагсагчдын ихэнх нь залуучууд байлаа. Дөрөвдүгээр сарын долооны өдөр жагсагчид парламентын ордонд дайран орж, Румыны болон Европын холбооны далбааг мандуулав. Үүний дараа сөрөг хүчний төлөөлөгчид эсэргүүцлийн жагсаалд оролцогчдод нөлөөлж чадна хэмээн мэдэгдэж байлаа. Жагсагчид цагдаагийнхантай мөргөлдсөний улмаас нэг хүн нас барж, 300 гаруй хүн шархдав. Шархдагсдын ихэнх нь хууль сахиулах хүчний ажилтнууд байлаа. Харин баривчлагдсан хүмүүсийн тоо 200 хол давав. Ийнхүү олон нийтийг хамарсан эмх замбараагүй байдал үүссэний улмаас саналыг дахин тоолсон бөгөөд үүний дүнгээр коммунистуудын парламентад эзлэх суудал 63 байснаа ердөө гурваар л цөөрсөн юм.

 Ямар ч “но”-гүй сонгууль

Литва улсад 2009 оны тавдугаар сарын 17-ны өдөр болж, 14 нэр дэвшигчээс Даля Грибаускайте 68.17 хувийн саналаар ялалт байгуулсан Ерөнхийлөгчийн сонгуулийн бэлтгэл ажил, сонгуулийн явц, санал тоололт нь ч тэр ямар ч “но”-гүй байлаа. Гэвч гурван сарын дараа асуудал үүсэв. Сеймийн спикер Арунас Валискасыг дэмжихэд цуглуулсан гарын үсэг хуурамч байж болзошгүй талаар Ерөнхий прокурорын газраас шүүхээс өмнөх мөрдлөгө явуулж эхэлсэн байлаа. Энэ хэргийг Ерөнхий прокурорын дэргэдэх зохион байгуулалттай гэмт хэрэг болон авлигыг мөрдөх хэлтэс хариуцсан байв. Яг энэ үеэр Валинаскасыг сэтгүүлчид гэмт хэргийн ертөнцтэй холбоотой хэмээн буруутгасны улмаас түүнийг Сеимийн спикерийн албан тушаалаас огцруулах талаар санал хураалаа. Хэдийгээр хууль сахиулах байгууллагын зүгээс спикер зохион байгуулалттай гэмт хэрэгтэй холбоотой талаар ямар ч баталгаа алга хэмээн мэдэгдсэн нь Ерөнхийлөгчид нэр дэвшсэн тэрбээр албан тушаалаа орхихоос өөр аргагүй болсон юм.

1.5 сая хуурамч саналын хуудас 

2009 оны наймдугаар сарын 20-ны өдөр Афганистанд Ерөнхийлөгчийн сонгууль болов. Энэ сонгуульд 36 нэр дэвшигч оролдон Хамид Карзай 54.6 хувиар ялалт байгуулсан юм. 2009 онд болсон энэхүү Ерөнхийлөгчийн сонгууль Талибын дэглэм унаснаас хойших хоёр дахь сонгууль байлаа. Эхний шатны дүнгээр тэр үеийн Ерөнхийлөгч Хамид Карзай болон сөрөг хүчнээс нэр дэвшсэн, Гадаад хэргийн сайд асан Абдуллаа Абдулла саналын хувиараа тэргүүлсэн юм. Сонгуулийн гол шуугиан олон улсын ажиглагчдын мэдэгдлийн дараа гарав. Саналын хуудасны 1.5 сая буюу нийт саналын хуудасны дөрөвний нэг нь хуурамч байж болзошгүй бөгөөд “сэжигтэй” саналын дөрөвний гурав нь Карзайд өгсөн байж. Хоёрдугаар шатны сонгуулийг 11 дүтээр сарын долооны өдөр товлов, гэвч товлосон өдөр болохоос хэдхэн хоногийн өмнө Абдулла гэнэт л сонгуульд оролцохоос татгалзаж байгаагаа мэдэгдлээ. Афганистаны хуулинд хоёр нэр дэвшигчийн аль нэг нь хоёр дахь шатны сонгуульд оролцохоос татгалзсан тохиолдлыг хэрхэн зохицуулах заалт байхгүй тул түүний энэ шийдвэр арайтай л хямрал үүсгэчихсэнгүй. Эцсийн дүнд НҮБ-ын тэргүүн Пан Ги Мунтай зөвшилцөн тус улсын сонгуулийн комисс хоёр дахь шатны сонгуулийг цуцалж, Хамид Карзайд ялалт өгч буйг зарлалаа.

