хоёр орны иж бүрэн түншлэлийн харилцааг илтгэн харуулсан үйл явдал юм” гэж Ерөнхий сайд С.Батболдын онцолсон хатагтай Ангела Меркелийн айлчлал 9.00 цагт Сүхбаатарын талбайд угтах ёслолоор эхэлсэн. Энэ үеэр хүндэт харуул, морьт цэргүүд жагсаж, хоёр орны Төрийн дууллыг эгшиглүүлэв.

Ёслолын ажиллагаанд Монголын талаас Гадаад харилцааны сайд Г.Занданшатар, Монгол Улсаас ХБНГУ-д суугаа Элчин сайд Б.Даваадорж, Батлан хамгаалахын сайд Л.Болд, Эрдэс баялаг, эрчим хүчний сайд Д.Зоригт, УИХ дахь Монгол, Германы парламентын бүлгийн дарга Б.Тэрбишдагва болон албаны бусад төлөөлөгч байлцлаа. ХБНГУ-ын талаас Бундестагийн гишүүн Юрген Коппелин, Михаэль Фукс, Дагмар Энкельманн, Уте Кумпф, болон Төрийн нарийн бичгийн дарга, Холбооны Засгийн газрын хэвлэлийн төлөөлөгч Штефан Зайберт нар оролцсон. Хоёр улсын Засгийн газрын тэргүүн Чингис хааны хөшөөнд хүндэтгэл үзүүлж, Төрийн ордны хүндэт зочны дэвтэрт гарын үсэг зурснаар албан ёсны хэлэлцээрийг эхлүүлсэн. Нэг цаг орчим үргэлжилсэн хэлэлцээрийн дараа Ерөнхий сайд С.Батболд, Канцлер Ангела Меркел нар Монгол, Германы харилцаа, хамтын ажиллагааны баримт бичгүүдэд гарын үсэг зурах ёслолд оролцсон юм.

Ашигт малтмал, аж үйлдвэр болон технологийн салбарт хамтран ажиллах тухай хоёр орны Засгийн газар хоорондын хэлэлцээрт Монголын талаас ЭБЭХ-ний сайд Д.Зоригт, Германы талаас ХБНГУ-аас Монгол Улсад суугаа Онц бөгөөд Бүрэн Эрхт Элчин сайд Петер Шаллер, тус улсын Эдийн засаг, технологийн яамны Төрийн нарийн бичгийн дарга Ёохен Хоманн нар, Уурхайн гэрээт олборлогчдын тухай хэлэлцээрт “Эрдэнэс Тавантолгой” компани, “ББМ Оперта” групп хоорондын гэрээнд “Эрдэнэс Тавантолгой” компанийн гүйцэтгэх захирал Б.Энэбиш, ББМ Оперта группийн ерөнхийлөгч Вольганг Петерс, Хамтран ажиллах тухай “Эрдэнэс Тавантолгой” компани, “Сийменс” компани хоорондын ерөнхий гэрээнд “Эрдэнэс Тавантолгой” компанийн гүйцэтгэх захирал Б.Энэбиш, “Сийменс” компанийн Эрчим хүчний үйлдвэрлэл хариуцсан гүйцэтгэх захирал Маркус Таке нар гарын үзэг зурлаа. Улаанбаатар хотод шинээр баригдах суурьшлын бүс дэх усны тогтвортой ашиглалтын болон усны хангамжийн техник, эдийн засгийн үндэслэл боловсруулах зөвлөх үйлчилгээний тухай Нийслэлийн Хөрөнгө оруулалтын газар, ХБНГУ-ын “ГАУФФ инженеринг” компанийн хоорондын хэлэлцээрт Улаанбаатар хотын ерөнхий менежер Ч.Бат, “ГАУФФ инженеринг” компанийн ерөнхийлөгч Увэ Гауф нар гарын үсэг зурж баталгаажууллаа.

