Нийслэлийн Иргэдийн төлөөлөгчдийн ээлжит VII хуралдаан өчигдөр нийслэлийн Хангарьд ордонд боллоо. 09 цагт товлогдсон хуралд 29 төлөөлөгч ирснээр ирц бүрдэж, хурал эхэлсэн юм.

Хуралдааныг ИТХ-ын дарга Т.Билэгт нээж, хэлэлцэх асуудлуудыг танилцуулж, төлөөлөгчид батлан гар өргөсөн. Дараа нь нийслэлийн Засаг дарга бөгөөд Улаанбаатар хотын захирагч Г.Мөнхбаяр хэлэлцэх асуудлуудын талаар илтгэл тавив.

Өнгөрсөн онд 440 төсөл, арга хэмжээ хэрэгжүүлжээ
Нийслэлийн 2010 оны төсвийн гүйцэтгэлийг батлах тухай илтгэлийг хотын мэр танилцуулаад 2010 оны төсвийн орлогын гүйцэтгэлийг 138 тэрбум 707 сая 756 мянган төгрөгөөр, зарлагын санхүүжилтийг 81 тэрбум 629 сая 906 мянган төгрөгөөр баталж өгөхийг төлөөлөгчдөөс хүслээ. 2010 онд нийслэлд улсын төсвийн хөрөнгөөр 41.1 тэрбум, нийслэлийн төсвийн хөрөнгөөр 28.8 тэрбум, өөрийн хөрөнгөөр дараа төлөгдөх нөхцөлтэйгээр 50.4 тэрбум, нийт 120.3 тэрбум төгрөгийн 440 төсөл арга хэмжээг хэрэгжүүлжээ.

Эндээс нийслэлийн агаарын бохирдлыг бууруулахад 1.5 хувийн хөрөнгийг зарцуулжээ. Хөрөнгө оруулалтын хэмжээ нэмэгдэж байгаатай холбогдуулан төвлөрлийг сааруулах, хөрөнгө оруулалтын арга хэмжээг хэрэгжүүлэх, орон нутгийн болон төрийн захиргааны байгууллагуудын оролцоог нэмэгдүүлэх, үүрэг хариуцлагыг нь дээшлүүлэх зорилгоор дүүргүүдэд болон хэрэгжүүлэгч агентлаг, харьяа газруудад 2010 онд 21.1 тэрбум төгрөгийн 136 арга хэмжээний худалдан авах эрхийг шилжүүлсэн байна.

Нэмэгдэж буй хөрөнгийн 199 саяыг хот тохижуулахад зарцуулна.
Дараа нь 2011 оны төсөвт нэмэлт, өөрчлөлт оруулах тухай төслийг төлөөлөгчдөд танилцуулсан юм. Нийслэлийн батлагдсан төсвөөр төсвийн нийт орлого 151 тэрбум 318 сая төгрөг, нийт зарлага 133 тэрбум 342 сая 795 мянган төгрөг, улсын төсөвт 26 гаруй тэрбум төгрөг төвлөрүүлэхээр тусгасан. Төсөвт төвлөрч байгаа орлогын давалт нь нийслэлийн төсөвт тодотгол хийх үндэслэл болжээ. Тиймээс энэ оны нийслэлийн төсвийн орлогын хүлээгдэж буй гүйцэтгэлд үндэслэн төсвийн орлогын батлагдсан төлөвлөгөөг 38.1 тэрбумаар нэмэгдүүлж, 223 тэрбум 629 сая төгрөг байхаар оруулжээ. Хувь хүний орлогын татвар нь хотын төсвийн орлогын 70 гаруй хувийг бүрдүүлдэг байна. Энэ орлогоос төсөвт 105.5 тэрбум төгрөг төвлөрч төсөвлөсөн хэмжээнээс 24.5 тэрбумаар давж биелэхээр болжээ.