Бас л хуурамч 

2010 оны нэгдүгээр сарын 17-ны өдөр Украин улсад Ерөнхийлөгчийн сонгууль болж эхний шатанд 18 нэр дэвшигч хоёр дахь шатанд хоёр нэр дэвшигч үлдсэн юм. Эхний шатанд Виктор Янукович 35.32 хувь, Юлия Тимошенко 25.05 хувийн саналаар тэргүүлж хоёр дахь шатанд Виктор Янукович 48.95 хувийн саналаар ялалт байгуулав. Хоёрдугаар сарын 10-ны өдөр Виктор Януковичийг ялагч хэмээн албан ёсоор зарласан бөгөөд үүнээс зургаа хоногийн дараа сонгуульд ялагдсан Тимошенко Украины Захиргааны дээд шүүхэд зарга мэдүүлсэн юм. Санал хураалт хуурамч байсан гэдгийг батлахын тулд Тимошенко сонгуульд оролцсон сонгогчдын жагсаалтыг сонгогчдын улсын бүртгэлийн жагсаалттай харьцуулахыг хүссэн түүний саналыг хүлээн авсан бол энэ хэрэг хэдэн сараар үргэлжилж, шинэ ерөнхийлөгч тангараг өргөх ёслол тодорхойгүй хугацаагаар хойшлох байлаа. Харин дахин дөрвөн өдрийн дараа Юлия Тимошенко өөрийн гаргасан өргөдлийг шүүхээс авч хэлэлцэхгүй байхыг хүсэв. Тэрбээр энэ шийдвэрээ сонгууль хууль бус болсон ч шүүх хэрэгсэхгүй гэдгийг ойлгосны улмаас ийм алхам хийсэн хэмээн тайлбарлажээ.

“Тоогоор тоглосон” ч шоглоом болов 

2010 оны 10 дугаар сарын 10-ны өдөр болсон Киргизийн Парламентын сонгууль мөн оны дөрөвдүгээр сард болсон “Алтанзул хувьсгал”-ын дараах анхны сонгууль байлаа. Энэ сонгуульд 29 нам оролцсоноос санал хураалтын дүнгээр тав нь харьцангуй олон санал авсан байлаа. Тэдний дундаас тухайн үеийн Ерөнхийлөгч Роза Отумбаевагийн сөргөлдөгч тал болох улс төрийн хөдөлгөөнүүд сайн дүн үзүүлсэн байв. Сонгуулийн дүнг зарласны дараа “Бутун Кыргызстан” /Нэгдсэн Кыргызстан/ нам Бишкек болон Ош хотноо эсэргүүцлийн жагсаал цуглаан зохион байгуулав. Тэдний дургүйцэх болсон шалтгаан нь энэ нам таван хувийн босгыг даваагүй гэж мэдэгдсэн Сонгуулийн төв хорооны мэдэгдэлтэй холбоотой. Намын өөрсдийнх нь мэдээллээр босгыг давахад шаардлагатай саналаас хэдэн зуугаар илүү санал авчээ. Намын тэргүүн Адахан Мадумаров Сонгуулийн төв хороог “тоогоор тоглож” байна хэмээн мэдэгдсэн юм. Комиссын төлөөлөгчдийн баталснаар тооцоолж байснаас 200000 хүнээр илүү сонгогч байсан нь босгын үзүүлэлтийг өсөхөд хүргэсэн гэнэ. Эсэргүүцлийн жагсаал ямар нэг ноцтой үр дагавар гаргалгүй өндөрлөж, сонгуулийн дүнг хэвээр батлав.

 Дэндүү “гэнэнтсэн” сонгууль

Өнгөрсөн оны 12 дугаар сарын 19-нд болсон Белоруссын Ерөнхийлөгчийн сонгуульд 10 нэр дэвшигч оролцож Александр Лукашенко ялалт байгуулав. Белоруссын Сонгуулийн төв хорооны албан ёсны мэдээллээр сонгуульд дөрөв дэх удаагаа оролцож буй тухайн үеийн Ерөнхийлөгч Александр Лукашенко нийт сонгогчдын 79.65 хувийн саналыг авчээ. Гэтэл сонгуулийн өмнө явуулсан санал асуулгын дүн болон сонгуулийн өдөр гаргасан санал хураалтын дүнгээр сонгогчдын ердөө 40 хувь нь л Лукашенког дэмжихэд бэлэн байж. Сонгуулийн хэсгүүд хаалгаа барихаас өмнө Лукашенког эсэргүүцэгчид Минскийн төвд цуглан 40000 орчим хүний бүрэлдэхүүнтэй зөвшөөрөлгүй цуглаан явуулав. Орой нь тэд Засгийн газрын ордныг барьцаалахыг оролдоод амжив. Гэвч энэ оролдлого, жагсаалыг хүчнийхэн тараав. Эцсийн дүнд Лукашенкод ялагдсан арван нэр дэвшигчийн долоо нь баривчлагдаж, жагсаалд оролцон баривчлагдсан 700 хүний адил шүүхийн тогтоол уншуулсан юм. Бас л сонгуулийн үр дүнд өөрчлөлт гарсангүй.

