байрлалтай уг байрны нэг давхарын оршин суугчид өргөтгөл хийж үйлчилгээний газрууд ажиллуулж байв. Автобусны буудлын араар байрлах эдгээр үйлчилгээний газрууд чамгүй ашиг олж үүгээрээ оршин суугчид амин зуулгынхаа эх үүсвэрийг хийж байлаа.

Гэсэн ч 1950-иад онд баригдсан уг байрны даац муудаж, дээврээр нь борооны ус орж хөгц мөөг ургасан гэх мэтчилэн асуудал үүсэж байв. Яг энэ үеэр мэргэжлийн хяналтын газрын “Ашиглалтын шаардлага хангахгүй” гэх дүгнэлт гарч түүнээс хойш тун удалгүй уг байрны оршин суугчдыг байраа чөлөөлөхийг шаардаж цахилгааныг таслах, ид хүйтнээр дулааныг нь зогсоох гэх мэтчилэнгээр дарамталж эхэлжээ.

Гэтэл иргэдийн эмзэг байдлыг дөрөөлсөн хүмүүс “Хуучин байрыг нь нурааж газар дээр нь шинэ байр барьж өгөх” санал тавьсан нь оршин суугчдад таатай сонсогдсон нь мэдээж. Ингээд гэрээ хэлцэл хийж, 44 дүгээр байрны газар дээр шинэ барилга барих компани, уг байрны оршин суугчидтай гэрээ хийж гарын үсэг зуруулж хөл болжээ. Тухайн үед оршин суугчид хотын мэрт далаараа цэвэр тавиулж байгаагаа мэдсэнгүй. Зөвхөн тог цахилгаанаа таслуулсан хүйтэн, чийгтэй дээрээс нь юу юугүй нурах дөхөж байгаа эл байрнаасаа гарч шинэ байранд орохын түүс болж байв.

Энэ явдал болсноос хойш хоёр жил гаруй хугацаа өнгөрсөн боловч оршин суугчдын хүлээсэн байрны сураг гарсангүй. Ингээд 44 дүгээр байрны оршин суугчид байрныхаа сургийг гаргах шинэ ажилтай болж хөөцөлдөж эхэлжээ. Гэтэл тэдэнд шинэ байр өгөх нь бүү хэл байрных нь мөнгийг тухайн үеийн ханшаар бодож өгөх асуудал яригджээ.

Хэрэв 44 дүгээр байрны оршин суугчдын байрыг тухайн үеийн ханшаар үнэлж мөнгийг нь өгвөл одоо хотын төвийн нэг өрөө байрны үнэ хүрэхгүй. Анх байрыг нь нурааж оронд нь шинэ байр барих асуудал яригдаж байх үе буюу 2009 онд байрны үнэ харьцангуй хямд байв. Түүнээс хойш хэд дахин нэмэгдсэн гэдгийг иргэд мэдэж байгаа. Тэгэхээр хэн ч гэсэн алдаатай наймаа хийхийг хүсэхгүй.

Тиймээс анх хийсэн яриа хэлэлцээрийнхээ дагуу хуучин байрныхаа буурин дээр баригдах шинэ байрнаас авъя. Гэхдээ хуучин байрныхаа кв/м-ээр бодно гэсэн санал хэлтэл “44 дүгээр байрны газар нь өөр компанийн мэдэлд байна. Тэгэхээр энэ асуудал та нарт хамаагүй” гэсэн хариу сонсчээ. Ингээд хэрэг мандах нь тэр.

Асуудлын мөрөөр мөшгөвөл Нийслэлийн Засаг дарга бөгөөд Улаанбаатар хотын захирагч Г.Мөнхбаяр 2009 оны 08-р сарын 07-ны өдрийн 405 тоот захирамжаараа тус байрны нийтийн эзэмшлийн газрыг 44-р байрны “Хөгжил” СӨХ-ийн гүйцэтгэх захирал байсан Т.Дашжаргал гэх эмэгтэйн охин С.Энхтуяагийн хувийн “Си Би Эл” компаний нэр дээр баталгаажуулж өгсөн байх нь тэр. Гэтэл оршин суугчдыг байрнаас нь 2009 оны 10 дугаар сард гаргасан байдаг. Тэгэхээр иргэдийг байрандаа байх үед нь “Си Би Эл” компани 44 дүгээр байрны газрыг аль хэдий өөрийн болгоод оршин суугчдыг хэрхэн хөөхөө бодож төлөвлөгөөгөө боловсруулж байжээ.