Энэ мэт нэмэгдсэн орлогын зэрэгцээ хасагдсан орлого бас байгаа аж. Тухайлбал, энэ онд нийтийн эзэмшлийн зам талбай төлбөртэй зогсоолтой байх тогтоолын дагуу 500 сая төгрөг төвлөрөхөөр баталсан нь хэрэгжих боломжгүй болжээ. Автомашин болон өөрөө явагч хэрэгслийн шинэчилсэн албан татварыг 2011 оны нэгдүгээр сарын 1-нээс мөрдөж эхэлснээр, 1.7 тэрбум төгрөгөөр замын санг арвижуулжээ. Зарлагын хувьд мөн нэмэгдэж байгаа. Гэхдээ урсгал зардлыг өнгөрсөн онд батлагдсан төсвийн дагуу зарцуулна. Тодотголоор орж ирж буй хөрөнгөөр "Автобус 3" компанийн хуримтлагдсан нийгмийн даатгалын өр болох 255.6 сая төгрөг, үндэсний цэцэрлэгт хүрээлэнгийн бүтээн байгуулалтад 1.117 тэрбум тусгасан, 2010 оны орлогын давалт 759.8 сая төгрөгийг тухайн байгууллагад зарцуулах эрх олгохоор болжээ.

Газар чөлөөлөх, "Хашаа-3" арга хэмжээ, явган хүний замыг засч сайжруулахад 364.9 сая төгрөг, үерийн далан, хур хог цэвэрлэх, золбин нохой, муур устгах зэрэг хот тохижуулах зардалд 199 сая төгрөг зэргийг тус тус нэмж тусгахаар оруулж иржээ. Энэ бүх зардал нь анх батлагдсан төсвөөс 11.4 тэрбум төгрөгөөр нэмэгдэж байгаа аж. Мөн дүүргүүдийн урсгал зардалд өөрчлөлт оруулжээ. Тухайлбал, хэсгийн ахлагчийн урамшууллын нэмэгдэл, 215 бүртгэлийн ажилтны үйл ажиллагааны зардал 212 сая төгрөг, ахмадын хорооны зардлыг санхүүжүүлэхээр болжээ. Урсгал зардлын тухайд дүүргүүд давсан орлогоороо шийдэх боломжтой юм байна.

Яаралтай түргэн тусламжид нэг тэрбумыг тусгах санал унажээ
Хотын мэрийг асуудлуудыг танилцуулсны дараа төлөөлөгчид асуултдаа хариулт авсан юм. Нийслэлийн иргэдийн хурлын төлөөлөгчид ихэвчлэн хог хаягдлыг зөөх, энэ онд шинээр баригдсан авто зам, гэр хороололд асфальтан зам тавих ажил хэзээ эхлэх боломжтойг асууж байв. Эдгээр асуултад холбогдох албан тушаалтнууд хариулахдаа "Цахилгааны мөнгөтэй хогны мөнгийг хамт авдаг болсноор бүрэн авч чаддаг болж байгаа. Урд нь 40 хувь ч хүрдэггүй байсан. Одооноос хогийг бүрэн зайлуулах боломжтой болж байна. Түүнчлэн хот тохижуулалтын паркийг шинэчлэхээр болсон. Энэ арга хэмжээ хэрэгжсэнээр хогтой холбоотой гомдол санал гарахгүй байх боломжтой. Хот тохижилтын парк шинэчлэлт хийхдээ нэг машины үнийг судалж байж 90 орчим сая төгрөг гэж тооцсон" гэж байв.

Энэ үеэр хотын дарга Г.Мөнхбаяр "Стандартын шаардлага хангасан машин авах ёстойг анхааруулж, самосваль авчирчихаад энэ хогны машин гээд зогсч байх ёсгүйг хатуу сануулсан юм. Мөн Э.Тамир төлөөлөгч "Нийслэлийн өмчит барилгуудын түрээсийн орлогыг нэмэгдүүлэх шаардлагатайг хэлж, хажууд нь байдаг хувийн хэвшлийн барилгууд өндөр үнээр түрээслээд хөгжөөд байхад нийслэлийн өмчийн барилгууд татаас авдгийг буруутгаж байв. Үүнд Нийслэлийн өмчийн харилцааны зүгээс "Түрээсийн үнийг өөрчлөх шаардлага бий. Тооцоо хийгээд Засаг даргад өргөн барихаар ажиллаж байгаа" гэснээс өөр тоймтой зүйл хэлсэнгүй.

