ЯМАРЧ ЗӨВШӨӨРӨЛГҮЙ ХЯТАЛ КОМПАНИЙНХАН НУРСАН БАРИЛГАА ХАЯАД ЗУГТЖЭЭ

2011-11-19

Нийслэлд өдрөөс өдөрт цаг, минуттай уралдан шинэ барилгууд сүндэрлэн босч байна. Сайны хажуугаар саар

зэрэгцэж чанаргүй барилгуудын тоо олшрох болов. "Барилга нурлаа, барилга дээрээс хүн унаж нас барлаа" гэсэн таагүй мэдээлэлд иргэд дасчихжээ. Дасчихаж гэсний учир нь барилгын салбарт ажиллаж байгаа компаниуд салбарынхаа хууль, дүрмийг хэрэгжүүлэхгүй байгаагаас болж үргэлж асуудалтай барилга босгож буй юм. Бид энэ удаад нийслэлийн Хан-Уул дүүргийн нэгдүгээр хороо "Дүнжингарав" хорооллын баруун урд босч буй "Home plaza" худалдааны төвийн барилгыг онцолж байна.

Тойрог хэлбэртэй автозамын дундахь бяцхан талбайд босч буй "Home plaza" худалдааны төвийн барилга өнгөрсөн есдүгээр сарын 15-нд нурсан талаар бид өмнө нь мэдээлсэн. Барилга нурсан шалтгааныг Нийслэлийн мэргэжлийн хяналтын байцаагч, захиалагч, зураг төсөл, ерөнхий гүйцэтгэгч болон эрдэм шинжилгээ, судалгааны байгууллагуудын оролцоотойгоор гаргажээ. "HAPPY MART"-ийн захиалгаар "Конконсалтинг" компанид боловсруулсан зураг төслийг баримтлан "Цахиур ван" компани ерөнхий гүйцэтгэгчээр ажиллаж байсан байна. Ингээд тус үйлчилгээний төвийн барилга угсралтын ажлыг гүйцэтгэхээр тохирч өнгөрсөн гуравдугаар сарын 18-нд "HAPPY MART" компанитай гэрээ байгуулжээ. "Цахиур ван" компани уг барилгын ажлыг гүйцэтгэхийн тулд БНХАУ-ын 100 хувийн хөрөнгө оруулалттай барилга угсралтын ажил эрхлэх ямар ч зөвшөөрөлгүй "ХУХОНГГЕН" компанитай өнгөрсөн дөрөвдүгээр сарын 22-ны өдөр 02 тоот "Барилгын ажил гүйцэтгэх гэрээ"-г "Ай энд Эр Монголиа" компанийн нэрээр байгуулж нуралт болох хүртэлх барилга угсралтын ажлыг гүйцэтгүүлсэн байна. Энэ нь барилгын тухай хуулийн 14 дүгээр зүйлийн 14.1-ийн "Барилга байгууламжийн угсралт, засвар үйлчилгээг тусгай зөвшөөрлийн үндсэн дээр эрхэлнэ" гэсэн заалтыг зөрчжээ.

Тус компанийн хятад ажилчид барилга нурсан өдөр буюу өнгөрсөн есдүгээр сарын 15-ны 23 цагийн үед барилгын ажлаа хийж байжээ. Энэ нь Хөдөлмөрийн хуулийн 72 дугаар зүйлийн 1-д зааснаар оройн 22 цагаас өглөөний 06 цаг хүртэл барилгын ажил явуулахгүй байх заалтыг ч зөрчсөн байна. Барилгыг гүйцэтгэгч, захиалагч байгууллагууд "Home plaza" худалдааны төвийн барилгын гурван давхрын төмөр бетон бүтээцийг цутгах хэв, хашмалын технологийг боловсруулаагүй, 12.4 метр өндөр зайд угсрах тулаасын даацын чадварыг тогтоолгоогүй, угсарсны дараа тогтворжилтын байдлыг шалгаж ачаалал, чичиргээнд найдвартай ажиллах нөхцлийг бүрдүүлээгүй ажээ. Үүнээс шалтгаалан бетон цутгалт хийж нягтруулах явцад уг давхрын цутгамал төмөр бетон бүтээцүүд нурсан гэж Нийслэлийн мэргэжлийн хяналтын газрын барилга хариуцсан байцаагч нар дүгнэлт гаргасан байна. Барилга нурах үед тухайн барилга дээр ажиллаж байсан хоёр хятад хүн бэртэж гэмтлийн эмнэлэгт хүргэгджээ. Харин барилгын зөвшөөрөлгүй боловч үйл ажиллагаа явуулж байсан "Хухонгген" компанийн хятад захирлууд тэр оройдоо нутаг руугаа зугтсан байна. Энэ барилгыг барихад анхнаасаа л ихээхэн "Но" байсан бололтой. Зураг төслийн үед газар хөдлөлтийн эрчмийг хэдэн баллаар авбал зохих нь тодорхойгүй, угсралтын үед хэрэглэсэн бетоны марк өөрчлөлт ихтэй гарсан байна. Захиалагч, гүйцэтгэгчийн захирлууд гуравдугаар давхрын багана, дам нуруу, хучилтын бетоныг өнгөрсөн есдүгээр сарын 15-16-нд шилжих шөнө цутгаж дуусаад гүний доргиураар нягтруулж байх үед гонх бүхий хэсгийн хучилтад нуралт үүссэн гэжээ.

