Анх сонсоод чихэндээ итгэлгүй ахин лавлаж, лавласныхаа дараа бусдын дэргэд хэлэхээс зовсхийсэн жүжгийн нэр “Үтрээний хүүрнэл”. Тэр бүр дэлгэн яриад байдаггүй ч энэ ертөнцийн насанд хүрсэн бүх хүнд хамааралтай энэ л сэдвийг саяхан “Өөрчлөлтийн төлөөх залуу эмэгтэйчүүд” клубынхэн олны өмнө дэлгээд тавьчихлаа. Гэхдээ бүр олон талаас нь, зовлон жаргалтай нь, ёстой л нэг эмэгтэй хүний итгэсэн хүндээ, эсвэл сэтгэлийн гүндээ зөвхөн өөртэйгөө ярьдаг тэр бүхнийг шүү. Хааяахан хацар улайж, заримдаа сэтгэл өвдөж, ихэнхэд нь инээж үзсэн энэ жүжиг эмэгтэйчүүд бидний оршихуйн тухай ихийг хүүрнэсэн алаг эрээн амьдралын түүх байлаа.

Хүний эрхийн төлөө тэмцэгч, жүжгийн зохиолч Ийв Энслерийн “Үтрээний хүүрнэл” жүжгийн агуулга тэр чигээрээ охид эмэгтэйчүүдийн эрхийг хамгаалахад чиглэснээс гадна жүжгийн орлого охид, эмэгтэйчүүдийн эсрэг хүчирхийлэлтэй тэмцдэг хувь хүн, байгууллагуудад санхүүжилт болон хандивлагддаг аж. 45 хэл дээр орчуулагдаж, 12 жилийн турш 140 гаруй улс оронд тоглогдож, 300 гаруй сая хүнд хүрч, 75 сая ам.долларын хөрөнгө босгож чадсан эл жүжгийг “Өөрчлөлтийн төлөөх Залуу Эмэгтэйчүүд” клубынхэн Монголд анх удаа албан ёсны эрхийг нь авч 200 хүний суудалтай Black box театрт гурван өдрийн турш толилуулсан юм. Цоглог, эрч хүчтэй, дайчин бүсгүйчүүд маань жүжгийн орлогын 90 хувь болох 4.680.580 төгрөгийг ХЭҮТ-ийн хамгаалах байранд, үлдсэн 10 хувийг газар хөдлөлтийн улмаас хүнд нөхцөлд байгаа Гайти улсын эмэгтэйчүүдэд хандивлалаа. Сайн үйлс бүхэн дэлгэрч, охид бүсгүйчүүд маань үргэлж айдас түгшүүргүй, аз жаргалтай инээмсэглэж яваасай!

Үтрээ чухам юуг хүүрнэв?

Нөхөртөө таалагдахын тулд умдагны үсээ хуссан эмэгтэй, хуульч мэргэжлээ орхиод биеэ үнэлэгч болсон халуухан бүсгүй, оготор банзлаар эрх чөлөөгөө тунхагласан бардамхан охин, бие сэтгэл тавирахын жаргалыг бүрэн мэдэрсэн тачаангуй бүсгүй... Тиймээ, үтрээ бидэнд аз жаргалыг мэдрүүлж чаддаг. Гэвч бас үтрээнд зовлон бий. Тампон, эмэгтэйчүүдийн ор, үзлэгийн толь, “бенз” дотоож, янз бүрийн “шидэт” үрэл гээд эмзэгхэн үтрээг зовоох ямар ч олон зүйл байдаг юм бэ дээ, бурхан минь. Гэхдээ энэ бүхнийг бурхан биш, хүн бид өөрсдөө бүтээсэн...

Үтрээ хүүрнэсээр... Жил бүр хэлүүгээ тайруулдаг 3 сая Африк охидын өвчин шаналал, анхны болзооноосоо хойш насан туршдаа өөрийгөө “цоожлон” ганцаардсан эмээ, насанд хүрээгүй байхдаа бэлгийн дарамт хүчирхийлэлд өртсөн цэцэг шиг охид, харь цэргүүдэд хүчин мөхөсдөн доромжлуулсан Босниа Косовогийн бүсгүйчүүдийн зүрх шимшрэм эмгэнэл,...

