Өхөөрдөм охидын "Anemone" хамтлагийнхан

2011-06-28

"Төрсөн өдрийн мэнд хүргэе ээж ээ", "Хаврын анхны хайр" дуунуудаараа олны анхаарлыг татаад буй охидын "Anemone"

хамтлагийнхантай уулзлаа. Байгуулагдаад удаагүй ч дуулсан дуунуудаараа тэд хэдийнэ өөрийн гэсэн сонсогч, шүтэн бишрэгчидтэй болоод амжжээ. Мөн дуунуудаа клипжүүлж, дараа дараагийн уран бүтээлдээ орж, маш хурдтайгаар урын сангаа арвижуулж яваа эдгээр охидын хамтлагийн ахлагч нь Жулдыз буюу Жулия юм байна. Таван хүний бүрэлдэхүүнтэй энэ хамтлагийн охидыг Жанна, Оно, Халиунаа, Цэнгэлэн гэдгийг ч уншигчид хэдийнэ мэдээ биз дээ. Анх "MN25" телевизээс зохион байгуулсан "Making the Band" шоунаас төрөн гарсан "Anemone" охидын хамтлаг эхнээсээ л олны анхаарлын дунд байсан. Рок, попын загалмайлсан эцэг гэгддэг "Харанга" хамтлагийн хөгжимчин, дуучин Ц.Чулуунбат энэ хамтлагийг продюссерлож, хоёр ч дууг нь зохиож өгсөн байдаг. Гол нь тэрбээр охидын хамтлагийг хүн сонсоод л өнгөрөх биш, сэтгэлд хүрэх аялгуулаг дуунуудтай болгохоор нэлээд хичээж байгаа гэсэн. Хамтлагийг үүсгэн байгуулагчид тэднийг, тайзанд "өлгийдөх" өдрөөс л урлагийн нэр хайрласнаар охид Жулия, Жанна, Оно нэртэй болцгоосон байдаг. Харин хамтлагийн шинэ гишүүн Халиунаа, Цэнгэлэн нар одоогоор аав, ээжээсээ авсан нэрээ өөрчлөөгүй аж. Мэдээж таван өөр орчинд өсч торнисон охид маш богино хугацаанд дотносож, сайхан анд найзууд болж чадсаныг хэлэх хэрэгтэй байх.

Х.ЖУЛДЫЗЫН НЭР МОНГОЛООР ОД ГЭСЭН ҮГ

Тэрбээр одоо 17 настай. Энэ жил нийслэлийн 33 дугаар дунд сургуулийн химийн гүнзгийрүүлсэн ангийг төгсчээ. Саяхан Жулия маань элсэлтийн ерөнхий шалгалтаа химийн хичээлээр өгсөн байна. Эмч болох хүсэлтэй тэрээр Улаанбаатар хотод төрж өссөн аав, ээжийн эрх охин юм. Хоёр ахтай айлын отгон охин багын урлагт элэгтэй хүүхэд байж. Жулия бүжиглэх, усанд сэлэх, дуулах хоббитой. Яс үндэс нь казах. Товчхондоо Жулдызийг казах үндэстнээс төрөн гарсан авьяаслаг охидын нэг гэж болно. Түүний нэр монголоор од гэсэн утгатай юм билээ.

Жулдызын аав нь инженер хүн байсан гэнэ. Харин ээж нь хуульч мэргэжилтэй. Энэ ажлынхаа хажуугаар казах эмэгтэйчүүдийн "Арулар" төрийн бус байгууллагыг удирддаг гэж байсан. Жулия цаашид эмч мэргэжлээрээ сурсан ч урлагаа хэзээ ч орхихгүй гэдгээ хэлээд авсан шүү. Тэгээд ч тэрээр насаараа хамтлаг дотроо хамгийн бага нь. Уг нь энэ хамтлагийн продюссер Чука охидын дунд хамтлагийн ахлагчийг сонгох санал явуулжээ. Ингээд хамтлагийг ахлах хүсэлгүй байгаа нь хэн болохыг асуухад Жулдыз ганцаараа гараа өргөсөн гэдэг. Ингээд хэсэг хугацаанд хамтлаг дотроо ярилцаж ахлагчаар нь Жулдызыг сонгосон байна.

Саяхны "Их хотын үдэш" нэвтрүүлэгт "Anemone" хамтлагийнхан уригдан оролцсоныг уншигчид санаж буй байх. Энэ үеэр продюссерээр ажиллаж байгаа "Харанга"-ын Чука "Би хамгийн эрх охидын хамтлагийг продюссерлодог. Дээр нь хамтлаг дотроос мөн л хамгийн эрхийг нь ахлагчаар сонгосон. Яагаад гэвэл эрхийг нь болиулах гэж" хэмээн наргиан болгон хэлж билээ.