Нуралт цаашид барилгын нийт уртыг хамран үргэлжилж барилгын багана, хучилт, үндсэн болон туслах дам нуруунууд нурах, хазайх, хотойх зэргээр хэв гажилтад орсон байна. Гүйцэтгэгч байгууллага нь захиалагчийн хүсэлтээр гол ба туслах дам нуруу, хучилтуудыг цутгалгүй гонх үлдээжээ. Нуралт үүссэн шөнийн 23 цагийн үед барилгын зарим тулаас хазгай байгааг захиалагч "Happy mart" компанийн захирал М.Энх-Амгалан туслан гүйцэтгэгчийн хятад инженерт анхааруулсан ч засах арга хэмжээ аваагүйгээс нуралт үүссэн байна.

Барилгын тулгуурыг лабораторид босоо чиглэлийн ачаалалд туршихад хоолойн нимгэн хана нь урагдах, бэхэлгээний хуруу төмөр муруйх, бэхэлгээний нүх сунах зэргээр эвдрэлд оржээ. Туршилтаар уг тулгуур 300 кг ачаанд эвдэрсэн нь хятадад үйлдвэрлэсэн тулгуурыг бат бэх хангалтгүй байсныг нотолсон байна. Барилгад нуралт гарах үеийн байгаль, цаг агаарын нөхцөл байдлыг тодруулахад Цаг уур, орчны шинжилгээний газрын Ус цаг уурын хүрээлэнгийнхэн "Энэ оны есдүгээр сарын 15-наас 16-нд шилжих шөнө, Улаанбаатар хот орчимд буюу танай албан бичигт дурьдсан газарт барилгад нөлөөлөх хэмжээний газар хөдлөлт болоогүйг мэдэгдье" гэсэн байна. Энэ нь уг барилгад нуралт болоход газрын ямар нэг нөлөө байгаагүйг нотолж байгаа юм.

"Happy mart " КОМПАНИ ҮЙЛЧИЛГЭЭНИЙХЭЭ ГАЗРЫГ ХЭРХЭН АВСАН БЭ?

"Happy mart” компанийнхан "Home plaza" худалдааны төвийн газрын зөвшөөрлийг хэрхэн авсан талаар сурвалжиллаа. Дээрх газарт үйлчилгээний төв баригдсаны дараа автомашины зогсоол болон явган хүний гарц тавихгүй бол хэцүү юм билээ. Гэвч энэхүү газрыг авсан бичиг баримт, зөвшөөрөл нь бүгд ном журмын дагуу байв. Замын голд байрлах энэ худалдааны төвийн барилгын газрыг танил талаа ашиглан авсан байх нь гарцаагүй. Иргэд замын голд байрлах дэлгүүр рүү орно гэдэг эрсдэлтэй,машинаа хаана байрлуулах вэ гээд асуудал олон. Харин энэ бүхнийг хариуцсан байгууллагын дарга нар үл тоож газрын зөвшөөрөл өгчээ. Нийслэлийн Засаг даргын өнгөрсөн оны захирамжаар үйлчилгээний зориулалтаар таван жилийн хугацаатай газар олгосон аж.

Уг талбайн нь Төв цэнгэлдэх хүрээлэн, Махатма Гандийн гудамжны уулзвар хэсгийн гурвалжин хэлбэрийн талбайг бүхэлд нь хамарч байгаа юм. Замын цагдаагийн газрын Замын зохион байгуулалтын тасгийн ахлах байцаагч, цагдаагийн дэд хурандаа Л.Гүнтэвсүрэн барилгын гаднах талбайн орц гарц, зай хэмжээний зургийг хийж, нөгөөдхийг нь тус газрын тасгийн дарга, цагдаагийн дэд хурандаа М.Ариунболд зөвшөөрч баталжээ. Монголд бүх зүйл ийм амархан бүтдэг бол ямар сайхан бэ. Харамсалтай нь мөнгөтэй компаниудын талд үйлчилдэг дарга нар хэтэрхий олон болжээ.

"ЦАХИУР ВАН"-ГИЙН ТУСГАЙ ЗӨВШӨӨРЛИЙГ ЦУЦЛАВ

Барилгын үйл ажиллагаа эрхлэх зөвшөөрөлгүй хятад компанийг туслан гүйцэгчээрээ ажиллуулсан "Цахиур ван" компанийн тусгай зөвшөөрлийг цуцалж, дахин барилгын салбарт үйл ажиллагаагаа явуулахгүй байх шийдвэрийг холбогдох байгууллагуудаас гаргажээ. Дээрх барилгын нурангийг цэвэрлэж эхнээс нь дахин барихаар болсон байна. Чанаргүй барилга баригдах явцдаа нурсан нь энэ удаад аз боллоо. Хэрэв ашиглалтад орсон хойноо нурсан бол олон хүний амь хохирох байв.

О.ЭРДЭНЭБҮРЭН

zuunii medee