-Сайн уу? Сайхан наадсан уу? Юуны өмнө танд Цагдаагийн байгууллагийн 90 жил болон замын цагдаагийн албаны 75 жилийн баярын мэнд хүргэе.
       -Баярлалаа. Та бүхэнд бас их ойн баяруудын мэнд хүргэе. Саяхан цагдаагийн байгууллага үүсэн байгуулагдсаны 90 жилийн түүхэн ойн баяр болж өнгөрлөө. Манай цагдаагийн байгууллагын бие бүрэлдэхүүн наадмын өдрүүдэд ард түмнээ сайхан наадуулах, амар тайван байлгах үүднээс бүгд амрах баярлах завгүй л ажиллаж өнгөрөөлөө дөө.
-Баяр наадмын өдрүүдэд замын хөдөлгөөн нэмэгддэг.Үүнийг дагаад зам тээврийн осол гарч иргэдийн эрүүл мэнд амь нас хохирох явдал цөөнгүй гардаг?
      -Баярын өдрүүдэд нийслэл хотын болон орон нутгийн тээврийн хэрэгслийн хөдөлгөөний ачаалал ихэсдэг. Үүнтэй холбоотой хот руу чиглэсэн автомашины урсгал нэмэгддэг. Мөн хотод наадам болж өнгөрсөн ч залгуулаад орон нутгуудын томоохон даншиг наадмууд эхэлдэг. Тэгэхээр хотруу чиглэж байсан их хөдөлгөөн буцаад хөдөө орон нутаг руу чиглэж орон нутгийн зам ачаалал авдаг. Энэ ачаалал, жолооч нарын болгоомжгүй байдлаас үүдэн зам тээврийн осол наадмын өдүүдэд нэмэгдэх хандлагатай байдаг. Хөдөө орон нутагт гарч байгаа хүний амь нас эрсдсэн гэмтэж бэртсэн ослын талаар мэдээлэл өдөр бүр замын цагдаагийн шуурхай удирдлагын төвд ирдэг. Энэ мэдээнээс үзэхэд наадмын өдрүүдээс өнөөдрыг хүртэл онц ноцтой гарсан зам тээврийн осол 10 бүртгэгдэж, үүний улмаас 12 хүн хүнд хөнгөн хэлбэрээр гэмтсэн, 16 хүн нас барсан тоо баримт байна. Үүний дунд бидний ирээдүй болсон хүүхэд багачууд маань ч байна. Иргэд мэдсэн байх. Хамгийн сүүлд гэхэд орон нутагт хүн тээвэрлэдэг том оврын автобус “Истана” маркийн машинтай мөргөлдөж газар дээрээ 4 хүн нас барж 5 хүн гэмтсэн байх жишээтэй. Энэ мэтчилэн гашуун мэдээ бидэнд маш их байна.
-Зам тээврийн ослын дийлэнх нь орон нутгийн замд гарч байгаа шалтгаан нь юу бэ?
      -Нэг талаас нь харж зам тээврийн осол орон нутгийн замд их гардаг гэж хэлж болохгүй. 2011 оны эхний хагас жилийн байдлаар нийт үйлдэгдсэн хөдөлгөөний аюулгүй байдлын эсрэг гэмт хэрэг, ослын дийлэнхи хувь буюу 62 хувь нь нийслэл хотод гарсан байна. Энэ нь мэдээж автомашины нягтралаас шалтгаална. Үлдсэн 38 хувь нь хөдөө орон нутгийн замд гардаг. Энэ тоо хүмүүст тоон утгаараа бага мэт анзаарагдах боловч цаад утгадаа орон нутгийн замд гарч буй зам тээврийн осол эрдэнэт хүний амь нас, эрүүл мэндийг хамгийн ихээр хохироодог. Үүнээс гадна, эд материалын хохирол маш ихээр учируулдаг гэдгийг мартаж болохгүй. Орон нутгийн замд үйлдэгдэж байгаа зам тээврийн ослын шалтгааны дийлэнхи нь жолооч нарын буруутай үйл ажиллагаанаас болдог. Жишээ нь жолооч бүрэн бус тээврийн хэрэгслээр хөдөлгөөнд оролцох, согтууруулах ундааны зүйл хэрэглэсэн үедээ тээврийн хэрэгсэл жолоодох, хэт ядарсан байх, хурд хэтрүүлэх, анхаарал болгоомжгүй явснаас зам тээврийн осол гарч бусдын амь нас эрүүл мэндэд асар их хор уршиг учруулж, хэн нэгнийг өнчрүүлэх, хэн нэгнийг бүх насаар нь тахир дутуу эрэмдэг болгодог гашуун сургамжтай. Тиймээс аян замд гарж байгаа жолооч зорчигчид өөрийн болон бусдын аюулгүй байдлыг хангаж хөдөлгөөнд оролцох хэрэгтэйг байнга санаж байгаасай.