Хамгийн сонирхолтой нь 44 дүгээр байрны газрыг Нийслэлийн Засаг дарга бөгөөд Улаанбаатар хотын захирагч Г.Мөнхбаяр хувийн компанид шилжүүлсэн асуудал. Ном ёсоороо бол 44 дүгээр байрны газар тухайн байрны оршин суугчдын нийтийн эзэмшлийнх. Мөн иргэдэд газар дээр нь шинэ байр барьж өгөх асуудлыг мэдэхийн дээдээр мэдэж байж яагаад газрыг нь өөр компанид шилжүүлэх захирамж бичиг гаргаж гарын үсгээ мутарлав гэдэг нь их сонин.

Байраа чөлөөлж өгсөн иргэд өнгөрсөн хоёр жилийн хугацаанд ихэвчлэн хөлсний байр дамжин амьдарч байсан хэдэн төгрөгөө гөвж дуусчээ. Мэдээж мөнгө төгрөгний бололцоотой нь шүү дээ. Харин санхүүгийн бэрхшээлтэй иргэд хашаа байшин бараадаж сүүлдээ гудамжинд гарах дээрээ тулжээ. Мөн дайны хажуугаар дажин гэгчээр 44 дүгээр байрыг нураах сургаар гэмт этгээдүүд цонхыг хагалж дотогшоо нэвтрэн айлын зурагт болон цонхоор зөөвөрлөж болох ойр зуурын эд хогшил зэргийг хулгайлан одсон аж. Энэ мэтчилэнгээр давхар, давхар хохирч байгаа иргэд одоо байр бүү хэл газар ч үгүй болж ёстой л дээшээ тэнгэр хол, доошоо газар хатуу гэгчийн үлгэр болж Нийслэлийн Баянзүрх дүүргийн 6-р хорооны цэргийн 44-р байрны сууц өмчлөгчдийн гарын үсэг бүхий захидлыг Нийслэлийн засаг дарга бөгөөд Улаанбаатар хотын захирагч Г.Мөнхбаярт хүргүүлжээ.

Түүнчлэн 44 дүгээр байрны араас орж магадгүй болоод байгаа 40,50,120 мянгатын оршин суугчид болон хуучин орон сууцны оршин суугчдад энэ мэт залилангийн шинжтэй хэргийн хохирогч болохоос сэрэмжлүүлэв.

БАЙРАА НУРААЛГАЖ, ГАЗРАА АЛДСАН БИД ОДОО ЯАХ ВЭ,
Г.МӨНХБАЯР ДАРГАА
Иргэдээс ирсэн захидал

Нийслэлийн засаг дарга бөгөөд Улаанбаатар хотын захирагч аа, таны гаргасан захирамжийн уршгаар Монгол Улсын иргэд бидний эрх ашиг хохирч, Монгол Улсын хуулиар олгогдсон эрхээ эдэлж чадахгүй болоод байгаа тул Улаанбаатар хотын БЗД-ийн 6 дугаар хорооны нутаг дэвсгэрт төв зам дагуу байрлаж байсан 44 дүгээр байрны асуудлаар тус байрны сууц өмчлөгчид бид Танд дахин хандаж байна.

Улаанбаатар хотын “А” зэрэглэлийн бүсэд төв зам дагуу байрладаг /ХХААХҮЯ-ны замын урд байдаг/ цэргийн 44-р байрыг ашиглалтын шаардлага хангахгүй гэсэн мэргэжлийн байгууллагын дүгнэлт гарч тус байрны сууц өмчлөгчдийг 2009 оны 10-р сард хүйтний улирал эхэлж байхад дулаан цахилгааныг нь таслах зэргээр орон байрнаасаа гарахаас аргагүй хүнд байдалд зориуд оруулж дараа нь уг байран дээр газар хөдлөлтийн үед ажиллах улсын онцгой байдлын сургуулилт хийж нураахад Монгол Улсын Шадар сайд М.Энхболд, Нийслэлийн засаг дарга бөгөөд Улаанбаатар хотын захирагч Г.Мөнхбаяр Та бүхэн хэвлэл мэдээллийнхнийг байлцуулан оролцсон билээ.

Ингэж иргэдийн өмч хөрөнгөд бүдүүлгээр халдаж, яаран нурааж сүйтгэхдээ оршин суугчдын зөвшөөрлийг аваагүй явдал нь орон байргүй болж ядарсан ард иргэдээрээ тохуурхаж даажигнасан юм шиг санагддаг. Энэ бүхний цаана тус байрны иргэд хохирч байгаа эсэхийг сэтгүүлчид асуухад оршин суугчдыг хохиролгүй болгоход анхаарч байгаа гэж хэвлэлийнхний өмнө Та ярьж байсан нь хадгалагдан үлджээ.

