Уг нь бол ард түмэнд 10 хувь, дотоодын аж ахуй нэгжүүддээ 10 хувь… гэсэн шийдвэрийг УИХ-аас гаргасан юм. 39 дүгээр тогтоол гэдэг байх аа. Тэгсэн сая нэр бүхий хэдэн гишүүн “Ерөөсөө аж ахуй нэгжид 10 хувийг өгч яах юм. Бүгдийг нь ард түмэнд өгчихье. Сонгогчдодоо тараачихъя” гэсэн хуулийн төслийг Засгийн газарт санал авахаар оруулав. Засгийн газар үүнийг юу гэж дэмжихэв дээ гэж бодож байлаа. Тэгсэн тэнэгтдэг байна ш дээ. “Зөв, компаниудад ер нь хувьцаа өгч яадаг юм” гэсэн байх юм. Одоо Их хурлаар орно. Их хурлын 76 нөхөр бүгд ард түмэнд таалагдах гэж янз бүр болж байгаа цаг болохоор дуу нэгтэй дэмжих биз. Ингээд л иргэн бүр 1072 ширхэг хувьцаа эзэмшдэг баян хүмүүс болцгоох юм байна. Нөхцөл байдал ингэж л өрнөж байна. Энд нэг зүйлийг баталгаатай хэлэхэд иргэн бүрийг хувьцаа эзэмшигч болголоо гээд 20 жил үргэлжилж буй ард түмний ядуурал, өнөөдөр буй 38 хувь нь ядуу байгаа явдал арилахгүй ээ. Яагаад гэвэл энэ улс орныг нуруундаа үүрч яваа аж ахуй нэгжүүддээ ингэж хандаж байгаа болохоор. Ажил хийхгүйгээр амьдралаа авч явдаг хүн гэж байдаггүй юм. Ажлын байрыг үндэсний аж ахуй нэгжүүд бий болгодог юм. Энэ бол энгийн, хэнд ч ойлгомжтой асуудал.

Тэгэхээр ийм байна. Хувь хүнд хувьцаа тарааснаас аж ахуй нэгжүүдэд тараасан нь хамаагүй эрүүл шийдвэр, эцсийн үр дүн нь сайн байх юм. Ард түмнээ дорд үзэж байгаа юм биш, өнөөдрийн амьдралын бодит үнэн л энэ. Хувь хүн хувьцаагаа зарж идээд чацга болгоод дуусгана. Зарсан мөнгөөрөө цувдай, архи аваад дуусгана. Харин компаниуд эрхбиш хувьцааны үнэ цэнэ, эдийн засгийн тооцоо, үр дагаврыг мэдэх байлгүй дээ. Иргэдэд очсон хувьцааг тийм амар заруулахгүй байх арга хэмжээг хуулиар хийж өгнө л гэж байна. Хуулийг яаж л бол яаж өөрчилдөг нөхөд 76 дотор бий. Тийм болохоор иргэд хувьцаагаа зарж л таарна. Зарахыг нь хэн анаж байна гэхээр монгол хүнээр өөрсдийгөө халхавчилсан хятадууд. Тэд архи сөгнөж байгаад л монголчуудын хувьцааг авна шүү дээ. Цэнхэр, ягаан тасалбарын гашуун түүх Монголд бий. Түүх нь ердөө л ийм, иргэдийн зүгээс “Хувьцаа гэдгийг чинь ойлгохгүй байна, ойлгуулахгүй байна” гэж ялархаж хэвтэх хойгуур нь ойлгосон хэсэг нь хамаад авчихсан. Тэдгээр нь өнөөдрийн Монголын баячуул.