-Хөдөө орон нутгийн замд гарч байгаа осол ихэвчлэн аль чиглэлийн ямар замд гарч байна вэ?
        -За ер нь бол заавал энэ тэр замд осол аваар ихээр гардаг гэж хэлэхээсээ өмнө орон нутгийн замд жолооч нар хөдөлгөөнд хэрхэн оролцож байгаа, мөн замын хөдөлгөөний дүрмийг хэр баримтлаж байна вэ гэдэг нь харагддаг. Хүмүүс ярьдаг л даа. Хойд чиглэл буюу Сэлэнгэ, Дархан, Эрдэнэтийн замд авто аваар ихээр гардаг гэж. Энэ нь үнэн боловч эргээд жолооч нарын сахилга хариуцлага яригдах болно. Энэ замд жолооч нар дандаа хурд хэтрүүлдэг. Тиймээс жолооч нар хурдаа зөв сонгож явах нь хамгийн чухал.
-Осол их гарч байгаа эдгээр орон нутгийн замд тавьдаг анхаарал, хяналт шалгалт хэр байдаг юм бэ?
       -Замын цагдаагийн газраас орон нутгийн замд гарч буй зам тээврийн осол хөдөлгөөний ачаалал ихсэж байгаатай холбогдуулж хяналт шалгалтыг сайжруулах, идэвхижүүлэх үүднээс байнгын үйл ажиллагаатай 24 цагийн турш хяналт тавих постуудыг барьж байгуулж байна. Эдгээр постуудын тоног төхөөрөмжийг сайжруулах, хурд хэмжигч, байнгын хяналтын камер гээд шаардлагатай бүх зүйлээр хангаж байгаа. Үүний жишээ нь хойд чиглэлд явах хөдөлгөөнийг хянах зам тээврийн хэрэг, осолд түргэн шуурхай очих үүднээс Төв аймгийн Баянчандманьд, Баруун аймаг руу явахад замд мөн Төв аймгийн Лүн суманд, урд аймаг явах замд Налайх, Багануур, Багахангай зэрэг газруудад постууд ажиллаж байна. Гэсэн хэдий ч аймгуудын алслагдсан сумдад бидний хүн хүч тэр болгон хүрч ажиллаж чадахгүй байна.
-Орон нутгийн замд засвар хийж сайжруулсан гэж ярьдаг. Гэтэл осол гарсаар байна. Эдгээр зам дагуух тэмдэг, тэмдэглэгээ хэр байдаг юм бэ?
      -Нэг үеээ бодвол зам сайжирч байна. Үүнийг дагаад мөн л тээврийн хэрэгслийн хөдөлгөөний хурд ихэсдэг. Энэ нь тээврийн осол буурахгүй байх шалтгаан нөхцөл нь болж байна. Замын тэмдэг тэмдэглэлийн хувьд харьцангуй сайн байгаа. Ер нь бол алсын замд, шөнийн цагаар хөдөлгөөнд оролцоход жолооч нарт замын тэмдэг л хань болж ямар замд явж байгааг мэдээлдэг шүү дээ. Замын өгсүүр уруу, нугачааг мэдээлэх гээд олон ашиг тустай байдаг. Тиймээс жолооч нар тэмдэгийг сайн харж явах хэрэгтэй.