Монгол Улсын Шинжлэх ухааны академи, Линдао Нобелийн шагналтнуудын Зөвлөл, Констанс нуурын эрэг дээрх Линдао Нобелийн шагналтнуудын уулзалтын сан хооронд байгуулах Харилцан ойлголцлын санамж бичиг болон Монгол Улсын ШУА, Дюссельдорф хот дахь Герда Хенкелийн сан хоорондын Археологийн салбарын шинжлэх ухааны хамтын ажиллагааны тохиролцоонд Монголын талаас ШУА-ийн Ерөнхийлөгч Б.Энхтүвшин, Германы талаас Герда Хенкелийн сангийн Төлөөлөн удирдах зөвлөлийн дарга Микел Ханслер нар гарын үсэг зурсан юм.

А.Меркель:Монгол Улсыг ЕХАБХАБ-д гишүүнээр элсүүлэхийг дэмжинэ

Дээрх ёслолын дараа Засгийн газрын тэргүүнүүд айлчлалыг сурвалжилж буй хэвлэлийнхэнд мэдээлэл хийв.

С.Батболд:-ХБНГУ-ын Канцлер, эрхэмсэг хатагтай Ангела Меркелийн Монгол Улсад хийсэн айлчлал амжилттай боллоо. Европ дахь Монголын гол түнш ХБНГУ-тай харилцаа, хамтын ажиллагаагаа хөгжүүлэх нь манай улсын гадаад бодлогын тэргүүлэх зорилтын нэг юм. Бидний яриа хэлэлцээр амжилттай болж өндөрлөлөө. Эдийн засгийн хамтын ажиллагааг хөгжүүлэх Германы хөрөнгө оруулалтыг татах, уул уурхай, дэд бүтцийн томоохон төслүүдэд тэргүүний дэвшилтэт технологи нэвтрүүлэх талаар санал солилцлоо. Түүхий эдийг шууд экспортлох бус аль болох өртөг шингэсэн бүтээгдэхүүн үйлдвэрлэж, экспортлохын тулд байгаль орчинд халгүй техник, технологи нэвтрүүлэх, Монголд өрнөж буй ардчилал, зах зээлийг улам гүнзгийрүүлэх, Герман улсын туршлагаас суралцах, сонгуулийн тогтолцоог боловсронгуй болгоход тодорхой дэмжлэг үзүүлэх, шинжлэх, боловсрол, батлан хамгаалах, эрүүл мэнд, нийгмийн салбарт хамтран ажиллах зэрэг тодорхой сэдвийг хөндөж ярилцлаа. Хоёр талын болон бүс нутгийн асуудлаар хамтран ажиллах талаар санал солилцсон. Эрхэмсэг хатагтайн энэ удаагийн айлчлал хоёр улсын харилцаа, хамтын ажиллагааг хөгжүүлэхэд чухал ач холбогдолтой, түлхэц өгсөн түүхэн үйл явдал боллоо гэж дүгнэж байна.

А.Меркель:Холбооны Канцлерийн хувьд анх удаа Монголд айлчилсандаа баяртай байна. Халуун дотноор хүлээж авсан монголын ард түмэн,төр, засгийн удирдлагад талархал илэрхийлье. Монгол, Герман улс орон зайн хувьд хол ч эртний түүхэн харилцаатай улс юм. Монгол Улс сүүлийн 20 жилд ардчилал, зах зээлийг амжилттай хөгжүүлж ирснийг Герман улс анхааралтай ажиглаж, сайшаадаг. Монгол Улсын Парламентад үг хэлэх завшаан олдсонд би туйлын их баяртай байгаа. Сонгуулийн тогтолцоог боловсронгуй болгох, эдийн засгийн хамтын ажиллагааг цаашид улам хөгжүүлэх чиглэлээр хамтран ажиллах боломж бололцоо бий гэж үзэж байна. Хоёр талын гарын үсэг зурж байгуулсан гэрээ, хэлэлцээрийг бодит ажил болно гэдэгт итгэлтэй байна. Ашигт малтмал, аж үйлдвэр болон бусад салбарт хамтран ажиллах хэлэлцээрт гарын үсэг зурлаа. Байгаль орчинд ээлтэй, үр ашиг өндөр технологийг нэвтрүүлэх, боловсон хүчин бэлтгэж өгөх чиглэлээр анхаарч ажиллана. Манай хоёр орон батлан хамгаалах салбарт амжилттай хамтран ажиллаж байна. Монгол Улсыг Европын холбоотой хамтын ажиллагаагаа өргөжүүлэх, Европын холбооны аюулгүй байдал, хамтын ажиллагааны байгууллага (ЕХАБХАБ)-ын гишүүнээр элсүүлэхийг Германы тал дэмжиж байна. Хоёр улсын харилцаа, хамтын ажиллагаанд энэхүү айлчлал шинэ хуудас нээлээ. Гарын үсэг зурсан хэлэлцээр, баримт бичгүүдийг ажил хэрэг болгох, бодит үр дүнд хүргэхийн төлөө ХБНГУ-ын Канлерийн хувьд анхаарч ажиллах болно.