Я.БАЯРЖАРГАЛ БУЮУ ЖАННАГИЙН ХООЛОЙНЫ ӨНГӨ Т.АРИУНААГИЙНХТАЙ ТӨСТЭЙ

Жанна одоо 19 настай юм байна. СУИС-ийн эстрадын дуулаачийн ангийн нэгдүгээр курсийн оюутан тэрээр сургуульдаа нэлээд нэр хүндтэй аж. Жанна Увс аймагт төрж өссөн. Тэндээ дунд сургуулиа төгсөөд СУИС-д элсчээ. Тэрээр багаасаа дуулж, бүжиглэж өссөн урлагт элэгтэй нэгэн байж.

Эхээсээ гурвуулаа. Нэг эгч бас дүүтэй гэсэн. Жаннагийн хоолойных нь өнгө дуучин Т.Ариунаатай төстэй гэгддэг. Тэгээд ч Жанна маань гавьяатын дуулдаг бүх дууг, ямар ч дээд өнгөтэй байсан дуулчихдаг өвөрмөц, чадалтай хоолойтой гэдгээрээ дуулаачийн хувьд үнэлэгддэг байна.

ОНО БҮХ ТӨРЛИЙН ХӨГЖИМ ХӨГЖИМДӨЖ ЧАДДАГ

Оногийн нэр нь Т.Оюунтуяа Оно, Жанна хоёр СУИС-ийн эстрадын дуулаачийн нэг ангийнхан. Тэд бас нэг ширээнд тохой нийлүүлэн суудаг гэсэн. Төрмөл авьяастай хэмээн СУИС-ийн багш нараасаа багагүй үнэлгээ авдаг тэрээр нэгэнтээ өөрийн туулж өнгөрүүлсэн амьдралынхаа талаар зурагтаар ярьж байгаа харагдсан. Оно багаасаа л хүүхдийн асрамжийн газарт өссөн гэж байна лээ. Гэхдээ тэр хэзээ ч үүндээ гутарч, сэтгэлээр унаад байдаггүй адтай бас одтой нэгэн юм. "Нэгэнт бурхнаас заяасан заяа төөрөг маань ийм байсан юм байлгүй. Хэзээ нэгэн цагт аав, ээжийгээ олж уулзана" гэж байна лээ. Саяхан Оно өөрийн өссөн газартаа хамтлагийн охидоо дагуулан очиж, тэнд хүмүүжиж буй хүүхдүүдэд ая дуугаа өргөсөн нь зурагтаар гарсан. Өхөөрдөм тэрбээр хамтлаг дотроо хамгийн авьяастай нь гэвэл та итгэх үү. Бүрээ, гитар, ятга гээд түүнд тоглож чаддаггүй хөгжим гэж байдаггүй гэсэн Дээр нь бүжиглэх авьяасаараа ч хамтлагийнхан болоод үеийнхнээ бишрүүлдэг гэсэн шүү.

Б.ЦЭНГЭЛЭН "ГАЛТ ШУВУУ" НЭРТЭЙ БҮЖГИЙН ХАМТЛАГТАЙ БАЙЖЭЭ

Б.Цэнгэлэн ШУТИС-ийн Хөнгөн үйлдвэрийн менежментийн гуравдугаар курсийн оюутан. Хамтлагийн бусад гишүүдийн хувьд түүнээс сурах юм их гэж байсан. Учир нь тэрээр одоо л урлагийн тайзанд хөл тавьж байгаа юм биш. Хүүхэд байхын урлагт элэгтэй байсан гэнэ лээ. Сурагч байхын "Галт шувуу" нэртэй бүжгийн хамтлагтай байж. Тэрбээр одоо 20 настай. Нийслэлд төрж өссөн Цэнгэлэн маань "Диана" дунд сургуулийг дүүргэсэн байна. Хэсэг хугацаанд фото моделийн чиглэлээр сурч, өөрийгөө хөгжүүлсэн тэр бүжиглэх дуртай.

А.ХАЛИУН ГИТАР ХӨГЖИМ ДАРДГААРАА ҮЕИЙНХЭН ДУНДАА ОНЦГОЙРДОГ

А.Халиун "Anemone" хамтлагийн шинэ гишүүн. Хамтлагийн продюссерийн шаардлагаар өмнөх нэг гишүүн солигдож оронд нь Халиунааг элсүүлжээ. Тэрээр дунд сургуульд байхын амьд хөгжмийн хамтлагтай байжээ. Гитар хөгжмийг гаргуун тоглодгоороо үеийнхэн дундаа онцгой нь. Өнөө жил тэрбээр СУИС-ийн бэлтгэл курсийг төгсчээ. Ирэх хичээлийн жилд эстрадын дуулаачийн ангийн нэгдүгээр курст элсэн сурахаар зэхэж буй гэнэ.

Охидын "Anemone" хамтлагийнхан шинэ уран бүтээлдээ ороод байна. Тэдний гурав дахь дуу нь "Бэхэн цэнхэр өдрүүд" нэртэй төгсөлтийн дуу аж. Хамтлагийн охид энэ зундаа багтааж дууны цомгоо гаргахаар шаргуу ажиллаж байна.

Ч.АННА

medee