-Зам тээврийн ослоос урьдчилан сэргийлэх, энэ төрлийн хэргийг бууруулах талаар авч байгаа арга хэмжээ юу байна?
      -Урьдчилан сэргийлэх ажил бол ямар ч төрлийн гэмт хэргийн гаралтыг бууруулахад асар их нөлөөлдөг. Зам тээврийн осол, энэ төрлийн хэргийг бууруулахад олон хүчин зүйл нөлөөлнө. Хамгийн гол нь жолооч нарын маань мэдлэг, ухамсар, хөдөлгөөнд оролцох соёл, амьдралын зөв хэвшилтэй байх хэрэгтэй байна. Бидний зүгээс олон арга хэмжээг авч иргэдэд хүргэдэг. Иймд ард иргэд жолооч нар үүргээ ухамсарлаж мэдээлэлтэй байгаасай гэж хүсэж байна.
-Жолооч, зорчигчид зам тээврийн ослын хохирогч болохгүйн тулд юуг анхаарах нь зүйтэй бэ?
      -Монгол улсын иргэд зам тээврийн ослоор амиа алдаж, эрүүл мэндээрээ хохирч гэмтэж бэртэж байгаа нь дэндүү эмгэнэлтэй асуудал болж байна. Жолооч нар дэндүү болгоомжгүй хөдөлгөөнд оролцдог. Жолооч зорчигчид маань соёлтой, дүрмээрээ хөдөлгөөнд оролцмоор байна. Жолооч зорчигчийн үүргээ биелүүлмээр байна. Согтууруулах ундаа хэрэглэсэн үедээ, мөн хэт их ядарсан, нойр дутуу үедээ жолооний ард суухгүй байх, хурдыг зөв сонгож явах гээд олон анхаарах зүйлс байна даа.
-Ярилцсанд баярлалаа. Таны ажилд амжилт хүсье.
       -Баярлалаа
                                                                                                                                                                                         Ярилцсан Д.Отгонсүрэн

Н.Ариунтөгс: Хэдхэн хормын болгоомжгүй үйлдэл нэгнийг нь өнчрүүлж, нөгөөг нь тахир дутуу болгож байна
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Автобусны жолооч нарын сахилга батыг сайжруулахгүй бол олон хавар нэгэндээ гэгчээр осол аваар гаргахгүй гэх батапгаа апга байна. Үйлдвэр комбинатаас нарны гүүр, энх тайвны гүүр хүртэлх зам дээр хянаптын камер байдаггүй юм уу эсвэл байсан ч ажилладаггүй юм уу энэ чиглэлд үйлчилж байгаа автобусны жолооч нар хоорондоо урапдах, замаа булаапдах, бие биенийхээ өмнүүр хөндөлсөж хөдөлгөөнд нь саад болох, хоорондоо болон бусад жолооч нартай хэрэлдэх, хөдөлгөөн багатай үед хурдаа нэмж Могой загас лугаа машинуудын урдуур хойгуур сүлжиж давхих зэргээр эрсдэлтэй үйлдлүүд ихээр хийх болжээ. Гол төлөв 30 хүртэлх насны запуу жолооч нар, шинээр шугаманд явж буй 6 ноймерийн автобусны жолооч нар дээрхи үйлдлүүдийг ихээр гаргах юм. Ер нь автобусны жолооч нарыг сонгож ажилд авахдаа 30-аас дээш насны уур бухимдап багатай, дөлгөөн төлөв зан араншинтай жолооч нарыг сонгож баймаар байна.

2014-12-04 | 15:26:05 | 180.149.78.26 |

Мэдээ
Гадаад мэдээ
Видео