Жилд л 70-80 хууль шинээр төрдөг гээд бод. Парламент мундаг ажилласан юм шиг байгаа биз. Харамсалтай нь тэдгээр хуулиудыг амьдралын хөрсөн дээр огт биелүүлдэггүй. Сүүлийн үед УИХ-ынхан өөрсдөө ч бусдыг үлгэрлэн хууль зөрчих нь элбэгшив.

Өнөөгийн Их хурлын дүр зургийг тольдвол амьдрал, ажил үйл нь урагшлахаа больсон бүтэлгүйхэн айл өрхийг санагдуулах юм.

Байгуулагдсан үеийн эхнээс л нэг хачин байсан даа. Харин С.Баярын санаачилгаар стандарт бус Засгийн газар байгуулж, парламентын хоёр их намыг өвөр түрийд нь оруулж чадсанаар, болох болохгүй олон хүнийг зөөлөн суудалд залснаар өнгөрсөн гурван жил гаруйг “Яахав дээ” гэхээр барсан.

Гэхдээ сонгогчдын емне хүлээсэн үүргээ олон талаар тасалдуулсан гэж болно. Ард иргэд УИХ-ын үйл ажиллагаанаас илт залхжээ. Телевиз нээхээр тэд хуралдах биш хэрэлдэж, уралцаж байх юм. Хулгайч, зэлгийчээрээ дуудалцах нь яс хавтайм гэж хэмээн манай айлын эмээ ярьж байлаа.

Жирийн сонгогчийн үг иймэрхүү. Үүнийг дэмий яриа гэвэл УИХ-ынхан өөрсдөө ч “анги хамт олноо голдог юм билээ.
Парламентад таван удаа сууснаараа хөөрөлдөхдөө УИХ-ын гишүүн, сайдын давхар хэргэмтэй Ц.Нямдорж “Би одоогийнх шиг ийм парламент үзсэнгүй. Үйл ажиллагааг нь ойлгоогүй гурван жил гаруй болчихлоо” гэж ярьсан байдаг.

Жинхэнэ парламентч гэхээр болсон энэ нөхөр юу хэлэв гээд бодохоор УИХ гэдэг байгууллага тун өөдгүй ажиллаж байгаа гэсэн үг болж таарна даа.

УИХ-д хулгайч, худалч олон бий. Бүр хөгшин залуу нохой гөлөгч шургалсан юм уу гэхээр энэ нь мөн Ц.Нямдорж залуу хуульч хоёрын дунд болсон хэрүүлээс үүдсэн айлгалт.

Парламентын танхимаас хамгийн олон сонсогддог нэг зүйл мөнгө хөрөнгөний асуудал. Алив асуудал дээр зөрөхөөрөө л “Чи их, би бага идсэн” гэцгээх. Тэгээд нохой, гахайгаараа дуудалцана. Төрийн эрх барих дээд байгууллагад заларч байгаа эрхмүүд ийм байж таарах уу.

Хамгийн сүүлийн жишээ гэхэд байнгын хорооны дарга нь нэг гишүүнтэйгээ ам муруйхдаа “Чи эрүүгийн элемент царайлаад…” гэж байх юм. Энэ бол санамсаргүй хэлсэн үг биш гэж олон түмэн ойлгож байгаа. Төрийн түшээ хүний үг бүр хариуцлагатай бас үнэн байх учиртай.

Тэгэхлээр УИХ-д эрүүгийн элемент хүртэл байгаа юм байна гэж ойлгож болох аж. Урьд нь улсын хөрөнгө мөнгө идсэн, уусан гэгдсэн, үнэндээ ч зувчуулсан, завшсан нь үнэн нөхөд хэд хэд бий. Д.Дондог, Х.Наранхүү нарыг хуулийн байгууллага шалгаж байгаа гэдэг.

Гэхдээ энэ нь өмнө нь илэрхий хөрөнгө мөнгөний асуудалтай холбогдсон Л. Гүндалай мэтийнхтэй адил замхарна биз. Үүнээс үүдээд бодохуйяа УИХ-ын гишүүний бүрэн эрх гэдэг асуудлыг хасах нь зөв юм. Тэгж гэмээнэ хууль иргэн бүрт тэгш үйлчилнэ гэсэн Үндсэн хуулийн заалт хэрэгжинэ.

Нэн ялантуяа авлига албан тушаалын хэрэг дээр жирийн иргэдийн адил хуулийн үйлчлэл УИХ-ыи гишүүдэд ногдуулж баймаар. Тэгж чадвал төр, нийгэм цэвэршиж чадна. Хэрвээ сонгогчдын дунд “Таны сонгосон гишүүн амлалт үүргээ биелүүлсэн үү” гэсэн судалгаа явуулбал лав 90 хувь нь “үгүй” гэсэн хариулт өгөх байх.

УИХ-ын сонгууль болоход ойртсоор. Гэтэл өнөөдөр сонгууль хийх хуулиа баталж чадахгүй маргалдсаар байх юм. Гишүүд алив асуудалд хувийн тоглолт хийсэн хандлагатай болж. Энэ нь нийгэмд ямар ч нөлөө алга. Зарим нь хуралдаа суух биш хувийн компанийнхаа барилгын талбарт л яваа сурагтай.

Иймээс УИХ-ыг даруйхан тараая. Хэдэн cap хэрүүл, хараал сонсохгүй шиг байя. Төрийн эрх эзгүйрэхгүй ээ. Ерөнхийлөгч гээд байна. Ардын түр парламект байгуулсан ч яадаг юм. Сонгууль болдгоороо л болно. Харин муу юм буюу долдугаар сарын нэгэн давтагдана гэж муу ёрлох бүр хэрэггүй.

Д.Бичээхүү

Эх сурвалж: “Зууны мэдээ”

Улсын их хурлыг тараая
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
их хурлийг тараая, АРД ТУМЭЭН ИХ ХУРЛИЙН СОНГУУЛИД САНАЛАА ОРОЛЦОХГУЙ БАЙХИЙГ УРИАЛЖ БАЙНА, ХЭН Н ЦХ ГАРСАН ДЭЭРДЭХ ЗУЙЛ ОГТ БАЙХГУЙГ БИД БУГД МЭДЭЖ БАЙГАА

2011-12-31 | 22:21:43 | 110.19.204.3 |

Мэдээ
Гадаад мэдээ
Видео