Бидэнд үртэй болох, хайранд умбах гээд орчлонгийн жаргал гэж нэрлэх бүхнийг амсуулдаг энэ энхрийхэн, өрөвдмөөр эмзэгхэн эрхтэнг бид юуны учир тамлан зовоож, айлгаж ичээнэ вэ? Тэр биднийг энэ ертөнцөд авчрахын тулд цусаа асгаруулж, өөрийгөө урж тасдан, бидний төлөө ямар ч өр төлөөс шаардахгүйгээр “үхээд” сэхдэггүй гэж үү? Тэр бол гүнээ хүндэтгэж, бахдан бишрэхээс өөр аргагүй эрэлхэг эрхтэн!!! Тэр бол хайрлан энхрийлүүлэх эрхтэй нандин эрхтэн!!! Үтрээ инээж, догдолж, бардамнаж, уйлж, шаналж, учирлан байж энэ бүхнийг бидэнд хүүрнэсэн юм.

Айдас дагуулсан хүчирхийлэл

Үтрээний хүүрнэсэн олон зүйлээс хамгийн их сэтгэл өвтгөсөн хэсэг бол хүчирхийлэлд өртсөн охид, эмэгтэйчүүдийн тухай хүүрнэл байлаа. Харамсалтай нь охид, эмэгтэйчүүдийн эсрэг бэлгийн хүчирхийлэл Монголд байсаар л байна... Өнгөрсөн хавар Хөвсгөлд гаж донтны гарт хэрцгийгээр тамлагдан амь насаа алдсан наймхан настай охин, энэ оны шинэ жилээр СХД-ийн Тахилт хороонд хичээлээсээ тарж яваад хөлчүүрхсэн төрийн албан хаагчийн дур хүслийн золиос болсон долоон настай охин, өнгөрсөн сард такси бариад бүлэг этгээдэд хүчиндүүлсэн охид... гээд дурсахаас ч зүрх өвдөм аймшигт тохиолдлууд... Хүний Эрхийн Үндэсний Төвийн хөтөлбөрийн менежер Н.Мөнхсаруул “Хэвлэл мэдээллийнхэн аллага хядлагатай, хүчирхийлэлтэй кино, мэдээллийг ямар ч хяналтгүй цацаж байна. Цахим ертөнцийн хувьд Монголд бүр ч замбараагүй байгаа. Өсвөр үе маань хүн алах, хүчирхийлэхийг захын киноноос үзэж багаасаа нүд чих дасч өсч байна. Олон нийт хүчирхийлэлд өртсөн хохирогчдыг орой үдэш гэртээ байж байхгүй гадуур яах гэж явж байсан юм, аальгүйдээ оготор банзал өмсөж бусдын анхаарал яах гэж татсан юм гэх мэтээр буруутгах хандлагатай байдаг. Гэтэл Монголд өсвөр насны охидыг гурван сарын турш буудалд хориод өдөрт амь зогоох төдий ганцхан бэлэн хоол өгч, шөнө оройд биеийг нь албадан үнэлүүлж байсан тохиолдол нэг биш, нэлээд хэд гарсан. Цагдаад хэлье гэхээр олон хүний дунд удаан хугацаагаар байцаагдах нь ийм төрлийн хохирогчийн хувьд сэтгэлзүйн маш том саад болдог. Мөн хувийн мэдээлэл нь нийтэд дэлгэгдээд нийгмээс бүр тусгаарлагдах аюулд орчих гээд байдаг. Тийм болохоор хэлэхгүй хав дарах явдал байдаг. Ямар ч байсан охид, эмэгтэйчүүд хүний эрхийнхээ төлөө тэмцэж, ийм тохиолдлыг мэдэж дуулсан хүмүүс байвал ХЭҮТ-д хандаж болно” гэж ярьсан юм. Эмх замбараагүй энэ нийгмийг цэгцэлж айдас түгшүүргүй алхах юмсан, бүсгүйчүүд минь.