Тэгвэл өнөөдрийн өнгө аяс ер нь ямар байна вэ. Мөнөөх л 20 жилийн өмнөх шигээ “Наад хувьцааг чинь ойлгохгүй байна, ойлгуулахгүй байна” гэж төрдөө ялархаж байх хойгуур нь хятадууд архи сөгнөөд ороод ирлээ. Тэд Монголын баялгаар маш их мөнгө хийж байна. Манайхан тэднээс юу дутах юм бэ, Монголын компаниуд өвгөдийн үлдээсэн баялгаараа маш их мөнгө хийх чадвартай болчихоод байна шүү дээ. Эхнээсээ олон улсын том, том хөрөнгийн биржүүд дээр ажиллаад эхэлчихлээ. Ийм атал Их хурлын сонгууль ойртож буйтай холбоотойгоор Их хурлын тодорхой тооны гишүүд популизм хийж “Аж ахуй нэгжүүд яахав, ард түмнээ бодъё” гэх зүйл ярьж хэлэлцэх нь үндэсний эдийн засагтаа заналхийлж байгаа үйл явдал гэж үзэхээс өөр аргагүй. Та нарын авч тараадаг 500 сая, тэрбум төгрөгийг чинь үндэсний компаниуд л бий болгодгийг бүгд мэднэ. Та нар бүр сайн мэднэ.

“Монгол 999″ нэгдлээс жишээ авъя. Энэ нэгдэлд багтсан 2700 компани бий. Эздээр нь тооцоход 2700 хүн байна. Өнөөдрийн төрд буй нөхдүүд 2700 хүнд сайн болж харагдсанаас 2.7 сая хүнд сайн болж харагдах нь чухал байна. Үнэндээ 2700 хүнийг 2700-хан сонгогч хэмээн харж байна, УИХ-ын гишүүд. Тэгвэл энэ 2700 хүн чинь дотоодын нийт бүтээгдэхүүний 80 хувийг үйлдвэрлэж буй хүмүүс. Та бүхний төрөөс авч буй бүх мөнгийг бий болгож буй хүмүүс. Аливаад жаахан увайтай хандаач, гишүүд ээ. Жаахан жудагтай байгаач. Их хуралд л суухгүй бол үхчих гээд байна уу. Үүний төлөө юугаа ч золиход бэлэн байна уу. Социалист сэтгэлгээнээсээ сал, хагац. Баян, хөрөнгөтэй хүнийг үзэж чаддаггүй атаач зан чанар бол соц нийгэмд л байсан. Тэгсэн өнөөдрийн ардчилсан нийгмээс энэ чанар үнэртэж байгаа нь төрд хуучны сэтгэлгээтэй хүмүүс байгаагийн тод илрэл.

Таван толгойн хувьцааг (алсдаа үүнээс ч дутахгүй ордууд эдийн засгийн эргэлтэд орно гэдэгт итгэлтэй байна.сурв) үндэсний аж ахуй нэгжүүддээ өгөхөд олон эерэг хандлагыг авчирна. Наад зах нь ажлын байр нэмэгдэнэ. Гадныхан өндөр техник, технологийн хүчээр богино хугацаанд бүгдийг хамаад гарахыг зорино. Харин үндэсний хэд маань Монголын пролетариудаа чирээд явна. Хоёрт гэвэл Монгол Улс яг өөрийн эдийн засагтай, тэр нь тийм чадамжтай болж хараахан чадаагүй байна. Том гэгдэж буй дийлэнх компаниуд гадны хөрөнгө оруулалттай байсаар байна. Үндэсний гэгдэж буй том аж ахуй нэгжүүдийн цөөнгүй нь төрийн өмчит байх жишээтэй. Ийм нөхцөлд энэ улс орон, ард түмний нуруун дээрх ачаанаас үүрэлцэж буй дотоодын, хувийн хэдэн компаниа гадныхны ард зогсоож, итгэхгүй байж болмооргүй байна. Төр ч өөрөө муухай харагдаж байна. Төрсөн үрсээ гудамжинд гаргасан эцэг, эх шиг. Эдэндээ хувьцаагаа тараагаад өгчихвөл Монгол Улс өөрийн сайн эдийн засагтай болоод л явчихна. Үнэндээ өнөөдөр гадны хөрөнгө оруулалттай том компаниудын дийлэнх нь Монголын банкуудаар үйлчилгээ хийлгэхгүй, хийлгэх дургүй байгаа шүү дээ. Эдгээр гадны компаниудын зөвхөн зардлыг нь хянаад байхад л өнөөдрийн авлигын сүлжээнд том тээг болчихно. Гэвч тэгж чадахгүй л байна. Харин дотоодын хэдийнхээ нурууг нь автал татвар шимтгэлээ авч чадаж байна.