 Гурав дахиа сонгогдсон ерөнхийлөгч

2011 оны 11 дүгээр сарын зургааны өдөр Никарагуад болсон Ерөнхийлөгчийн сонгууль хэрүүл маргаан дагуулахгүй өнгөрч чадсангүй. Энэ сонгуульд таван нэр дэвшигч өрсөлдөн Даниель Ортега 63.95 хувиар ялалт байгуулсан юм. Харин сөрөг хүчнийхэн Даниель Ортегаг энэ албан тушаалд нэрээ дэвшүүлэх ямар ч эрхгүй байсан хэмээн буруутгаж байв. Тэрбээр 1985-1990 онд улс орныг удирдаж байсан бол 2006 онд хоёр дахь удаагаа Ерөнхийлөгч болжээ. Гэтэл 2009 оны 10 дугаар сард Никарагуагийн Дээд шүүх Үндсэн хуулийн 147 дугаар зүйлд заасан хоёр удаа сонгогдох хязгаарыг үл харгалзан Ерөнхийлөгчид дахин нэр дэвших зөвшөөрөл өгсөн байлаа. Тиймээс ч сонгуулийн дүнд дургүйцсэн Ортегаг эсэргүүцэгчид Манагуад эсэргүүцлийн жагсаал өрнүүлж түүнийг дэмжигчидтэй мөргөлдөж байв. Хожим нь энэ улсын хойд хэсэгт мөргөлдөөн нь буудалцаанаар солигдсон. Хэдийгээр олон улсын ажиглагчид сонгууль зөрчилтэй явсныг ажигласан ч сонгуулийг хууль бус гэж хүлээн зөвшөөрөөгүй юм.

Сөрөг хүчин ялагдав 

Ердөө өнгөрсөн сард болсон сонгууль хамгийн дуулиантай сонгуулийн жагсаалтанд багтсан. Энэ бол 2011 оны 11 дүгээр сарын 13 болон 27-нд Өмнөд Осетэд болсон Ерөнхийлөгчийн сонгууль. Сонгуулийн эхний шатанд 11 нэр дэвшигч өрсөлдсөн бол хоёр дахь шатанд хоёр нэр дэвшигч үлджээ. Энэ сонгууль Өмнөд Осетийн тусгаар тогтнолыг зарласнаас хойших Ерөнхийлөгчийн анхны сонгууль юм. Сонгуулийн эхний шатанд аль ч нэр дэвшигч сонгогчдын талаас илүү хувийн санал аваагүй байсан тул хоёр дахь шатыг товлон, тус улсын Онцгой байдлын сайд Анатолий Бибилов, Боловсролын сайд асан Алла Джиоева нар оролцов. Арван нэгдүгээр сарын 28-ны өдөр Сонгуулийн төв хорооноос 56.7 хувийн санал авсан Джиоеваг ялалт байгуулсан хэмээн мэдэгджээ. Харин Бибилов ердөө 40 хувийн санал авсан байж. Гэвч Бибиловын талынхан үүнийг эсэргүүцэж сонгуулийн өмнөх кампанит ажил, санал хураалтын үеэр зөрчил гарсан хэмээн Дээд шүүхэд хандсан юм. Тэдний энэ гомдлыг хүлээн аваад хоёр дахь шатны сонгуулийн дүнг цуцалсан. Хоёр дахь шатны сонгуулийн дахин санал хураалтыг ирэх оны гуравдугаар сарын 25-ны өдөр товлоод байна. Түүний зэрэгцээ дэмжигчид нь хэдийнэ жагсаал цуглаан хийгээд амжсан Алла Джиоева хариу гомдол мэдүүлэн ялалтыг нь хүлээн зөвшөөрөхийг шаардсан юм. Түүнчлэн тэрбээр өөрийгөө Өмнөд Осетийн Ерөнхийлөгч хэмээн хэдийнэ зарлачихаад байна.

Эх сурвалж: Улаанбаатар таймс