Мөн "Хаягжуулах төсөлд 318 сая төгрөг суусан байгаа. Хаягжилт хэдэн хувьтай байгаа вэ" гэсэн Б.Бямбадорж төлөөлөгчийн асуултад Барилга, хот байгуулалт, төлөвлөлтийн газрын дарга Хүрэлбаатар "26 хороо шинээр байгуулагдсан. Үүнд нийт 1.250 тэрбум төгрөг зарцуулахаар байгаа. Зургаан хорооны хаягжилтад 318 сая төгрөг төсөвлөсөн" гэсэн хариулт өгсөн. Мөн төлөөлөгч Б.Ариунболд "Яаралтай түргэн тусламжийн төвд нэг тэрбумыг тодотголоор тусгаж өгөөч ээ гэсэн саналыг манай намын бүлгээс хүргүүлсэн. Эрүүл мэндийн тусламж авч чадахгүйгээс жилд 2200 гаруй хүн нас бардаг гэсэн тоо баримт байна. Үүнд анхаарлаа хандуулаач ээ. Мөн өмнөх хурлаас иргэний танхим байгуулах шийдвэр гарсан. Мөнгө бахгүй гээд энэ танхим ажилладаггүй. Шаардлагатай хөрөнгийг нь төсөвт тусгасан уу.

Төвийн зургаан дүүрэгт газар олгох гэсэн захирамжийг НИТХ гаргасан. Гэтэл "Тэнгис" кино театрын хажууд газар олгочихсон. Хоёр байгууллага хэрэлдээд хэл ам болоод байна. Нийслэлээс гарсан захирамжууд хэрэгжихгүй байна" гэхэд Засаг дарга Г.Мөнхбаяр "Салбарын сайдтай ярьсан. Дүүргийн эрүүл мэндийн нэгдлийг түшиглэж шийднэ. Гэр хороолол ихтэйгээс өвчин их гардаг. Дэд бүтцийг шийдэх чухал байгаа. Гэхдээ багцаар нь шийдэх боломжгүй. "Тэнгис" кино театрын 44 хувийг хот эзэмшдэг. Номын сан тухайн дүүрэгт хэрэгтэй байгаа. Тиймээс Засаг даргын шийдвэрээр барьж байгаа" гэсэн хариулт өгсөн юм. Харин иргэний танхимыг ажилд оруулахын тулд тодотголд 75 сая төгрөг тусчээ. Засварын ажил нь удахгүй дуусч, энэ сард нээлтээ хийхээр болжээ.

Хоёр цаг гаруй үргэлжилсэн асуулт хариулт дууссаны дараа төлөөлөгчид саналаа хэлсэн юм. Тухайлбал, төлөөлөгч Б.Баяндэлгэр: Архитай тэмцэхэд зориулан тусгасан 50 сая төгрөгийг есөн дүүрэгт тэнцүү хуваах саналыг хэлсэн. Мөн төлөөлөгч Х.Оюунцэцэг : төлбөртэй зогсоолын төлбөрийг сараар нь авах, төлөөлөгч Ц.Цогзолмаа: 2012 оны төсөвт яаралтай тусламжийг сайжруулах талаар заавал хөрөнгө тусгах, төлөөлөгч Б.Төмөрчулуун: хогны цахилгаан машины тендерийг яарал¬тай зарлах, төлөөлөгч Ж.Ганбаатар: Нийслэлийн иргэдийн төлөөлөгчийн хурал өөртөө нөөц хөрөнгө бий болгох, төлөөлөгч Б.Энх-Амгалан нийслэлийн Засаг даргын Тамгын газрын дэргэд архины эсрэг тэмцэх сурталчилгааны төв байгуулах зэрэг саналыг гаргаж байв.

Төлөөлөгчдийг саналаа хэлж дууссаны дараа Нийслэлийн 2010 оны төсвийн гүйцэтгэлийг батлах тухай, Нийслэлийн 2011 оны төсөвт нэмэлт өөрчлөлт оруулах тухай асуудлаар тус тус санал хураахад төлөөлөгчид 100 хувь дэмжсэн юм.

Д.НАВЧАА

niislel taims

ИТХ нийслэлийн төсвийн тодотголыг баталлаа
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
orosoos orj irsen bulgan shuba zah zeeliin vnees hymd zarna.mun borluulagch ajild awna.tsalin 4g zarah tutamd say tugrug olgono.utas 91915043 91914197

2012-09-21 | 11:19:26 | 122.201.18.150 |

Мэдээ
Гадаад мэдээ
Видео