-Манай хоёр орон харилцааны урт түүхтэй ч томоохон төслүүдэд хамтран ажилласан туршлага бага. Хоёр орны эрх ашгийг нэгтгэсэн ирээдүйн хөгжлийн гарцыг Та хэрхэн харж байна вэ?

А.Меркель:-Тантай санал нэг байна. Хоёр тал хамтраад хэрэгжүүсэн томоохон төсөл одоогоор байхгүй байгаа. Ашигт малтмал, аж үйлдвэр болон технологийн салбарт хамтран ажиллах, “Эрдэнэс Тавантолгой”, “Сийменс” компани хоорондын ерөнхий гэрээнд гарын үзэг зурлаа. Цаашдаа эдийн засгийн хамтын ажиллагааг улам хөгжүүлэхийн тулд өөр томоохон төслүүдэд хамтран ажиллах болно.

-Ардчиллыг бэхжүүлэх талаар Та Холбооны Канцлертэй санал солилцсон гэсэн. Монголд ардчиллыг бэхжүүлэх талаар цаашдаа ямар арга хэмжээ авах вэ?

С.Батболд:-ХБНГУ-ын Канцлертэй харилцаа, хамтын ажиллагааны олон асуудлаар ажил хэрэгч яриа өрнүүлж, санал солилцсон. Монголд өрнөж буй ардчиллын үйл явцыг улам гүнзгийрүүлж, баталгаажуулах, сонгуулийн тогтолцооны шинэчлэлийн талаар харилцан ярилцсанд миний сэтгэл хангалуун байгаа. Герман улсын туршлагыг судлах нь бидэнд үнэтэй зүйл байх болно.

Монгол Улсад албаны ёсны айлчлал хийсэн ХБНГУ-ын Канцлер Ангела Меркель Ерөнхийлөгч Ц.Элбэгдорж, УИХ-ын дарга Д.Дэмбэрэл нарт бараалхаж, УИХ-ын хүндэтгэлийн чуулганд оролцож үг хэлсэн юм. Мөн Афганистан дахь Германы цэргийн удирдлагад алба хаасан Монгол цэргийн төлөөлөл, Германы цэргийн сургагч нартай уулзлаа. Манай улсад суугаа ХБНГУ-ын Элчин сайдын яаманд зочилж, иргэний нийгмийн төлөөлөл, Германд сургууль төгсөгчдийн төлөөлөлтэй уулзсан байна.

Эрхэмсэг хатагтай А.Меркелийг хүндэтгэн зоог барих үеэрээ Монголын зуны дэлгэр цагт арай урт хугацаагаар дахин айлчлахыг Ерөнхий сайд С.Батболд урьжээ. Хэдий богино хугацаагаар айлчилсан ч Монголын үзэсгэлэнт байгаль, хүн ардынх нь зочломтгой сайхан зан чанарыг мэдэрлээ гэдгээ А.Меркель хэлээд Монгол Улсын Ерөнхий сайдыг ХБНГУ-д хариу айлчлахыг урьжээ. Хатагтай А.Меркель өчигдөр 15.20 цагт Чингис хаан олон улсын нисэх буудлаас Бүгд найрамдах социалист Вьетнам улсыг зорилоо.