Бид нэгдэж чадвал өөрчилж чадна

Яагаад дайн дажингүй амар амгалан улс оронд амьдарч байж бид орж гарахаасаа айж суух ёстой юм бэ? Яагаад эрх чөлөөт ардчилсан улсын иргэн байж өмсөх зүүхээ хүссэнээрээ сонгож болохгүй гэж? Яагаад эмэгтэй хүн болж төрснийхөө төлөө, чадал хүч дорой төрснийхөө төлөө бид хүсээгүй, бүр огт танихгүй зэрлэг балмад нэгний бузар дур хүслийн золиос болох гэж? Бид ийм жигшүүрт хэргийн талаар болсон хойно нь сүр дуулиантай мэдээлээд орхих биш, зүгээр нэг зүрх хөндүүрлэн уншаад өнгөрөх биш, урьдчилан сэргийлж, таслан зогсоохын төлөө дуу хоолой, сэтгэл зүрхээ нэгтгэн ажиллах цаг болжээ. “Үтрээний хүүрнэл” жүжигт мэргэжлийн жүжигчид биш, “Өөрчлөлтийн төлөөх залуу эмэгтэйчүүд” клубын гишүүд тоглосон нь үнэхээр сонирхолтой байж чадсан юм. Хэрвээ театрууд уг клубынхэнд Black box театрынхан шиг тайз дэлгэцээ үнэгүй ашиглуулж, хэвлэл мэдээллийн хэрэгслүүд “Боловсрол” телевиз шиг мэдээлэл сурталчилгаа хийж, ер нь хэн бүхэн сэтгэл зүрхээрээ дэмжиж илүү өргөн хүрээнд тоглож чадах юм бол хандивын мөнгө босгохоос гадна олон нийтийн ухамсарт нөлөөлж чадах ажил байна даа хэмээн өөрийн эрхгүй бодогдож байлаа. Бид нэгдэж чадвал, хүчирхийллийн эсрэг тэмцэж байгаа бусдыгаа дэмжиж чадах юм бол олон нийтийн ухамсар төлөвшилд нөлөөлж, аймшигт, жигшүүрт хэргүүдээс урьдчилан сэргийлж, таслан зогсоож чадах билээ.

Эцэст нь хэлэх эхлэл үг

Та ч, би ч, таны, бидний үр хүүхэд, эгч дүүс ч ялгаагүй Үндсэн хуулиар баталгаажсан хүний эрх, эрх чөлөөгөө эдэлж, аюулгүй, тайван орчинд амьдармаар байна. Тиймээс UPTOWN бүх төрлийн хүчирхийллийн эсрэг, нэн ялангуяа охид, эмэгтэйчүүдийн эсрэг хүчирхийлэлтэй тэмцэх тэмцлийн тэргүүн эгнээнд ямагт байх болно. Уншигч та ч бас хүний эрхийг зөрчсөн, хүчирхийллийн эсрэг бүхий л үйл ажиллагааг сэтгэл зүрхээрээ, чадах бүхнээрээ заавал дэмжээрэй! Таны, миний өнөөдрийн дэмжлэгээс хүчирхийлэлгүй, айх айдасгүй амар амгалан ирээдүй эхлэх нь гарцаагүй. Аливаа муу зүйлийн үрийг тарихгүй байх нь айдас түгшүүртэй нийгмийг өөрчлөх хамгийн эхний алхам билээ...

Бэлтгэсэн Ж.Мөнхцэцэг

ҮТРЭЭНИЙ ХҮҮРНЭЛ
Tweet
Bolod.mn

Сэтгэгдэл (2)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Булган шуба зарж бгаа хунд,,,Унуудур дэлхий дээр соёлт хун турулхтун амид амитаний усийг умсух ни моодноос гарсан.Тэгээд дэлхийн баян хатагтай нар хуучин амитаний арисан дээлээ монгол мэтийн ядуу , бас хуйтэрдэг орон руу тусламж маягаар унэгүй илгээдэг болсон шуу дээ.Амид амитаний арис умсух ни удд туйлийн дорой бгаагаа илтгэж буй хэрэг болж дээ хуурхийс,,,

2012-10-25 | 01:54:49 | 69.29.69.164 |

Зочин
bulgan shuba zah zeeliin vnees hymd zarna.utas 91915043 91914197

2012-10-02 | 19:39:09 | 122.201.18.171 |

Мэдээ
Гадаад мэдээ
Видео