Энэ явдлаас хойш бүтэн нэг жил гарангийн хугацаа өнгөрөхөд таны байлцаж нураасан бидний өмч хөрөнгө хэнд ч хэрэггүй овоолгоотой шороо л болж хувираад байна. Тус байрны оршин суугчид өнөөдөр өмч хөрөнгөөрөө хохироод зогсоогүй сэтгэл санаа, мөнгө төгрөгний үлэмж хохирол амсаж, төр засаг, ирээдүйдээ итгэх итгэл алдарч, зарим нэгний нь амьдрал гудамжинд гарах дээрээ тулаад аргаа барж явна.

Нийслэлийн засаг дарга бөгөөд Улаанбаатар хотын захирагч Та 2009 оны 08-р сарын 07-ны өдрийн 405 тоот захирамжаараа тус байрны нийтийн эзэмшлийн газрыг 44-р байрны “Хөгжил” СӨХ-ийн гүйцэтгэх захирал байсан Т.Дашжаргалын охин С.Энхтуяагийн хувийн “Си Би Эл” компаний нэр дээр баталгаажуулж өгсөн нь биднийг ийнхүү хохироох үндсийг тавьсныг бид өмнө нь уламжилж, захирамжаа цуцалж өгөхийг хүссэн боловч Та болон Таны удирдлагад ажилладаг албан тушаалтнууд оршин суугчдын хүсэлтийг анхаарч үзсэнгүй өдийг хүрлээ.

Өнөөдөр 44-р байрны нийтийн эзэмшлийн газар “Хөгжил” СӨХ-ийн гүйцэтгэх захирал байсан Т.Дашжаргалын гэр бүлийн мэдэлд байгаагаас газрын маргаантай асуудал бий болж, сууц өмчлөгчид байрны асуудлаа шийдэж чадахгүйд хүрээд байна. Тус байрны сууц өмчлөгчид бүхэлдээ ганцхан гэр бүлийн эрхшээлд орж, “Дээшээ тэнгэр хол, доошоо газар хатуу” гэгч л болж хувираад байна. Улаанбаатар хотын “А” зэрэглэлийн бүсэд төв зам дагуу байрладаг тус байрны газрыг нийт сууц өмчлөгчдөд мэдэгдэлгүй ганцхан гэр бүлийн мэдэлд өгдөг нь шударга ёс уу?.
Төр засгаас ашиглалтын шаардлага хангахгүй болсон нийтийн зориулалттай орон сууц өмчлөгчдийн эрх ашгийг хамгаалсан хууль эрх зүйн орчинг шинээр бүрдүүлж, хуучин орон сууцны талбайн хэмжээнээсээ багагүй шинэ орон сууцтай болох боломж бий болголоо.

Иймд 44-р байрны сууц өмчлөгчид бидний Монгол Улсын хуулиар олгогдсон эрхээ эдлэхэд саад болж, бидний эрх ашгийг хохирооход хүргэж байгаа газрын луйвар, залилангийн шинжтэй дээрх асуудлыг Та анхааралдаа авч нийтийн эзэмшлийн орон сууцны талбайг ганц гэр бүлийн хувийн компаний мэдэлд шилжүүлсэн захирамжаа даруй хүчингүй болгож, 44-р байрны сууц өмчлөгчид биднийг хуулиар олгогдсон эрхээ эдлэж /Монгол Улсын орон сууцны шинэчилсэн хуулийн тавдугаар бүлгийн 151.3, 1514.-д заасан/ хуучин орон сууцныхаа буурин дээр шинэ орон сууц барьж хуучин орон сууцны талбайн хэмжээнээсээ багагүй шинэ орон сууцтай болох боломжийг хангахад анхаарлаа хандуулж, хөрөнгө оруулагч олж шалгаруулахад туслахыг Таниас хичээнгүйлэн хүсч байна.

44-р байрны сууц өмчлөгчдийн итгэлийг алдсан “Хөгжил” СӨХ-ийн гүйцэтгэх захирал байсан Т.Дашжаргал нь биднийг хууль ёсоор төлөөлөх эрхгүй бөгөөд тус байрны сууц өмчлөгчдийн олонхийн хурлаар түүнийг “Хөгжил” СӨХ-ийн гүйцэтгэх захирлаас өөрчилсөн боловч тамга тэмдгээ хүлээлгэж өгөхгүй хууль бус үйлдэл үзүүлж байгааг үүгээр давхар мэдэгдэж байна.

luivarmn

Хотын мэр Г.Мөнхбаяр байр нурааж, газрыг нь хувьд шилжүүлэх луйварт гар бие оролцжээ
Tweet
Bolod.mn