Энд гадны хөрөнгө оруулалтыг хорьж хаа гэсэн утгаар хандаж байгаа юм биш. Тэдэнтэй зэрэгцэх хэмжээний аж ахуй нэгжүүдтэй болоход энэхүү хувьцаа чинь их хэрэг болох гээд байна гэдгийг хэлж байна. Дайны дараахь Солонгосын жишээг бүгд мэднэ. Гадныхныг ямар ч татваргүйгээр хөрөнгийг нь оруулж, ядарсан ард түмнээ тэдний зарц болгож хоолтой, хувцастай 15 жил амьдруулсан. Ингээд нэг л өдөр төрөөс нь гадны хөрөнгө оруулалтуудыг ерөнхийд нь хавчсан хууль падхийтэл гаргасан. Тэр үед зарцлагдаж байсан ард түмэн нь хэдүйн үндэсний хэмжээний боловсон хүчнүүд, мэргэжлийн ажилтнууд болж, гадныхны туслан гүйцэтгэгч байсан Солонгосын компаниуд нь тэдэнтэй эн зэрэгцэхүйц техник, технологитой, санхүүгийн чадамжтай үндэсний компаниуд болчихсон байв. Ийм хэмжээнд очих нөхцөлийг Солонгосын төр бий болгож өгсөн. Санасандаа хүрсэн Солонгосын засаг төр нэг л өдөр хууль гаргаад өөрийн гэсэн эдийн засгаа хамгаалаад, бодлогоо улам сайжруулж, хэрэгжүүлсээр бар болсон билээ. Ердөө 15 жилийн дотор.

МАХН-ын Н.Энхбаяртан “Таван толгой”-г дундын өмч хэмээн ярьж байна. Тэгвэл дундын өмч байж болдоггүйг дэлхий дээр 100 шахам жил туршиж үзээд, хүн төрөлхтний тал хувийг хядаж байж яс махандаа тултал ойлгоо биз дээ, ертөнцийн хүмүүс. Нэг намын төлөөлөл болох энэ нөхөр юу гэж ч бурж болно, ардчилсан нийгэмд. Харин өнөөдрийн төр бол ингэж болохгүй. Огт болохгүй. Н.Энхбаяр нар яахав. Ямар ялах юм биш. Юу гэж ч ярьж болно. Хоёр ориг нь хоёр хулхи шигээ ийм буруу пиар хийгээд сууж болохгүй. Алсыг хардаг, амьдралын үнэнтэй эвлэрдэг, ард нь гарах үр дүнг тооцож чаддаг, ер нь бол зөвийг дэмжих гишүүд саарал байшинд байгаа байлгүй дээ.

Ингэхээр ард түмэнд ч хувьцаагаа өг. Аж ахуй нэгжид нь ч чөлөөтэй өг. Энэ хоёр өгснөөс эцсийн дүндээ аж ахуй нэгжүүдэд өгсөн хувьцаа л “юм” болж үлдэнэ. Яагаад гэвэл тэд цувдай, хувьцаа хоёроо ялгахтайгаа болохоор.

П.ХАШЧУЛУУН

ХУВЬЦАА, ЦУВДАЙ хоёроо ялгахгүй юмнуудад “Таван толгой”-г тарааж чацга болгомооргүй байна
Tweet
Bolod.mn

Сэтгэгдэл (2)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Зөв.Хүн өөрийгөө л тэжээдэг. Үндэсний компаниуд тэжээдэг гэвүү. Тэнд чи насаараа ажиллаад авсныхаа мөнгийг хурааж харагдаач. Нэг алдаан дээр чинь тоглочиxно. Хувьцаа цувдай 2-оо мэдэxгүй гэвүү. төрөлxийн тэнэг биш бол заалгаад сурчиxна . Ард түмнийг битгий доромжил.

2011-10-27 | 20:09:43 | 202.126.91.246 |

Зочин
Бүгд хэдхэн луйварчдийн охин компаниуд.Цагаан шонхорын охин компаниуд гэхэд 1000 гаран гэдэг шүү дээ.

2011-10-22 | 11:57:00 | 66.218.47.209 |